Yɩɩ Nii 11

Moyizə lìí Yɩzərayɛlə lɩ̀à, kʋ tə Yɩɩ nə fwa ʋ pa ba

1 Á swə́nə́ Ba-Yígúrə́-Jə-Tiu, á tíú Yɩɩ, á ga zìlí máŋá mama, yìə̀n tə ʋ nə tún sə ba twá tə nə, də yìə̀n tə ʋ nə pɩn tə pʋ́pʋ́nɩ́ sə ba twá tə nə, də yìə̀n tə ʋ nə bɩrɩ sə tə tʋn, də yìə̀n tə ʋ nə pɩn nii tə yuu wa. 2 Á mʋ̀ zə̀n yə̀ə́ yìə̀n təntə. Cɩ́gá, kʋ tà á bɩ̀á tə ba nə wà tə yəni, ba ga wà tə nɩ, nə à swɩ̀n. Á mʋ̀ yə̀ə́ Ba-Yígúrə́-Jə-Tiu, á tíú Yɩɩ kàrà tə, də ʋ dánɩ́ tə, də ʋ jɩɩn dɩ̀àn tə, də ʋ vagoo tə, 3 də ʋ dɩ̀àn mɩmɩnan tə, də ʋ tʋ̀tʋ̀nán tə, də kʋ tə ʋ nə tʋn Ezwipətə wa, ʋ zɩgɩ Ezwipətə pɩ̀ʋ́ Farawon, də ʋ lʋʋ nii tə mama nə, 4 də kʋ tə ʋ nə tʋn Ezwipətə kwatara tə yɩra, də ba səsen tə, də ba səsen kòrə̀n tə yɩra, də nətʋ tə ʋ nə pɩn Mɩncanɩ mʋʋ^a tə nɩ́á tə pìí tə bà tə pú Ezwipətə kwatara tə yuu nə, máŋá tə wa, ba yà nə púə́ á kwa ba dɩŋɩ, yá Ba-Yígúrə́-Jə-Tiu pɩn ba nyʋn lá mɩ́ámɩ́án, 5 də kʋ tə ʋ nə tʋn kasɔɔ lanworu tə wa, á kori á bà á yí yəbə, 6 də kʋ tə ʋ nə tʋn Eliyabə bɩ̀á Datan də Abiramə yɩra, ba nə yɩ Ribɛn dwíí lɩ̀à: Ba-Yígúrə́-Jə-Tiu pɩn tɩa tə súrí ka nii, ka lìrə̀ ba də ba dìə̀ lɩ̀à, də ba gansilə, də lɩ̀à tə mama ba nii yà nə wulə ba kwa, Yɩzərayɛlə lɩ̀à tə mama titəŋi wa. 7 Cɩ́gá, á mʋ̀ yɩ́á nə dìgə̀ yofaran tə mama, Ba-Yígúrə́-Jə-Tiu nə tʋn. 8 Kʋ mʋ̀ nə pɩn, á mɛ sə á zìlí yìə̀n tə mama, Yɩɩ nə pɩn nii tə yuu wa, à nə pɩn aba zə̀n kʋ tə, sə kʋ pa á ja dɩ̀àn, á ja va á ma ta lʋʋ nii tə, á nə vələ sə á jon á tɩnɩ, 9 kʋ ga pa á mɩɩ ya danɩ lʋʋ nii tə wa, Ba-Yígúrə́-Jə-Tiu nə dùə̀ ʋ ma swɩ̀n á nyɩna-ba con, də ʋ wá pa kʋ ba də ba dwíí nə. Kʋ yɩ lʋʋ nii nayɩla də tʋ̀ràn nə súə́ lá, tə pàlɩ̀.

Lʋʋ nii tə Ba-Yígúrə́-Jə-Tiu nə ywàŋá kʋ yuu

10 Cɩ́gá, lʋʋ nii tə á nə vələ sə á jon á tɩnɩ tà ndə Ezwipətə lʋʋ nii tə nə, á nə nan lá, kʋ nə yɩ bwálɩ́, á nə yàá dù á wiən, á ga gàrɩ̀ tə nə də á naa, ndə ba nə gàrɩ̀ dabɔɔ dwavʋran nətʋ. 11 Lʋʋ nii tə á nə vələ sə á jon á tɩnɩ, yɩ pɛɛn də varnɛɛ lʋʋ nii, yá kʋ yɩ lanworu dwà nɩ́á nə gàrɩ̀ kʋ nə. 12 Kʋ yɩ lʋʋ nii, Ba-Yígúrə́-Jə-Tiu, á tíú Yɩɩ nə ywàŋá kʋ yuu. Ba-Yígúrə́-Jə-Tiu, á tíú Yɩɩ yɩ́á wulə kʋ yuu máŋá mama, kʋ nə zɩgɩ bɩnɩ tə də̀ń laŋʋ wa, kʋ va kʋ yí kʋ yígúrə́.

13 Á nə zìlí à yìə̀n tə à nə pɩn aba nii tə yuu wa zə̀n kʋ tə, yá á bɩrɩ də á swə à mʋ̀ Ba-Yígúrə́-Jə-Tiu, á tíú Yɩɩ, á ga pɩn nə dun də á waa mama, də á jə̀rə́ mama, 14 à wá pa dwà nà á lʋʋ nii tə wa, ka máŋá wa, síí dwà də lʋan dwà, yá á kárɩ́ wiən, də á mɩna, də á divɛn nədʋn, də á nʋga wá kwɛn zəni, tə pa aba. 15 À wá pa gaʋ də nan á kábánán wa, sə á vàná də́, yá á wá də́ á sú.

16 Á cɩa á tɩ̀àn nə, á dànà ká yá á pa won gɩgarɩ aba, kʋ pa á pìí á twɩ á nadwana yuu yɩa duən yáá con, á pɩn tə dun. 17 Kʋ nətʋ wá pa Ba-Yígúrə́-Jə-Tiu lɩŋa zàn á yuu wa, yá ʋ wá sun lanworu tə, dwà kʋ́ʋ̀ bá nà, tɩa tə kʋ́ʋ̀ bá pa wiən zɩn lənə, yá á wá tɩ á zwɛ̀ naa nədʋ, lʋʋ nii nəzəŋu tə wa Ba-Yígúrə́-Jə-Tiu nə pɩn aba. 18 Á wá kə à sʋ̀ràn tə tə à nə pɩn aba, á bɩcan wa, də á jə̀rə́ wa. Á wá vwa tə á jɩɩn nə, ndə mɩmɩnʋ nə, tə ga ya mɩmɩnʋ won á tílí nə, á yɩ́á pwə́rə́ wa. 19 Á wá ja tə á ma kàrɩ̀ á bɩ̀á, á ga swɩ̀n tə yoo á bɩrɩ ba, máŋá tə á nə wulə á dìə̀ wa, də máŋá tə á nə vələ cwəŋə, də máŋá tə á nə tígə́, də máŋá tə á nə zàn. 20 Á wá pʋ́pʋ́nɩ́ tə á dìə̀ mimii ywəŋə yɩra, də á tɩan mimien nə. 21 Yá á də á bɩ̀á tə bɩna dàń wá ya kapʋpʋ lʋʋ nii tə wa, Ba-Yígúrə́-Jə-Tiu nə dùə̀ də ʋ wá pa á nyɩna-ba nə, ndə lanworu tə bɩna nə yɩ kapʋpʋ tɩa tə yuu con nətʋ.

22 Cɩ́gá, á nə zìlí yìə̀n tə tə mama nii zəni, Yɩɩ nə pɩn nii tə yuu wa, à nə pɩn aba zə̀n kʋ tə, á nə twá tə nə, á nə sóní Ba-Yígúrə́-Jə-Tiu, á tíú Yɩɩ, á nə vəli ʋ coŋi tə mama wa, á ga vwa á tɩ̀àn ʋ nə, 23 Ba-Yígúrə́-Jə-Tiu wá dɩŋa dwíə́ nəkaran* tə tə mama, ʋ lɩ á yáá nə, yá á wá ta dwíə́ nəkaran, tə dánɩ́ də dɩ̀àn nə dwə aba lʋʋ níə́, á jon á tɩnɩ. 24 Bwálɩ́ tə mama á naa nə wá nɩŋa lá, wá ya á mʋ̀ nyiən. Á lʋʋ nii tə sɩswɩan wá zɩgɩ kasɔɔ lanworu tə nə, kʋ va kʋ yí Liban pɛɛn tə, kʋ ga zɩgɩ Əfəratə mʋnaa tə nə, kʋ va kʋ yí yɩɩ yizwɩa con mʋʋ tə. 25 Lìù mama ba wànɩ́ ʋ ta ʋ zɩgɩ á yáá con. Ba-Yígúrə́-Jə-Tiu, á tíú Yɩɩ wá pa á fən, də bɩcapuri ja lʋʋ nii tə mama, á nə wá va kʋ wa, ndə ʋ nə swɩ̀n kʋ á con nətʋ.

26 Nəŋə, à ken zəni də zɩra á yáá con, zə̀n kʋ tə: 27 Zəni, də á nə zìlí yìə̀n tə nii, Ba-Yígúrə́-Jə-Tiu, á tíú Yɩɩ nə pɩn nii tə yuu wa, à nə pɩn aba zə̀n kʋ tə. 28 Zɩra, də á nə wà yìə̀n tə nii zìlí, Ba-Yígúrə́-Jə-Tiu, á tíú Yɩɩ nə pɩn nii tə yuu wa, á ga dʋgʋ cwəŋə tə vàn nə, à nə pɩn aba nii sə á tì zə̀n kʋ tə, á ga pìí á vwa á tɩ̀àn yɩa duən nə, á nə yəri tə.

29 Máŋá tə Ba-Yígúrə́-Jə-Tiu, á tíú Yɩɩ nə wá ja aba ʋ zʋ lʋʋ nii tə wa, á nə wá jon á tɩnɩ, á wá zɩgɩ Garizimə paan tə yuu wa, á ma lòrì sə Yɩɩ fwa zəni, á ga zɩgɩ Ebalə paan tə yuu wa, á ma zɩrɩ zɩra. 30 Pɛɛn təntə yɩ tə wulə Zʋrədɛn mʋnaa tə vàn tə don nə, cwəŋə tə kwa con, ka nə vələ yɩɩ yizwɩa con, Kanaan tɩ̀án tə yà nə wulə Araba* digə tə wa, lʋʋ nii wa, Giləgalə yáá con, More sɩsanan tə nii nə. 31 Cɩ́gá, á wá bɩn Zʋrədɛn mʋnaa tə, á va á jon lʋʋ nii tə Ba-Yígúrə́-Jə-Tiu, á tíú Yɩɩ nə pɩn aba, á tɩnɩ. Á wá jon kʋ, á jə̀ń kʋ wa. 32 Yá á dàń nə mɛ sə zìlí yìə̀n tə mama nii, Yɩɩ nə pɩn tə pʋ́pʋ́nɩ́ sə ba twá tə nə, də Yɩɩ nii yìə̀n tə mama, à nə pɩn aba zə̀n kʋ tə.