BA-YIGURƏ-JƏ-TIU NII YIƏN TƏ
12—26
12
1 Nəŋə yìə̀n tə Yɩɩ nə pɩn tə pʋ́pʋ́nɩ́ sə ba twá tə nə, də yìə̀n tə Yɩɩ nə bɩrɩ sə tə tʋn, á nə mɛ sə á zìlí tə nii, á ga twá tə nə, máŋá tə mama á mɩɩ nə wá ya lʋʋ wa, lʋʋ nii tə wa Ba-Yígúrə́-Jə-Tiu, á nyɩna-ba Yɩɩ nə pɩn aba, sə á jon á tɩnɩ.Yɩɩ wúlú bwálɩ́ nədʋ tə yoo
2 Máŋá tə á nə jon dwíə́ nəkaran* tə lʋʋ nii tə á tɩnɩ, á wá pa ba culu bwálá tə mama, ba nə tʋŋa lá, ba ma pɩn dun ba yɩa tə nə nyʋn lá. Culu bwálá təntə yɩ tə wulə pɛɛn yuparɩ wa, də didwələn yuu, də tɩ̀án tə nə jə vʋran də̀ń nə. 3 Á wá gwɛrɩ ba jwəŋə bwálá tə, á ga kɛ́n ba culu kapana* tə, ba nə zɩ̀n ba zɩgɩ yɩɩ nə. Á wá sʋ̀rɩ́ ba woŋwanʋ Aswera* dacəli tə, á lwa ba woŋwanan ciciri tə, á ga pa ba yɩrɩ nyʋn bwálɩ́ təntə wa. 4 Á mʋ̀ nə pɩ̀à á pa dun Ba-Yígúrə́-Jə-Tiu, á tíú Yɩɩ nə, á wà mɛ sə á fwa ndə dwíə́ nəkaran təntə nə. 5 Á mɛ sə á pa dun Ba-Yígúrə́-Jə-Tiu, á tíú Yɩɩ nə, bwálɩ́ tə nə ʋ nə wá kúrí á dwíə́ tə mama wa, sə ʋ kə ʋ yɩrɩ tə lá, ʋ pa kʋ ya kʋ wa. Mə lá nə á wá va. 6 Mə lá nə, á wá ja á joŋi tə ba nə sʋ̀rɩ́*, də á jwəŋə duən, də á fugə nii nyiən, də á zìlə́ wiən tə á nə wá lɩ á kárɩ́ wiən lənə wa, də á nipoli jwəŋə, də á pupwən jwəŋə, də á vanfaran də á vanmɩnɩ təntən bɩ̀á, á bà á pa Ba-Yígúrə́-Jə-Tiu nə. 7 Mə lá nə, á wá də́ wodiu Ba-Yígúrə́-Jə-Tiu, á tíú Yɩɩ yáá con, á də á dìə̀ lɩ̀à ga fwa pupwən jɩjə wiən tə mama yɩrɩ, tə nə wulə á jɩɩn wa, Ba-Yígúrə́-Jə-Tiu, á tíú Yɩɩ nə ma fwa zəni á yɩra.
8 Á kʋ́ʋ̀ bá tʋn ndə nə nə tʋŋa nətʋ yəbə zə̀n kʋ tə, nə lìù mama nə tʋŋa kʋ tə nə ywán də wá. 9 Cɩ́gá, á tə wà sìə́ bwálɩ́ tə yí, lʋʋ nii tə Ba-Yígúrə́-Jə-Tiu, á tíú Yɩɩ nə pɩn aba, sə kʋ ya á tori. 10 Yá á dàń wá bɩn Zʋrədɛn mʋnaa tə, á nan á jə̀ń lʋʋ nii tə wa Ba-Yígúrə́-Jə-Tiu, á tíú Yɩɩ nə pɩn aba, sə kʋ ya á tori. Ʋ wá jon aba á dʋŋa tə mama jɩɩn wa, ba nə kɩkarɩ aba, ʋ kə sìə́ wa, ʋ ga pa á ya lá də yazurə. 11 Mə bwálɩ́ tə wa, Ba-Yígúrə́-Jə-Tiu, á tíú Yɩɩ nə kúrí, sə ʋ pa ʋ yɩrɩ tə ya lá, nə á wá ja won tə mama à nə bɩrɩ aba, á bà á pa Ba-Yígúrə́-Jə-Tiu nə. Kʋ yɩ á jwəŋə tə ba nə sʋ̀rɩ́, də á jwəŋə duən, də á fugə nii nyiən, də á zìlə́ wiən tə á nə wá lɩ á kárɩ́ wiən lənə wa, də won tə mama á nə wá lɩ, sə á ma fwa nipoli jwəŋə, á pa Ba-Yígúrə́-Jə-Tiu nə. 12 Á wá fwa pupwən Ba-Yígúrə́-Jə-Tiu, á tíú Yɩɩ yáá con, á də á bɩ̀á də á bwɩ̀ɩ́, də á tʋtʋnbɩa də á tʋtʋnbwɩɩ, də Levi dwíí lɩ̀à tə nə wulə á tɩan tə wa. Cɩ́gá, Levi dwíí tə ba tori, nə à yə̀ə́ tɩa jə də aba.
13 Á cɩa á tɩ̀àn nə, á dànà ká fwa jwəŋə tə ba nə sʋ̀rɩ́, bwálɩ́ mama wa á nə wá na. 14 Yá á dàń nə mɛ sə á fwa á jwəŋə tə ba nə sʋ̀rɩ́, bwálɩ́ tə wa Ba-Yígúrə́-Jə-Tiu nə wá kúrí á dwíí tə don wa. Mə lá nə á wá fwa kʋ tə mama à nə bɩrɩ aba sə á tʋn. 15 Yá də nàŋʋ́ fɩra nə jə aba, á wàá vànɩ́ á gwɩ, á də́ kʋ nàŋʋ́, ndə Ba-Yígúrə́-Jə-Tiu, á tíú Yɩɩ nə fwa zəni á yɩra ʋ mɛ nətʋ, á tɩan tə mama wa. Lìù tə nə yɩ durən lìù, də lìù tə nə yɩ parɩ mɛ wàá kʋ nàŋʋ́ tə ba də́, ndə ba nə də́ felə, də bɩnɩ mama ka pɛ́n nyʋʋ nàŋʋ́ nətʋ. 16 Yá á dàń nə wà mɛ sə á də́ vànɩ́ tə jana. Á mɛ sə á pa tə lwá tɩa, ndə nɩ́á nə.
17 Á wà mɛ sə á jə̀ń tɩan tə wa á nə wulə, á də́ á mɩna fugə nii nyiən, də á divɛn nədʋn fugə nii nyiən, də á nʋga fugə nii nyiən, də á vanfaran də á vanmɩnɩ təntən bɩ̀á, nə à yə̀ə́ á Yɩɩ lɛ̀ɛ̀ kənu jwəŋə tə á nə fwa nipoli yɩrɩ, nə à yə̀ə́ á zìlə́ wiən, nə à yə̀ə́ á zìlə́ wiən tə á nə wá lɩ á kárɩ́ wiən lənə wa. 18 Yá kʋ dàń nə yɩ Ba-Yígúrə́-Jə-Tiu, á tíú Yɩɩ yáá con nə á wá də́ tə, bwálɩ́ tə wa Ba-Yígúrə́-Jə-Tiu, á tíú Yɩɩ nə wá kúrí. Á mʋ̀ də á bɩ̀á də á bwɩ̀ɩ́, də á tʋtʋnbɩa də á tʋtʋnbwɩɩ, də Levi dwíí lɩ̀à tə nə wulə á tɩan tə wa, nə wá də́ tə, á ga fwa pupwən Ba-Yígúrə́-Jə-Tiu, á tíú Yɩɩ yáá con, jɩjə wiən tə mama yɩrɩ, á nə tʋn á na. 19 Máŋá tə mama wa á mɩɩ nə wá ya lʋʋ wa, á lʋʋ nii tə wa, á mɛ sə á cɩ̀ á tɩ̀àn nə, á dàn ká vɩ Levi dwíí tə á dʋgʋ.
20 Máŋá tə Ba-Yígúrə́-Jə-Tiu, á tíú Yɩɩ nə wàlɩ̀ á lʋʋ nii tə, ndə ʋ nə kàn nii ʋ pa aba nətʋ, nàŋʋ́ diŋə fɩra nə jə aba, kʋ pa á swɩ̀n, á wʋ́: «À pɩ̀à nàŋʋ́ sə à də́!» Á wàá nàŋʋ́ á də́, ndə á nə pɩ̀à nətʋ. 21 Də bwálɩ́ tə Ba-Yígúrə́-Jə-Tiu, á tíú Yɩɩ nə kúrí, sə ʋ yɩrɩ tə ya kʋ wa, nə ŋʋ́ná də bwálɩ́ á nə wulə, á wàá á vanfaran tə də á vanmɩnɩ tə Ba-Yígúrə́-Jə-Tiu nə pɩn aba, á gwɩ bwálɩ́ tə wa á nə wulə. Á dàń nə mɛ sə á tʋn kʋ, kʋ twá ndə nətʋ tə nə, à nə bɩrɩ aba sə á tʋn. Yá á wàá tə nàŋʋ́ tə á də́ á tɩan tə wa, á nə wulə, kʋ yí ndə á nə pɩ̀à nətʋ. 22 Á wàá kʋ á də́, ndə ba nə də́ felə, nə à yə̀ə́ bɩnɩ mama ka pɛ́n nyʋʋ nàŋʋ́ nətʋ. Lìù tə nə yɩ durən lìù, də lìù tə nə tà durən lìù mɛ wàá kʋ ba də́. 23 Á dàń nə cɩa á tɩ̀àn nə zəni, á dàn ká də́ jana tə. Cɩ́gá, jana nə yɩ mɩɩ, kʋ mʋ̀ yɩrɩ, á wà mɛ sə á də́ nàŋʋ́ də kʋ mɩɩ mama. 24 Á dànà ká də́ tə, á mɛ sə á pa tə lwá tɩa, ndə nɩ́á nə. 25 Á dànà ká də́ tə, yá kʋ nətʋ wá pa á nì ywánɩ́, á mʋ̀ də á dwíí tə nə wá ya lʋʋ wa, á kwa nə, á nə wá tʋn kʋ tə nə yɩ mənmənə, Ba-Yígúrə́-Jə-Tiu yáá con yɩrɩ.
26 Yá won tə nə yɩ á mʋ̀ nyiən, á nə tún vàn nə, á pa Yɩɩ nə, də á nipoli jwəŋə nə, á mɛ sə á ja bà bwálɩ́ tə wa, Ba-Yígúrə́-Jə-Tiu nə wá kúrí. 27 Á wá fwa á jwəŋə tə ba nə sʋ̀rɩ́, á tún tə nàŋʋ́ də tə jana, Ba-Yígúrə́-Jə-Tiu, á tíú Yɩɩ joŋi bwálɩ́ tə yuu wa. Á wá lwá á jwəŋə tə duən jana tə, Ba-Yígúrə́-Jə-Tiu, á tíú Yɩɩ joŋi bwálɩ́ tə yuu wa, á ga də́ tə nàŋʋ́ tə.
28 Á cʋga sʋ̀ràn təntə mama, à nə pɩn aba nii tə yuu wa, á ga zìlí tə nii, sə kʋ pa á nì ywánɩ́, á mʋ̀ də á dwíí tə nə wá ya lʋʋ wa, á kwa nə, máŋá mama wuuu, á nə wá tʋn kʋ tə nə ziən, də kʋ tə nə yɩ mənəmənə Ba-Yígúrə́-Jə-Tiu, á tíú Yɩɩ yáá con yɩrɩ.
Yɩzərayɛlə lɩ̀à mɛ sə ba cɩ̀ ba tɩ̀àn nə də Kanaan tɩ̀án yɩa tə
29 Máŋá tə Ba-Yígúrə́-Jə-Tiu, á tíú Yɩɩ nə wá dɩŋa dwíə́ nəkaran* tə ʋ lɩ á yáá nə mɩ́ámɩ́án, ʋ ga pa á jon ba lʋʋ nii tə, máŋá tə á nə wá jon ba lʋʋ nii tə, á wulə kʋ wa, 30 á cɩa á tɩ̀àn nə, á dànà ká tʋ ba tʋtʋnɛɛ tə wa, á ga lwən ba, Ba-Yígúrə́-Jə-Tiu nə cʋ̀gʋ̀ ba á yáá con kwa nə. Á cɩa á tɩ̀àn nə, á dànà ká bwe bwiə ba yɩa tə yuu wa, á swɩ̀n, á wʋ́: «Nətə nə dwíə́ nəkaran tə tə pɩn dun ba yɩa tə nə? Nə də pɩ̀à sə nə tʋn ndə ba nə!» 31 Á wà mɛ sə á tʋn nətʋ, á ma pa dun Ba-Yígúrə́-Jə-Tiu, á tíú Yɩɩ nə. Cɩ́gá, dwíə́ təntə yà tʋŋa yobalwaran yiri mama, Ba-Yígúrə́-Jə-Tiu nə culi, ba ma pɩn dun ba yɩa tə nə. Ba yà sʋ̀rɩ́ ba bɩ̀á də ba bwɩ̀ɩ́ də tətə mən wa, ba pɩn ba yɩa tə nə.