13
1 Á wá zìlí, á ga twá kʋ tə mama nə, à nə pɩn aba nii kʋ yuu wa. Á wà mɛ sə á súrí yoo kʋ nə, á ga wà mɛ sə á lɩ yoo kʋ nii nə də.Yɩɩ zɩga lɩ̀à tə nə, ba nə bwɩ woŋwanan nə
2 Yɩɩ nii sʋ̀sʋ̀nʋ̀, nə à yə̀ə́ Yɩɩ yinarʋ nə zàn á titəŋi wa, ʋ swɩ̀n mɩmɩnʋ nə à yə̀ə́ yogwarʋ yoo á con, 3 kʋ mɩmɩnʋ tə, nə à yə̀ə́ kʋ yogwarʋ tə nii nə súə́, ndə ʋ nə swɩ̀n kʋ á con nətʋ, ʋ nə bon aba, ʋ wʋ́: «Á bɩ̀àn nə pa dun yɩa duən nə», yá tə yɩ yɩa tə á nə yəri, 4 á wà mɛ sə á cʋgʋ Yɩɩ nii sʋ̀sʋ̀nʋ̀ təntə, nə à yə̀ə́ Yɩɩ yinarʋ təntə sʋ̀ràn tə. Cɩ́gá, kʋ yɩ Ba-Yígúrə́-Jə-Tiu, á tíú Yɩɩ nə mɩlɩ aba, sə ʋ jə́n, də á nə swə Ba-Yígúrə́-Jə-Tiu, á tíú Yɩɩ, də á waa mama, də á jə̀rə́ mama. 5 Á mɛ sə á twá Ba-Yígúrə́-Jə-Tiu, á tíú Yɩɩ cɩcɩ nə. Á mɛ sə á dəri ʋ fən, á twá yìə̀n tə nə, ʋ nə pɩn aba nii tə yuu wa, á ga zìlí ʋ nii. Ʋ mʋ̀ cɩcɩ nə nə, á mɛ sə á pa dun, á ga vwa á tɩ̀àn ʋ nə. 6 Ʋ mʋ̀ Yɩɩ nii sʋ̀sʋ̀nʋ̀ təntə, nə à yə̀ə́ Yɩɩ yinarʋ təntə mɛ sə ba gʋ wá. Cɩ́gá, ʋ swɩ̀n sə á vɩ Ba-Yígúrə́-Jə-Tiu, á tíú Yɩɩ nii, ʋ nə lɩ aba Ezwipətə lʋʋ nii tə wa, yongaʋ tə wa. Yá Yɩɩ nii sʋ̀sʋ̀nʋ̀ təntə yà dídə́n sə ʋ yigu aba ʋ lɩ cwəŋə tə wa, Ba-Yígúrə́-Jə-Tiu, á tíú Yɩɩ nə pɩn aba nii, sə á va ka wa. Mə nətʋ nə á wá kwɛn kʋ tə nə lwara, á lɩ á titəŋi wa.
7 Kʋ wàá sə á n nubiu, nə à yə̀ə́ n bìú, nə à yə̀ə́ n bʋ̀á, nə à yə̀ə́ n sapaa kan, nə à yə̀ə́ n dabɛɛ tə n nə swə ndə n tətə nə, twá tɩa tɩa ʋ sugu mʋ́, ʋ wʋ́: «Nə vələ nə pa dun yɩa duən nə!» Yá tə yɩ yɩa tə n tətə, nə à yə̀ə́ n nyɩna-ba nə wà yəni. 8 Kʋ wàá dwíə́ nəkaran* tə nə kɩkarɩ aba yɩa kʋ yanɩ, ba tə nə bwə́lə́, nə à yə̀ə́ ba tə nə ŋʋ́ná də aba, kʋ nə zɩgɩ tɩa tə vàn don nə, kʋ va kʋ yí ka vàn don. 9 Dàn ká sɛ̀ ʋ kwìə̀ tə, dàn ká cʋgʋ ʋ sʋgʋ də tətə. Dàn ká dəri ʋ yii, dàn ká pa ʋ yinəgə ja mʋ́, dàn ká pú ʋ də̀ń nə. 10 Yá n dàń nə mɛ sə n gʋ wá. N mʋ̀ nə mɛ sə n təntən n zɩ̀n n jɩɩn lìù təntə yuu wa, sə n ma gʋ wá, yá kʋ kwa nə, lalʋʋ tə mama dàń wá zɩ̀n ba jɩ̀àn ʋ yuu wa. 11 N wá dɩlɩ wá də kapana n gʋ, ʋ nə dídə́n sə ʋ yigu mʋ́ ʋ kə yiŋʋnɩ də Ba-Yígúrə́-Jə-Tiu, n tíú Yɩɩ tə, ʋ nə lɩ mʋ́ Ezwipətə lʋʋ nii tə wa, yongaʋ tə wa. 12 Yɩzərayɛlə lɩ̀à mama wá nì kʋ nətʋ tə, fən ga wá zʋ ba, yá lìù mama kʋ́ʋ̀ bá tʋn yolwan təntə yiri á titəŋi wa.
13 Á nə nì də ba swɩ̀n də tɩan tə don wa, Ba-Yígúrə́-Jə-Tiu, á tíú Yɩɩ nə pɩn aba, sə á ya tə wa, 14 də bakʋkwanyɩna nan á lalʋʋ tə wa, ba sugu ba tɩʋ tə lɩ̀à, ba wʋ́: «Nə vələ nə pa dun yɩa duən nə», yá tə yɩ yɩa tə á nə yəri tə, 15 á wá zuri á yɩra, á fwa swɩan á bwe lɩ̀à, á ma á twarɩ yoo tə nɛɛ, á na. Á nə nɩ də yoo tə yɩ cɩ́gá, yobalwarʋ təntə cɩ́gá tʋn á titəŋi wa, 16 á mɛ sə á gʋ tɩʋ təntə tɩ̀án də kwatara sɩ̀ʋ́. Á wá cʋ̀gʋ̀ tɩʋ tə mama mɩ́ámɩ́án*, də won tə mama nə wulə kʋ wa, á ma pa dun Yɩɩ nə. Á wá gʋ vàná tə də mama mɩ́ámɩ́án. 17 Á wá pɛ̀ wiən tə mama, á nə ta á jon, á ja nan á pú kanporu tə wa, á dɩ mən tə də tɩʋ tə mama nə, Ba-Yígúrə́-Jə-Tiu, á tíú Yɩɩ yáá con. Tɩʋ tə wá ya dibwərən máŋá mama wuuu, lìù kʋ́ʋ̀ bá ya kʋ wa, yá ba kʋ́ʋ̀ bá pìí ba lwà kʋ də mama. 18 Á wà mɛ sə á dwən won mama yɩra, wiən tə wa á nə mɛ sə á cʋ̀gʋ̀ mɩ́ámɩ́án, á ma pa dun Yɩɩ nə. Kʋ nətʋ wá pa Ba-Yígúrə́-Jə-Tiu lɩŋa tə yà nə fʋrɩ á yuu wa, pìí tə tʋ, yá ʋ dəri á yinəgə, ʋ ga pa á pùlì zənzən, ndə ʋ nə dùə̀ ʋ ma swɩ̀n kʋ á nyɩna-ba con nətʋ. 19 Mə kʋ wá ya nətʋ, də á nə zìlí Ba-Yígúrə́-Jə-Tiu, á tíú Yɩɩ nii, á ga twá yìə̀n tə mama nə, ʋ nə pɩn nii tə yuu wa, à nə pɩn aba zə̀n kʋ tə, á ga tʋn kʋ tə nə yɩ mənəmənə Ba-Yígúrə́-Jə-Tiu, á tíú Yɩɩ yáá con.