Yɩɩ Nii 14

Yɩɩ dùə̀ suu Yɩzərayɛlə lɩ̀à nii nə, yɩra bɩ̀rʋ̀ yuu wa

1 Á yɩ Ba-Yígúrə́-Jə-Tiu, á tíú Yɩɩ bɩ̀á! Á wà mɛ sə á bɩ̀rɩ̀ gwɛɛn á yɩra, nə à yə̀ə́ á pàrɩ́ á tílí yáá yukʋran, də á lìù nə tɩga. 2 Cɩ́gá, á yɩ lalʋʋ á nə yɩ parɩ, á pa Ba-Yígúrə́-Jə-Tiu, á tíú Yɩɩ nə. Yá Ba-Yígúrə́-Jə-Tiu, á tíú Yɩɩ kúrí aba, sə á ya lalʋʋ, kʋ nə yɩ ʋ mʋ̀ cɩcɩ nyiən, dwíə́ tə mama wa, tə nə wulə tɩa yuu wa.

Nàŋʋ́ tə nə mɛ diŋə, də kʋ tə nə culi diŋə

3 Á wà mɛ sə á də́ won mama tə mama, Ba-Yígurə́-Jə-Tiu nə jələ ndə durən won nə. 4 Nəŋə vàná tə, á nə wàá tə nàŋʋ́ á də́: Kʋ yɩ naʋ, də piə, də bʋ̀n, 5 də bɩnɩ mama ka pɛ́n nyʋʋ, də felə, də panʋ, də gaʋ bʋtɩlʋ, də fɩbʋna, də nanbəru, də kwan. 6 Vànɩ́ mama kʋ napaŋɩ nə pwɛ̀ bələ, kʋ ga pìí kʋ gwìń wodirən, kʋ lɩ kʋ pùə́ wa, kʋ də́, á wàá kʋ nàŋʋ́ á də́. 7 Yá á dàń nəŋə vàná tə, á nə wà mɛ sə á də́ tə nàŋʋ́, vàná tə wa tə nə pìí tə gwìń wodirən, tə lɩ tə pùə́ wa, tə də́, yá tə napaŋɩ ga wà pwɛ̀, nə à yə̀ə́ tə napaŋɩ nə pwɛ̀, yá tə ba wodirən pìí tə gwìń, tə lɩ tə pùə́ wa, tə də́: Kʋ yɩ nyʋgʋma, də zwəŋə, də panyanɩ: Tə pìí tə gwìń wodirən, tə lɩ tə pùə́ wa, tə də́, yá tə ba napaŋɩ jə: Á mɛ sə á jələ tə ndə durən vàná nə. 8 Too jə napaŋɩ tə nə pwɛ̀, yá kʋ ba wodirən pìí kʋ gwìń, kʋ lɩ kʋ pùə́ wa, kʋ də́: Á mɛ sə á jələ kʋ ndə durən vànɩ́ nə. Á dànà ká də́ vàná təntə nàŋʋ́, á dànà ká dwen tə tɩgɩ də tətə yɩra.

9 Nɩ́á wa wonəŋə tə mama wa, á nəŋə tə tə, á nə wàá á də́: Tə tə mama tə yɩra nə jə pʋran, də wiən tə ma ye, á wàá tə á də́. 10 Yá á wà mɛ sə á də́ tə duən tə mʋ̀ mama, tə yɩra nə ba pʋran, də wiən tə nə ma ye jə: Á mɛ sə á jələ tə ndə durən wiən nə.

11 Á wàá zuŋə tə mama nə tà durən zuŋə á də́. 12 Yá á dàń nəŋə zuŋi tə, á nə wà mɛ sə á də́: Kʋ yɩ dəlu, də kayɩlʋ, də mʋʋ nii kayɩlʋ, 13 də kələjana, də cii də kʋ dwíí yiri mama, 14 də batɩɛnkanʋ də kʋ dwíí yiri mama, 15 də taataa, də kunkoru, də buu bisiu, də twələ də ka dwíí yiri mama, 16 də cirə lwara, də bugwana, də kunkwəbasirə, 17 də buu cə̀rə́, də caŋwara, də bisikwələ, 18 də dwanʋ, də buzuŋu də kʋ dwíí yiri mama, də kadaapurə, də sɩ́sárá.

19 Wopəru yiri mama mɛ sə kʋ ya durən won kʋ pa aba: Kʋ wà diŋə mɛ. 20 Yá á wàá zuŋə yiri mama mʋ̀ nə tà durən won, á də́.

21 Á wà mɛ sə á də́ vantɩgʋ nàgʋ́ də mama. Á mɛ sə á yá kʋ á pa vee tə nə, ʋ nə twá ʋ jə̀ə́ á con, sə ʋ də́, nə à yə̀ə́ á yoli kʋ vee yuu wa. Cɩ́gá, á yɩ lalʋʋ á nə yɩ parɩ, á pa Ba-Yígúrə́-Jə-Tiu, á tíú Yɩɩ nə. Á wà mɛ sə á sàn bʋbiə, ka nuu yɩlɩ nɩ́á wa^a.

Fugə nii nyiən yuu wa yìə̀n

22 Bɩnɩ mama, á wá lɩ wiən tə mama á nə vàrɩ̀ á na á kárá wa, fugə nii nyiən. 23 Á wá də́ tə Ba-Yígúrə́-Jə-Tiu, á tíú Yɩɩ yáá con, bwálɩ́ tə wa ʋ nə kúrí, sə ʋ pa ʋ yɩrɩ tə ya lá. Fugə nii nyiən tə yɩ á wá lɩ kʋ á mɩna, də á divɛn nədʋn, də á nʋga, də á vanfaran də vanmɩnɩ təntən bɩ̀á yuu wa, sə kʋ pa á kwè ka dəri Ba-Yígúrə́-Jə-Tiu, á tíú Yɩɩ fən, máŋá mama wuuu. 24 Máŋá tə Ba-Yígúrə́-Jə-Tiu, á tíú Yɩɩ nə fwa zəni á yɩra, ʋ pa á kárɩ́ wiən bɩ zənzən, kʋ wàá də á bá wànɩ́ fugə nii nyiən wiən tə á zɩn, á ja bà bwálɩ́ tə wa, Ba-Yígúrə́-Jə-Tiu, á tíú Yɩɩ nə kúrí, sə ʋ pa ʋ yɩrɩ tə ya lá, á bwálɩ́ nə ŋʋ́ná zənzən də wiən tə zɩŋʋ yɩrɩ. 25 Kʋ nə yɩ nətʋ, á wá yoli á fugə nii nyiən tə, á jon kʋ səbiu, yá á dàń wá ja səbiu tə zəni, á ja bà bwálɩ́ tə wa, Ba-Yígúrə́-Jə-Tiu, á tíú Yɩɩ nə kúrí. 26 Lá nə, á wá ja səbiu tə á ma yə̀ won tə mama á nə pɩ̀à: Kʋ nə yɩ vanfaran də vanmɩnɩ, nə à yə̀ə́ divɛn, də sana tə nə dà, won tə mama nə poli á pùə́, á wàá kʋ á yə̀, á də́ Ba-Yígúrə́-Jə-Tiu, á tíú Yɩɩ yáá con, á ga fwa pupwən, á mʋ̀ də á dìə̀ lɩ̀à. 27 Á dànà ká swɛ̀ɛ́ Levi dwíí lɩ̀à tə yoo, ba nə wulə də aba. Cɩ́gá, ba ba tori* jə ndə á nə, lʋʋ nii tə tarʋ wa.

28 Bɩna batwa mama, á wá lɩ á wiən lənə fugə nii nyiən tə mama, batwa nii bɩnɩ tə wa, á tún tɩʋ tə wa á nə wulə. 29 Yá Levi dwíí lɩ̀à tə nə ba tori jə ndə á nə, lʋʋ nii tə tarʋ wa, də vərə tə nə twá ba jə̀ə́ á con, də bitara tə də kadənə tə nə wulə á tɩan tə wa, wá bà ba tì tə, ba də́ ba sú, sə kʋ pa Ba-Yígúrə́-Jə-Tiu, á tíú Yɩɩ fwa zəni á yɩra, á tʋtʋŋɩ mama wa, á nə wá ja á jɩɩn á ma tʋn.