Zozuwe 20

Yuu yikwala tɩan

1 Ba-Yígúrə́-Jə-Tiu swɩ̀n Zozuwe con, ʋ wʋ́: 2 «Swɩ̀n Yɩzərayɛlə lɩ̀à tə con, sə ba kúrí tɩan ba tún, tə nə wá ya tɩan tə, lìù nə wàá ʋ dəri ʋ vəli, ʋ kwálɩ́ ʋ yuu tə wa. À dí yáá à twá də Moyizə, à ma swɩ̀n tɩan təntə yoo á con. 3 Yá á wa lìù dàń nə gʋa ʋ don, də kʋ tà ʋ sɩnɩ, ʋ wàá ʋ dəri ʋ vəli, ʋ kwálɩ́ ʋ yuu tɩan təntə don wa. Yá ʋ dàń wá wànɩ́, ʋ jɛ́n tɩgɩ tə nubiu tə yáá nə, ʋ nə mɛ sə ʋ fwi tɩgɩ tə lɩŋa. Tɩan təntə wá ya á yuu yikwala bwálɩ́. 4 Lagʋrʋ tə mɛ, sə ʋ dəri ʋ va tɩan tə don wa. Ʋ nə vəli ʋ yí lá, ʋ wá zɩgɩ tɩʋ tə mimii tə wa, ʋ tún ʋ nii ʋ bɩrɩ tɩʋ tə nəkwɩna tə nə. Yá ba dàń wá sɛ̀ ba jon wá ba kə ba con, tɩʋ tə wa, ba ga pa wá bwálɩ́ sə ʋ ya də ba. 5 Yá tɩgɩ tə nubiu tə nə mɛ sə ʋ fwi tɩgɩ tə lɩŋa tə, nə púə́ lagʋrʋ tə kwa ʋ bà tɩʋ tə wa, tɩʋ tə tɩ̀án wà mɛ sə ba ja lagʋrʋ tə, ba pa. Cɩ́gá, kʋ tà ʋ sɩnɩ ʋ gʋ ʋ twadon tə, kʋ ma tà ʋ yà bʋlɩ ʋ nə fuən. 6 Yá lagʋrʋ tə dàń wá ya tɩʋ təntə wa, kʋ va kʋ yí máŋá tə, tɩʋ tə tɩ̀án nə wá bʋ̀rɩ̀ ʋ bʋra. Kʋ kwa nə, ʋ tə wá ya tɩʋ təntə wa, kʋ va kʋ yí joŋwana yun tɩ̀án nəkwɩa tə tɩan. Joŋwana yun tɩ̀án nəkwɩa təntə tɩan kwa nə, lagʋrʋ tə dàń wàá ʋ pìí ʋ vəli tɩʋ tə, ʋ nə nan lá.»

7 Yá Yɩzərayɛlə lɩ̀à tə dàń kúrí Kedɛswə, kʋ nə wulə Galile nə, Nɛfətali dwíí pɛɛn nagwanaa tə wa. Kʋ súrí Siswɛmə nə, kʋ nə wulə Efərayimə dwíí pɛɛn nagwanaa tə wa. Kʋ súrí Kiriyatə-Arəba nə, kʋ yɩrɩ don nə yɩ Ebəron, kʋ nə wulə Zwida dwíí nagwanaa pɛɛn nagwanaa tə wa. 8 Yá Zʋrədɛn mʋnaa tə də Zweriko yɩɩ yipɩan con, ba kúrí Besɛrə, kʋ nə wulə digə tə wa, kasɔɔ lanworu tə wa, Ribɛn dwíí tə lʋʋ nii wa. Kʋ súrí Ramɔtə nə, kʋ nə wulə Galadə nagwanaa wa, Gadə dwíí tə lʋʋ nii wa. Kʋ súrí Golan nə, kʋ nə wulə Baswan nə, Manase dwíí nagwanaa wa.

9 Mə tɩan təntə nə ba kúrí ba tún, sə tə ya yuu yikwala bwálɩ́, tə pa Yɩzərayɛlə lɩ̀à tə mama nə, də vere tə nə, ba nə twá ba jə̀ə́ Yɩzərayɛlə lɩ̀à tə titəŋi wa. Lìù nə gʋa ʋ don, də kʋ tà ʋ sɩnɩ, sə kʋ tíú dəri ʋ va ʋ kwálɩ́ ʋ yuu, tɩan təntə don wa. Kʋ nətʋ dàń wá pa, tɩgɩ tə nubiu tə nə mɛ sə ʋ fwi tɩgɩ tə lɩŋa tə, kʋ́ʋ̀ bá na lagʋrʋ tə, ʋ gʋ. Yá tɩʋ tə tɩ̀án dàń nə wá bʋ̀rɩ̀ lagʋrʋ tə bʋra.