Simeyon dwíí tə tori
19
1 Bələ nii tori tə, pwárʋ́ tə nə bɩrɩ, yɩn Simeyon dwíí tə, də ba sànɩ́ nyiən. Ba lʋʋ nii tə yà yɩ kʋ wulə Zwida dwíí nagwanaa tə titəŋi wa. 2 Nə̀ń tɩan tə yà nə wulə Simeyon dwíí nagwanaa tə wa. Kʋ yɩ Bɛrəsweba, də Sweba, də Molada, 3 də Hasarə-Swuwalə, də Baala, də Esɛmə, 4 də Ɛlətoladə, də Betulə, də Ɔrəma, 5 də Sikəlagə, də Bɛtə-Marəkabɔtə, də Hasarə-Susa, 6 də Bɛtə-Lebawɔtə, də Swaruhɛn. Tə fwa tɩan fugə də batwa, də tə nii tɩbii. 7 Tɩan duən, tə tə nə wulə lá nə yɩ Ayin, də Rimon, də Etɛrə, də Aswan. Tə fwa tɩan banɩa, də tə nii tɩbii. 8 Kʋ dàń súrí tɩbii tə mama nə, tə nə kɩkarɩ tɩfaran təntə, kʋ va kʋ yí Baalatə-Bɛrə, kʋ yɩrɩ don nə yɩ Ramatə, kʋ nə wulə Negɛbə tə wa. Mə lʋʋ nii təntə nə yɩn Simeyon dwíí tə, də ba sànɩ́ tə tori. 9 Simeyon dwíí tə tori tə yɩ ba lɩ Zwida dwíí nagwanaa tə wa. Cɩ́gá, Zwida dwíí nagwanaa tə yà dáá zənzən, kʋ pa ba. Mə kʋ mʋ̀ nə pɩn, ba ma pa tori Simeyon dwíí tə nə, Zwida dwíí nagwanaa tə wa.Zabulon dwíí tə tori
10 Batwa nii tori tə, pwárʋ́ tə nə bɩrɩ, yɩn Zabulon dwíí tə, də ba sànɩ́ nyiən. Ba nagwanaa tə sɩswɩan yà vəli tə yí Saridə. 11 Yá tə twá yɩɩ yizwɩa con, tə va tə yí Mareyala, də Dabeswɛtə, də nacoru tə, kʋ nɩ́á nə dəri Yokəneyamə yáá con. 12 Sɩswɩan tə zɩgɩ Saridə, tə va yɩɩ yipɩan con. Tə twá Kisəlɔtə-Tabɔrə nii nə, tə va tə nan Dabəratə nə, tə ga kɛ̀ń tə dɩ̀ tə yí Yafɩa. 13 Kʋ nə zɩgɩ lá, sɩswɩan tə tə vəli yɩɩ yipɩan con. Tə twá Gatə-Efɛrə, də Ɛtə-Kasin, tə va tə nan Rimon nə, yá tə kɩkarɩ, tə va Neya con. 14 Yá jɩzən saparʋ con, sɩswɩan tə kɩkarɩ, tə twá Hanaton, tə nan tə jɩrɩ Yifəta-Ɛlə vara tə nə. 15 Tɩan duən, tə nə súrí lá nə yɩ Katatə, də Nahalalə, də Swiməron, də Yidala, də Bɛtəleyɛmə. Tə fwa tɩan fugə də bələ, də tə nii tɩbii. 16 Mə lʋʋ nii təntə nə yɩn Zabulon dwíí tə, də ba sànɩ́ tə tori, kʋ dàń súrí tɩan təntə, də tə nii tɩbii tə nə.
Yɩsakarə dwíí tə tori
17 Banɩa nii tori tə, pwárʋ́ tə nə bɩrɩ, yɩn Yɩsakarə dwíí tə, də ba sànɩ́ nyiən. 18 Tɩan tə yà nə wulə ba nagwanaa tə wa, nə yɩ Zwizəreyɛlə, də Kesulɔtə, də Sunɛmə, 19 də Hafarayimə, də Swiyon, də Anaharatə, 20 də Rabitə, də Kiswiyon, də Ebɛsə, 21 də Remɛtə, də Eyin-Ganimə, də Eyin-Hada, də Bɛtə-Pasɛsə. 22 Sɩswɩan tə yà yí Tabɔrə, də Swahasimə, də Bɛtə-Swemɛswə, tə ga nan tə jɩrɩ Zʋrədɛn mʋnaa tə nə. Tə fwa tɩan fugə də bardʋ, də tə nii tɩbii. 23 Mə lʋʋ nii təntə nə yɩn Yɩsakarə dwíí tə, də ba sànɩ́ tə tori, kʋ dàń súrí tɩan təntə, də tə nii tɩbii tə nə.
Aswɛrə dwíí tə tori
24 Bonu nii tori tə, pwárʋ́ tə nə bɩrɩ yɩn Aswɛrə dwíí tə, də ba sànɩ́ nyiən. 25 Tɩan tə yà nə wulə ba nagwanaa tə wa nə yɩ Hɛləkatə, də Halɩ, də Betɛn, də Akəswafə, 26 də Alamelɛkə, də Amadə, də Miswalə. Yɩɩ yizwɩa con, sɩswɩan tə twá Swihɔrə-Libənatə nacoru tə nə, tə nan tə jɩrɩ Karəmɛlə paan tə nə. 27 Sɩswɩan tə kɩkarɩ tə va yɩɩ yipɩan con, yá tə vəli tə yí Bɛtə-Dagon. Tə vəli tə yí Zabulon nagwanaa tə, də Yifəta-Ɛlə vara tə. Tə zɩgɩ lá tə kɩkarɩ tə va jɩzən saparʋ yuu. Tə vəli tə yí Bɛtə-Emɛkə də Neyɛlə, yá tə kɛ̀ń tə va Kabulə, kʋ nə wulə jɩgwiə vàn yuu. 28 Tə vəli Ɛbəron, də Rehɔbə, də Hamon, də Kana. Tə vəli tə jɩrɩ Sidon tɩfarʋ tə nə. 29 Yá sɩswɩan tə kɩkarɩ tə va Rama con. Tə vəli tə yí Tirə tɩfarʋ tə, ba nə lwə̀ ba kɩkarɩ də bírə́. Tə kɩkarɩ tə twá Hoza, tə nan tə jɩrɩ mʋʋ tə nə. Tɩan duən tə nə súrí lá nə yɩ Mahalabə, də Akəzibə, 30 də Uma, də Afɛkə, də Rehɔbə. Tə fwa tɩan sapʋa də bələ, də tə nii tɩbii. 31 Mə lʋʋ nii təntə nə yɩn Aswɛrə dwíí tə, də ba sànɩ́ tə tori, kʋ dàń súrí tɩan təntə, də tə nii tɩbii tə nə.
Nɛfətali dwíí tə tori
32 Bardʋ nii tori tə, pwárʋ́ tə nə bɩrɩ yɩn Nɛfətali dwíí tə, də ba sànɩ́ nyiən. 33 Ba nagwanaa tə sɩswɩan zɩgɩ Elɛfə, tə twá Saananimə tɩʋ nəfarʋ tə con, tə va Adami-Nekɛbə, də Yabəneyɛlə, tə va tə yí Lakumə. Yá tə dàń nan tə jɩrɩ Zʋrədɛn mʋnaa tə nə. 34 Sɩswɩan tə kɩkarɩ tə va yɩɩ yizwɩa con. Tə zɩgɩ Azənɔtə-Tabɔrə, tə nan tə jɩrɩ Hukɔkə nə. Jɩgwiə saparʋ yuu, sɩswɩan tə yà vəli tə yí Zabulon nagwanaa tə. Yɩɩ yizwɩa con, tə yà vəli tə yí Aswɛrə nagwanaa tə. Yá yɩɩ yipɩan con, tə yà vəli tə yí Zʋrədɛn mʋnaa tə con. 35 Nɛfətali nagwanaa tə wa tɩan tə, ba nə lwə̀ ba kɩkarɩ də biritaŋʋ, yà nə yɩ Sidimə, də Sɛrə, də Hamatə, də Rakatə, də Kinerɛtə, 36 də Adama, də Rama, də Hasɔrə, 37 də Kedɛswə, də Edəreyi, də Eyin-Hasɔrə, 38 də Yiron, də Migədalə-Ɛlə, də Horɛmə, də Bɛtə-Anatə, də Bɛtə-Swemɛswə. Tə fwa tɩan fugə də nʋgʋ, də tə nii tɩbii. 39 Mə lʋʋ nii təntə nə yɩn Nɛfətali dwíí tə, də ba sànɩ́ tə tori, kʋ dàń súrí tɩan təntə, də tə nii tɩbii tə nə.
Dan dwíí tə tori
40 Barpɛ nii tori tə, pwárʋ́ tə nə bɩrɩ yɩn Dan dwíí tə, də ba sànɩ́ nyiən. 41 Tɩan tə yà nə wulə ba nagwanaa tə wa nə yɩ Sora, də Ɛswətawɔlə, də Yirə-Swemɛswə, 42 də Swalabin, də Ayalon, də Yitəla, 43 də Elon, də Timənata, də Ekəron, 44 də Ɛləteke, də Gibeton, də Baalatə, 45 də Yehudə, də Bene-Berakə, də Gatə-Rimon. 46 Kʋ dàń súrí Yarəkon də Rakon nacoŋi tə, də lʋʋ nii tə, kʋ nə wulə Zwafa yáá con. 47 Yá Dan dwíí tə kwɩ̀n ba nagwanaa tə nə. Yá ba dàń zàn, ba va ba ta Leswɛmə tɩ̀án. Ba gʋa tɩʋ tə wa lɩ̀à tə də kwatara sɩ̀án, ba ga jon kʋ, ba jə̀ə́ kʋ wa. Yá ba dàń lwàń, ba dɩ ba nɩbɛɛ Dan yɩrɩ tə, tɩʋ tə nə. 48 Mə lʋʋ nii təntə nə yɩn Dan dwíí tə, də ba sànɩ́ tə tori, kʋ dàń súrí tɩan təntə, də tə nii tɩbii tə nə.
Zozuwe tori
49 Máŋá tə Yɩzərayɛlə lɩ̀à tə nə pwɛ̀ lʋʋ nii tə, ba tara ba zwɛ̀, ba pɩn tori Nun bìú Zozuwe nə, ba titəŋi wa. 50 Ba pɩn wá tɩʋ tə, ʋ nə dí yáá, ʋ lòrì, ndə Ba-Yígúrə́-Jə-Tiu yà nə pɩn nii, sə kʋ tʋn nətʋ. Kʋ tɩʋ təntə yɩrɩ nə yɩ Timənatə-Sera. Kʋ yɩ kʋ wulə Efərayimə pɛɛn tə wa. Yá Zozuwe dàń pìí ʋ kwɛn ʋ lwà kʋ, ʋ jə̀ə́ kʋ wa. 51 Mə lʋʋ níə́ təntə nə, Yɩɩ joŋwanʋ Eleyazarə, də Nun bìú Zozuwe, də Yɩzərayɛlə dwíə́ tə dìə̀ tɩ̀án tə tarɩ, ba pa Yɩzərayɛlə dwíə́ tə nə. Kʋ yɩ ba pwárɩ́ Ba-Yígúrə́-Jə-Tiu yáá con, Silo nə, Yɩɩ jə́rə́ gansili tə mimii nə, ba ma tara tə. Mə nətʋ nə, ba tarɩ lʋʋ nii tə, ba zwɛ̀.