Lʋʋ nii tə nə ga tə tarʋ yoo
18
1 Yɩzərayɛlə lɩ̀à tə nə dí dɩ̀àn lʋʋ nii tə yuu wa kwa nə, ba mama twi ba kun duən nə, Silo nə. Yá ba dàń púə́ Yɩɩ jə́rə́ gansili tə, ba zɩgɩ lá nə. 2 Dwíə́ barpɛ yà nə ga Yɩzərayɛlə lɩ̀à tə wa, ba yà tə nə wà tori nɩ, lʋʋ nii tə wa. 3 Yá Zozuwe dàń swɩ̀n Yɩzərayɛlə lɩ̀à tə con, ʋ wʋ́: «Máŋá kwà nə, á dànɩ̀ sə á ma va á jon lʋʋ nii tə, Ba-Yígúrə́-Jə-Tiu, ʋ nə yɩ á nɩbara-ba Yɩɩ, nə pɩn aba á tɩnɩ? 4 Á kúrə́ bara batwa dwíí mama wa, sə à tʋn ba. Ba wá va, ba jírí lʋʋ nii tə wa, ba pʋ́pʋ́nɩ́ ba dwíí mama tori nə mɛ sə kʋ ya nətʋ. Yá kʋ kwa nə, ba dàń wá pìí ba bà à con. 5 Ba wá pwɛ̀ lʋʋ nii tə nagwanɛɛ barpɛ. Zwida dwíí tə wá ya ba lʋʋ nii wa, jɩgwiə saparʋ yuu. Zʋzɛfə dìə̀ tə də wá ya ba lʋʋ nii wa, jɩzən saparʋ yuu. 6 Á mʋ̀ dàń pʋ́pʋ́ná nətʋ tə, lʋʋ nii tə gɩganɩ tə nə mɛ sə kʋ pwɛ̀ nagwanɛɛ barpɛ, á ja pìí á bà, á pa nə yəbə. Yá à dàń wá pwárɩ́ yəbə, Ba-Yígúrə́-Jə-Tiu yáá con, ʋ nə yɩ nə Yɩɩ, à ma pa aba á tori.7 Yá Levi dwíí tə mʋ̀ bá na tori, lʋʋ nii tə tarʋ wa. Cɩ́gá, Yɩɩ joŋwanɩ tə nə yɩ ba tori. Gadə dwíí tə, də Ribɛn dwíí tə, də Manase dwíí faan tə don tə də dí yáá ba jon ba tori, Zʋrədɛn mʋnaa tə kwa con, yɩɩ yipɩan con. Ba-Yígúrə́-Jə-Tiu tʋtʋnʋ Moyizə nə pɩn kʋ ba.» 8 Bara tə ba nə kúrí sə ba pʋ́pʋ́nɩ́ nətʋ tə, lʋʋ nii tə nə mɛ sə kʋ pwɛ̀ kʋ tara tə, dàń zàn ba vìí. Zozuwe yà dí yáá, ʋ pa ba nii kʋ tə, ʋ wʋ́: «Á vələ á jírí lʋʋ nii tə wa, á pʋ́pʋ́nɩ́ nətʋ tə, kʋ nə mɛ sə kʋ pwɛ̀ kʋ tara. Kʋ kwa nə, á wá pìí á bà à con. Yá à dàń wá pwárɩ́, Ba-Yígúrə́-Jə-Tiu yáá con, Silo nə, à ma pa aba á tori.» 9 Bara təntə vəli ba jírí lʋʋ nii tə wa, yá ba dàń pʋ́pʋ́nɩ́ nətʋ tə, kʋ də kʋ wa tɩan tə nə mɛ sə tə pwɛ̀ nagwanɛɛ barpɛ, ba kə sagɩ wa. Kʋ kwa nə, ba pìí ba bà Zozuwe con, ba dəkuu bwálɩ́ tə wa, Silo nə. 10 Yá Zozuwe dàń pwárɩ́, Ba-Yígúrə́-Jə-Tiu yáá con, Silo nə, ʋ ma tara lʋʋ nii tə, ʋ pa Yɩzərayɛlə lɩ̀à tə nə. Yá dwíí mama dàń nɩ ba tori, kʋ twá ndə nətʋ tə nə, ba nə pwɛ̀ lʋʋ nii tə.
Bɛnzwamɛn dwíí tə tori
11 Bɛnzwamɛn dwíí tə tori nə, pwárʋ́ tə təntən kʋ bɩrɩ, kʋ mɛ də sànɩ́ tə. Yá nagwanaa tə Zozuwe nə pwárɩ́, ʋ ma pa ba tə, yà wulə Zwida dwíí nagwanaa tə, də Zʋzɛfə dwíí nagwanaa tə pwə́rə́ wa. 12 Jɩzən saparʋ yuu, ba nagwanaa tə sɩswɩan sinti Zʋrədɛn mʋnaa tə nə. Tə vəli tə twá Zweriko nii nə, jɩzən saparʋ con, tə kɛ̀ń tə va pɛɛn nagwanaa tə con, yɩɩ yipɩan con. Yá tə dàń vəli tə jɩrɩ Bɛtə-Avɛnə kasɔɔ lanworu tə nə. 13 Sɩswɩan tə zɩgɩ lá nə, tə va tə twá Luzə, kʋ yɩrɩ don nə yɩ Betɛlə nii nə, jɩgwiə saparʋ con. Tə twá paan tə yuu wa, ka nə wulə tɩa con Bɛtə-Horon jɩgwiə saparʋ con, tə lɛ tə cú Atarɔtə-Adarə. 14 Sɩswɩan tə lwàń tə va yáá don wa. Tə zɩgɩ yɩɩ yizwɩa con, tə kɩkarɩ tə va jɩgwiə saparʋ yuu. Tə vəli tə zɩgɩ paan tə nə, ka nə wulə Bɛtə-Horon yáá con, jɩgwiə saparʋ yuu, tə nan tə jɩrɩ Kiriyatə-Baalə nə, kʋ yɩrɩ don nə yɩ Kiriyatə-Yarimə. Tɩʋ təntə yɩ Zwida dwíí tə tɩʋ. Mə yɩɩ yizwɩa con sɩswɩan tə yɩ nətʋ. 15 Jɩgwiə saparʋ yuu sɩswɩan tə sinti Kiriyatə-Yarimə nii nə. Yá tə dàń twá Yimə con, tə va tə jɩrɩ Nɛfətʋa nɩ́á tə nii nə. 16 Sɩswɩan tə lɛ tə cú paan tə də̀ń con, ka nə wulə Bɛn-Hinomə vara tə yáá con, Refayimə vara tə jɩzən saparʋ con. Tə twá Hinomə vara tə nə, Yebusə tɩʋ tə jɩgwiə saparʋ yuu, tə kɛ̀ń tə cú Eyin-Rogɛlə nabuliyii tə con. 17 Yá sɩswɩan tə kɩkarɩ tə twá jɩzən saparʋ con, tə va tə nan Eyin-Swemɛswə, də Gelilɔtə nə, kʋ nə wulə Adumimə cwəŋə dədolu tə yáá con. Yá tə dàń kɛ̀ń tə cú Ribɛn bìú Bohan kapan tə con. 18 Tə twá paan tə jɩzən saparʋ tə nə, kʋ nə daa Araba tə con, tə kɛ̀ń tə cú Araba tə wa. 19 Yá sɩswɩan tə zɩgɩ lá, tə twá Bɛtə-Hɔgəla jɩzən saparʋ con, tə nan tə jɩrɩ Nəkuən mʋʋ tə jɩzən saparʋ nii tə nə, bwálɩ́ tə nə, Zʋrədɛn mʋnaa tə jɩgwiə saparʋ nii tə nə twi, kʋ jɩrɩ lá. Mə jɩgwiə saparʋ sɩswɩan tə yɩ nətʋ. 20 Zʋrədɛn mʋnaa tə yà nə yɩ yɩɩ yipɩan con sɩswɩan. Mə Bɛnzwamɛn nagwanaa tə sɩswɩan nə nətʋ. Mə lʋʋ nii təntə nə yɩn Bɛnzwamɛn dwíí tə, də ba sànɩ́ tə tori. 21 Tɩan tə tə nə Bɛnzwamɛn dwíí tə, də ba sànɩ́ tə yà tɩ. Kʋ yɩ Zweriko, də Bɛtə-Hɔgəla, də Emɛkə-Kesisə, 22 də Bɛtə-Araba, də Semarayimə, də Betɛlə, 23 də Avimə, də Para, də Ofəra, 24 də Kefarə-Amona, də Ofəni, də Geba. Tə fwa tɩan fugə də bələ, də tə nii tɩbii. 25 Tɩan duən, tə tə nə wulə lá, nə yɩ Gabawon, də Rama, də Berɔtə, 26 də Misəpe, də Kefira, də Mosa, 27 də Rekɛmə, də Yirəpeyɛlə, də Tarala, 28 də Sela, də Elɛfə, də Yebusə, kʋ yɩrɩ don nə yɩ Zwerizalɛmə, də Gibeya, də Kiriyatə-Yarimə. Tə fwa tɩan fugə də banɩa, də tə nii tɩbii. Mə lʋʋ nii təntə nə yɩn Bɛnzwamɛn dwíí tə, də ba sànɩ́ tə tori.