Zozuwe 17

1 Ba pɩn tori Manase dwíí tə nə, lʋʋ nii tə tarʋ wa. Manase nə yɩ Zʋzɛfə bìú nəkwɩa. Ba yà dí yáá ba pa Galadə də Baswan lʋʋ nii tə, Galadə nyɩna Makirə nə. Makirə nə yɩ Manase bìú nəkwɩa. Cɩ́gá, ʋ yà yɩ kwatarʋ babɩʋ. 2 Ba pɩn tori Manase bɩ̀á tə duən tə dwíə́ tə də nə, lʋʋ nii tə tarʋ wa, kʋ mɛ də ba sànɩ́ tə. Kʋ yɩ Abiyezɛrə dwíí tə, də Elɛkə dwíí tə, də Asəriyɛlə dwíí tə, də Siswɛmə dwíí tə, də Efɛrə dwíí tə, də Swemida dwíí tə. Mə ba mʋ̀ nə yɩ Zʋzɛfə bìú Manase bibara, ba də ba sànɩ́.

3 Selofadə yɩ Efɛrə bìú, Efɛrə yɩ Galadə bìú, Galadə yɩ Makirə bìú, Makirə yɩ Manase bìú. Selofadə yà wà bibɛɛ lɩrɩ. Ʋ yɩ bikana cɩcɩ nə ʋ lɩrɩ. Ʋ bwɩ̀ɩ́ tə yɩra nə yɩ Mala, də Nʋa, də Hɔgəla, də Miləka, də Tirəsa. 4 Ba vəli ba yí Yɩɩ joŋwanʋ Eleyazarə, də Nun bìú Zozuwe, də lalʋʋ tə yáá tɩ̀án tə, ba swɩ̀n, ba wʋ́: «Ba-Yígúrə́-Jə-Tiu pɩn nii Moyizə nə, sə ʋ pa nəba tori lʋʋ nii tə tarʋ wa, nə dwíí lɩ̀à tə wa.» Yá ba dàń zìlí Ba-Yígúrə́-Jə-Tiu nii, ba ga pa tori Selofadə bwɩ̀ɩ́ tə nə, ba nyɩna nubɩa tə titəŋi wa. 5 Ba twá pwárʋ́ nə, ba ma pa lʋʋ nii tə bwálá fugə, Manase dwíí tə nə. Kʋ dàń súrí Galadə də Baswan lʋʋ nii tə nə, kʋ nə wulə Zʋrədɛn mʋnaa tə yɩɩ yipɩan con. 6 Cɩ́gá, Manase bwɩ̀ɩ́ tə də nɩ tori, ʋ bɩ̀á tə titəŋi wa. Yá Galadə lʋʋ nii tə dàń yɩn Manase dwíí lɩ̀à tə duən tə nyiən.

7 Manase dwíí nagwanaa tə sɩswɩan zɩgɩ Aswɛrə dwíí tə lʋʋ nii nə, jɩzən saparʋ con, tə va tə nan Mikəmetatə nə, kʋ nə wulə Siswɛmə yáá con, jɩgwiə saparʋ con. Yá tə vəli tə nan Eyin-Tapuwa tɩ̀án tə vàn con. 8 Tapuwa tɩʋ tə yà yɩ kʋ wulə Manase dwíí nagwanaa tə, də Efərayimə dwíí nagwanaa tə sɩswɩan wa. Tapuwa tɩʋ tə tətə yà yɩ Efərayimə dwíí lɩ̀à tə nə tɩ. Yá kʋ nii tɩbii tə mʋ̀ yà yɩ Manase dwíí lɩ̀à tə nə tɩ. 9 Sɩswɩan tə yà cúə́ Kana nacoru tə jɩgwiə saparʋ con. Yá tɩan təntə tə nə wulə Manase dwíí nagwanaa tə vàn təntə nə, yà yɩ Efərayimə dwíí tə nə tɩ. Manase dwíí nagwanaa tə sɩswɩan, nacoru tə jɩzən saparʋ con, yà vəli tə jɩrɩ mʋʋ tə nə. 10 Jɩgwiə saparʋ con lʋʋ nii tə yà yɩ Efərayimə dwíí tə nə tɩ, yá Manase dwíí tə də ga tɩ jɩzən saparʋ con lʋʋ nii tə. Yá mʋʋ tə dàń yà nə yɩ ba sɩswɩan. Ba lʋʋ nii tə yà vəli kʋ nan Aswɛrə dwíí tə lʋʋ nii nə, jɩzən saparʋ con, kʋ ga va kʋ nan Yɩsakarə dwíí tə lʋʋ nii nə, yɩɩ yipɩan con. 11 Yɩsakarə dwíí tə, də Aswɛrə dwíí tə lʋʋ níə́ tə wa, Bɛtə-Swan də kʋ nagwanaa tɩan tə yà yɩ Manase dwíí tə nə tɩ. Yibəleyamə də kʋ nagwanaa tɩan tə də yà yɩ ba mʋ̀ nə tɩ. Dɔrə tɩ̀án də kʋ nagwanaa tɩan tə də yà yɩ ba mʋ̀ nə tɩ. Eyin-Dɔrə tɩ̀án də kʋ nagwanaa tɩan tə də yà yɩ ba mʋ̀ nə tɩ. Tanakə tɩ̀án də kʋ nagwanaa tɩan tə də yà yɩ ba mʋ̀ nə tɩ. Megido tɩ̀án də kʋ nagwanaa tɩan tə də yà yɩ ba mʋ̀ nə tɩ. Tə yà yɩ nagwanɛɛ batwa. 12 Manase dwíí lɩ̀à tə wà wànɩ́, ba jon tɩan təntə ba tɩnɩ. Yá Kanaan tɩ̀án tə dàń dí ba yuu, ba ja jə̀ń lʋʋ nii təntə wa. 13 Máŋá tə, Yɩzərayɛlə lɩ̀à tə nə nɩ dɩ̀àn zənzən, ba ken Kanaan tɩ̀án tə ywə́n tʋ̀tʋ̀nán wa. Yá ba dàń nə wà Kanaan tɩ̀án tə dɩgɩ, ba ga jon lʋʋ nii tə.

14 Dɩɩn don nə, Zʋzɛfə dwíí lɩ̀à tə vəli ba swɩ̀n sʋ̀ràn tə tə Zozuwe con, ba wʋ́: «Kʋ yɩ nətə, n ma pa nəba bwálɩ́ nədʋ cɩcɩ lʋʋ nii tə wa? N tətə na də Ba-Yígúrə́-Jə-Tiu fwa zəni nə yɩra, ʋ pa nə dwíí dáá zənzən!» 15 Yá Zozuwe le ba, ʋ wʋ́: «Á dwíí nə dáá zənzən, kʋ pa Efərayimə pɛɛn nagwanaa tə mùrì aba, sə á zʋ á goŋə pún tə, Perizi dwíí, də Rafa dwíí lʋʋ nii tə wa, á jə̀ń lá.» 16 Zʋzɛfə dwíí lɩ̀à tə ma pìí ba le, ba wʋ́: «Efərayimə pɛɛn nagwanaa tə cɩ́gá wà nəba yí. Yá kʋ tə nə súrí lá, Kanaan lʋʋ lɩ̀à tə mama, ba nə wulə vara tə wa, jə kwatara səsen kòrə̀n, tə nə yɩ lurən. Ba tə nə wulə Bɛtə-Swan də kʋ nagwanaa tɩan tə wa, də ba tə nə wulə Zwizəreyɛlə vara tə wa.» 17 Yá Zozuwe dàń swɩ̀n Efərayimə də Manase dwíí tə con, ba nə yɩ Zʋzɛfə bɩ̀á, ʋ wʋ́: «Á yɩ dwíí tə, á nə dáá zənzən, á ga jə dɩ̀àn zənzən də. Kʋ wà mɛ sə ba pa aba tori nədʋ cɩcɩ, lʋʋ nii tə wa. 18 Kʋ mʋ̀ yɩrɩ, á wá tɩnɩ pɛɛn nagwanaa tə. Ka nə swə ka yɩ pún də, á wá goŋə kʋ mama, á ga tɩnɩ kʋ, á ja va á yí kʋ sɩswɩan nii. Yá Kanaan lʋʋ lɩ̀à tə nə swə ba jə kwatara səsen kòrə̀n, tə nə yɩ lurən, ba ga jə dɩ̀àn də, á tə wá dɩŋa ba, á ga jon bwálɩ́ tə.»