Efərayimə də Manase dwíə́ tə lʋʋ nii
16
1 Ba pɩn tori Zʋzɛfə bɩ̀á tə nə, lʋʋ nii tə tarʋ wa. Ba lʋʋ nii tə zɩgɩ Zʋrədɛn mʋnaa tə nə, Zweriko nii nə, Zweriko nɩ́á tə yɩɩ yipɩan con, kʋ twá kasɔɔ lanworu tə wa, kʋ va kʋ jɩrɩ Betɛlə pɛɛn nagwanaa tə nə. 2 Ba lʋʋ nii tə zɩgɩ Betɛlə, kʋ va kʋ nan Luzə nə. Kʋ vəli kʋ twá Arəka lʋʋ nii sɩswɩan con, Atarɔtə nə. 3 Yá kʋ dàń pìí kʋ cú yɩɩ yizwɩa con, Yafəlɛtə dwíí tə lʋʋ nii sɩswɩan con. Kʋ vəli kʋ nan tɩa con Bɛtə-Horon nagwanaa tə nə. Kʋ twá Gezɛrə, kʋ va kʋ jɩrɩ mʋʋ tə nə. 4 Mə lʋʋ nii təntə nə yɩn Zʋzɛfə bɩ̀á Manase də Efərayimə dwíí tə tori.5 Nə̀ń Efərayimə dwíí tə lʋʋ nii sɩswɩan, kʋ mɛ də ba sànɩ́ tə. Jɩgwiə saparʋ con, ba lʋʋ nii tə sɩswɩan zɩgɩ Atarɔtə-Adarə yɩɩ yipɩan con, tə va tə yí yuu con Bɛtə-Horon. 6 Yá sɩswɩan tə zɩgɩ lá, tə va tə jɩrɩ mʋʋ tə nə. Mikəmetatə tɩʋ tə nə yɩ jɩzən saparʋ con sɩswɩan tə nii máŋá. Yɩɩ yipɩan con, sɩswɩan tə kɩkarɩ tə twá Tanatə-Silo tɩʋ tə yɩɩ yipɩan con, tə kɛ̀ń tə va Yanʋa con. 7 Yá tə zɩgɩ Yanʋa, tə lɛ tə cú Atarɔtə də Narata. Tə pórí Zweriko nə, tə ga kɛ̀ń tə jɩrɩ Zʋrədɛn mʋnaa tə nə. 8 Jɩzən saparʋ con, sɩswɩan tə zɩgɩ Tapuwa nə, tə va yɩɩ yizwɩa con, Kana nacoru tə con, tə kɛ̀ń tə jɩrɩ mʋʋ tə nə. Mə lʋʋ nii təntə nə yɩn Efərayimə dwíí tə, də ba sànɩ́ tə tori. 9 Kʋ dàń súrí tɩan tə, də tə nii tɩbii tə mama nə, ba nə lɩ ba pa Efərayimə dwíí tə nə, Manase dwíí tə lʋʋ nii wa. 10 Efərayimə dwíí tə wà wànɩ́ ba dɩŋa Kanaan tɩ̀án tə, ba yà nə wulə Gezɛrə nə. Yá Kanaan tɩ̀án tə dàń yɩn Efərayimə dwíí tə wa, kʋ bà kʋ yí zə̀n. Efərayimə dwíí tə dàń nə ken Kanaan tɩ̀án tə, ywə́n tʋ̀tʋ̀nán wa.