<<    <     Zozuwe     15     >    >> 
Zwida dwíí tə lʋʋ nii
15
1 Zwida dwíí tə də ba sànɩ́ tə lʋʋ nii tə yà vəli kʋ nan Edomə lʋʋ nii tə sɩswɩan con, Sin kasɔɔ lanworu tə wa, jɩgwiə saparʋ con. 2 Yá ba lʋʋ nii tə jɩgwiə saparʋ con sɩswɩan tə zɩgɩ Nəkuən mʋʋ tə nii tə nə daa Negɛbə con tə, 3 tə va tə nan Akərabimə cwəŋə dədolu tə jɩgwiə saparʋ con. Tə twá Sin, tə lɛ tə dɩ̀ Kadɛswə-Barəneya jɩgwiə saparʋ con. Tə zɩgɩ lá nə, tə twá Ɛsəron, tə lɛ tə dɩ̀ Adarə con, yá tə kɩkarɩ tə va Karəka. 4 Sɩswɩan tə twá Asəmon, tə va tə nan Ezwipətə nacoru tə nə, tə kɛ̀ń tə jɩrɩ mʋʋ tə nə. Mə Zwida dwíí tə lʋʋ nii jɩgwiə saparʋ con sɩswɩan nə nətʋ. 5 Yɩɩ yipɩan con, sɩswɩan tə zɩgɩ Nəkuən mʋʋ tə nə, tə va tə nan bwálɩ́ tə nə, Zʋrədɛn mʋnaa tə nə twi ka jɩrɩ Nəkuən mʋʋ tə nə. Mə jɩzən saparʋ con sɩswɩan tə də yɩ tə sinti kʋ bwálɩ́ təntə wa, Zʋrədɛn mʋnaa tə nə twi ka jɩrɩ Nəkuən mʋʋ tə nə. 6 Tə zɩgɩ lá tə dɩ̀ Bɛtə-Hɔgəla con, tə lɛ tə twá Bɛtə-Araba jɩzən saparʋ con. Yá sɩswɩan tə kɛ̀ń tə dɩ̀ tə yí Ribɛn bìú Bohan kapan tə. 7 Sɩswɩan tə twá Akɔrə vara tə wa, tə kɛ̀ń tə va Debirə. Tə galɩ tə nan jɩzən saparʋ con, tə kɩkarɩ tə va Giləgalə con, kʋ nə wulə Adumimə cwəŋə dədolu tə yáá con, nacoru tə jɩgwiə saparʋ con. Tə twá Eyin-Swemɛswə nɩ́á tə nii nə, tə nan tə jɩrɩ Eyin-Rogɛlə nə. 8 Sɩswɩan tə zɩgɩ lá, tə twá Bɛn-Hinomə vara tə nə, Yebusə (kʋ mʋ̀ nə nə yɩ Zwerizalɛmə) paan tə jɩgwiə saparʋ con. Yá tə dɩ̀gà tə twá paan tə yupara wa. Paan təntə yɩ ka wulə Hinomə vara tə yáá con, yɩɩ yizwɩa con. Tə vəli tə nan Rafa digə tə nii nə, jɩzən saparʋ con. 9 Tə zɩgɩ paan tə yuu wa, tə tɩɩn tə va tə nan Nɛfətʋa nɩ́á tə nii nə. Tə kɛ̀ń tə va tɩan tə con, tə nə wulə Efəron paan tə con. Yá tə kɩkarɩ tə twá Baala, kʋ yɩrɩ don nə yɩ Kiriyatə-Yarimə. 10 Sɩswɩan tə kɩkarɩ tə twá Baala yɩɩ yizwɩa con, tə lɛ tə va Seyirə pɛɛn tə con. Tə vəli tə twá Yarimə paan tə jɩzən saparʋ con. Paan təntə yɩrɩ don nə yɩ Kesalon. Tə twá Timəna, tə lɛ tə cú Bɛtə-Swemɛswə con. 11 Sɩswɩan tə twi tə jɩrɩ paan tə səpuni nə, Ekəron jɩzən saparʋ con. Yá tə zɩgɩ lá, tə gugoli tə va Swikaron. Tə twá Baala paan tə con, tə va tə nan Yabəneyɛlə nə, yá tə kɛ̀ń tə jɩrɩ mʋʋ tə nə. 12 Mʋʋ nəfarʋa tə, də kʋ nii tɩan tə dàń yà nə yɩ Zwida dwíí tə lʋʋ nii yɩɩ yizwɩa con sɩswɩan. Mə Zwida dwíí tə, də ba sànɩ́ tə lʋʋ nii sɩswɩan nə nətʋ.
13 Ba pɩn tori Yefune bìú Kalɛbə nə, Zwida dwíí nagwanaa tə wa, ndə Ba-Yígúrə́-Jə-Tiu yà nə pɩn nii Zozuwe nə, sə ʋ tʋn kʋ nətʋ. Kalɛbə tori təntə nə yɩ Kiriyatə-Arəba tɩʋ tə, kʋ yɩrɩ dàń nə lwàń kʋ jì Ebəron. Anakə dwíí tə nɩbɛɛ yɩrɩ yà nə yɩ Arəba. 14 Yá Kalɛbə dàń ta tɩʋ tə, ʋ jon Anakə bɩ̀á batwa tə con. Ba mʋ̀ nə yɩ Sweswayi, də Ahiman, də Taləmayi. Mə ba mʋ̀ nə yɩ Anakə dwíí tə. 15 Kalɛbə zɩgɩ Ebəron, ʋ va ʋ ta Debirə. Fuən nə, Debirə yɩrɩ yà nə yɩ Kiriyatə-Sefɛrə. 16 Kalɛbə swɩ̀n ʋ wʋ́: «À wá pa à bʋ̀á Akəsa lìù tə nə, ʋ nə wá ta Kiriyatə-Sefɛrə tɩʋ tə, ʋ də́.» 17 Yá Kenazə bìú Ɔtəniyɛlə, ʋ nə yɩ Kalɛbə nubiu, ta Kiriyatə-Sefɛrə tɩʋ tə, ʋ də́. Yá Kalɛbə dàń pɩn ʋ bʋ̀á Akəsa, Ɔtəniyɛlə nə, ʋ ma fwa ʋ kan. 18 Máŋá tə wa, Akəsa nə twi Ɔtəniyɛlə con, ʋ sugu Ɔtəniyɛlə ʋ kə, sə ʋ lòrì kárá ʋ nyɩna Kalɛbə con. Kʋ kwa nə, Akəsa dɩ̀gà ʋ bɩ̀nà, ʋ va ʋ cú ʋ nyɩna tə con. Yá Kalɛbə dàń bwe wá, ʋ wʋ́: «Bɛ̀ɛ̀ nə n pɩ̀à?» 19 Akəsa ma le, ʋ wʋ́: «À lòrì sə n fwa zəni à yɩra. Cɩ́gá, nɩ́á tə̀lə́ Negɛbə tɩa tə wa, n nə pɩn nə. Kʋ mʋ̀ yɩrɩ, à lòrì sə n pa nə nabuliyɩa. Yá Kalɛbə dàń pɩn wá, yuu con nabuliyɩa tə, də də̀ń con nabuliyɩa tə. 20 Mə lʋʋ nii təntə nə yɩn Zwida dwíí tə, də ba sànɩ́ tə tori. 21 Nə̀ń tɩan tə nə wulə Zwida dwíí nagwanaa Negɛbə tə wa, kʋ nə daa Edomə sɩswɩan con. Kʋ yɩ Kabəseyɛlə, də Edɛrə, də Yagurə, 22 də Kina, də Dimona, də Adada, 23 də Kədɛswə, də Hasɔrə, də Yɩtənan, 24 də Zifə, də Telɛmə, də Beyalɔtə, 25 də Hasɔrə-Hadata, də Keriyɔtə-Ɛsəron, kʋ yɩrɩ don nə yɩ Hasɔrə, 26 də Amamə, də Swema, də Molada, 27 də Hasarə-Gada, də Ɛswəmon, də Bɛtə-Pelɛtə, 28 də Hasarə-Swuwalə, də Bɛrəsweba, də Bizəyotəya, 29 də Baala, də Yimə, də Esɛmə, 30 də Ɛlətoladə, də Kesilə, də Ɔrəma, 31 də Sikəlagə, də Madəmana, də Sansana, 32 də Lebawɔtə, də Swiləhimə, də Ayin, də Rimon. Tə mama fwa tɩan sapʋa də nʋgʋ, də tə nii tɩbii.
33 Nə̀ń tɩan tə nə wulə Swefela tə wa. Kʋ yɩ Ɛswətawɔlə, də Sora, də Aswəna, 34 də Zanʋa, də Eyin-Ganimə, də Tapuwa, də Enamə, 35 də Yarəmutə, də Adulamə, də Soko, də Azeka, 36 də Swarayimə, də Aditayimə, də Gedera, də Gederotayimə. Tɩan fugə də banɩa, də tə nii tɩbii.
37 Tɩan duən, tə tə nə wulə lá nə yɩ Senan, də Hadaswa, də Migədalə-Gadə, 38 də Dileyan, də Misəpe, də Yɔkəteyɛlə, 39 də Lakiswə, də Bɔsəcatə, də Egəlon, 40 də Kabon, də Lahəmasə, də Kitəliswə, 41 də Gederɔtə, də Bɛtə-Dagon, də Naama, də Makeda. Tɩan fugə də bardʋ, də tə nii tɩbii. 42 Tɩan duən, tə nə súrí lá nə yɩ Libəna, də Etɛrə, də Aswan, 43 də Yifəta, də Aswəna, də Nesibə, 44 də Keyila, də Akəzibə, də Mareswa. Tɩan nʋgʋ, də tə nii tɩbii. 45 Ekəron də kʋ nii tɩbii tə twá tə wulə Zwida dwíí nagwanaa tə wa. 46 Kʋ nə zɩgɩ Ekəron, kʋ va kʋ nan mʋʋ tə con, tɩan tə mama, tə nə bwə́lə́ də Aswədɔdə, də tə nii tɩbii tə twá tə wulə lá. 47 Aswədɔdə də kʋ nii tɩbii tə, də Gaza də kʋ nii tɩbii tə, də twá tə wulə lá, kʋ va kʋ nan Ezwipətə nacoru tə, də mʋʋ nəfarʋ tə, də kʋ nii tɩan tə nə.
48 Nə̀ń tɩan tə nə wulə pɛɛn nagwanaa tə wa. Kʋ yɩ Swamirə, də Yatirə, də Soko, 49 də Dana, də Kiriyatə-Sana, kʋ yɩrɩ don nə yɩ Debirə, 50 də Anabə, də Ɛswətemʋa, də Animə, 51 də Goswɛn*, də Holon, də Gilo. Tə fwa tɩan fugə də nədʋ, də tə nii tɩbii.
52 Tɩan duən, tə tə nə wulə lá nə yɩ Arabə, də Ruma, də Eswan, 53 də Yanumə, də Bɛtə-Tapuwa, də Afeka, 54 də Humeta, də Kiriyatə-Arəba, kʋ yɩrɩ don nə yɩ Ebəron, də Siyɔrə. Tə fwa tɩan nʋgʋ, də tə nii tɩbii.
55 Tɩan duən, tə nə súrí lá, nə yɩ Mawon, də Karəmɛlə, də Zifə, də Yuta, 56 də Zwizəreyɛlə, də Yɔkədeyamə, də Zanʋa, 57 də Kayin, də Gibeya, də Timəna. Tə fwa tɩan fugə, də tə nii tɩbii.
58 Tɩan duən, tə tə nə wulə lá nə yɩ Haləhulə, də Bɛtə-Surə, də Gedɔrə, 59 də Maaratə, də Bɛtə-Anɔtə, də Elətekonə. Tə fwa tɩan bardʋ, də tə nii tɩbii.
60 Kʋ tə jɩn Kiriyatə-Baalə, kʋ yɩrɩ don nə yɩ Kiriyatə-Yarimə, də Raba, kʋ súrí lá. Tə fwa tɩan bələ, də tə nii tɩbii.
61 Nə̀ń tɩan tə nə wulə kasɔɔ lanworu tə wa. Kʋ yɩ Bɛtə-Araba, də Midin, də Sekaka, 62 də Nibəswan, də Yirə-Mɛla, də Eyin-Gedi. Tə fwa tɩan bardʋ, də tə nii tɩbii.
63 Zwida dwíí tə wà wànɩ́ ba dɩŋa Yebusə tɩ̀án tə, ba yà nə wulə Zwerizalɛmə wa. Yá Yebusə tɩ̀án tə, də Zwida dwíí tə mɛ dàń yɩn Zwerizalɛmə wa, kʋ bà kʋ yí zə̀n.