Zʋrədɛn mʋnaa tə yɩɩ yizwɩa con lʋʋ nii tə tarʋ
14
1 Nə̀ń kʋ tə nə yɩn Yɩzərayɛlə lɩ̀à tə tori, Kanaan lʋʋ nii tə tarʋ wa. Yɩɩ joŋwanʋ Eleyazarə, də Nun bìú Zozuwe, də Yɩzərayɛlə dwíə́ tə dìì tɩ̀án tə nə tarɩ kʋ, ba pa Yɩzərayɛlə lɩ̀à tə nə. 2 Kʋ yɩ ba pwárɩ́, ba ma tara kʋ lʋʋ nii təntə, ba pa Yɩzərayɛlə lɩ̀à dwíə́ nʋgʋ də faan tə nə, ndə Ba-Yígúrə́-Jə-Tiu nə pɩn nii Moyizə nə, sə kʋ tʋn nətʋ. 3 Cɩ́gá, Moyizə yà dí yáá, ʋ pa tori Yɩzərayɛlə dwíə́ bələ də faan tə nə, lʋʋ nii tə wa, kʋ nə wulə Zʋrədɛn mʋnaa tə yɩɩ yipɩan con. Yá ʋ wà tori Levi dwíí tə mʋ̀ nə pɩn, lʋʋ nii tə tarʋ wa. 4 Cɩ́gá, Zʋzɛfə bɩ̀á tə yà fwa dwíə́ bələ. Manase dwíí tə, də Efərayimə dwíí tə. Yá ba wà tori Levi dwíí tə mʋ̀ nə pɩn, lʋʋ nii tə tarʋ wa. Tɩan nə ba kúrí, sə Levi dwíí tə ya tə wa, sə ba vàná, də ba jɩjə wiən duən də ga ya tɩan təntə kasɔɔ níə́ tə nə. 5 Yɩzərayɛlə lɩ̀à tə dàń tarɩ lʋʋ nii tə, ndə Ba-Yígúrə́-Jə-Tiu nə pɩn nii Moyizə nə, sə kʋ tʋn nətʋ.Ba pɩn Ebəron nagwanaa tə Kalɛbə nə
6 Zwida dwíí tə wa lɩ̀à twi ba yí Zozuwe Giləgalə nə, də lʋʋ nii tə tarʋ tə wà sinti. Yá Yefune bìú Kalɛbə, ʋ nə yɩ Kenazə sàń tə wa lìù, dàń swɩ̀n Zozuwe con, ʋ wʋ́: «N yə̀ə́ yoo tə, Ba-Yígúrə́-Jə-Tiu nə swɩ̀n ʋ tʋtʋnʋ Moyizə con, à də mʋ́ yuu wa, Kadɛswə-Barəneya nə. 7 À yà jə bɩna sapwɩlə, máŋá tə wa Ba-Yígúrə́-Jə-Tiu tʋtʋnʋ Moyizə nə zɩgɩ Kadɛswə-Barəneya nə, ʋ tʋn nə sə à va à mɩ̀àn lʋʋ nii kʋ tə, à na kʋ nə yɩ nətʋ. Yá à pìí à bà, à tún à nii à bɩrɩ wá, də bɩcan nədʋ. 8 Yá à nubɩa tə mʋ̀, à də ba nə vəli, pɩn lalʋʋ tə jɩɩn gwàrɩ̀. Yá à mʋ̀ ga twá Ba-Yígúrə́-Jə-Tiu nə, ʋ nə yɩ à tíú Yɩɩ, də bɩcan nədʋ. 9 Kʋ dɩɩn təntə nə, Moyizə kàn nii, ʋ pa nə. Ʋ swɩ̀n də, à nə twá Ba-Yígúrə́-Jə-Tiu nə, ʋ nə yɩ ʋ Yɩɩ, də bɩcan nədʋ tə yɩrɩ, lʋʋ nii tə, à nə jírí kʋ wa, wá ya à də à dwíí tə nyiən, máŋá mama wuuu. 10 Yá nə̀ń kʋ nə, Ba-Yígúrə́-Jə-Tiu pɩn nə mɩdarɩ, ndə ʋ nə swɩ̀n də, ʋ wá tʋn kʋ nətʋ. Ba-Yígúrə́-Jə-Tiu nə pɩn kʋ nii təntə Moyizə nə, kʋ jə bɩna sapwɩlə də bonu sɩ́ʋ́n nə. Kʋ yɩn máŋá tə wa, Yɩzərayɛlə lɩ̀à tə yà nə wulə kasɔɔ lanworu tə wa, ba vəli. Yá sɩ́ʋ́n nə, à dàń jə bɩna sapwɩnɩa də bonu. 11 Zə̀n kʋ tə, à tə jə dɩ̀àn ndə dɩɩn tə nə Moyizə nə tʋn nə tə. À tə jə dɩ̀àn, à wàá kʋ̀ʋ̀ tətə à naŋa à tɛ, də à pìí à twi. 12 Sɩ́ʋ́n nə, n dàń pa nə pɛɛn nagwanaa ka tə, Ba-Yígúrə́-Jə-Tiu dɩɩn nə kàn nii, də ʋ wá pa nə. Cɩ́gá, kʋ dɩɩn təntə nə, n nì də Anakə dwíí tə nə wulə lá, yá ba tɩan tə yɩ tɩfaran, ba lwə̀ ba kɩkarɩ də biritaŋʋ. Kʋ wàá də, Ba-Yígúrə́-Jə-Tiu wá ya də nə, yá à wá dɩŋa ba, à ga jon lʋʋ nii tə, ndə Ba-Yígúrə́-Jə-Tiu nə swɩ̀n kʋ nətʋ.»
13 Yá Zozuwe dàń lòrì sə Yɩɩ fwa zəni Kalɛbə yɩra, yá ʋ dàń pɩn wá Ebəron nagwanaa tə, sə ka ya ʋ tori. 14 Mə kʋ zɩgɩ nətʋ, Ebəron ma jì Kalɛbə, ʋ nə yɩ Kenazə sàń tə wa lìù, də ʋ dwíí tori, də zə̀n mama. Kʋ yɩ Kalɛbə nə twá Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ, də bɩcan nədʋ tə yɩrɩ. 15 Fuən nə, Ebəron yɩrɩ yà nə yɩ Kiriyatə-Arəba. Anakə dwíí tə wa babɩʋ don yɩrɩ yà nə yɩ Arəba. Kʋ nə zɩgɩ kʋ máŋá təntə wa, lʋʋ nii tə dàń nɩ sìə́, kʋ̀ʋ̀ kʋ́ʋ̀ wà lá yɩn.