Lʋʋ níə́ tə nə ga, sə Yɩzərayɛlə lɩ̀à tə ta ba də́
13
1 Zozuwe yà kwɩn zənzən, ʋ jì bazʋnʋ, ʋ bɩna nə dáá. Yá Ba-Yígúrə́-Jə-Tiu dàń swɩ̀n ʋ con, ʋ wʋ́: «N kwɩn zənzən, n jì bazʋnʋ. N bɩna dáá. Yá lʋʋ nii tə nə ga, á nə mɛ sə á ta á jon á tɩnɩ, tə dáá zənzən. 2 Nə̀ń lʋʋ nii tə, kʋ tə nə ga. Kʋ yɩ Filisi nagwanɛɛ tə mama, də Gesurə lʋʋ nii tə mama. 3 Lʋʋ nii tə kʋ tə nə ga tə, zɩgɩ Swɩhɔrə buu tə nə, kʋ nə ken sɩswɩan də Ezwipətə lʋʋ nii tə, kʋ va kʋ nan Ekəron nagwanaa tə jɩzən saparʋ con. Kʋ lʋʋ nii təntə twá kʋ wulə Kanaan lʋʋ nii tə wa. Yá kʋ lʋʋ nii təntə yuu wa nə, Filisi pɛ̀gá bonu tə də́ pàrɩ̀. Pɛ̀gá təntə nə yɩ Gaza pɩ̀ʋ́, də Aswədɔdə pɩ̀ʋ́, də Aswəkelon pɩ̀ʋ́, də Gatə pɩ̀ʋ́, də Ekəron pɩ̀ʋ́. Ava tɩ̀án də yà wulə kʋ lʋʋ nii təntə 4 jɩgwiə saparʋ con. Kʋ súrí Kanaan lʋʋ nii tə mama nə, kʋ nə zɩgɩ Meyara nə, kʋ nə yɩ Sidon tɩ̀án nə tɩ, kʋ va kʋ nan Afɛkə, də Amɔrə dwíí lʋʋ nii tə sɩswɩan nə. 5 Kʋ súrí Gebalə lʋʋ nii tə, də Liban pɛɛn nagwanaa tə mama, kʋ nə wulə yɩɩ yipɩan con, kʋ nə zɩgɩ Baalə-Gadə nə, kʋ nə wulə Ɛrəmon paan tə də̀ń con, kʋ va kʋ nan Lebo-Hamatə nə. 6 Kʋ súrí kʋ mʋ̀ pɛɛn nagwanaa lɩ̀à təntə mama nə, ba nə yɩ Sidon tɩ̀án, kʋ nə zɩgɩ Liban pɛɛn tə nə, kʋ va kʋ nan Misərefotə-Mayimə nə. À wá dɩŋa ba mʋ̀ lɩ̀à təntə mama, à lɩ lʋʋ nii tə wa, à ga jon kʋ, à pa Yɩzərayɛlə lɩ̀à tə nə, sə ba tɩnɩ kʋ. Yá n dàń wá twá pwárʋ́ nə, n ma tara lʋʋ nii tə, n pa Yɩzərayɛlə dwíə́ tə nə, sə dwíí mama ja kʋ tori, ndə à nə pɩn mʋ́ nii nətʋ. 7 Sɩ́ʋ́n nə, n dàń pwɛ̀ lʋʋ nii kʋ tə, n ma tara Yɩzərayɛlə dwíə́ nʋgʋ tə, də Manase dwíí faan tə, sə dwíí mama ja kʋ tori.Zʋrədɛn mʋnaa tə yɩɩ yipɩan con lʋʋ nii tə tarʋ
8 Ribɛn dwíí tə, də Gadə dwíí tə, də Manase dwíí faan tə don tə mʋ̀ yà dí yáá ba na ba tori, lʋʋ nii tə wa kʋ nə wulə Zʋrədɛn mʋnaa tə kwa con, yɩɩ yipɩan con. Bwálɩ́ təntə yɩ Ba-Yígúrə́-Jə-Tiu tʋtʋnʋ Moyizə nə pɩn kʋ ba. 9 Ba lʋʋ nii tə zɩgɩ Arɔwɛrə nə, kʋ nə wulə Arənon nacoru tə nii nə, də tɩʋ tə nə, kʋ nə wulə vara tə titəŋi wa, də Medeba digə tə mama, kʋ va kʋ nan Dibon nə. 10 Kʋ tə jɩn Amɔrə dwíí tə pɩ̀ʋ́ Sihon tɩan tə mama, kʋ súrí lá, kʋ va kʋ nan Amon dwíí tə lʋʋ nii sɩswɩan nə. Sihon yà yɩ ʋ də́ pàrɩ̀ Ɛswəbon nə. 11 Kʋ tə jɩn Galadə lʋʋ nii tə, də Geswurə də Maaka nagwanɛɛ tə, də Ɛrəmon paan tə mama, də Baswan mama kʋ súrí lá, kʋ va kʋ nan Saləka nə. 12 Kʋ tə jɩn pɩ̀ʋ́ Ogə payuu tə mama Baswan nə, kʋ súrí lá. Ogə yà yɩ ʋ də́ pàrɩ̀ Aswətarɔtə də Edəreyi nə, yá ʋ yà yɩ Rafa dwíí tə wa talɩkwa lìù don. Moyizə ta pɛ̀gá təntə ʋ də́, ʋ ga jon lʋʋ nii tə ba con. 13 Yá də kʋ nətʋ mɛ, Yɩzərayɛlə lɩ̀à wà wànɩ́ ba dɩŋa Geswurə tɩ̀án, də Maaka tɩ̀án, ba ga jon lʋʋ nii tə. Yá kʋ dàń pɩn Geswurə tɩ̀án tə, də Maaka tɩ̀án tə tə wulə Yɩzərayɛlə lɩ̀à tə wa, də zə̀n mama.
14 Levi dwíí tə cɩcɩ nə nə, ba wà tori pɩn, lʋʋ nii tə tarʋ wa. Jwəŋə wiən tə ba nə sʋ̀rɩ́*, ba pɩn Ba-Yígúrə́-Jə-Tiu nə, ʋ nə yɩ Yɩzərayɛlə lɩ̀à Yɩɩ, yà nə yɩ ba tori. Ba-Yígúrə́-Jə-Tiu yà dí yáá ʋ swɩ̀n kʋ nətʋ tə, Levi dwíí tə con.
Ribɛn dwíí tə tori
15 Moyizə yà pɩn tori Ribɛn dwíí tə nə, lʋʋ nii tə tarʋ wa, kʋ mɛ də ba sànɩ́ tə. 16 Ba nagwanaa tə zɩgɩ Arɔwɛrə nə, kʋ nə wulə Arənon nacoru tə nii nə, də tɩʋ tə nə, kʋ nə wulə vara tə titəŋi wa, kʋ ja digə tə mama, ka nə wulə Medeba nii nə, kʋ súrí lá. 17 Kʋ tə jɩn Ɛswəbon, də kʋ tɩan tə mama, tə nə wulə digə tə wa, kʋ súrí lá. Tɩan təntə nə yɩ Dibon, də Bamɔtə-Baalə, də Bɛtə-Baalə-Meyon, 18 də Yahasə, də Kedemɔtə, də Mefatə, 19 də Kiriyatayimə, də Sibəma, də Serɛtə-Swaharə, kʋ nə wulə paan tə yuu wa, vara tə wa, 20 də Bɛtə-Pewɔrə, də Pisəga paan tə zizinu tə, də Bɛtə-Yeswimɔtə. 21 Yá kʋ nətʋ tə bɩrɩ də, digə tə wa tɩan tə mama, də Amɔrə dwíí tə pɩ̀ʋ́ Sihon payuu tə mama yà yɩ Ribɛn dwíí tə tori. Sihon yà yɩ ʋ də́ pàrɩ̀ Ɛswəbon nə. Moyizə yà ta Sihon də Madɩan pɛ̀gá tə, ʋ də́. Ba mʋ̀ yà nə yɩ Evi, də Rekɛmə, də Surə, də Urə, də Reba. Pɛ̀gá təntə yà yɩ Sihon kwa lɩ̀à, yá ba də yà wulə lʋʋ nii tə wa. 22 Bewɔrə bìú Balamə, ʋ nə yɩ vʋrʋ, də yɩn lɩ̀à tə wa Yɩzərayɛlə lɩ̀à tə nə gʋa də kwatara sɩ̀ʋ́, kʋ máŋá tə wa. 23 Yá Ribɛn dwíí tə nagwanaa tə sɩswɩan dàń yà nə yɩ Zʋrədɛn mʋnaa tə. Mə tɩan təntə, də tə nii tɩbii tə nə yɩn Ribɛn dwíí tə, də ba sànɩ́ tə tori.
Gadə dwíí tə tori
24 Moyizə yà pɩn tori Gadə dwíí tə nə, lʋʋ nii tə tarʋ wa, kʋ mɛ də ba sànɩ́ tə. 25 Yazɛrə, də tɩan tə mama tə nə wulə Galadə nə, də Amon dwíí tə lʋʋ nii tə faan, kʋ va kʋ nan Arɔwɛrə nə, kʋ nə wulə Raba yáá con, yà yɩ tə wulə ba nagwanaa tə wa. 26 Kʋ zɩgɩ Ɛswəbon, kʋ va kʋ nan Ramatə-Misəpe, də Betonimə nə. Kʋ zɩgɩ Mahanayimə, kʋ va kʋ nan Dəbirə nagwanaa tə sɩswɩan nə. 27 Yá Zʋrədɛn vara tə wa, ba nagwanaa tə zɩgɩ Bɛtə-Haramə, də Bɛtə-Niməra, də Sukotə, də Safon nə, də Sihon, ʋ nə yɩ Ɛswəbon pɩ̀ʋ́, payuu tə gɩganɩ nə, kʋ twá Zʋrədɛn mʋnaa tə yɩɩ yipɩan con, də ka nii tɩan tə nə, kʋ va kʋ nan Kinerɛtə buu tə nii nə, kʋ nə wulə Zʋrədɛn mʋnaa tə nii tə don nə, jɩzən saparʋ con. 28 Mə tɩan təntə, də tə nii tɩbii tə nə yɩn Gadə dwíí tə, də ba sànɩ́ tə tori.
Manase dwíí faan tə nə wulə Zʋrədɛn mʋnaa tə yɩɩ yipɩan con tə tori
29 Moyizə yà pɩn tori Manase dwíí faan tə nə, lʋʋ nii tə tarʋ wa, kʋ mɛ də ba sànɩ́ tə. 30 Ba nagwanaa tə zɩgɩ Mahanayimə, kʋ ja Baswan mama, də Baswan pɩ̀ʋ́ Ogə payuu tə mama, də pɩ̀ʋ́ Yayirə tɩbii sapwɩtwa tə mama, tə nə wulə Baswan nə, kʋ súrí lá. 31 Yá Galadə nagwanaa tə faan, də Aswətarɔtə, də Edəreyi, tə yà nə yɩ pɩ̀ʋ́ Ogə patɩan, Baswan nə, dàń jìgə̀ Manase bìú Makirə dwíí faan tə, də ba sànɩ́ tə tori.