Kwatara 1

Kwatara yáá tɩ̀án

tʋ̀tʋ̀nán yoo

Yɩzərayɛlə lɩ̀à tə jə̀ə́ Kanaan lʋʋ nii wa

1 Zozuwe tɩan kwa nə, Yɩzərayɛlə lɩ̀à tə bwe Ba-Yígúrə́-Jə-Tiu, sə ba jə́n ba dwíə́ tə wa, dwíí tə nə mɛ sə ba dí yáá, ba va ba ta Kanaan lʋʋ lɩ̀à tə. 2 Ba-Yígúrə́-Jə-Tiu ma le ba, ʋ wʋ́: «Zwida dwíí tə nə wá dí yáá ba va. Cɩ́gá, à ken lʋʋ nii tə ba jɩɩn wa.» 3 Zwida dwíí tə ma swɩ̀n Zwida nubiu Simeyon dwíí tə con, ba wʋ́: «Á bɩ̀àn sə nə va nagwanaa tə wa, ba nə tarɩ ba pa nəba, á san nəba sə nə ta Kanaan lʋʋ lɩ̀à tə. Kʋ kwa nə, nə də wá va nagwanaa tə wa, ba nə tarɩ ba pa aba, nə san aba nə ta.» Yá Simeyon dwíí tə dàń zàn ba kwé Zwida dwíí tə. 4 Ba vəli, yá Ba-Yígúrə́-Jə-Tiu pɩn ba ta Kanaan lʋʋ lɩ̀à tə, də Perizi dwíí tə, ba də́. Ba gʋa bara mʋ̀rʋ̀ fugə Bezɛkə nə. 5 Ba nɩ pɩ̀ʋ́ Adoni-Bezɛkə, Bezɛkə tɩʋ tə wa, yá ba ta wá. Ba ta Kanaan lʋʋ lɩ̀à tə, də Perizi dwíí tə, ba də́. 6 Adoni-Bezɛkə yà dəri sə ʋ jɛ́n, yá ba dɩŋɩ wá ba ja, ba goŋə ʋ jɩfʋnbɩran, də ʋ nafʋnbɩran. 7 Adoni-Bezɛkə dàń swɩ̀n, ʋ wʋ́: «Pɛ̀gá sapwɩtwa də fugə, à nə goŋi ba jɩfʋnbɩran, də ba nafʋnbɩran, yà nə twɩn wodiu mumunə, à wodiu diŋə bwálɩ́ nə ba də́. Kʋ tə à nə tʋn à duən yɩra nə, Yɩɩ pìí ʋ ŋwɩ́n à tətə yɩra.» Ba ja wá ba va Zwerizalɛmə, yá mə lá nə ʋ tɩga.

8 Zwida dwíí tə ta Zwerizalɛmə ba də́. Ba gʋa tɩʋ tə ləzwənbɩa tə, də kwatara sɩ̀ʋ́, ba ga kə mən tɩʋ tə nə. 9 Kʋ kwa nə, Zwida dwíí tə kɛ̀ń ba va ba ta Kanaan lʋʋ lɩ̀à tə, ba yà nə wulə pɛɛn nagwanaa tə wa, də Negɛbə* nagwanaa tə wa, də Swefela* nagwanaa tə wa.

10 Zwida dwíí tə zɩ̀n kʋ̀ʋ̀ də Kanaan lʋʋ lɩ̀à tə, ba yà nə wulə Ebəron nə (fuən nə, Ebəron yɩrɩ yà nə yɩ Kiriyatə-Arəba). Ba ta Sweswayi, də Ahiman, də Taləmayi dwíə́ tə, ba də́. 11 Ba zɩgɩ lá nə, ba va ba ta Debirə tɩ̀án (fuən nə, Debirə yɩrɩ yà nə yɩ Kiriyatə-Sefɛrə). 12 Yá Kalɛbə dàń swɩ̀n, ʋ wʋ́: «Lìù tə, ʋ nə ta Kiriyatə-Sefɛrə tɩʋ tə ʋ də́, à wá pa à bʋ̀á Akəsa kʋ tíú nə, sə ʋ ma fwa ʋ kan.» 13 Ɔtəniyɛlə ma ta Kiriyatə-Sefɛrə, ʋ də́. Ɔtəniyɛlə yà yɩ Kalɛbə nyánʋ́ Kenazə bìú. Yá Kalɛbə dàń pɩn ʋ bʋ̀á Akəsa, Ɔtəniyɛlə nə, ʋ ma fwa ʋ kan. 14 Máŋá tə, Akəsa nə twi Ɔtəniyɛlə con, ʋ sugu Ɔtəniyɛlə, sə ʋ lòrì kárá, ʋ nyɩna Kalɛbə con. Akəsa nan ʋ bɩ̀nà yuu ʋ cú. Kalɛbə ma bwe wá, ʋ wʋ́: «Bɛ̀ɛ̀ nə n pɩ̀à?» 15 Ʋ le wá, ʋ wʋ́: «À lòrì sə n fwa zəni à yɩra. À lòrì sə n pa nə nɩ́á bwálá. Cɩ́gá, tɩa tə n nə pɩn nə, Negɛbə nagwanaa tə wa, yɩ tɩkʋrʋ.» Yá Kalɛbə dàń pɩn wá yuu con nabuliyɩa, də də̀ń con nabuliyɩa.

16 Yàrá dwíí tə, ba wa lìù don nə yɩ Moyizə tɩnbɛɛ, nan kʋra tɩʋ^a tə wa, ba twá Zwida dwíí tə nə, ba va ba jə̀ə́ Amalɛkə dwíí tə con, Zwida nagwanaa kasɔɔ lanworu tə wa, Aradə tɩʋ tə jɩgwiə saparʋ con.

17 Zwida dwíí tə, də ʋ nubiu Simeyon dwíí tə vəli ba ta Kanaan lʋʋ lɩ̀à tə nə wulə Sefatə nə, ba də́. Ba cʋ̀gʋ̀ tɩʋ tə mama mɩ́ámɩ́án*, ba ga dɩ kʋ yɩrɩ Ɔrəma.^b 18 Zwida dwíí tə tə ta Gaza tɩʋ tə, də kʋ nagwanaa tə, də Aswəkelon tɩʋ tə, də kʋ nagwanaa tə, də Ekəron tɩʋ tə, də kʋ nagwanaa tə, ba də́. 19 Ba-Yígúrə́-Jə-Tiu yɩn də Zwida dwíí tə, kʋ pa ba də́ dɩ̀àn pɛɛn nagwanaa tə yuu wa. Yá ba dàń nə wà wànɩ́, ba ta digə nagwanaa lɩ̀à tə mʋ̀, ba lɩ, lɩ̀à təntə yà nə jə lurən səsen kòrə̀n yɩrɩ.

20 Ba pɩn Ebəron tɩʋ tə Kalɛbə nə, ndə Moyizə yà nə pɩn nii nətʋ. Yá Kalɛbə dàń ta kʋ ʋ jon, Anakə dwíə́ batwa tə jɩɩn wa, ba yà nə wulə lá.

Kanaan lʋʋ lɩ̀à tə, Yɩzərayɛlə lɩ̀à tə nə wà wànɩ́, ba ta ba lɩ

21 Bɛnzwamɛn dwíí tə wà wànɩ́, ba ta Yebusə tɩ̀án tə, ba yà nə wulə Zwerizalɛmə wa, ba lɩ. Yá ba də Bɛnzwamɛn dwíí tə mɛ dàń yɩn Zwerizalɛmə wa, kʋ bà kʋ yí zə̀n.

22 Zʋzɛfə dwíí tə mʋ̀ vəli ba ta Betɛlə tɩʋ, yá Ba-Yígúrə́-Jə-Tiu yɩn də ba. 23 Zʋzɛfə dwíí tə dí yáá ba pa lɩ̀à va ba mɩ̀àn Betɛlə tɩʋ tə, ba lwarɩ kʋ mama (fuən nə, Betɛlə yɩrɩ yà nə yɩ Luzə). 24 Tʋntʋna tə nɩ bɛɛ don, də ʋ naŋa tɩʋ tə wa, ba ma swɩ̀n ʋ con, ba wʋ́: «Bɩrɩ nəba bwálɩ́ tə, nə nə wá twá, nə ma zʋ tɩʋ tə wa, yá nə wá fwa wʋywaŋʋ* n yɩra.» 25 Bɛɛ tə ma bɩrɩ ba bwálɩ́ tə, ba nə wá twá ba ma zʋ tɩʋ tə wa. Yá ba dàń zʋa, ba gʋ tɩʋ tə wa lɩ̀à tə də kwatara sɩ̀ʋ́, ba ga yá bɛɛ tə mʋ̀, də ʋ dìə̀ lɩ̀à mama, ba pa ba vìí. 26 Bɛɛ təntə vəli Ɛtə dwíí lʋʋ nii wa, ʋ lwà tɩʋ lá, ʋ dɩ kʋ yɩrɩ Luzə. Yá mə tɩʋ təntə yɩrɩ nə, də zə̀n mama.

27 Zʋzɛfə bìú Manase dwíí tə wà wànɩ́, ba ta Kanaan lʋʋ lɩ̀à tə, ba lɩ Bɛtə-Swan, də kʋ nii tɩbii tə wa, də Tanakə, də kʋ nii tɩbii tə wa, də Dɔrə, də kʋ nii tɩbii tə wa, də Yibəleyamə, də kʋ nii tɩbii tə wa, də Megido, də kʋ nii tɩbii tə wa. Yá Kanaan lʋʋ lɩ̀à tə dàń nyɩ́n dɩ̀àn, sə ba ya lʋʋ nii təntə wa. 28 Máŋá tə, Yɩzərayɛlə lɩ̀à tə nə twi ba na dɩ̀àn, ba ken Kanaan lʋʋ lɩ̀à tə tʋtʋncaran wa. Yá ba dàń nə wà ba wànɩ́, ba ta ba lɩ lʋʋ nii tə wa.

29 Zʋzɛfə bìú Efərayimə dwíí tə wà wànɩ́ ba ta Kanaan lʋʋ lɩ̀à tə, ba yà nə wulə Gezɛrə nə, ba lɩ. Yá ba də Efərayimə dwíí tə mɛ dàń yɩn Gezɛrə nə.

30 Zabulon dwíí tə wà wànɩ́ ba ta Kitəron tɩ̀án, də Nahalɔlə tɩ̀án, ba lɩ. Ba yɩn Zabulon dwíí tə titəŋi wa, yá Zabulon dwíí tə dàń nə ken ba tʋtʋncaran wa.

31 Azɛrə dwíí tə wà wànɩ́ ba ta Ako tɩ̀án, də Sidon tɩ̀án, də Alabə tɩ̀án, də Akəzibə tɩ̀án, də Hɛləba tɩ̀án, də Afikə tɩ̀án, də Rehɔbə tɩ̀án, ba lɩ. 32 Yá Azɛrə dwíí tə, də Kanaan lʋʋ lɩ̀à tə mɛ dàń yɩn lʋʋ nii tə wa. Cɩ́gá, ba wà ba wànɩ́ ba ta ba lɩ.

33 Nɛfətali dwíí tə wà wànɩ́ ba ta Bɛtə-Swemɛswə tɩ̀án, də Bɛtə-Anatə tɩ̀án, ba lɩ. Ba də Kanaan lʋʋ lɩ̀à tə mɛ dàń yɩn tɩan təntə wa. Yá Nɛfətali dwíí tə dàń ken Bɛtə-swemɛswə tɩ̀án, də Bɛtə-Anatə tɩ̀án, tʋtʋncaran wa.

34 Amɔrə dwíí tə dɩŋɩ Dan dwíí tə, ba kə pɛɛn tə wa. Ba wà yá ba pa ba cú varɩnaa tə nii nə. 35 Amɔrə dwíí tə dàń nyɩ́n dɩ̀àn, sə ba ya Harə-Herɛsə wa, də Ayalon wa, də Swaaləbimə wa. Yá kʋ nə vəli yáá, Zʋzɛfə dwíí tə dí dɩ̀àn ba yuu wa, ba ga kə ba tʋtʋncaran wa. 36 Amɔrə dwíí lʋʋ nii yà zɩgɩ Akərabimə cwəŋə dədolu tə nə, kʋ twá Sela, kʋ kɛ̀ń kʋ va yuu con.