Ba-Yígúrə́-Jə-Tiu caga ʋ lɩ̀à tə nii nə
2
1 Ba-Yígúrə́-Jə-Tiu tʋn ʋ malɩka, ka nan Giləgalə ka bà Bokimə, ka swɩ̀n Yɩzərayɛlə lɩ̀à tə con, ka wʋ́: «À lɩ aba Ezwipətə wa, à ja bà lʋʋ nii tə wa, à nə twá də durə à ma kàn nii, də à pɩn kʋ á nɩbara-ba nə. À yà swɩ̀n də à bá cʋ̀gʋ̀ à nimarʋ tə, à nə tún də aba, abada! 2 Yá á də wà mɛ sə á tún nimarʋ də Kanaan lʋʋ lɩ̀à tə. Á mɛ sə á cʋ̀gʋ̀ ba jwəŋə bwálá tə. Yá á wà à nii zìlí. Bɛ̀ɛ̀ nə pɩn á ma fwa nətʋ? 3 Kʋ mʋ̀ yɩrɩ, à mʋ̀ nə swɩ̀n kʋ, à kʋ́ʋ̀ bá dɩŋa ba à lɩ, á yáá con. Ba wá ya á nii nə, ba fɩfɩn aba. Yá ba yɩa tə wá ya ndə nyalɩ nə, tə ja aba.» 4 Máŋá tə, Ba-Yígúrə́-Jə-Tiu malɩka tə nə swɩ̀n sʋ̀ràn təntə Yɩzərayɛlə lɩ̀à tə con, ba lwə kori, ba wulə ba kwi. 5 Kʋ mʋ̀ nə pɩn, ba dɩ kʋ bwálɩ́ tə yɩrɩ Bokimə (kʋ də̀ń nə yɩ “lɩ̀à tə nə kwi”). Yá ba dàń fwa jwəŋə lá, ba pa Ba-Yígúrə́-Jə-Tiu nə.Zozuwe tɩan yoo
6 Zozuwe pɩn Yɩzərayɛlə lalʋʋ tə pìí ba vìí, yá ba lìù mama dàń vəli ʋ jon bwálɩ́ tə, ba nə tarɩ ba pa wá, lʋʋ nii tə wa. 7 Lalʋʋ tə tʋn ba pa Ba-Yígúrə́-Jə-Tiu nə, Zozuwe lʋʋ wúlú tə mama wa. Yá kʋ yɩn nətʋ, nəkwɩna tə də lʋʋ wúlú tə mama wa, ba nə yɩn lá Zozuwe tɩan kwa nə, ba ga na tʋtʋnfaran tə mama, Ba-Yígúrə́-Jə-Tiu nə tʋn, ʋ pa Yɩzərayɛlə lɩ̀à nə. 8 Nun bìú Zozuwe, ʋ yà nə yɩ Ba-Yígúrə́-Jə-Tiu tʋtʋnʋ, tɩga də ʋ jə bɩna bíí də fugə. 9 Ba gùrì wá tɩa tə wa, ba nə tarɩ ba pa wá, Timənatə-Herɛsə nə, Efərayimə pɛɛn nagwanaa tə wa, Gaaswə paan tə jɩzən saparʋ con. 10 Zozuwe suruduən tə də mama tɩga, ba va ba nɩbara-ba con, ba nə dí yáá ba tɩ. Ba tɩan kwa lɩ̀à tə mʋ̀ yà yəri Ba-Yígúrə́-Jə-Tiu. Ba yà yəri tʋ̀tʋ̀nán tə də, Ba-Yígúrə́-Jə-Tiu nə tʋn ʋ pa Yɩzərayɛlə lɩ̀à nə.
Yɩzərayɛlə lɩ̀à vɩga Ba-Yígúrə́-Jə-Tiu, ba dʋgʋ
11 Yɩzərayɛlə lɩ̀à tə tʋn kʋ tə nə lwara, Ba-Yígúrə́-Jə-Tiu yáá con. Ba pɩn dun woŋwanan tə nə, ba nə boŋə Baalə*. 12 Ba vɩga Ba-Yígúrə́-Jə-Tiu ba dʋgʋ. Ʋ mʋ̀ ba nɩbara-ba Yɩɩ tə, ʋ nə pɩn ba nan ba yá Ezwipətə lʋʋ nii tə. Yá ba dàń pìí ba vwa ba tɩ̀àn yɩa duən nə, tə nə yɩ dwíə́ nəkaran* tə nə kɩkarɩ ba yɩa. Ba tʋa ba nadwana yuu tə yáá con, ba pa tə dun. Yá kʋ nətʋ tə dàń zɩ̀n Ba-Yígúrə́-Jə-Tiu lɩŋa. 13 Ba vɩga Ba-Yígúrə́-Jə-Tiu ba dʋgʋ, ba ga pa dun woŋwanan tə nə, ba nə boŋə Baalə, də Asətarəte*.
14 Ba-Yígúrə́-Jə-Tiu lɩŋa zàn Yɩzərayɛlə lɩ̀à tə yuu wa. Yá ʋ dàń yá ba, ʋ pa lɩ̀à tə nə vɩrɩ lɩ̀à, vɩrɩ ba. Ʋ ken ba, ba dʋŋa tə nə kɩkarɩ ba jɩɩn wa, yá ba kʋ́ʋ̀ wàrɩ̀ ba dʋŋa, ba zɩga ba tɛ. 15 Máŋá mama, Yɩzərayɛlə lɩ̀à tə nə vəli kʋ̀ʋ̀, Ba-Yígúrə́-Jə-Tiu yàá zɩgɩ ba nə, ʋ pa yinəgə nəfarʋ yí ba, ndə ʋ nə dùə̀ ʋ ma swɩ̀n kʋ ba con nətʋ. Yá kʋ nətʋ tə dàń yà pɩn ba wulə pucʋnɩ nəfarʋ wa. 16 Máŋá də máŋá, Ba-Yígúrə́-Jə-Tiu yàá tún kwatara yáá tɩ̀án, Yɩzərayɛlə lɩ̀à tə yuu wa, ʋ pa ba jon ba lɩ̀à tə jɩɩn wa, ba nə vɩrɩ ba. 17 Yá Yɩzərayɛlə lɩ̀à tə wà ba kwatara yáá tɩ̀án tə də tətə nii zìlí. Ba pìí ba tʋ ba nadwanaa yuu yɩa duən yáá con, ba cwàrɩ̀* ba ma pɩn tə dun. Ba vəvəri ba kwa lala, ba ma sà cwəŋə tə, ba nɩbara-ba nə yɩn ka wa. Ba nɩbara-ba mʋ̀ yà twá yìə̀n tə nə, Ba-Yígúrə́-Jə-Tiu nə pɩn ba nii tə yuu wa. Yá ba mʋ̀ tʋtʋnɛɛ wà ba nɩbara-ba tʋtʋnɛɛ nə twá. 18 Máŋá tə mama, Ba-Yígúrə́-Jə-Tiu nə tún kwatara yáá tíú, ʋ pa Yɩzərayɛlə lɩ̀à tə nə, ʋ yàá ya də wá, ʋ ga yàá ta ʋ jon Yɩzərayɛlə lɩ̀à tə, ba dʋŋa jɩɩn wa, kwatara yáá tíú təntə lʋʋ wúlú tə mama wa. Cɩ́gá, Ba-Yígúrə́-Jə-Tiu yàá dəri ba yinəgə, máŋá tə wa, ba dʋŋa tə nə yàá fɩfɩn ba, kʋ pa ba kwi, də ba sisigə. 19 Yá máŋá tə, kwatara yáá tíú tə nə tɩga, ba yàá pìí ba tʋn cʋna, ba doni ba nyɩna-ba. Ba yàá pìí ba vwa ba tɩ̀àn yɩa duən nə, ba twɩ ba nadwanaa yuu tə yáá con, ba pɩn tə dun. Ba yàá ba ba tʋtʋnkʋkwɩnan tə, də ba zɩbaniu yìə̀n tə nə yá.
20 Ba-Yígúrə́-Jə-Tiu lɩŋa dàń zàn Yɩzərayɛlə lɩ̀à tə yuu wa, ʋ ga swɩ̀n, ʋ wʋ́: «Dwíí kʋ tə cʋ̀gʋ̀ à nimarʋ tə, à yà nə tún də ba nɩbara-ba. Ba wà à nii zìlí. 21 Kʋ mʋ̀ yɩrɩ, à də kʋ́ʋ̀ bá dɩŋa dwíə́ nəkaran tə nədʋ tətə, Zozuwe nə tɩga ʋ yá, à lɩ ba yáá con. 22 Mə dwíə́ nəkaran təntə nə nə, à wá twá à ma pa də́də́ŋú yí Yɩzərayɛlə lɩ̀à tə. Yá à dàń wá na, də ba nə wá pìí ba bà, ba twá à mʋ̀ Ba-Yígúrə́-Jə-Tiu cwəŋə tə, ndə ba nɩbara-ba nə twá ka nətʋ!» 23 Yá Ba-Yígúrə́-Jə-Tiu dàń yá dwíə́ nəkaran təntə sənbwen. Ʋ kʋ́ʋ̀ wà bɩbarɩ ʋ dɩŋa ba, ʋ lɩ lʋʋ nii tə wa. Ʋ yà wà dwíə́ təntə Zozuwe jɩɩn wa ken.