Dwíə́ nəkaran* tə nə ga lʋʋ nii tə wa
3
1 Nə̀ń dwíə́ nəkaran tə, Ba-Yígúrə́-Jə-Tiu nə yá lʋʋ nii tə wa sənbwen, sə ʋ twá ba nə, ʋ ma pa də́də́ŋú yí Yɩzərayɛlə lɩ̀à tə mama, ba nə wà twá ba ta kʋ̀ʋ̀ mama, ba ma jon Kanaan lʋʋ nii tə. 2 Ʋ yà pɩ̀à sə ʋ twá nətʋ, ʋ ma pa Yɩzərayɛlə lɩ̀à tə ba tə nə wà kʋ̀ʋ̀ tɛ mɩ́ámɩ́án, wànɩ́ ba kwè kʋ̀ʋ̀ tɛgʋ. 3 Dwíə́ nəkaran təntə nə yɩ Filisi tɩ̀án pɛ̀gá bonu tə, də Kanaan lʋʋ lɩ̀à tə mama, də Sidon tɩ̀án, də Evi dwíí tə, ba yà nə jə̀ə́ Liban pɛɛn tə wa, kʋ nə zɩgɩ Baalə-Ɛrəmon paan tə nə, kʋ va kʋ nan Hamatə tɩʋ tə nii nə.4 Kʋ wá twá də dwíə́ nəkaran təntə, də́də́ŋú ma yí Yɩzərayɛlə lɩ̀à tə. Yá Ba-Yígúrə́-Jə-Tiu dàń wá na, də ba nə wá twá ʋ yìə̀n tə nə, ʋ nə pɩn nii tə yuu wa, ʋ nə twá də Moyizə, ʋ ma pʋ́pʋ́nɩ́ ʋ pa ba nɩbara-ba nə. 5 Mə kʋ zɩgɩ nətʋ, Yɩzərayɛlə lɩ̀à tə ma ya Kanaan lʋʋ lɩ̀à tə, də Ɛtə dwíí tə, də Amɔrə dwíí tə, də Perizi dwíí tə, də Evi dwíí tə, də Yebusə tɩ̀án tə titəŋi wa. 6 Yɩzərayɛlə lɩ̀à tə dàń swe dwíə́ nəkaran tə bwɩ̀ɩ́, ba ma fwa ba kana, ba ga pa ba tətə bwɩ̀ɩ́, dwíə́ nəkaran tə bɩ̀á nə, ba də ma fwa ba kana. Yá ba dàń pɩn dun dwíə́ nəkaran tə yɩa tə nə.
YƖZƏRAYƐLƏ KWATARA YAA TƖAN TƏ
Ɔtəniyɛlə jìgə̀ Yɩzərayɛlə lɩ̀à kwatara yáá tíú
7 Yɩzərayɛlə lɩ̀à tə tʋn kʋ tə nə lwara, Ba-Yígúrə́-Jə-Tiu yáá con. Ba swɛ̀ɛ́ Ba-Yígúrə́-Jə-Tiu, ʋ nə yɩ ba Yɩɩ yoo, ba ga pìí ba pɩn dun woŋwanan tə nə, ba nə boŋə Baalə*, də woŋwanʋ Aswera* daceli nə. 8 Ba-Yígúrə́-Jə-Tiu lɩŋa dàń zàn Yɩzərayɛlə lɩ̀à tə yuu wa, ʋ ga yá ʋ pa Aramə pɩ̀ʋ́, Kuswan-Riswatayimə jɩɩn zʋ ba. Yá Yɩzərayɛlə lɩ̀à tə dàń tʋn, ba pa Kuswan-Riswatayimə nə, bɩna nana. 9 Yɩzərayɛlə lɩ̀à tə bubwi ba kə Ba-Yígúrə́-Jə-Tiu nə, yá Ba-Yígúrə́-Jə-Tiu pɩn ba jonu. Ʋ mʋ̀ nə yɩn Ɔtəniyɛlə. Ʋ yà yɩ Kalɛbə nyánʋ́ Kenazə bìú. 10 Ba-Yígúrə́-Jə-Tiu Siŋu* tə cúə́ Ɔtəniyɛlə yuu wa, yá ʋ dàń jìgə̀ Yɩzərayɛlə lɩ̀à yáá tíú. Ʋ vəli ʋ ta kʋ̀ʋ̀ də Aramə pɩ̀ʋ́ Kuswan-Riswatayimə, yá Ba-Yígúrə́-Jə-Tiu pɩn Ɔtəniyɛlə də́ dɩ̀àn Kuswan-Riswatayimə yuu wa. 11 Yá Lʋʋ nii tə dàń yɩn sìə́ wa, bɩna sapwɩlə. Kʋ kwa nə, Kenazə bìú Ɔtəniyɛlə tɩga.
Ehudə jìgə̀ Yɩzərayɛlə lɩ̀à kwatara yáá tíú
12 Ɔtəniyɛlə tɩan kwa nə, Yɩzərayɛlə lɩ̀à tə kʋ́ʋ̀ tʋn kʋ tə nə lwara, Ba-Yígúrə́-Jə-Tiu yáá con. Yá ʋ dàń pɩn dɩ̀àn Mʋabə pɩ̀ʋ́ Egəlon nə, sə Egəlon fɩfɩn Yɩzərayɛlə lɩ̀à tə, ba nə tʋn kʋ tə nə lwara, ʋ mʋ̀ Ba-Yígúrə́-Jə-Tiu yáá con yɩrɩ. 13 Egəlon jɩn Amon dwíí tə, də Amalɛkə dwíí tə, ʋ súrí Mʋabə tɩ̀án nə, ʋ ja va ʋ ma ta Yɩzərayɛlə. Ba ta Yɩzərayɛlə lɩ̀à tə ba də́, ba ga dɩŋa ba, ba lɩ kʋra tɩʋa tə wa. 14 Yá Yɩzərayɛlə lɩ̀à tə dàń tʋn ba pa Mʋabə pɩ̀ʋ́ Egəlon nə, bɩna fugə nana.
15 Yɩzərayɛlə lɩ̀à tə bubwi, ba kə Ba-Yígúrə́-Jə-Tiu nə, yá Ba-Yígúrə́-Jə-Tiu pɩn ba jonu. Ʋ mʋ̀ nə yɩn Gera bìú Ehudə, Bɛnzwamɛn dwíí tə wa. Ehudə yà yɩ jɩgwiu.
Dɩɩn don nə, Yɩzərayɛlə lɩ̀à tə tʋn Ehudə, sə ʋ ja lanpo ʋ va ʋ pa Mʋabə pɩ̀ʋ́ Egəlon nə. 16 Yá Ehudə dàń lùə̀ sɩ̀ʋ́ kʋ níə́ bələ, kʋ danɩ nə yí jɩvaŋɩ yii, ʋ kə ʋ voru nə, ʋ vwa ʋ jɩzən ciceri nə, ʋ ga zʋ ʋ gànàn ʋ ma pú kʋ nə. 17 Kʋ kwa nə, ʋ dàń tì lanpo tə ʋ ja va sə ʋ pa Mʋabə pɩ̀ʋ́ Egəlon nə. Egəlon yà yɩ bɛɛ tə, ʋ nə curə zənzən. 18 Ehudə nə pɩn lanpo tə kwa nə, ʋ də lɩ̀à tə nə zɩn lanpo tə ba ja bà tə, pìí ba vìí. 19 Ba nə vəli ba yí kapana woŋwanan tə, Giləgalə nii nə, Ehudə mɛ lá ʋ pìí ʋ bà, ʋ swɩ̀n pɩ̀ʋ́ Egəlon con, ʋ wʋ́: «À nyɩna pɩ̀ʋ́, à jə yosəgu sə à swɩ̀n n con.» Pɩ̀ʋ́ tə ma pa ʋ dìə̀ lɩ̀à mama nan, ba ga yá ʋ də Ehudə cɩcɩ. 20 Egəlon yà jə̀ə́ ʋ dəyuu dìə̀ wa, ka nə zurə. Dibiu təntə yà yɩ ʋ cɩcɩ nyiən. Ehudə dàń fwarɩ ʋ yí Egəlon yɩra, ʋ swɩ̀n, ʋ wʋ́: «Sʋgʋ tə à nə jə sə à swɩ̀n n con, yɩ kʋ nan Yɩɩ.» Egəlon ma nyɩ́n ʋ zàn ʋ gólí yuu. 21 Yá Ehudə dàń ja ʋ jɩgwiə ʋ van sɩ̀ʋ́ tə, ʋ jɩzən ciceri nə ʋ lɩ, ʋ zwa ʋ dɩ pɩ̀ʋ́ Egəlon pùə́ wa. 22 Sɩ̀ʋ́ tə nii tə, də kʋ sɩtəli tə mɛ zʋa pɩ̀ʋ́ tə pùə́ wa, kʋ cʋ̀rɩ̀ kʋ nan ʋ tàŋá wa, ʋ nʋga ga pìí ka pú sɩ̀ʋ́ tə yuu nə. Cɩ́gá, Ehudə yà wà pìí ʋ van sɩ̀ʋ́ tə, ʋ lɩ.
23 Kʋ kwa nə, Ehudə tagʋ dibiu tə mimien, ʋ ga twá waa con mimibiə, ʋ nan. 24 Ehudə viru kwa nə, pɩ̀ʋ́ tə dìə̀ lɩ̀à twi ba ywàń, yá ba nɩ də dəyuu dìə̀ tə mimien tə tagʋ. Yá ba dàń bʋ́n də, kʋ wá yà pɩ̀ʋ́ tə jə̀ə́ kaduə yuu, dibiu tə wa kʋ nə zurə. 25 Ba dàn wuuu, yá pɩ̀ʋ́ tə ba dəyuu dìə̀ tə mimien tə súrí. Ba ma ga ba tì borbiu ba ma súrí, də nə̀ń ba yuu-tiu tə nə, ʋ tɩga ʋ tígə́ tɩa. 26 Máŋá tə mama, ba yà nə zɩga ba dànɩ̀ tə, də Ehudə mʋ̀ dəri ʋ jɛ́n. Ʋ lɛ kapana woŋwanan tə, ʋ va ʋ wulə Seyira nə. 27 Ʋ nə zə́n ʋ yí kʋ bwálɩ́ təntə wa, ʋ wúrí nabwanʋ Efərayimə pɛɛn tə wa, ʋ ma bon Yɩzərayɛlə lɩ̀à tə ʋ kə duən yáá. Ʋ tətə dàń yɩn ba yáá, ba nan pɛɛn tə yuu ba cú. 28 Ʋ swɩ̀n ba con, ʋ wʋ́: «Á pwíə́ à kwa! Cɩ́gá, Ba-Yígúrə́-Jə-Tiu ken á dʋŋa Mʋabə tɩ̀án tə, á jɩɩn wa.» Yɩzərayɛlə lɩ̀à tə dàń púə́ Ehudə kwa, ba va ba cɩ̀ Zʋrədɛn mʋnaa tə bwálá tə nə, ba nə twá ba bɩn. Yá Mʋabə tíú nədʋ mama kʋ́ʋ̀ wà wànɩ́ ʋ bɩn mʋnaa tə. 29 Kʋ máŋá tə wa, Yɩzərayɛlə lɩ̀à tə gʋa Mʋabə tɩ̀án bara ba yí mʋ̀rʋ̀ fugə. Ba mama yà yɩ babɩran, ba nə bɩga ba yí bara máŋá. Ba ladʋa tətə wà Yɩzərayɛlə lɩ̀à tə yáá nə jɛ́n. 30 Kʋ nə zɩgɩ kʋ dɩɩn tə nə, Mʋabə tɩ̀án bwànɩ̀ Yɩzərayɛlə lɩ̀à jɩɩn də̀ń. Yá lʋʋ nii tə dàń yɩn sìə́ wa, bɩna sapwɩnɩa.
Swaməgarə jìgə̀ Yɩzərayɛlə lɩ̀à kwatara yáá tíú
31 Ehudə kwa nə, Anatə bìú Swaməgarə nə jìgə̀ Yɩzərayɛlə lɩ̀à kwatara yáá tíú. Ʋ ja nɩan líú, ʋ ma gʋ Filisi tɩ̀án bara biəyardʋ. Ʋ də yɩn Yɩzərayɛlə lɩ̀à tə jonu.