Kwatara 4

Yɩɩ nii sʋsʋnkana Debora jìgə̀ Yɩzərayɛlə lɩ̀à bʋra lìù

1 Ehudə tɩan kwa nə, Yɩzərayɛlə lɩ̀à tə kʋ́ʋ̀ tʋn kʋ tə nə lwara, Ba-Yígúrə́-Jə-Tiu yáá con. 2 Ba-Yígúrə́-Jə-Tiu ma yá ʋ pa Kanaan pɩ̀ʋ́ Yabɩn, ʋ yà nə də́ pàrɩ̀ Hasɔrə nə, jɩɩn zʋ ba. Yabɩn kwatara yuu tíú yà nə yɩ Sisera. Sisera sàń yà wulə Haroswɛtə-Goyimə nə. 3 Yɩzərayɛlə lɩ̀à tə bubwi ba kə Ba-Yígúrə́-Jə-Tiu nə. Cɩ́gá, Yabɩn yà jə lurən səsen kòrə̀n biənʋgʋ. Yá ʋ yà fɩfɩn Yɩzərayɛlə lɩ̀à tə də dɩ̀àn, kʋ bɩna sapʋa.

4 Kʋ máŋá tə wa, də Yɩɩ nii sʋsʋnkana Debora yà nə bʋ̀rɩ̀ Yɩzərayɛlə lɩ̀à bʋra. Debora yà yɩ Lapɩdɔtə kan. 5 Ʋ yà jəni kʋra tɩʋ don də̀ń, ba nə boŋə Debora kʋra. Kʋ yà wulə Rama də Betɛlə pwə́rə́ wa, Efərayimə pɛɛn nagwanaa tə wa. Yɩzərayɛlə lɩ̀à tə dàń yà vəli Debora con, kʋra təntə də̀ń nə, sə ʋ bʋ̀rɩ̀ ba yìə̀n bʋra. 6 Dɩɩn don nə, Debora pɩn ba bon Abinowamə bìú Barakə, ʋ nə yɩ Kedɛswə tíú, kʋ nə wulə Nɛfətali nagwanaa wa, ʋ swɩ̀n ʋ con, ʋ wʋ́: «Nə̀ń nii tə, Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nə pɩn. Ʋ wʋ́ vəli n kúrí bara mʋ̀rʋ̀ fugə, Nɛfətali dwíí tə, də Zabulon dwíí tə wa, n ja dɩ̀ Tabɔrə paan tə yuu. 7 Ba-Yígúrə́-Jə-Tiu dàń wá van Sisera, ʋ nə yɩ pɩ̀ʋ́ Yabɩn kwatara yuu tíú, ʋ pa ʋ bà n con, Kiswon nacoru tə nii nə, də ʋ səsen kòrə̀n tə, də ʋ kwatara tə. Yá Ba-Yígúrə́-Jə-Tiu wá ja wá, ʋ kə n jɩɩn wa.» 8 Barakə ma swɩ̀n Debora con, ʋ wʋ́: «Də n nə wá kwé nə n ja va, à wá va. N dàń nə nə bá kwé nə, à bá va.» 9 Debora le, ʋ wʋ́: «À wá kwé mʋ́, à ja va! N dàń nə kʋ́ʋ̀ bá na dun, kʋ nətʋ tə wa. Cɩ́gá, Ba-Yígúrə́-Jə-Tiu wá ja Sisera, ʋ kə kan don jɩɩn wa.» Yá Debora dàń zàn, ʋ də Barakə va Kedɛswə. 10 Barakə bon Zabulon dwíí tə, də Nɛfətali dwíí tə, Kedɛswə nə. Yá bara ba nə yí ndə mʋ̀rʋ̀ fugə nə, nan dwíə́ təntə wa ba twá ʋ nə. Debora də twá ʋ nə ʋ va.

11 Ebɛrə, ʋ nə yɩ yàrá dwíí, yà pwɛ̀ ʋ tɩ̀àn də yàrá dwíí tə, ba nə yɩ Moyizə tɩnbɛɛ Hobabə bɩ̀á. Yá ʋ dàń vəli ʋ pú ʋ gansili, sɩsanʋ tə bɩan nə, kʋ nə wulə Saananimə nə, Kedɛswə nii nə.

12 Ba swɩ̀n Sisera con də, Abinowamə bìú Barakə dɩ̀gà Tabɔrə paan tə yuu. 13 Yá Sisera dàń zɩgɩ Haroswɛtə-Goyimə nə, ʋ kə ʋ lurən səsen kòrə̀n biənʋgʋ tə mama duən nə, də lalʋʋ tə mama ba yà nə wulə də wá, ʋ ja bà Kiswon nacoru tə nii nə. 14 Debora dàń swɩ̀n Barakə con, ʋ wʋ́: «Zàn yɩɩ nə! Cɩ́gá, zə̀n kʋ tə nə, Ba-Yígúrə́-Jə-Tiu jɩn Sisera, ʋ kə n jɩɩn wa. Ba-Yígúrə́-Jə-Tiu tətə wulə n yáá, ʋ tɛ ʋ pɩn mʋ́.» Barakə dàń nan Tabɔrə paan tə yuu ʋ cú, də bara mʋ̀rʋ̀ fugə, ʋ kwa. 15 Ba-Yígúrə́-Jə-Tiu pɩn fən nəfarʋ zʋ Sisera, də ʋ səsen kòrə̀n tə mama, də ʋ kwatara púlí tə mama, ba dəri ba làgà duən yáá nə, Barakə yáá con. Yá Barakə dàń gʋa ba də kwatara sɩ̀ʋ́. Sisera nan ʋ səsən kòrù yuu ʋ cú, ʋ dəri də nɛɛ. 16 Barakə púə́ Sisera səsen kòrə̀n tə, də ʋ kwatara tə mama kwa ʋ dɩŋa, ʋ va ʋ yí Haroswɛtə-Goyimə. Yá ʋ gʋa Sisera kwatara tə mama də kwatara sɩ̀ʋ́, ba ladʋa tətə wà gɛ.

17 Sisera dəri də nɛɛ, ʋ va ʋ zʋ Ebɛrə kan Yayɛlə gansili də̀ń. Ebɛrə yà yɩ yàrá dwíí. Cɩ́gá, sìə́ yà wulə Hasɔrə pɩ̀ʋ́ Yabɩn, də Ebɛrə, ʋ nə yɩ yàrá dwíí, dìə̀ tə pwə́rə́ wa. 18 Yayɛlə nan ʋ jəri Sisera, ʋ swɩ̀n ʋ con, ʋ wʋ́: «Bà n zʋ à yuu-tiu! Bà n zʋ à con, dàń ká pa fən ja mʋ́!» Ʋ dəri ʋ zʋ Yayɛlə gansili tə də̀ń, yá Yayɛlə dàń tì ganpəru, ʋ ma pəri Sisera yuu nə. 19 Ʋ swɩ̀n Yayɛlə con, ʋ wʋ́: «Nanyʋnɩ jə nə! À lòrì nɩ́á mancɩn, sə à nyʋn!» Yayɛlə ma súrí nayɩla púrí nii, ʋ pa wá ʋ nyʋn, ʋ ga pìí ʋ piri ʋ yuu nə. 20 Ʋ kʋ́ʋ̀ swɩ̀n Yayɛlə con, ʋ wʋ́: «Zɩgɩ gansili tə mimii tə nə. Lìù nə twi ʋ bwe mʋ́, sə ʋ jə́n də lìù nə wulə yəbə naaa, n wá le ndə, “ɔn ɔn!” » 21 Sisera yà gwàrɩ̀ zənzən, kʋ pa ʋ dwɛ̀ lɩ́gɩ́. Yayɛlə dàń tì gansili tə párɩ́, ʋ tì seli, ʋ ga daŋɩ bʋ̀àbʋ̀à, ʋ va ʋ yí Sisera yɩra. Ʋ pa párɩ́ tə ʋ kə Sisera zɩpan wa, kʋ cʋ̀rɩ̀ kʋ nan kʋ zʋ tɩa. Yá mə nətʋ nə, ʋ tɩga. 22 Kʋ kwa nə, Barakə də dɩŋɩ Sisera kwa, ʋ bà ʋ yí. Yayɛlə nan ʋ jəri wá, ʋ swɩ̀n ʋ con, ʋ wʋ́: «Bà n nə̀ń bɛɛ tə, n nə twarɩ tə.» Barakə zʋa gansili tə wa, yá ʋ nɩ Sisera də ʋ tɩga ʋ tígə́, də ʋ zɩpan párɩ́. 23 Kʋ nə zɩgɩ kʋ dɩɩn tə nə, Ba-Yígúrə́-Jə-Tiu pɩn Kanaan pɩ̀ʋ́ Yabɩn bwànɩ̀, Yɩzərayɛlə lɩ̀à yáá con. 24 Yɩzərayɛlə lɩ̀à tə dɩ̀àn dàń súrí Yabɩn yuu wa wuuu, ba kori ba gʋ wá.