Debora nuŋə tə
5
1 Kʋ dɩɩn tə nə, Debora də Abinowamə bìú Barakə dɩga gwaran, ba nun ba wʋ́:2 «Yɩzərayɛlə lɩ̀à ken ba sírí, sə ba ta kʋ̀ʋ̀.
Lalʋʋ tə kúrí ba tì ba tɩ̀àn nə,
sə ba ta kʋ̀ʋ̀.
Á bwɩa Ba-Yígúrə́-Jə-Tiu nə!
3 Pɛ̀gá-ba, á cʋga!
Pabɩa-ba, á gunə á zɩan!
À wá nun, cɩ́gá, à mʋ̀ wá nun,
à ma bʋ Ba-Yígúrə́-Jə-Tiu nə.
À wá dɩ gwaran, à ma pa dun Ba-Yígúrə́-Jə-Tiu nə,
ʋ nə yɩ Yɩzərayɛlə lɩ̀à Yɩɩ.
4 Ooo Ba-Yígúrə́-Jə-Tiu, máŋá tə wa, n nə nan Seyirə,
máŋá tə wa, n nə nan Edomə lʋʋ nii tə wa n bɩ̀àn,
tɩa sisigi, lanworu ga nyɩan.
Bakwan nyɩan tə jì nɩ́á, tə lwɛ́.
5 Pɛɛn lwá duən yuu Ba-Yígúrə́-Jə-Tiu yáá con,
kʋ mʋ̀ Sinayi paan tə lwá duən yuu,
Ba-Yígúrə́-Jə-Tiu yáá con, ʋ nə yɩ Yɩzərayɛlə lɩ̀à Yɩɩ.
6 Anatə bìú Swaməgarə máŋá wa,
Yayɛlə máŋá wa, ywələ yà vɩga coŋi tə, ba dʋgʋ.
Yá vələ dàń yà yɩ cwəmɩnɩ ba twá.
7 Pɩ̀ʋ́ yà tə̀lə́,
pɩ̀ʋ́ yà tə̀lə́ Yɩzərayɛlə wa,
kʋ va kʋ yí máŋá tə,
à mʋ̀ Debora nə nyɩ́n à zàn.
À nyɩ́n à zàn ndə bɩ̀á nuu nə, Yɩzərayɛlə wa.
8 Lɩ̀à tə yà kúrí ba tì, sə ba twá yɩa nədʋra nə:
Kʋ̀ʋ̀ dàń twí kʋ yí ba mimien,
yá natana, nə à yə̀ə́ cwiin nədʋ tətə yà wàrɩ̀ kʋ nɩ,
bara mʋ̀rʋ̀ sapwɩlə con, Yɩzərayɛlə wa.
9 À bɩcan wulə də Yɩzərayɛlə yáá tɩ̀án tə,
də lalʋʋ tə wa lɩ̀à tə nə sɛ̀ ba tɩ̀àn nə, sə ba ta kʋ̀ʋ̀.
Á bwɩa Ba-Yígúrə́-Jə-Tiu nə!
10 Á mʋ̀ lɩ̀à tə á nə dɩ̀ bɩnakana nəpwənə yuu,
á mʋ̀ lɩ̀à tə á nə jəni ganpurə yuu,
də á mʋ̀ lɩ̀à tə á nə vəli cwəŋə yuu,
á bʋŋa zəni.
11 Nayɩra bwɩ Ba-Yígúrə́-Jə-Tiu nə, nɩan nɩ́á gwàlán nii nə,
ʋ zəni tə yɩrɩ, ʋ nə tʋn.
Ʋ fwa zəni, ʋ pɩn Yɩzərayɛlə lɩ̀à də́ dɩ̀àn.
Ba-Yígúrə́-Jə-Tiu lɩ̀à tə dàń nan tɩan tə mimien nə.
12 Zàn dwiən nə!
Zàn dwiən nə, Debora!
Zàn dwiən nə! Zàn dwiən nə!
Dɩ gwaran n ma bʋ Ba-Yígúrə́-Jə-Tiu nə.
Zàn yɩɩ nə, Abinowamə bìú Barakə!
Zàn n ja n ywə́ŋə́, n ja vìí!
13 Lɩ̀à tə ba mɩɩ nə wulə lʋʋ, dàń vwə ba tɩ̀àn dɩ̀àn tɩ̀án yɩra.
Ba-Yígúrə́-Jə-Tiu lalʋʋ tə kɩkarɩ nə, ndə kwatara babɩran nə.
14 Ba tə nə dí dɩ̀àn Amalɛkə dwíí tə yuu wa,
dəkuu nan Efərayimə dwíí tə wa.
Bɛnzwamɛn dwíí tə twá Efərayimə dwíí kwatara tə nə,
yá ba dàń gùlí duən wa.
Kwatara yun tɩ̀án nan Makirə sàń tə wa, ba va kʋ̀ʋ̀.
Yá kwatara yun tɩ̀án nan Zabulon də dwíí tə wa.
15 Yɩsakarə dwíí pàbɩ̀á tə yɩn də Debora.
Yɩsakarə dwíí tə wulə Barakə kwa.
Ba twá ʋ nə ba cú varɩnaa tə wa.
Yá Ribɛn sànɩ́ tə wa, bábɩ̀á yɩn ba bɩcanɩ wa zənzən.
16 Kʋ yɩ nətə, á ma zɩga najɩra pwə́rə́ wa,
á cʋga vàná munu?
Ribɛn sànɩ́ tə wa, bábɩ̀á yɩn ba bɩcanɩ wa zənzən.
17 Galadə nagwanaa tə wa,
Zʋrədɛn mʋnaa tə yɩɩ yipɩan con,
dwíí mama wà sʋsʋgʋ.
Dan dwíí tə mɛn ba nɩ́á yuu bwərə bɩan nə.
Aswɛrə dwíí tə sànɩ́ yɩ tə wulə mʋʋ nii nə.
Yá ba dàń mɛn ba nɩ́á yuu bwərə yizɩga bwálá nə.
18 Zabulon dwíí tə sɛ̀ ba ta kʋ̀ʋ̀,
ba wà tɩan fən dəri.
Mə kʋ yɩn nətʋ də Nɛfətali dwíí tə də,
pɛɛn tə yuu wa, catarɩ laŋa wa.
19 Dʋŋa pɛ̀gá twi ba ta kʋ̀ʋ̀.
Kanaan pɛ̀gá tə ta nəba, Taanakə nə,
Megido nɩ́á tə nii nə.
Yá ba wà won mama nɩ, catarɩ təntə wa.
20 Kacɩlacɛɛ zɩgɩ lanworu wa, tə ta kʋ̀ʋ̀ tə.
Tə zɩgɩ tə bʋran wa, tə ta Sisera.
21 Kiswon nacoru tə jàn ba.
Kiswon nacoru tə nə yɩn lá, kʋ máŋá ba yigə.
À jə̀rə́, nyɩ́n n va də wʋdɩʋ.
22 Səsen nacinə zʋa tɩa,
kʋ yɩ dəru də dəru.
23 Ba-Yígúrə́-Jə-Tiu malɩka* tə wʋ́:
“Á zɩra á kə Merozə tɩʋ tə nə.
Zɩra, zɩra á kə Merozə tɩ̀án nə.
Cɩ́gá, ba wà twi ba san Ba-Yígúrə́-Jə-Tiu nə.
Ba wà Ba-Yígúrə́-Jə-Tiu nə san,
də ba kwatara babɩran tə.”
24 Yɩɩ wá fwa zəni Yayɛlə yɩra, ʋ duən kana wa.
Yàrá dwíí Ebɛrə kan Yayɛlə!
Yɩɩ wá fwa zəni ʋ yɩra,
ʋ duən kana wa, ba nə wulə gansili wa!
25 Sisera lòrì nɩ́á,
yá Yayɛlə pɩn wá nayɩla!
Ʋ ken nayɩlɩ nʋga dun wùrú zʋŋa wa, ʋ pa wá.
26 Yayɛlə ja ʋ jɩgwiə, ʋ tì párɩ́,
ʋ ga ja ʋ jɩzən, ʋ tì tʋ̀tʋ̀nà seli.
Ʋ mà Sisera yuu ʋ lwa.
Ʋ mà ʋ zɩpan ʋ pórí, párɩ́ tə cʋ̀rɩ̀ kʋ nan.
27 Ʋ tʋa ʋ də̀ń baan, Yayɛlə nɛɛ də̀ń.
Ʋ tʋa, ʋ tígə́ sələlələ.
Ʋ tʋa ʋ də̀ń baan, Yayɛlə nɛɛ də̀ń.
Bwálɩ́ tə, ʋ tʋa ʋ də̀ń baan,
mə lá nə, ʋ tɩga bɩla.
28 Sisera nuu zɩgɩ təkurə nii nə,
ʋ jɩ̀ɩ́n ka nii wogɩganʋ, ʋ ywàŋá,
ʋ ga bwe ʋ tɩ̀àn, won tə nə pɩn,
Sisera səsen kòrù ma dán kwa!
Bɛ̀ɛ̀ nə pɩn, ʋ səsen kòrə̀n ma vəli mancɩn mancɩn?
29 Ʋ pabwɩɩ tə wa wʋbʋnyɩna tə nə le wá,
yá ʋ də tətə dàń swɩ̀n sʋ̀ràn təntə, ʋ tɩ̀àn con, ʋ wʋ́:
30 “Sɩ́ʋ́n nə, Sisera də ʋ kwatara wulə ba tarɩ wiən tə,
ba nə ta ba jon kʋ̀ʋ̀ tə wa.
Kwatarʋ mama wá na kacɩɩn nədʋ, nə yə̀ə́ bələ.
Sisera tətə wá tì ganmʋla,
ganmʋla, ba nə sʋa ba nàn.
Ganmʋlɩ, də gànàn bələ, ba nə sʋa ba nàn,
nə mɛ də ladɩa bɩan.”
31 Ba-Yígúrə́-Jə-Tiu, pa n dʋŋa tə mama tɩ, ndə Sisera nə!
Sə ba tə nə swə mʋ́ ga ya ndə yɩcaʋ tə nə,
máŋá tə wa, kʋ yàá nə pɛ́n, kʋ naŋa də dɩ̀àn.»
Yá lʋʋ nii tə dàń yɩn sìə́ wa, bɩna sapwɩlə.