Kwatara 6

Madɩan dwíí tə fɩfɩn Yɩzərayɛlə lɩ̀à tə

1 Yɩzərayɛlə lɩ̀à tə kʋ́ʋ̀ tʋn kʋ tə nə lwara, Ba-Yígúrə́-Jə-Tiu yáá con. Ba-Yígúrə́-Jə-Tiu ma yá ʋ pa Madɩan dwíí tə fɩfɩn ba, bɩna barpɛ. 2 Madɩan dwíí tə ken càn Yɩzərayɛlə lɩ̀à tə nə zənzən. Madɩan dwíí tə yɩrɩ nə Yɩzərayɛlə lɩ̀à tə kwɛn pɛɛn bʋran, də pɩ̀ràn kwələ, də pɛɛn gungorən, ba səgə tə wa. 3 Máŋá mama, Yɩzərayɛlə lɩ̀à nə dùə̀ wiən, Madɩan dwíí tə, də Amalɛkə dwíí tə, də yɩɩ yipɩan con dwíə́ tə yàá bà, ba ta Yɩzərayɛlə lɩ̀à tə. 4 Ba yàá pú lʋʋ nii tə ba kə, ba cʋ̀gʋ̀ wiən tə mama ba nə vàrɩ̀, nə à yə̀ə́ ba nə kʋ̀nɩ̀, ba ja va ba nan Gaza nə. Ba yàá ba wobiu, nə à yə̀ə́ piə, nə à yə̀ə́ naʋ, nə à yə̀ə́ bɩ̀nà nədʋ mama yá, Yɩzərayɛlə lʋʋ nii tə wa. 5 Ba nə bɩ̀àn, ba yàá bà də ba vàná, də ba gansilə. Yá ba dàń yàá dáá zənzən, ndə kayɩra nə. Ba də ba nyʋgʋmɛ tə nii yàá wàrɩ̀ kʋ gàlɩ̀. Yá ba dàń yàá zʋ ba cʋ̀gʋ̀ lʋʋ nii tə. 6 Madɩan dwíí tə pɩn zʋrɩ zʋ Yɩzərayɛlə lɩ̀à tə zənzən, yá ba dàń bubwi ba kə Ba-Yígúrə́-Jə-Tiu nə.

7 Máŋá tə, Yɩzərayɛlə lɩ̀à tə nə bubwi ba kə Ba-Yígúrə́-Jə-Tiu nə, càn tə yɩrɩ Madɩan dwíí tə nə kəni ba nə, 8 Ba-Yígúrə́-Jə-Tiu tʋn ʋ nii sʋ̀sʋ̀nʋ̀ Yɩzərayɛlə lɩ̀à tə con. Yɩɩ nii sʋ̀sʋ̀nʋ̀ tə swɩ̀n ba con, ʋ wʋ́: «Nə̀ń kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nə swɩ̀n: “À mʋ̀ nə lɩ aba, yongaʋ tə wa, Ezwipətə lʋʋ nii tə wa. 9 À jon aba Ezwipətə tɩ̀án, də á dʋŋa tə mama jɩɩn wa, ba yà nə fɩfɩn aba. À dɩŋɩ ba à lɩ á yáá con, à ga jon ba lʋʋ nii tə, à pa aba. 10 À swɩ̀n á con də, à mʋ̀ nə yɩ Ba-Yígúrə́-Jə-Tiu, à nə yɩ á Yɩɩ. Amɔrə dwíí tə lʋʋ nii wa nə á wulə. Á dàń nə wà mɛ sə á pa dun ba yɩa tə nə. Yá á wà à kori cʋgʋ.” »

Yɩɩ kúrí Zwedeyon, sə ʋ jon Yɩzərayɛlə lɩ̀à, ba dʋŋa jɩɩn wa

11 Kʋ kwa nə, Ba-Yígúrə́-Jə-Tiu malɩka* tə twi ka jə̀ə́ sɩsanʋ tə də̀ń, kʋ nə wulə Zʋasə kárá wa, Ofəra tɩʋ tə wa. Zʋasə yà yɩ Abiyezɛrə sàń tə wa lìù. Zʋasə bìú Zwedeyon yà wulə ʋ lwaga dipɛn mɩna gwàlʋ́ wa, sə ʋ səgə Madɩan dwíí tə yáá nə. 12 Ba-Yígúrə́-Jə-Tiu malɩka tə twi ka nan ʋ nə, yá ka swɩ̀n ʋ con, ka wʋ́: «Ba-Yígúrə́-Jə-Tiu wulə də mʋ́, kwatarʋ babɩa!» 13 Zwedeyon ma le malɩka tə, ʋ wʋ́: «Aaa! À yuu-tiu, də Ba-Yígúrə́-Jə-Tiu cɩ́gá nə wulə də nəba, bɛ̀ɛ̀ nə pɩn yìə̀n tə tə mama yí nəba? Nə nɩbara-ba swɩ̀n ba bɩrɩ nəba, də Ba-Yígúrə́-Jə-Tiu tʋn yomɩlan, ʋ ma lɩ ba Ezwipətə lʋʋ nii wa. Yomɩlan təntə mama wa yə̀n nə? Nə̀ń kʋ nə, sɩ́ʋ́n kʋ tə, Ba-Yígúrə́-Jə-Tiu vɩga nəba ʋ dʋgʋ, ʋ pa nə tʋ Madɩan dwíí tə jɩɩn wa.»

14 Ba-Yígúrə́-Jə-Tiu^a dàń vəvəri ʋ yáá ʋ kə Zwedeyon con, ʋ ga swɩ̀n, ʋ wʋ́: «Ja dɩ̀àn tə n nə jə, n va n jon Yɩzərayɛlə lɩ̀à tə, Madɩan dwíí tə jɩɩn wa. Cɩ́gá, à mʋ̀ nə tʋn mʋ́.» 15 Zwedeyon le wá, ʋ wʋ́: «Aaa! À yuu-tiu, bɛ̀ɛ̀ nə à wá fwa, à ma jon Yɩzərayɛlə lɩ̀à tə? À mʋ̀ nyɩna sàń tə nə yɩ Manase dwíí tə wa zʋra. Yá à nyɩna dìə̀ tə wa, à mʋ̀ nə yɩ nəmaa.» 16 Ba-Yígúrə́-Jə-Tiu ma swɩ̀n ʋ con, ʋ wʋ́: «À wá ya də mʋ́, yá n wá ta Madɩan dwíí tə mama n də́, ndə ləzwəndʋa nə.» 17 Zwedeyon le, ʋ wʋ́: «Də cɩ́gá mama, à nə nɩ yuywaŋʋ n yáá con, à lòrì sə n pa nə mɩmɩnʋ, kʋ nə bɩrɩ də n mʋ̀ cɩ́gá nə swɩ̀n à con. 18 À lòrì sə n zɩgɩ yəbə n dàn nə, də à ja à zìlə́ won à pìrí à bɩ̀àn, sə à pa mʋ́.» Ba-Yígúrə́-Jə-Tiu ma le, ʋ wʋ́: «À wá zɩgɩ à dàn mʋ́, də n pìrí n bɩ̀àn.»

19 Zwedeyon vəli ʋ gʋ bʋbiə ʋ sàn, ʋ fwa mun maŋʋ tiə* yii, ʋ ma wà dipɛn tə nə ba sabwarɩ jə. Ʋ ken nàŋʋ́ tə fɩyɔɔ wa, ʋ ga kə nàngwàlà tə nagwalʋ wa, ʋ ja bà sɩsanʋ tə də̀ń nə, ʋ tún Ba-Yígúrə́-Jə-Tiu malɩka tə yáá con. 20 Ba-Yígúrə́-Jə-Tiu malɩka tə swɩ̀n ʋ con, ka wʋ́: «Tì nàŋʋ́ tə, də dipɛn tə nə wà sabwarɩ ken tə, n tún pɩ̀ʋ̀ kʋ tə yuu, n lwá nàngwàlà tə, tə yuu wa.» Zwedeyon ma tʋn kʋ nətʋ tə. 21 Daduu yà wulə Ba-Yígúrə́-Jə-Tiu malɩka tə jɩɩn wa. Ka dàń jɩn daduu tə nii, ka ma dwen nàŋʋ́ tə, də dipɛn tə nə wà sabwarɩ ken tə yɩra. Yá mən dàń nan pɩ̀ʋ̀ tə wa, tə də́ nàŋʋ́ tə, də dipɛn tə. Kʋ kwa nə, Ba-Yígúrə́-Jə-Tiu malɩka tə jɛ́n Zwedeyon yɩ́á yuu. 22 Zwedeyon dàń lwarɩ də kʋ yɩ Ba-Yígúrə́-Jə-Tiu malɩka. Yá ʋ swɩ̀n, ʋ wʋ́: «Càn wá yí nə, Yuu-Tiu, Ba-Yígúrə́-Jə-Tiu! Cɩ́gá à nɩ n malɩka tə, də yɩ́á pwənə pwənə!» 23 Yá Ba-Yígúrə́-Jə-Tiu swɩ̀n ʋ con, ʋ wʋ́: «Ja bɩcan sìə́, dàn ká pa fən ja mʋ́, n bá tɩ.»

24 Zwedeyon lwə̀ Yɩɩ joŋi bwálɩ́, lá nə, ʋ pa Ba-Yígúrə́-Jə-Tiu nə, ʋ ga swɩ̀n, ʋ wʋ́: «Ba-Yígúrə́-Jə-Tiu yɩ sìə́ Yɩɩ.» Də zə̀n mama, Yɩɩ joŋi bwálɩ́ təntə tə wulə Abiyezɛrə bɩ̀á tə tɩʋ tə wa, ba nə boŋə Ofəra.

Zwedeyon gwɛrɩ woŋwanʋ tə ba nə boŋə Baalə, joŋi bwálɩ́ tə

25 Kʋ tɩtɩn nə, Ba-Yígúrə́-Jə-Tiu swɩ̀n Zwedeyon con, ʋ wʋ́: «Ja n nyɩna nabɩa tə, də bələ nii nabɩa, ka nə jə bɩna barpɛ. Yá n dàń wá gwɛrɩ n nyɩna woŋwanʋ tə, ba nə boŋə Baalə*, joŋi bwálɩ́ tə, n ga goŋə woŋwanʋ Aswera* dacelə tə, ka nə wulə joŋi bwálɩ́ tə bɩan nə. 26 Kʋ kwa nə, n dàń wá lwà Yɩɩ joŋi bwálɩ́, dədolu təntə yuu wa, n pa Ba-Yígúrə́-Jə-Tiu nə, ʋ nə yɩ n Yɩɩ. N wá tì bələ nii nabɩa tə, n ma fwa joŋi, n sʋ̀rɩ́* də woŋwanʋ Aswera dacelə tə, n nə wá goŋə.» 27 Zwedeyon kúrí ʋ tʋ̀tʋ̀nà wa bara fugə, ʋ pa ba san wá, ba fwa kʋ tə, Ba-Yígúrə́-Jə-Tiu nə swɩ̀n ʋ con, sə ʋ fwa. Zwedeyon yà dəri ʋ nyɩna dìə̀ lɩ̀à tə, də tɩʋ tə wa lɩ̀à tə fən. Kʋ mʋ̀ yɩrɩ, ʋ wà kʋ yoo təntə tʋn yɩcaʋ wa, kʋ yɩ ʋ tʋn kʋ tɩtɩn nə. 28 Kʋ tɩpʋrɩ nə, jɩjʋ fuən fuən, tɩʋ tə wa lɩ̀à tə zàn, də nə̀ń woŋwanʋ Baalə joŋi bwálɩ́ tə nə, kʋ gwɛrɩ, yá woŋwanʋ Aswera dacelə tə yà nə wulə joŋi bwálɩ́ tə bɩan nə, ga goŋə. Yá Zwedeyon yà ja bələ nii nabɩa tə, ʋ ma fwa joŋi, ʋ sʋ̀rɩ́ Yɩɩ joŋi bwálɩ́ tə yuu wa, ʋ nə lwə̀ dʋra. 29 Lɩ̀à tə bwe duən, ba wʋ́: «Wàà nə tʋn yoo kʋ tə?» Ba bwe, ba twarɩ kʋ nɛɛ, yá ba nì də kʋ yɩ Zʋasə bìú Zwedeyon nə tʋn kʋ. 30 Tɩʋ tə wa lɩ̀à tə dàń swɩ̀n Zʋasə con, ba wʋ́: «Lɩ n bìú tə n pa nəba, sə nə gʋ. Cɩ́gá, ʋ gwɛrɩ woŋwanʋ Baalə joŋi bwálɩ́ tə, ʋ ga goŋə woŋwanʋ Aswera dacelə tə, ka yà nə wulə joŋi bwálɩ́ tə bɩan nə. 31 Zʋasə le lɩ̀à tə mama, ba yà nə kɩkarɩ wá, ʋ wʋ́: «Á mʋ̀ nə mɛ sə á jon woŋwanʋ Baalə kʋ̀ʋ̀, á ta naaa? Á mʋ̀ nə wàá Baalə á tɛ, á joŋə naaa? Lìù tə mama ʋ nə pɩ̀à sə ʋ jon Baalə kʋ̀ʋ̀ ʋ ta, ʋ wá tɩ, də tɩa tə wà pʋrɩ. Də Baalə nə yɩ yɩɩ, kʋ tətə wá ta kʋ tɩ̀àn nə, kʋ mʋ̀ joŋi bwálɩ́ nə, ba gwɛrɩ.» 32 Kʋ nə zɩgɩ kʋ dɩɩn tə nə, ba dɩga yɩrɩ Zwedeyon nə, ba boŋə wá Yerubaalə. Kʋ də̀ń nə yɩ, “Baalə wá ta kʋ zɩgɩ ʋ nə,” ʋ nə gwɛrɩ kʋ joŋi bwálɩ́ tə yɩrɩ.

Zwedeyon lòrì mɩmɩnʋ Yɩɩ con

33 Madɩan dwíí tə mama, də Amalɛkə dwíí tə, də yɩɩ yipɩan con dwíə́ tə twi, ba kun duən nə. Ba galɩ Zʋrədɛn mʋnaa tə, ba va ba kə ba dəkuu bwálɩ́ Zwɩzəreyɛlə varɩnaa tə wa. 34 Ba-Yígúrə́-Jə-Tiu Siŋu* tə cúə́ Zwedeyon yuu wa, yá ʋ wúrí nabwana, ʋ ma bon Abiyezɛrə sàń lɩ̀à tə, sə ba nan ba pú ʋ kwa. 35 Ʋ tʋn ʋ kə Manase dwíí tə mama nə, sə ba də nan ba pú ʋ kwa. Ʋ tʋn ʋ kə Azɛrə dwíí tə, də Zabulon dwíí tə, də Nɛfətali dwíí tə nə, yá ba də nan ba jəri ba.

36 Zwedeyon swɩ̀n Yɩɩ con, ʋ wʋ́: «Də n cɩ́gá nə pɩ̀à sə kʋ twá də à mʋ̀ jɩɩn, n ma jon Yɩzərayɛlə lɩ̀à tə, ndə n nə swɩ̀n nətʋ, 37 à wá tún bɔɔ tʋa tə wa. Bɔɔ tə cɩcɩ nə vwə nyʋ̀nʋ̀, yá tɩa tə mʋ̀ ga zɩgɩ nəkʋrʋ, à wá twá nətʋ à ma lwarɩ də, kʋ cɩ́gá wá twá də à mʋ̀ jɩɩn, n ma jon Yɩzərayɛlə lɩ̀à tə, ndə n nə swɩ̀n nətʋ.» 38 Yá kʋ cɩ́gá tʋn, ndə Zwedeyon nə lòrì nətʋ. Kʋ tɩpʋrɩ nə, ʋ zàn jɩjʋ fuən fuən, ʋ kàŋà bɔɔ tə, yá nyʋ̀nʋ̀ nan kʋ yɩra, tə sú wùrú zʋŋa. 39 Zwedeyon kʋ́ʋ̀ swɩ̀n Yɩɩ con, ʋ wʋ́: «À lòrì mʋ́, dàn ká pa n lɩŋa zàn à yuu wa. À tə pɩ̀à sə à lòrì mʋ́ yoo nədʋ. À tə pɩ̀à sə à ja bɔɔ tə, à fwa mɩmɩnʋ don. Naa kʋ tə nə, à pɩ̀à sə bɔɔ tə cɩcɩ ya nəkʋrʋ, sə tɩa tə mama ga vwa nyʋ̀nʋ̀, ka kɩkarɩ.» 40 Yá Yɩɩ tʋn kʋ nətʋ tə, kʋ tɩtɩn təntə nə. Bɔɔ tə cɩcɩ nə yɩn nəkʋrʋ, tɩa tə mama ga vwa nyʋ̀nʋ̀, ka kɩkarɩ.