Kwatara 7

Zwedeyon kúrí bara biətwa, sə ʋ ma ta Madɩan dwíí tə

1 Zwedeyon, ʋ yɩrɩ don nə yɩ Yerubaalə, də lalʋʋ tə mama, kʋ yà nə wulə də wá, zàn jɩjʋ fuən fuən, ba va ba kə ba dəkuu bwálɩ́ Harɔdə nabuliyii tə nii nə. Madɩan dwíí dəkuu bwálɩ́ yà wulə Zwedeyon-ba dəkuu bwálɩ́ tə jɩzən yuu. Kʋ yà zɩgɩ More dədolu tə nə, kʋ va kʋ zʋ varɩnaa tə wa. 2 Ba-Yígúrə́-Jə-Tiu swɩ̀n Zwedeyon con, ʋ wʋ́: «N lɩ̀à tə dáá zənzən ba ja lɛ, sə à ma pɩn ba də́ dɩ̀àn, Madɩan dwíí tə yuu wa. Yɩzərayɛlə lalʋʋ təntə nə dí dɩ̀àn, ba wá pa dun ba tɩ̀àn nə, ba ga yá nə. Ba wá swɩ̀n də, ba tətə nə ta ba jon ba tɩ̀àn. 3 Kʋ mʋ̀ yɩrɩ, n dàń bòrì lalʋʋ tə wa, n swɩ̀n sə lìù tə mama fən nə jə wá, ʋ ga vɩvaga, sə kʋ tíú pìí, ʋ dàn ká twá ʋ va Galadə paan tə yuu wa.» Yá lalʋʋ tə wa bara mʋ̀rʋ̀ sapʋa də bələ pìí, kʋ ga ga bara mʋ̀rʋ̀ fugə. 4 Ba-Yígúrə́-Jə-Tiu kʋ́ʋ̀ swɩ̀n Zwedeyon con, ʋ wʋ́: «Lalʋʋ tə, tə dáá zənzən. Ja ba n cú nɩ́á tə nii nə, yá à wá kúrí ba, à pa mʋ́. Lìù tə à nə swɩ̀n n con də ʋ mɛ, sə ʋ twá n nə ʋ va, kʋ tíú wá twá n nə ʋ va. Yá lìù tə mama, à nə swɩ̀n n con də ʋ wà mɛ, sə ʋ twá n nə ʋ va, kʋ tíú bá va!» 5 Zwedeyon jɩn lalʋʋ tə ʋ cú nɩ́á tə nii nə. Yá Ba-Yígúrə́-Jə-Tiu dàń swɩ̀n ʋ con, ʋ wʋ́: «Lɩ̀à tə mama, ba nə wá pú ba nii nɩ́á tə wa, ba nyʋn ndə kukurə nə, n wá pwɛ̀ ba n zɩgɩ vàn nə. Yá lɩ̀à tə də, ba nə wá tʋ ba nadwana yuu ba nyʋn, n wá pwɛ̀ ba də, n zɩgɩ vàn nə.» 6 Lɩ̀à tə nə gà nɩ́á tə də ba jɩɩn ba nyʋn, yɩn bara biətwa. Lalʋʋ tə gɩganɩ tə mama yɩ ba tʋa ba nadwana yuu, ba pú ba nii nɩ́á tə wa, ba nyʋn. 7 Ba-Yígúrə́-Jə-Tiu dàń swɩ̀n Zwedeyon con, ʋ wʋ́: «Bara biətwa tə, ba nə gà nɩ́á tə də ba jɩɩn ba nyʋn tə nə, à wá ma ta à jon Yɩzərayɛlə lɩ̀à tə, à ga pa n də́ dɩ̀àn Madɩan dwíí tə yuu wa. Lalʋʋ tə gɩganɩ tə mama pìrə́ ba va ba sànɩ́.» 8 Bara biətwa tə dàń jon lalʋʋ tə gɩganɩ tə wodirən tə, də ba nabwanan tə, tə yà nə wulə ba jɩɩn wa. Zwedeyon pɩn bara biətwa tə zɩgɩ ʋ con, ʋ ga pa Yɩzərayɛlə lalʋʋ tə gɩganɩ tə mama pìí ba va ba sànɩ́.

Madɩan dwíí dəkuu bwálɩ́ tə yà wulə Zwedeyon-ba dəkuu bwálɩ́ tə tɩa con, varɩnaa tə wa.

Zwedeyon nɩ mɩmɩnʋ, kʋ nə bɩrɩ də ʋ wá də́ dɩ̀àn

9 Ba-Yígúrə́-Jə-Tiu swɩ̀n Zwedeyon con, kʋ tɩtɩn təntə nə, ʋ wʋ́: «Zàn n cú Madɩan dwíí dəkuu bwálɩ́ tə wa. Cɩ́gá, à ken kʋ, n jɩɩn wa. 10 Də fən nə jə mʋ́ sə n ta ba, sə n ja n tʋtʋnʋ Pura, n ma kwé n tɩ̀àn, n ja dí yáá n va. 11 N nə cúə́ lá, n wá nì kʋ tə ba nə swɩ̀n, yá kʋ kwa nə, n jɩ̀àn dàń wá ja dɩ̀àn n ma ta.» Zwedeyon də ʋ tʋtʋnʋ Pura vəli ba yí bwálɩ́ tə, Madɩan dwíí kwatara tə duən nə cɩ̀gà, ba zɩga. 12 Madɩan dwíí tə, də Amalɛkə dwíí tə, də yɩɩ yipɩan con dwíə́ tə mama yà larɩ ba sú varɩnaa tə, ndə kayɩra nə. Ba nyʋgʋmɛ tə nii yà wàrɩ̀ kʋ gàlɩ̀, ndə mʋʋ nii kasɩlʋ nə. 13 Zwedeyon yí lá, də bɛɛ don yà wulə ʋ maŋa pandwɩa yoo, ʋ bɩrɩ ʋ don nə. Ʋ yà swɩ̀n, ʋ wʋ́: «À dwɛ̀ dʋndwɩa, də dipɛn ba nə wùə̀ də dipɛn mɩna yiri don, wulə kʋ bibili nə mʋ̀ Madɩan dwíí dəkuu bwálɩ́ tə wa. Kʋ bibili kʋ bà kʋ bwɩn gansili tə don, kʋ dɩ. Kʋ gurə gansili tə duən wa, kʋ ga vəvəri kʋ, kʋ tún kʋ kwa yara. Yá gansili tə buburi duən yuu.» 14 Lìù tə nə ʋ nə maŋa ʋ bɩrɩ tə, ma le, ʋ wʋ́: «Kʋ tə tà yoo don mama, kʋ yɩ Zʋasə bìú Zwedeyon, ʋ nə yɩ Yɩzərayɛlə lìù, kwatara sɩ̀ʋ́ tə nə, kʋ bɩrɩ! Yɩɩ ken nə mʋ̀ Madɩan dwíí tə, də nə dəkuu bwálɩ́ tə mama, Zwedeyon jɩɩn wa.» 15 Máŋá tə, Zwedeyon nə nì pandwɩa tə, də tə də̀ń gwiun tə, ʋ tʋa ʋ nadwana yuu, ʋ pa dun Yɩɩ nə, ʋ ga pìí ʋ bà Yɩzərayɛlə lɩ̀à dəkuu bwálɩ́ tə wa, ʋ swɩ̀n, ʋ wʋ́: «Á zaŋa yɩɩ nə! Cɩ́gá, Ba-Yígúrə́-Jə-Tiu ken Madɩan dwíí dəkuu bwálɩ́ tə, á jɩɩn wa.»

Zwedeyon dí dɩ̀àn Madɩan dwíí tə yuu wa

16 Zwedeyon pwɛ̀ bara biətwa tə, púlə́ batwa. Ʋ pɩn nabwanan, də kwàrɩ́ worən, də tə waa məndɛɛ, ba mama nə. 17 Yá ʋ dàń swɩ̀n ba con, ʋ wʋ́: «Á wá ywàń à con, á ga fwa ndə à nə. Máŋá tə, à nə yí Madɩan dwíí dəkuu bwálɩ́ tə nii, kʋ tə à nə fwa, sə á də fwa kʋ. 18 Máŋá tə, à də lɩ̀à tə mama, ba nə wulə à con, nə wúrí nabwanan, sə á də wúrí nabwanan, á kɩkarɩ Madɩan dwíí dəkuu bwálɩ́ tə, á ga swɩ̀n, á wʋ́: “Ba-Yígúrə́-Jə-Tiu də Zwedeyon nə wá də́ dɩ̀àn!” »

19 Zwedeyon də bara bíí tə, ba yà nə wulə də wá, twi ba yí Madɩan dwíí dəkuu bwálɩ́ tə nii, máŋá tə wa, tɩa nə kwɩ́n ka tara ka mɛ duən. Kʋ máŋá tə wa, də Madɩan dwíí tə kwatara duən dàń nə twi, ba lwàń kwatara tə yuu nə, ba nə cɩ̀ bwálɩ́ tə nə. Zwedeyon də ʋ lɩ̀à tə wúrí nabwanan, ba ga lwa kwàrɩ́ tə yà nə wulə ba jɩɩn wa. 20 Púlə́ bələ tə duən tə də dàń wúrí nabwanan, ba ga lwa kwàrɩ́ tə. Ba yà jə məndɛɛ tə ba jɩgwiə wa, ba ga jə nabwanan tə ba jɩzən wa, ba wúrí də ba mà cə̀rí, ba wʋ́: «Nə tɛga ba! Ba-Yígúrə́-Jə-Tiu də Zwedeyon nə wá də́ dɩ̀àn!» 21 Zwedeyon lɩ̀à tə kɩkarɩ Madɩan dwíí dəkuu bwálɩ́ tə, ba lìù mama zɩga ʋ yizɩga nə. Yá Madɩan dwíí kwatara tə mama ga cə́n, ba dəkuu bwálɩ́ tə wa, ba mà bubwiə, yá ba dəri sə ba jɛ́n. 22 Máŋá tə bara biətwa tə nə wúrí nabwanan tə, Ba-Yígúrə́-Jə-Tiu pɩn Madɩan dwíí kwatara tə vəvəri ba gʋ duən, də ba kwatara sɩ̀án, ba dəkuu bwálɩ́ tə mama wa. Ba duən dəri ba va ba nan Bɛtə-Swɩta nə, kʋ nə daa Serera vàn con, də Abɛlə-Mehola nə, kʋ nə bwə́lə́ də Tabatə.

23 Nɛfətali dwíí tə wa, də Azɛrə dwíí tə wa, də Manase dwíí tə mama wa, Yɩzərayɛlə kwatara tə twi duən yáá. Yá ba dàń púə́ Madɩan dwíí tə kwa, ba dɩŋɩ. 24 Zwedeyon tʋn ʋ kə Efərayimə pɛɛn nagwanaa lɩ̀à tə mama nə, ʋ wʋ́: «Á mama cwíə́ á cɩ̀ Madɩan dwíí tə yáá nə. Á díə́ ba yáá, á va á cɩ̀ nɩ́á bwálá tə nə, tə nə wulə Zʋrədɛn mʋnaa tə nii nə, kʋ va kʋ yí Bɛtə-Bara. Efərayimə dwíí bara tə mama dàń twi duən yáá, ba va ba cɩ̀ nɩ́á bwálá tə nə, tə nə wulə Zʋrədɛn mʋnaa tə nii nə, kʋ va kʋ yí Bɛtə-Bara. 25 Ba jɩn Madɩan dwíí pɛ̀gá bələ tə. Ba mʋ̀ nə yɩ Ɔrɛbə də Zɛbə. Ba gʋa Ɔrɛbə pɩ̀ʋ̀ don yuu wa, yá ba dàń dɩga kʋ yɩrɩ Ɔrɛbə pɩ̀ʋ̀. Yá ba gʋa Zɛbə gwàlʋ́ don nii nə, ba nə ma nɩŋɩ divɛn tɩ̀án lənə, yá ba dɩga kʋ yɩrɩ Zɛbə divɛn tɩ̀án lənə gwàlʋ́. Ba dɩŋɩ Madɩan dwíí tə kwa, yá ba goŋi Ɔrɛbə də Zɛbə yun, ba ja bà ba pa Zwedeyon nə, Zʋrədɛn mʋnaa tə vàn tə don nə.