Kwatara 8

Efərayimə dwíí lɩ̀à tə lɩŋa zàn

1 Efərayimə dwíí lɩ̀à tə bwe Zwedeyon, ba wʋ́: «Tʋtʋnaa ka tə də̀ń nə yɩ bɛ̀ɛ̀, n nə tʋn nə yɩra? Kʋ yɩ nətə, n ma wà nəba bon, máŋá tə wa, n nə vələ sə n ta Madɩan dwíí tə?» Yá ba dàń dɩga jara nəfarʋ də Zwedeyon. 2 Zwedeyon le ba, ʋ wʋ́: «Bɛ̀ɛ̀ nə à də taa fwa, kʋ nə wàá kʋ tì kʋ ma maŋa də dɩ̀àn tə, á nə dí? Efərayimə dwíí tə divɛn tɩ̀án lənə wogunə tətə ba Abiyezɛrə sàń tə divɛn tɩ̀án lənə tə mama kʋ́kwà naaa? 3 Á mʋ̀ jɩɩn wa nə, Yɩɩ jɩn Madɩan dwíí pɛ̀gá tə, Ɔrɛbə də Zɛbə, ʋ kə. Bɛ̀ɛ̀ nə à də taa kʋ́ʋ̀ fwa, kʋ nə wàá kʋ tì kʋ ma maŋa də dɩ̀àn tə, á nə dí?» Zwedeyon nə le nətʋ tə, Efərayimə dwíí tə lɩŋa tə yà nə zaŋa ʋ yuu wa, dàń pìí tə tʋ.

Sukotə də Penuwɛlə tɩ̀án vɩga, sə ba pa wodiu Zwedeyon kwatara tə nə

4 Zwedeyon twi ʋ bɩn Zʋrədɛn mʋnaa tə, ʋ mʋ̀ də bara biətwa tə, ba yà nə wulə də wá. Ba yà gwàrɩ̀, yá də kʋ mɛ, ba yà tə púə́ ba dʋŋa tə kwa ba dɩŋɩ. 5 Ba nə yí Sukotə, Zwedeyon swɩ̀n Sukotə tɩ̀án con, ʋ wʋ́: «À lòrì aba, sə á pa dipɛn kukulə lalʋʋ tə nə, ba nə wulə à kwa. Cɩ́gá, ba gwàrɩ̀, yá Madɩan dwíí pɛ̀gá tə, ba nə boŋə Zeba də Saləmuna nə, à wulə à dɩŋɩ sə à ja. 6 Yá Sukotə tɩʋ tə yáá tɩ̀án tə le, ba wʋ́: «N tə jɩn Zeba də Saləmuna, n kə n jɩɩn wa naaa, nə ma pɩn dipɛn n kwatara nə?» 7 Zwedeyon le ba, ʋ wʋ́: «Kʋ ziən! Máŋá tə, Ba-Yígúrə́-Jə-Tiu nə jɩn Zeba də Saləmuna ʋ kə à jɩɩn wa, à wá pən aba, də kasɔɔ lanworu casʋran kafɩran, də səni kafɩran.» 8 Zwedeyon zɩgɩ lá, ʋ kɛ̀ń ʋ va Penuwɛlə. Ʋ lòrì kʋ lòrí nədʋ tə tətə, Penuwɛlə tɩ̀án də con, yá ba də le wá, ndə Sukotə tɩ̀án nə le wá nətʋ. 9 Yá ʋ dàń swɩ̀n Penuwɛlə tɩ̀án də con, ʋ wʋ́: «Máŋá tə, à nə pìí à bà də yazurə, à wá gwɛrɩ á dəyuu dìə̀ nədarʋ kʋ tə.

Zwedeyon jɩɩn zʋa Zeba də Saləmuna

10 Zeba də Saləmuna yà wulə Karəkɔrə nə, ba də ba kwatara. Kwatara tə mama ba yà nə ga, yɩɩ yipɩan con dwíə́ tə kwatara tə mama wa, yà yɩ ndə bara mʋ̀rʋ̀ fugə bonu nə. Cɩ́gá, ba bara mʋ̀rʋ̀ bíí də sapʋa, ba nə ja kwatara sɩ̀ʋ́ ba ma tɛ, yà tɩga. 11 Zwedeyon twá ganbələ tɩ̀án cwəŋə tə, ka nə wulə Noba də Yogəboha tɩan tə yɩɩ yipɩan con. Yá ʋ dàń vəli ʋ ta dʋŋa tə kwatara sàń tə, kʋ yà nə wulə lá, ʋ də́. Dʋŋa tə yà bʋŋa də, yoo kʋ́ʋ̀ wàrɩ̀ ba kʋ yí. 12 Zeba də Saləmuna dəri sə ba jɛ́n, yá Zwedeyon púə́ ba kwa. Ʋ dɩŋɩ Madɩan dwíí pɛ̀gá bələ təntə ʋ ja, fən ga zʋ ba kwatara tə mama, ba dəri ba ywan duən yáá nə.

13 Zʋasə bìú Zwedeyon nə pìí ʋ nan kʋ̀ʋ̀ tə ʋ bɩ̀àn, ʋ twá Erɛsə cwəŋə dədolu tə. 14 Ʋ nə yí Sukotə, ʋ jɩn balandʋrʋ don lá, ʋ bwe wá yìə̀n. Yá balandʋrʋ tə dàń pʋ́pʋ́nɩ́ Sukotə tɩʋ tɩ̀án tə, də ba nəkwɩna tə yɩra, ʋ pa Zwedeyon nə. Ba yɩn bara sapwɩtwa də fugə də barpɛ. 15 Kʋ kwa nə, Zwedeyon twi ʋ yí Sukotə tɩ̀án tə, ʋ swɩ̀n ba con, ʋ wʋ́: «Á nəŋə Zeba də Saləmuna nə. Ba mʋ̀ yoo nə nə, á twá á ma twɩn nə. Á swɩ̀n à con, á wʋ́: “N tə jɩn Zeba də Saləmuna, n kə n jɩɩn wa naaa, nə ma pɩn dipɛn n kwatara nə, ba nə gwàrɩ̀!” » 16 Yá ʋ dàń jɩn tɩʋ tə nəkwɩna tə, ʋ kɛ́n kasɔɔ lanworu casʋran kafɩran, də səni kafɩran, ʋ ma pən ba. 17 Ʋ gwɛrɩ Penuwɛlə tɩ̀án dəyuu dìə̀ nədarʋ tə də, ʋ ga gʋ tɩʋ tə wa lɩ̀à tə.

18 Zwedeyon bwe Zeba də Saləmuna, ʋ wʋ́: «Lɩ̀à tə, á nə gʋa Tabɔrə paan tə yuu wa, yà yɩ nətə?» Ba le, ba wʋ́: «Ba yà yɩ ndə n nə! Ba lìù mama yà nyən ndə pɩ̀ʋ́ bìú nə.» 19 Ʋ swɩ̀n, ʋ wʋ́: «Ba yɩ à nubɩa, à nuu bilɩra pwɛɛn! Kʋ yɩ cɩ́gá, Ba-Yígúrə́-Jə-Tiu wulə! Á yà nə yá ba, á pa ba ya lʋʋ wa, à yà bá gʋ aba. 20 Yá ʋ dàń swɩ̀n ʋ bikwɩa Yetɛrə con, ʋ wʋ́: «Zàn, n gʋ ba!» Yá balandʋrʋ tə wà ʋ kwatara sɩ̀ʋ́ tə cʋ̀rɩ̀, fən yà nə jə wá yɩrɩ. Cɩ́gá, ʋ tə yà yɩ balandʋrʋ zənzən. 21 Zeba də Saləmuna ma swɩ̀n Zwedeyon con, ba wʋ́: «N tətə zàn, n gʋ nəba! Cɩ́gá, bɛɛ nə mɛ nətʋ, mə ʋ dɩ̀àn də mɛ nətʋ! Zwedeyon ma nyɩ́n ʋ zàn, ʋ gʋ ba. Kʋ kwa nə, ʋ pɛ̀ wonanan tə, ndə canpɩan nə, tə nə guə ba nyʋgʋmɛ tə bɩan nə.

Zwedeyon zɩgɩ woŋwanʋ, ʋ pa Yɩzərayɛlə lɩ̀à nə

22 Kʋ kwa nə, Yɩzərayɛlə lɩ̀à tə swɩ̀n Zwedeyon con, ba wʋ́: «Ya nə pɩ̀ʋ́, n də́ pàrɩ̀ nə yuu wa! Nə sɛ̀ sə n bìú tə də də́ pàrɩ̀ nə yuu wa, n kwa nə. Yá n bìú tə də kwa nə, n nàʋ́ də wá də́ pàrɩ̀ nə yuu wa. Cɩ́gá, n jon nəba Madɩan dwíí tə jɩɩn wa.» 23 Yá Zwedeyon le ba, ʋ wʋ́: «À mʋ̀ bá də́ pàrɩ̀ á yuu wa, à bìú də ma bá də́ pàrɩ̀ á yuu wa. Ba-Yígúrə́-Jə-Tiu nə wá də́ pàrɩ̀ á yuu wa.» 24 Zwedeyon swɩ̀n ba con, ʋ súrí lá, ʋ wʋ́: «À jə lòrí, à pɩ̀à sə à lòrì á con! Á lìù mama pa nə kabaŋʋ nədʋ, ʋ tori wiən tə wa, nə nə ta nə jon.» Cɩ́gá, dʋŋa tə yà jə sɩ́án kabaŋa, ndə Yɩsəmayɛlə dwíí lɩ̀à tə mama nə. 25 Ba le, ba wʋ́: «Nə sɛ̀ sə nə pa tə mʋ́, də pupwən.» Yá ba dàń larɩ gànʋ̀ tɩa, ba lìù mama ga lɩ jɩfɩlɩ nədʋ, ʋ tori wiən tə wa, ba nə ta ba jon, ʋ dɩ lá. 26 Sɩ́án jɩfɩla tə mama, Zwedeyon nə lòrì, dun yà yí kilo sapʋa. Wonanan tə, ndə canpɩan nə, də zɩnkwana tə, də ganmʋla tə, Madɩan dwíí pɛ̀gá tə yà nə zwɩ, nii yà ba lá də́. Ba nyʋgʋmɛ bɩan zànán tə də nii yà ba lá də́. 27 Zwedeyon ja sɩ́án tə, ʋ ma fwa woŋwanʋ, ʋ zɩgɩ ʋ tɩʋ Ofəra nə, yá Yɩzərayɛlə lɩ̀à tə mama dàń cwàrɩ̀*, ba ma pɩn kʋ dun. Kʋ jìgə̀ ndə nyalɩ nə, Zwedeyon də ʋ dìə̀ tə nə tʋa kʋ wa.

28 Mə kʋ twá nətʋ, Madɩan dwíí tə ma bwànɩ̀, Yɩzərayɛlə lɩ̀à yáá con, yá ba kʋ́ʋ̀ wà wànɩ́, ba pìí ba zɩ̀n ba yuu yɩɩ nə. Yá lʋʋ nii tə dàń yɩn sìə́ wa, bɩna sapwɩlə, Zwedeyon lʋʋ wúlú tə máŋá wa.

Zwedeyon tɩan yoo

29 Zʋasə bìú Zwedeyon, ʋ yɩrɩ don nə yɩ Yerubaalə, pìí ʋ va ʋ sàń, ʋ wulə lá. 30 Zwedeyon yà jə bɩ̀á sapwɩtwa də fugə, ba nə yɩ ʋ tətə nə lɩrɩ. Cɩ́gá, ʋ kana yà dáá. 31 Zwedeyon yà jə bwàlʋ́ Siswɛmə nə. Ʋ də ʋ bwàlʋ́ təntə də lɩrɩ bìú, yá ʋ dɩga bìú tə yɩrɩ Abimelɛkə. 32 Zʋasə bìú Zwedeyon tɩga, də ʋ kwɩn zənzən, ʋ ga də́ lʋʋ ywánɩ́ də. Ba gùrì wá, ʋ nyɩna Zʋasə libəri tə wa, Ofəra nə. Ofəra tɩʋ tə yɩ Abiyezɛrə sàń tə nə tɩ.

33 Zwedeyon tɩan kwa nə, Yɩzərayɛlə lɩ̀à tə kʋ́ʋ̀ sinti, ba cwàrɩ̀*, ba ma pɩn dun woŋwanan tə nə, ba nə boŋə Baalə*. Ba tì woŋwanʋ tə, ba nə boŋə Baalə-Beritə, ba ma fwa ba Yɩɩ. 34 Yá ba dàń swɛ̀ɛ́ Ba-Yígúrə́-Jə-Tiu yoo, ʋ nə yɩ ba Yɩɩ. Ʋ mʋ̀ Yɩɩ tə, ʋ nə jon ba, ba dʋŋa tə mama jɩɩn wa, ba yà nə kɩkarɩ ba. 35 Yá ba wà won mama tʋn Zwedeyon, ʋ yɩrɩ don nə yɩ Yerubaalə dìə̀ tə yɩra, kʋ nə bɩrɩ də ba yə̀ə́ jwɩan, zəni tə mama yɩrɩ, ʋ nə fwa Yɩzərayɛlə yɩra.