Abimelɛkə jìgə̀ Siswɛmə pɩ̀ʋ́
9
1 Yerubaaləa bìú Abimelɛkə vəli Siswɛmə, ʋ kə ʋ nɩbana tə, də ʋ nuu sàń lɩ̀à tə mama duən yáá, ʋ swɩ̀n ba con, ʋ wʋ́: 2 «À lòrì aba, sə á bwe Siswɛmə tɩʋ tɩ̀án tə á jə́n, ba swə sə Yerubaalə bɩ̀á sapwɩtwa də fugə tə mama də́ pàrɩ̀ ba yuu wa, nə à yə̀ə́ ba pɩ̀à sə bɛɛ nədʋ cɩcɩ nə yà ba pɩ̀ʋ́. Yá á lìə́ á tɩ̀àn də, à mʋ̀ yɩ á jana.» 3 Abimelɛkə nɩbana tə ja sʋ̀ràn təntə mama, ba va ba swɩ̀n Siswɛmə tɩʋ tɩ̀án tə mama con, yá ba dàń kúrí ba tì, sə Abimelɛkə nə ya ba pɩ̀ʋ́. Cɩ́gá, ba yà swɩ̀n də, ʋ yɩ ba nubiu. 4 Ba lɩ wárʋ́ səbilurən sapwɩtwa də fugə, ba woŋwanʋ Baalə-Beritə dìə̀ tə wa, ba pa Abimelɛkə nə. Yá Abimelɛkə dàń ja səbiu təntə, ʋ ma tì bakʋkwanyɩna də ləzwənywanan, ʋ kə ʋ kwa. 5 Kʋ kwa nə, ʋ pìí ʋ bà ʋ nyɩna dìə̀ tə wa, Ofəra nə, yá ʋ dàń gʋa ʋ nubɩa sapwɩtwa də fugə tə, ba də nə yɩ ʋ nyɩna Yerubaalə bɩ̀á, kapan nədʋ yuu wa. Yotamə yà nə yɩ Yerubaalə bɩ̀á tə wa nəmaa tíú. Yá ʋ mʋ̀ cɩcɩ nə wànɩ́, ʋ jɛ́n Abimelɛkə yáá nə. Cɩ́gá, ʋ mʋ̀ yà səgə. 6 Siswɛmə tɩʋ tɩ̀án tə mama, də Milo dìə̀ tə mama twi, ba kun duən nə, Siswɛmə sɩsanʋ tə də̀ń nə, kapan tə bɩan nə, kʋ nə zɩga lá. Yá ba dàń pɩn pàrɩ̀, Abimelɛkə nə.Yotamə zwansɩsara tə yoo
7 Yotamə nì də, Abimelɛkə jìgə̀ pɩ̀ʋ́. Ʋ dàń vəli, ʋ dɩ̀ ʋ zɩga Garizimə paan tə yuu wa, ʋ ga bòrì, ʋ wʋ́:
«Á mʋ̀ Siswɛmə tɩʋ tɩ̀án-ba, á cʋga à con,
də á nə pɩ̀à, sə Yɩɩ cʋgʋ á con.
8 Dɩɩn don nə, tɩ̀án nə zàn
tə va, sə tə tún tə pɩ̀ʋ́.
Tə swɩ̀n olivə tɩ̀ʋ́ con, tə wʋ́:
“Ya nə pɩ̀ʋ́!”
9 Yá olivə tɩ̀ʋ́ tə le tə, kʋ wʋ́:
“À mʋ̀ bá yá à nʋga tə nə,
ba nə ma pɩn dun yɩa də ləzoni nə,
à ga va à də́ pàrɩ̀ tɩ̀án yuu wa.”
10 Tɩ̀án tə ma swɩ̀n kapɩrʋ con, tə wʋ́:
“N mʋ̀ bàá, n ya nə pɩ̀ʋ́!”
11 Yá kapɩrʋ le tə, kʋ wʋ́:
“À mʋ̀ bá yá à bɩ̀á tə nə bwànà,
tə ga ywán lənu nə,
à ga va à də́ pàrɩ̀ tɩ̀án yuu wa.”
12 Tɩ̀án tə ma swɩ̀n divɛn tɩ̀ʋ́ con, tə wʋ́:
“N mʋ̀ bàá, n ya nə pɩ̀ʋ́!”
13 Yá divɛn tɩ̀ʋ́ le tə, kʋ wʋ́:
“À mʋ̀ bá yá à divɛn tə nə,
kʋ nə pɩn pupwən yɩa də ləzoni nə,
à ga va à də́ pàrɩ̀ tɩ̀án yuu wa.”
14 Yá tɩ̀án tə mama dàń swɩ̀n saʋ con, tə wʋ́:
“N mʋ̀ bàá, n ya nə pɩ̀ʋ́!”
15 Saʋ ma le tɩ̀án tə, kʋ wʋ́:
“Kʋ nə yɩ də á waa mama nə, á pɩ̀à,
sə á twɛ́n dun nʋga* à yuu wa,
á ma tún nə, sə à yà á pɩ̀ʋ́,
á bɩ̀án á kwálɩ́ á yuu, à ywárɩ́ nə.
Kʋ nə tà nətʋ, mən wá nan à casʋran tə wa,
tə də́ Liban nyanbwərə tə də tətə.” »
16 Yotamə tə swɩ̀n, ʋ súrí lá, ʋ wʋ́: «Kʋ mʋ̀ yɩrɩ, sɩ́ʋ́n nə, á mʋ̀ Siswɛmə tɩ̀án dàń bʋŋa də, á nə pɩn pàrɩ̀ Abimelɛkə nə tə, yɩ yoo tə kʋ nə ziən, kʋ ga twá cɩ́gá nə, ndə kʋ nə mɛ nətʋ naaa? Á bʋŋa də kʋ yɩ zəni nə, á tʋn nətʋ, Yerubaalə də ʋ dìə̀ tə yɩra naaa? Yoo tə, á nə tʋn ʋ yɩra, mɛ də ʋ tʋ̀tʋ̀nán tə naaa? 17 Cɩ́gá, à nyɩna dʋgʋ ʋ mɩɩ kʋ̀ʋ̀ wa, ʋ ma ta ʋ pa aba. Yá ʋ jon aba Madɩan dwíí tə jɩɩn wa. 18 Yá á mʋ̀ dàń nyɩ́n á zàn, á zɩga à nyɩna dìə̀ tə nə, zə̀n kʋ tə. Á gʋa ʋ bɩ̀á tə, bara sapwɩtwa də fugə, kapan nədʋ yuu wa. Yá á dàń tì Abimelɛkə, à nyɩna bìú tə, ʋ nə lɩrɩ də ʋ bwàlʋ́ tə, á pa ʋ jì Siswɛmə tɩʋ tɩ̀án pɩ̀ʋ́, ʋ nə yɩ á nubiu yɩrɩ. 19 Də yoo tə, á nə tʋn Yerubaalə, də ʋ dìə̀ tə yɩra zə̀n kʋ tə, nə ziən kʋ ga twá cɩ́gá nə, ndə kʋ nə mɛ nətʋ, sə Abimelɛkə ya á pupwən lìù, sə á də ga ya ʋ pupwən lɩ̀à! 20 Kʋ nə tà nətʋ, sə mən nan Abimelɛkə con, tə də́ Siswɛmə tɩʋ tɩ̀án tə, də Milo dìə̀ tɩ̀án tə, sə mən ga nan ba də con tə də́ Abimelɛkə!
21 Kʋ kwa nə, Yotamə nan paan tə yuu ʋ cú, ʋ dəri ʋ va ʋ səgə Beyɛrə nə. Yá ʋ dàń yɩn ŋʋ́nɩ́, də ʋ nubiu Abimelɛkə.
Siswɛmə tɩ̀án zàn ba zɩgɩ Abimelɛkə nə
22 Abimelɛkə dí pàrɩ̀ Yɩzərayɛlə yuu wa, bɩna batwa. 23 Kʋ kwa nə, Yɩɩ pɩn jə̀rə́ kʋkwɩan zʋ Abimelɛkə, də Siswɛmə tɩʋ tɩ̀án tə pwə́rə́ wa, kʋ pa ba yà kʋ́ʋ̀ ba duən kori nə̀ń. Yá Siswɛmə tɩʋ tɩ̀án tə dàń zàn ba zɩgɩ Abimelɛkə nə. 24 Kʋ yɩn nətʋ, sə kʋ pa ba lwanɩ tə, ba nə tʋn Yerubaalə bɩ̀á sapwɩtwa də fugə tə yɩra, jɩŋɩ wànɩ́ kʋ ŋwɩ́n ba yɩra. Cɩ́gá, Siswɛmə tɩʋ tɩ̀án tə nə san Abimelɛkə nə, ʋ ma gʋ ʋ nubɩa sapwɩtwa də fugə tə. Yá mə kʋ dàń wá twá nətʋ, ba jana tə yoo ma zɩn ba nubiu Abimelɛkə, də Siswɛmə tɩʋ tɩ̀án tə. 25 Siswɛmə tɩʋ tɩ̀án tə pɩn lɩ̀à va, ba səgə pɛɛn tə yuu wa, sə ba ta Abimelɛkə, kʋ dɩ̀ ʋ yuu. Yá lɩ̀à təntə dàń yà naŋa, ba cɩ̀ lɩ̀à tə nə twá cwəŋə tə, ba joŋə ba wiən. Yá Abimelɛkə nì kʋ.
26 Dɩɩn don nə, Ebɛdə bìú Gaalə, də ʋ nubɩa twi Siswɛmə, yá Siswɛmə tɩʋ tɩ̀án tə jɩn ʋ dɩ̀àn. 27 Ba vəli ba divɛn tɩ̀án kárɩ́ wa, ba pʋ̀rɩ́ divɛn tɩ̀án lənə, ba kàŋà tə nɩ́á ba ma fwa cànà. Ba zʋa ba woŋwanʋ dìə̀, ba də́ wodirən, ba nyʋn sana, ba ga zɩrɩ ba kə Abimelɛkə nə. 28 Ebɛdə bìú Gaalə swɩ̀n, ʋ wʋ́: «Abimelɛkə yɩ Siswɛmə tɩ̀án bɛ̀ɛ̀, nə ma tʋŋa nə pɩn wá? Ʋ tà Yerubaalə bìú naaa? Yá kʋ tà Zebulə nə ʋ tún, sə ʋ ya tɩʋ tə yáá tíú naaa? Á tʋŋa á pa Hamɔrə nə, ʋ mʋ̀ nə yɩ Siswɛmə nyɩnab. Bɛ̀ɛ̀ yɩrɩ nə, nə mɛ, sə nə tʋn nə pa Abimelɛkə nə? 29 Gaalə swɩ̀n, ʋ wʋ́: «Aaa! Ba yà nə yá Siswɛmə tɩ̀án à jɩɩn wa, à yà wá pú Abimelɛkə yáá tɩa. À yà wá swɩ̀n ʋ con, à wʋ́: “Abimelɛkə, tanɩ n kwatara, sə nə ta kʋ̀ʋ̀.” »
30 Zebulə yà nə yɩ tɩʋ tə yáá tíú. Yá ʋ nə nì sʋ̀ràn tə, Gaalə nə swɩ̀n, ʋ lɩŋa pupwin ndə mən nə. 31 Zebulə dàń twá tɩa ʋ tʋn lɩ̀à, ʋ pa ba swɩ̀n Abimelɛkə con, ʋ wʋ́: «Nə̀ń, Ebɛdə bìú Gaalə, də ʋ nubɩa twi Siswɛmə, yá ba wulə ba sugə tɩʋ tə tɩ̀án, ba kəni n nə. 32 Kʋ mʋ̀ yɩrɩ, n dàń zàn tɩtɩn nə, sə n mʋ̀ də n kwatara tə va, á səgə kasɔɔ con. 33 Yá n dàń wá zàn jɩjʋ nə, máŋá tə, yɩcaʋ nə wulə kʋ pɛ́n, n pú tɩʋ tə n kə n ta, kʋ dɩ̀ kʋ yuu. Yá Gaalə də ʋ kwatara tə nə nan ba jəri mʋ́, n dàń wá ja wá, n ma tʋn kʋ tə n nə swə.»
34 Abimelɛkə də ʋ kwatara tə mama dàń zàn tɩtɩn nə, ba va ba səgə Siswɛmə tɩʋ tə nii nə. Ba yà pwɛ̀ púlə́ banɩa. 35 Ebɛdə bìú Gaalə yà nan, ʋ zɩga tɩʋ tə mimii nə. Yá kʋ máŋá tə wa nə, Abimelɛkə də ʋ kwatara tə nyɩ́n ba nan ba yisəgə bwálɩ́ tə wa. 36 Gaalə nɩ ba, yá ʋ swɩ̀n Zebulə con, ʋ wʋ́: «Nə̀ń lalʋʋ nə, ba naŋa pɛɛn tə yuu wa, ba cwi.» Yá Zebulə le wá, ʋ wʋ́: «Kʋ yɩ pɛɛn tə ywárɩ́ tə nə, n ma jì ləzoni.» 37 Gaalə tə bwɛ́, ʋ swɩ̀n, ʋ wʋ́: «Ywàń, kʋ yɩ lɩ̀à nə naŋa lʋʋ nii tə titəŋi wa, ba bɩ̀àn. Yá púlí don də nə, kʋ twá Vʋra Sɩsanʋ tə con cwəŋə tə, kʋ bɩ̀àn.» 38 Yá Zebulə dàń le wá, ʋ wʋ́: «Sə n sʋfaran tə wa yə̀n nə? Kʋ tà n wʋ́, Abimelɛkə nə yɩ wàà, á ma tʋŋa á pɩn wá naaa? Mə lɩ̀à təntə nə, n gwìə̀n tə. Sɩ́ʋ́n nə, n dàń nan n jəri ba, sə á ta kʋ̀ʋ̀.» 39 Gaalə nan ʋ ya Siswɛmə tɩʋ tɩ̀án tə yáá, ʋ ta kʋ̀ʋ̀ də Abimelɛkə. 40 Gaalə dəri Abimelɛkə yáá nə, yá Abimelɛkə púə́ ʋ kwa, ʋ dɩŋɩ wá. Abimelɛkə za Gaalə lɩ̀à tə kapʋpʋ, ʋ gʋ. Ba tʋa ba larɩ, ba va ba yí tɩʋ tə mimii. 41 Abimelɛkə mɛ Aruma nə, yá Zebulə ga dɩŋa Gaalə, də ʋ nubɩa tə, ʋ lɩ Siswɛmə wa.
42 Kʋ tɩa nə pʋrɩ, Abimelɛkə nì də, Siswɛmə tɩ̀án kəni ba sírí, sə ba nan ba va kasɔɔ con. 43 Ʋ dàń pwɛ̀ ʋ kwatara tə púlə́ batwa, ʋ ja də́ yáá ʋ va, ʋ səgə kasɔɔ tə wa. Yá máŋá tə, ʋ nə nɩ də, Siswɛmə tɩ̀án tə naŋa tɩʋ tə wa, ʋ nyɩ́n ʋ nan ʋ yisəgə bwálɩ́ tə wa, ʋ ta ba. 44 Abimelɛkə də kwatara púlí tə yà nə wulə də wá, dəri lala ba va ba cɩ̀ tɩʋ tə mimii tə nə. Yá ʋ kwatara púlə́ bələ tə duən tə dàń gʋa Siswɛmə tɩ̀án tə mama, ba yà nə wulə kasɔɔ con. 45 Abimelɛkə ta tɩʋ tə, yɩtʋrɩ tə mama. Ʋ jɩɩn zʋa tɩʋ tə, yá ʋ gʋa kʋ waa lɩ̀à tə. Ʋ cʋ̀gʋ̀ tɩʋ tə mama, ʋ ga mɩ́n nəkuən kʋ wa. 46 Siswɛmə dɩ̀àn dəkuu bwálɩ́ yun tɩ̀án tə nə nì kʋ nətʋ tə, ba mama nan ba va, ba səgə woŋwanʋ Beritə dìə̀ tə tɩa bʋʋ tə wa. 47 Abimelɛkə nì də, Siswɛmə dɩ̀àn dəkuu bwálɩ́ yun tɩ̀án tə kun duən nə. 48 Yá Abimelɛkə də ʋ kwatara tə mama dàń dɩ̀gà Saləmon paan tə yuu wa. Ʋ tì dèrí ʋ ma goŋə tɩ̀ʋ́ naa, ʋ tì ʋ palɩ ʋ pàrà wa. Kʋ kwa nə, ʋ swɩ̀n ʋ kwatara tə con, ʋ wʋ́: «Kʋ tə á nə nɩ də à fwa tə, á də fwaga nətʋ, ndə à nə, lala!» 49 Yá ʋ kwatara tə lìù mama dàń goŋi tɩ̀ʋ́ naa, ba ja pú Abimelɛkə kwa. Ba ja tɩ̀án nɛɛ təntə ba va, ba pú bʋʋ tə nii nə, ba kə mən. Yá ba dàń sʋ̀rɩ́ bʋʋ tə, də kʋ waa lɩ̀à tə mama. Mə nətʋ nə, Siswɛmə dɩ̀àn dəkuu bwálɩ́ lɩ̀à tə mama tɩga. Bara tə də kana tə mama yà yí ndə lɩ̀à mʋ̀rʋ̀ nə.
Abimelɛkə tɩan
50 Abimelɛkə zɩgɩ lá nə ʋ va, sə ʋ ta Tebɛsə tɩʋ tə. Ʋ vəli ʋ pú kʋ ʋ kə, yá ʋ ta kʋ, ʋ də́. 51 Dɩ̀àn dəkuu bwálɩ́ yà wulə tɩʋ tə titəŋi wa. Yá bara tə, də kana tə mama, də tɩʋ tə yáá tɩ̀án tə mama dàń vəli, ba səgə lá. Ba sun ba tɩ̀àn nii nə, ba ga dɩ̀ ba wulə kʋ dəyuu tə wa. 52 Abimelɛkə twi ʋ ta dɩ̀àn dəkuu bwálɩ́ tə, ʋ ga va ʋ yí kʋ mimii tə yɩra, sə ʋ kə mən kʋ nə. 53 Yá kʋ máŋá təntə wa, kan don zɩgɩ dəyuu tə wa, ʋ dɩ nʋŋʋ kapan Abimelɛkə yuu wa, yá kapan tə lwə ʋ yuu tə. 54 Kʋ də̀ń tə yuu wa, Abimelɛkə bon ʋ balandʋrʋ tə nə zɩŋa ʋ kwatarɩ zɩla tə, ʋ swɩ̀n ʋ con, ʋ wʋ́: «Lɩ n kwatara sɩ̀ʋ́ tə, n ma zwa nə n gʋ, ba dàn ká swɩ̀n də kʋ yɩ kan nə gʋa nə.» Balandʋrʋ tə ma zwa wá, yá ʋ tɩga. 55 Yɩzərayɛlə lɩ̀à tə nə nɩ də Abimelɛkə tɩga, ba lìù mama pìí ʋ va ʋ sàń.