Tola də Yayirə jìgə̀ Yɩzərayɛlə lɩ̀à kwatara yáá tɩ̀án
10
1 Abimelɛkə tɩan kwa nə, Puwa bìú Tola nə zàn, ʋ ta ʋ jon Yɩzərayɛlə lɩ̀à tə, ba dʋŋa jɩɩn wa. Tola yà yɩ Dodo nàʋ́, ʋ ga yɩ Yɩsakarə dwíí tə wa lìù. Ʋ yà yɩ ʋ wulə Swamirə nə, Efərayimə pɛɛn nagwanaa tə wa. 2 Ʋ yɩn Yɩzərayɛlə lɩ̀à kwatara yáá tíú, bɩna sapʋa də batwa. Kʋ kwa nə, ʋ tɩga, yá ba gùrì wá Swamirə nə.3 Tola tɩan kwa nə, Yayirə nə danɩ lá. Ʋ yà yɩ Galadə tíú. Ʋ yɩn Yɩzərayɛlə lɩ̀à kwatara yáá tíú, bɩna sapʋa də bələ. 4 Ʋ yà jə bibara fɩtwa, ba nə dɩ̀ bɩnabii fɩtwa yuu. Ba yà jə tɩan fɩtwa Galadə nagwanaa tə wa. Də zə̀n mama, ba tə boŋə tɩan təntə, Yayirə tɩan. 5 Yayirə tɩga, yá ba gùrì wá Kamon tɩʋ tə wa.
Amon dwíí tə zɩ̀n kʋ̀ʋ̀ də Yɩzərayɛlə lɩ̀à tə
6 Yɩzərayɛlə lɩ̀à tə kʋ́ʋ̀ tʋn kʋ tə nə lwara, Ba-Yígúrə́-Jə-Tiu yáá con. Ba pɩn dun woŋwanan tə nə, ba nə boŋə Baalə*, də Asətarəte*, də Siri tɩ̀án woŋwanan nə, də Sidon tɩ̀án woŋwanan nə, də Mʋabə tɩ̀án woŋwanan nə, də Amon dwíí tə woŋwanan nə, də Filisi tɩ̀án woŋwanan nə. Ba vɩga Ba-Yígúrə́-Jə-Tiu ba dʋgʋ, ba wà sɛ̀ sə ba pa wá dun. 7 Ba-Yígúrə́-Jə-Tiu lɩŋa dàń zàn Yɩzərayɛlə lɩ̀à tə yuu wa, ʋ ga yá ʋ pa Filisi tɩ̀án, də Amon dwíí tə jɩɩn zʋ ba. 8 Ba fɩfɩn Yɩzərayɛlə lɩ̀à tə, kʋ bɩnɩ tə nə, ba ga tɩtaga ba. Yá Yɩzərayɛlə lɩ̀à tə mama, ba yà nə wulə Galadə nagwanaa tə wa, Zʋrədɛn mʋnaa tə yɩɩ yipɩan con, Amɔrə dwíí tə lʋʋ nii wa, dí càn bɩna fugə də nana. 9 Amon dwíí tə bɩn Zʋrədɛn mʋnaa tə, sə ba ta Zwida dwíí tə, də Bɛnzwamɛn dwíí tə, də Efərayimə dwíí tə. Yá Yɩzərayɛlə lɩ̀à tə dàń yɩn yinəgə nəfarʋ wa. 10 Ba bubwi ba kə Ba-Yígúrə́-Jə-Tiu nə, ba wʋ́: «Ba-Yígúrə́-Jə-Tiu, nə tʋn cʋna nə zɩgɩ n nə. Cɩ́gá, n mʋ̀ nə yɩ nə Yɩɩ, yá nə vɩga mʋ́ nə dʋgʋ, nə ga pɩn dun woŋwanan tə nə, ba nə boŋə Baalə.» 11 Ba-Yígúrə́-Jə-Tiu le ba, ʋ wʋ́: «Máŋá tə wa, Ezwipətə tɩ̀án, də Amɔrə dwíí tə, də Amon dwíí tə, də Filisi tɩ̀án, 12 də Sidon tɩ̀án, də Amalɛkə dwíí tə, də Mawon tɩ̀án, yà nə kəni aba càn wa, á nə bubwi á kə à nə, à wà aba jon ba jɩɩn wa naaa? 13 Yá á mʋ̀ vɩga nə á dʋgʋ, á ga pɩn dun yɩa duən nə. Kʋ mʋ̀ yɩrɩ, à də kʋ́ʋ̀ bá jon aba. 14 Á dàń vələ á bubwi á kə yɩa tə nə, á nə kúrí á tì, sə tə mʋ̀ nə jon aba, á yinəgə tə máŋá wa!» 15 Yá Yɩzərayɛlə lɩ̀à tə swɩ̀n Ba-Yígúrə́-Jə-Tiu con, ba wʋ́: «Nə tʋn cʋna, yá n jə cɩ́gá sə fwa nəba, ndə n nə swə nətʋ. Nə dàń nə lòrì mʋ́, sə n tə jon nəba, zə̀n kʋ tə!» 16 Ba dàń lɩ yɩa nəkaran tə ba titəŋi wa ba dʋgʋ, ba ga pɩn dun Ba-Yígúrə́-Jə-Tiu nə. Yá Ba-Yígúrə́-Jə-Tiu yà kʋ́ʋ̀ wàrɩ̀ Yɩzərayɛlə lɩ̀à tə ʋ yá, ʋ pɩn ba də́ càn, ba súrí lá.
17 Amon dwíí tə twi duən yáá, ba kə ba dəkuu bwálɩ́ Galadə nə. Yá Yɩzərayɛlə lɩ̀à tə də twi duən yáá, ba kə ba dəkuu bwálɩ́ Misəpa nə. 18 Yá Galadə lalʋʋ tə, də ba yáá tɩ̀án tə dàń swɩ̀n duən con, ba wʋ́: «Wàà nə wá dí yáá, ʋ ta Amon dwíí tə? Lìù tə ʋ nə wá sinti kʋ̀ʋ̀ tə, wá ya Galadə tɩ̀án mama pɩ̀ʋ́.»