Kwatara 11

Zwɛfəte jìgə̀ Yɩzərayɛlə lɩ̀à kwatara yáá tíú

1 Kwatarʋ babɩa don yà wulə Galadə nə, ʋ yɩrɩ nə yɩ Zwɛfəte. Ʋ yà yɩ kacwarʋ don bìú. Ʋ nyɩna yɩrɩ nə yɩ Galadə. 2 Galadə kan tə də yà lɩrɩ bibara, ʋ pa wá. Yá máŋá tə, Galadə kan tə bibara tə nə bori, ba dɩŋɩ Zwɛfəte, ba ga swɩ̀n ʋ con, ba wʋ́: «N ba tori jə nə nyɩna dìə̀ tə wa. Cɩ́gá, n yɩ kan don bìú.» 3 Zwɛfəte dàń dəri ʋ va yiŋʋnɩ də ʋ nubɩa tə. Ʋ vəli ʋ jə̀ə́ Tɔbə nagwanaa tə wa. Yá ləzwənywanan dàń twá ʋ nə.

4 Kʋ kwa nə, máŋá don wa, Amon dwíí tə twi ba zɩ̀n kʋ̀ʋ̀ də Yɩzərayɛlə lɩ̀à tə. 5 Yá Amon dwíí tə nə wulə ba tɛ Yɩzərayɛlə lɩ̀à tə dàń pɩn Galadə tɩ̀án nəkwɩna tə va, ba twarɩ Zwɛfəte nɛɛ, Tɔbə nagwanaa tə wa. 6 Ba swɩ̀n ʋ con, ba wʋ́: «Bà n ya nə kwatara yáá tíú, sə nə ta Amon dwíí tə.» 7 Zwɛfəte ma le ba, ʋ wʋ́: «Kʋ tà á mʋ̀ nə ja wʋgwɩʋ á dɩŋa nə, á lɩ à nyɩna dìə̀ tə wa naaa? Bɛ̀ɛ̀ nə pɩn, á ma bɩ̀àn à con sɩ́ʋ́n nə, á dàń nə wulə yinəgə wa tə yɩrɩ?» 8 Galadə tɩ̀án nəkwɩna tə swɩ̀n Zwɛfəte con, ba wʋ́: «Kʋ yɩ cɩ́gá! Kʋ mʋ̀ yɩrɩ nə, nə twi n con sɩ́ʋ́n nə, sə n bà n san nəba, n ta Amon dwíí tə. Yá n dàń wá ya nə mʋ̀ Galadə tɩ̀án mama pɩ̀ʋ́.» 9 Zwɛfəte le ba, ʋ wʋ́: «Də á nə pìí á ja nə á va, sə à ta Amon dwíí tə, Ba-Yígúrə́-Jə-Tiu nə ken ba à jɩɩn wa, à mʋ̀ cɩ́gá nə wá ya á pɩ̀ʋ́!» 10 Galadə tɩ̀án nəkwɩna tə swɩ̀n Zwɛfəte con, ba wʋ́: «Ba-Yígúrə́-Jə-Tiu yɩ nə dansɩa lìù, də nə nə wà n sʋgʋ tə nii zìlí.» 11 Yá Zwɛfəte dàń twá Galadə tɩ̀án nəkwɩna tə nə, ʋ vìí. Lalʋʋ tə ken wá ba yáá, sə ʋ ya ba pɩ̀ʋ́, də ba kwatara yáá tíú. Yá Zwɛfəte dàń pìí ʋ tún ʋ də nəkwɩna tə nimarʋ tə sʋ̀ràn tə mama nii, Ba-Yígúrə́-Jə-Tiu con, Misəpa nə.

Zwɛfəte tʋn lɩ̀à Amon dwíí tə con

12 Zwɛfəte tʋn lɩ̀à, ʋ pa ba swɩ̀n Amon dwíí pɩ̀ʋ́ tə con, ʋ wʋ́: «Bɛ̀ɛ̀ yoo nə wulə à də mʋ́ pwə́rə́ wa, kʋ ma pɩn n twi n tɛ à lʋʋ nii tə?» 13 Amon dwíí pɩ̀ʋ́ tə le Zwɛfəte tʋntʋna tə, ʋ wʋ́: «Máŋá tə, Yɩzərayɛlə lɩ̀à tə nə nan ba yá Ezwipətə lʋʋ nii tə, ba twi ba jon à lʋʋ nii, kʋ nə zɩgɩ Arənon varɩnaa tə nə, kʋ va kʋ yí Yabɔkə nacoru tə, də Zʋrədɛn mʋnaa tə. Sɩ́ʋ́n nə, n nə pɩ̀à sə sìə́ ya nə pwə́rə́ wa, sə n pìí n pa nə lʋʋ nii təntə.»

14 Zwɛfəte kʋ́ʋ̀ pìí ʋ tʋn lɩ̀à, ʋ pa ba swɩ̀n Amon dwíí pɩ̀ʋ́ tə con, 15 ʋ wʋ́: «Kʋ tə yɩ Zwɛfəte kori. Yɩzərayɛlə lɩ̀à wà Mʋabə tɩ̀án lʋʋ nii jon, ba ma wà Amon dwíí tə də lʋʋ nii jon. 16 Cɩ́gá, máŋá tə, Yɩzərayɛlə lɩ̀à nə nan Ezwipətə ba bɩ̀àn, ba yɩ ba lwə ba twá kasɔɔ lanworu tə wa, ba va ba nan Mɩncanɩ mʋʋ tə nə, ba ma va Kadɛswə. 17 Yɩzərayɛlə lɩ̀à tə zɩgɩ Kadɛswə nə, ba tʋn lɩ̀à Edomə pɩ̀ʋ́ con. Ba lòrì wá, sə ʋ yá ʋ pa ba twá ʋ lʋʋ nii tə wa ba kɛ̀ń, yá Edomə pɩ̀ʋ́ vɩga. Ba tʋn lɩ̀à Mʋabə pɩ̀ʋ́ də con, yá ʋ də vɩga. Yá Yɩzərayɛlə lɩ̀à tə dàń mɛn Kadɛswə nə. 18 Kʋ kwa nə, ba zàn ba twá kasɔɔ lanworu tə wa ba kɩkarɩ, ba twá Edomə də Mʋabə lʋʋ níə́ tə kwa con, ba va ba kə ba də̀ń Mʋabə lʋʋ tə yɩɩ yipɩan con. Ba ken ba dəkuu bwálɩ́ Arənon nacwəŋə tə bibiru tə don nə, ba wà Mʋabə lʋʋ nii wa zwɩ. Cɩ́gá, Arənon nacwəŋə tə nə yɩ Mʋabə lʋʋ nii tə sɩswɩan. 19 Yɩzərayɛlə lɩ̀à tə zɩgɩ lá, ba tʋn lɩ̀à Amɔrə dwíí tə pɩ̀ʋ́ Sihon con, ʋ nə də́ pàrɩ̀ Ɛswəbon nə. Ba lòrì wá sə ʋ yá, ʋ pa ba twá n lʋʋ nii tə wa ba kɛ̀ń, ba va bwálɩ́ tə ba nə vələ. 20 Yá Sihon wà Yɩzərayɛlə lɩ̀à tə yarɩda jɩn. Ʋ wà sɛ̀ sə ba twá ʋ lʋʋ nii tə wa ba kɛ̀ń. Ʋ ken ʋ kwatara mama duən nə, ʋ ja va ʋ kə ʋ dəkuu bwálɩ́ Yahasə nə, ʋ ma ta Yɩzərayɛlə lɩ̀à tə. 21 Yá Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, ken Sihon də ʋ kwatara tə mama, Yɩzərayɛlə lɩ̀à tə jɩɩn wa, yá Yɩzərayɛlə lɩ̀à tə ta ba, ba də́. Yɩzərayɛlə lɩ̀à tə dàń jon lʋʋ nii tə mama, Amɔrə dwíí tə yà nə wulə kʋ wa. 22 Ba jon Amɔrə dwíí lʋʋ nii tə mama, kʋ nə zɩgɩ Arənon varɩnaa tə nə, kʋ va kʋ yí Yabɔkə nacoru tə, kʋ ga zɩgɩ kasɔɔ lanworu tə nə, kʋ va kʋ nan Zʋrədɛn mʋnaa tə nə. 23 Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nə ta Amɔrə dwíí tə, ʋ jon ba lʋʋ nii tə, ʋ pa Yɩzərayɛlə lɩ̀à tə nə, ba nə yɩ ʋ mʋ̀ lɩ̀à. Sɩ́ʋ́n nə, n də dàń yɩ n bʋŋa, sə n pìí n ta kʋ n jon nə con naaa? 24 Lʋʋ nii tə, n woŋwanʋ Kemoswə nə pɩn mʋ́, tà n mʋ̀ nyiən naaa? N dàń bʋŋa də, nə mʋ̀ ba cwəŋə jə, sə nə tɩnɩ lʋʋ nii tə mama, Ba-Yígúrə́-Jə-Tiu, ʋ nə yɩ nə Yɩɩ, nə pɩn nəba naaa? 25 N bʋŋa də, n mʋ̀ dɩ̀àn nə dwə Mʋabə pɩ̀ʋ́ Sipɔrə bìú Balakə naaa? Yá Balakə də tətə wà Yɩzərayɛlə lɩ̀à tə nii nə pɩ̀à, ʋ dàń nə ma tɛ kʋ̀ʋ̀ də ba. 26 Kʋ bɩna biətwa nə, Yɩzərayɛlə lɩ̀à nə wulə Ɛswəbon də kʋ nii tɩbii tə wa, də Arɔwɛrə də kʋ nii tɩbii tə wa, də tɩan tə mama wa, tə nə wulə Arənon nacwəŋə nii nə. Bɛ̀ɛ̀ nə pɩn, á ma wà tɩan təntə jon, kʋ máŋá təntə mama wa? 27 À mʋ̀ wà lwanɩ tʋn n yɩra. N mʋ̀ nə tɛ nə də kʋ̀ʋ̀, kʋ mʋ̀ yɩrɩ, n mʋ̀ nə tʋŋa yolwan à yɩra. Ba-Yígúrə́-Jə-Tiu nə bʋ̀rɩ̀ bʋra. Ʋ mʋ̀ nə wá bʋ̀rɩ̀ Yɩzərayɛlə lɩ̀à, də Amon dwíí tə bʋra, zə̀n kʋ tə!» 28 Yá Amon dwíí pɩ̀ʋ́ tə wà sʋ̀ràn tə jələ, Zwɛfəte nə tʋn ʋ pa ba swɩ̀n ʋ con.

Zwɛfəte fwa nipoli

29 Ba-Yígúrə́-Jə-Tiu Siŋu* tə cúə́ Zwɛfəte yuu wa, yá ʋ twá Galadə nagwanaa tə, də Manase nagwanaa tə wa, ʋ kɛ̀ń. Ʋ vəli Misəpa, kʋ nə wulə Galadə nagwanaa tə wa, yá ʋ dàń zɩgɩ Misəpa nə, ʋ zʋ Amon dwíí tə lʋʋ nii wa. 30 Zwɛfəte fwa nipoli Ba-Yígúrə́-Jə-Tiu con, ʋ wʋ́: «Cɩ́gá mama, n nə jɩn Amon dwíí tə, n kə à jɩɩn, 31 à ga də́ dɩ̀àn, à ja pìí à nan Amon dwíí tə lʋʋ nii wa, à bɩ̀àn, təntən lìù tə nə wá nan à dìə̀ wa ʋ jəri nə, kʋ tíú wá ya n mʋ̀ Ba-Yígúrə́-Jə-Tiu nyiən, yá à wá ja wá à fwa joŋi tə, ba nə sʋ̀rɩ́*, à pa mʋ́.

32 Zwɛfəte vəli, ʋ zʋ Amon dwíí tə lʋʋ nii wa sə ʋ ta ba, yá Ba-Yígúrə́-Jə-Tiu jɩn ba ʋ kə Zwɛfəte jɩɩn wa. 33 Ʋ zɩgɩ Arɔwɛrə nə, ʋ ta ba ʋ də́ dɩ̀àn ba yuu wa zənzən, ʋ va ʋ yí Minitə. Kʋ nətʋ tə fwa tɩan sapʋa, ʋ nə ta ʋ jon. Ʋ ta ba ʋ va ʋ yí Abɛlə-Keramimə. Yá Amon dwíí tə dàń bwànɩ̀, Yɩzərayɛlə lɩ̀à tə yáá con.

34 Máŋá tə, Zwɛfəte nə pìí ʋ bà ʋ sàń, Misəpa nə, ʋ bʋ̀á nə dí yáá, ʋ nan ʋ jəri wá də mənkori, ʋ ga sɛ. Bʋ̀á təntə cɩcɩ yà nə yɩ Zwɛfəte bisɩmaa. Bʋ̀á təntə kwa nə, ʋ yà kʋ́ʋ̀ ba bisɩmabara, nə à yə̀ə́ bisɩmakana don jə. 35 Yá máŋá tə, Zwɛfəte nə zə́n ʋ na ʋ bʋ̀á tə, ʋ van ʋ gànàn ʋ cɩrɩ, ʋ ga swɩ̀n, ʋ wʋ́: «Aaa! À bʋ̀á, n ken nə pucʋnɩ nəfarʋ wa. N van yoo nəfarʋ, n kə à yuu wa. À kàn nii Ba-Yígúrə́-Jə-Tiu con, yá à wàrɩ̀ à nii tə, à pìí à kwànɩ́.» 36 Yá bʋ̀á tə swɩ̀n Zwɛfəte con, ʋ wʋ́: «À nyɩna, kʋ yɩ nii nə n kàn Ba-Yígúrə́-Jə-Tiu con. Kʋ mʋ̀ yɩrɩ, n dàń tʋn n nipoli yoo tə à yɩra, n pa kʋ nii sú. Cɩ́gá, Ba-Yígúrə́-Jə-Tiu pɩn, n fwi n lɩŋa n dʋŋa, Amon dwíí tə yuu wa.» 37 Ʋ tə swɩ̀n ʋ nyɩna tə con, ʋ súrí lá, ʋ wʋ́: «À dàń nə lòrì, sə n pa nə cànɩ̀ bələ, sə à də à budwənə va pɛɛn tə wa, sə à kwi, à nə wá tɩ, də à yəri bɛɛ tə yɩrɩ.» 38 Zwɛfəte sɛ̀, ʋ pa wá cwəŋə, cànɩ̀ bələ. Yá bʋ̀á tə, də ʋ budwənə dàń vəli pɛɛn tə yuu, ʋ kwi, ʋ nə wá tɩ, də ʋ yəri bɛɛ tə yɩrɩ. 39 Cànɩ̀ bələ tə nə yí, bʋ̀á tə pìí ʋ bà ʋ nyɩna tə con, yá ʋ dàń tʋn ʋ nipoli yoo tə bʋ̀á tə yɩra, ʋ pa kʋ nii sú. Ʋ yà yəri bɛɛ mɩ́ámɩ́án. Yá kʋ nə zɩgɩ kʋ máŋá tə nə, yoo təntə jìgə̀ yofwamɩʋn Yɩzərayɛlə wa. 40 Bɩnɩ mama, Yɩzərayɛlə bwɩ̀ɩ́ tə yàá va, ba kwi dɩan banɩa, ba ma lìí Galadə Zwɛfəte bʋ̀á tə yoo.