Efərayimə dwíí tə dɩga jara də Zwɛfəte
12
1 Efərayimə dwíí lɩ̀à tə twi duən yáá, ba va ba bɩn Zʋrədɛn mʋnaa tə, ba nan ba va Safon. Ba vəli ba swɩ̀n Zwɛfəte con, ba wʋ́: «Bɛ̀ɛ̀ nə pɩn, n ma lɛ n va n ta Amon dwíí tə, yá n wà nəba bon, sə nə san mʋ́? Kʋ mʋ̀ yɩrɩ, nə wá sʋ̀rɩ́ n də n dìə̀ tə mɛ mən.» 2 Zwɛfəte ma le ba, ʋ wʋ́: «À də à dwíí lɩ̀à tə ta kʋ̀ʋ̀ nəfarʋ də Amon dwíí tə. À bon à kə á nə, yá á wà twi sə á jon nə, ba jɩɩn wa. 3 À nɩ də, á ba bɩ̀àn sə á jon nə. Kʋ mʋ̀ nə pɩn, à ma dʋgʋ à mɩɩ, à ga va à ta Amon dwíí tə, yá Ba-Yígúrə́-Jə-Tiu ken ba, à jɩɩn wa. Bɛ̀ɛ̀ dàń nə pɩn, á bà sə á ta kʋ̀ʋ̀ də nə, zə̀n kʋ tə?»4 Zwɛfəte ken Galadə tɩ̀án bara tə mama duən yáá, ʋ ma ta Efərayimə dwíí tə. Galadə tɩ̀án tə ta Efərayimə dwíí tə, ba də́. Cɩ́gá, Efərayimə dwíí tə yà swɩ̀n, ba wʋ́: «Á mʋ̀ Galadə tɩ̀án yɩ Efərayimə dwíí tə waa lɩ̀à. Kʋ yɩ á dəri á nan á yá Efərayimə dwíí tə, á ga zʋ á wulə Manase dwíí tə wa.» 5 Galadə tɩ̀án tə vəli, ba cɩ̀ bwálá tə nə, ba nə twá ba bɩn Zʋrədɛn mʋnaa tə, Efərayimə nagwanaa tə vàn con. Yá Efərayimə dwíí lìù nə dəri ʋ bà sə ʋ bɩn, Galadə tɩ̀án tə yàá bwe wá, ba wʋ́: «N yɩ Efərayimə dwíí lìù naaa?» Ʋ nə le, ʋ wʋ́: «Ɔn ɔn,» 6 ba yàá swɩ̀n ʋ con, sə ʋ swɩ̀n, ʋ wʋ́: «Swibolɛtə!» Yá ʋ dàń yàá swɩ̀n, ʋ wʋ́: «Sibolɛtə!» Cɩ́gá, Efərayimə dwíí lɩ̀à tə yà wàrɩ̀ kʋ sʋgʋ tə, ba boŋə zəni. Yá Galadə tɩ̀án tə dàń yàá ja wá, ba gʋ bwálá tə nə, ba nə twá ba bɩn Zʋrədɛn mʋnaa tə. Efərayimə dwíí tə wa bara mʋ̀rʋ̀ sapwɩlə də bələ nə tɩga, kʋ máŋá tə wa.
7 Zwɛfəte yɩn Yɩzərayɛlə lɩ̀à kwatara yáá tíú, bɩna bardʋ. Kʋ kwa nə, Zwɛfəte, ʋ nə yɩ Galadə tíú tɩga, yá ba gùrì wá Galadə nagwanaa tɩan tə don wa.
Yɩzərayɛlə lɩ̀à kwatara yáá tɩ̀án duən
8 Zwɛfəte kwa nə, Yɩbəsan nə jìgə̀ Yɩzərayɛlə lɩ̀à kwatara yáá tíú. Yibəsan yà yɩ Bɛtəleyɛmə tíú. 9 Ʋ lɩrɩ bibara fɩtwa, də bikana fɩtwa. Ʋ swe bwɩ̀ɩ́ tə, dwíə́ nəkaran* yuu wa, ʋ ga swe dwíə́ nəkaran bwɩ̀ɩ́, ʋ pa ʋ bibara tə nə. Ʋ yɩn Yɩzərayɛlə lɩ̀à kwatara yáá tíú, bɩna barpɛ. 10 Kʋ kwa nə, Yibəsan tɩga, yá ba gùrì wá Bɛtəleyɛmə nə.
11 Yibəsan kwa nə, Elon nə jìgə̀ Yɩzərayɛlə lɩ̀à kwatara yáá tíú, kʋ ja va bɩna fugə. Elon yà yɩ Zabulon dwíí tə wa lìù. 12 Kʋ kwa nə, Elon, ʋ nə yɩ Zabulon dwíí lìù tɩga, yá ba gùrì wá Ayalon nə, Zabulon nagwanaa tə wa.
13 Elon kwa nə, Hilɛlə bìú Abədon nə jìgə̀ Yɩzərayɛlə lɩ̀à kwatara yáá tíú. Ʋ yà yɩ Piraton tíú. 14 Ʋ jɩn bibara sapwɩlə, də nɩ̀án fɩtwa, ba yà nə dɩ̀ bɩnɛbii sapwɩtwa də fugə yuu. Abədon yɩn Yɩzərayɛlə lɩ̀à kwatara yáá tíú, bɩna nana. 15 Kʋ kwa nə, Hilɛlə bìú Abədon tɩga, yá ba gùrì wá Piraton nə, Efərayimə nagwanaa tə wa, Amalɛkə dwíí paan tə wa.