Saməson lɩrʋ yoo
13
1 Yɩzərayɛlə lɩ̀à tə kʋ́ʋ̀ tʋn kʋ tə nə lwara, Ba-Yígúrə́-Jə-Tiu yáá con. Ba-Yígúrə́-Jə-Tiu ma yá ʋ pa Filisi tɩ̀án jɩɩn zʋ ba. Yá Filisi tɩ̀án tə dàń ken Yɩzərayɛlə lɩ̀à tə càn wa, bɩna sapwɩlə.2 Bɛɛ don yà wulə Sora nə, Dan dwíí tə wa, ʋ yɩrɩ nə yɩ Manowa. Ʋ kan yà yɩ kadɩŋʋ, ʋ wà bìú lɩrɩ. 3 Dɩɩn don nə, Ba-Yígúrə́-Jə-Tiu malɩka* twi ka nan kan tə nə, ka swɩ̀n ʋ con, ka wʋ́: «À yə̀ə́ də n yɩ kadɩŋʋ, n ba bìú jə. Yá də kʋ nətʋ mɛ, n wá ja pùə́, n lɩra bibɛɛ. 4 Sɩ́ʋ́n nə, n dàń sɩrɩ n tɩ̀àn, dàn ká nyʋn divɛn, nə à yə̀ə́ sana tə nə dà. Dàn ká də́ wodiu tə, kʋ nə yɩ durən won. 5 Cɩ́gá, n wá ja pùə́, yá n wá lɩra bibɛɛ. Ba wà mɛ sə ba fɩna bìú təntə yuu də mama. Cɩ́gá, Yɩɩ kúrí wá, sə ʋ ya ʋ mʋ̀ Yɩɩ cɩcɩ nyiən*, də ʋ tə wulə ʋ nuu pùə́ wa. Yá bìú təntə nə wá sinti, ʋ jon Yɩzərayɛlə lɩ̀à tə, Filisi tɩ̀án tə jɩɩn wa.» 6 Kan tə vəli, ʋ swɩ̀n ʋ barɩ con, ʋ wʋ́: «Yɩɩ tʋtʋnʋ don twi à con. Ʋ yiri tə yà ba kamandon jə. Ʋ yà yɩ ndə Yɩɩ malɩka nə. À wà wá bwe, sə à jə́n bwálɩ́ tə ʋ nə nan, ʋ də ma wà ʋ yɩrɩ swɩ̀n, ʋ bɩrɩ nə. 7 Ʋ swɩ̀n à con də, à wá ja pùə́, à lɩra bibɛɛ. Ʋ swɩ̀n də, kʋ nə mɛ sɩ́ʋ́n nə, à kʋ́ʋ̀ wà mɛ sə à nyʋn divɛn, nə à yə̀ə́ sana tə nə dà. Ʋ swɩ̀n də, à wà mɛ sə à də́ wodiu tə, kʋ nə yɩ durən won. Ʋ swɩ̀n də, Yɩɩ kúrí bisɩmaa tə, sə ʋ ya ʋ mʋ̀ Yɩɩ cɩcɩ nyiən, də ʋ tə wulə ʋ nuu pùə́ wa, də ʋ lʋʋ yanʋ mama, kʋ ja va ʋ tɩan dɩɩn.»
8 Manowa lòrì Ba-Yígúrə́-Jə-Tiu, ʋ wʋ́: «Yuu-Tiu, à lòrì mʋ́, sə n pa Yɩɩ tʋtʋnʋ tə, n nə tʋn tə, pìí ʋ bà nə con, sə ʋ bɩrɩ nəba kʋ tə, nə nə mɛ sə nə fwa, nə pa bisɩmaa tə nə, nə nə wá lɩra.» 9 Yɩɩ nì Manowa kori tə, yá ʋ pɩn ʋ Malɩka tə kʋ́ʋ̀ pìí ka bà kan tə con. Kan tə yà jə̀ə́ kárá wa, yá ʋ barɩ Manowa yà tə̀lə́ də wá. 10 Yá ʋ dàń dəri lala, ʋ va ʋ swɩ̀n ʋ barɩ con, ʋ wʋ́: «Ywàń, bɛɛ tə, ʋ dɩɩn nə twi à con tə, kʋ́ʋ̀ twi ʋ nan à nə.» 11 Manowa ma zàn, ʋ twá ʋ kan tə nə, ʋ va bɛɛ tə con. Ʋ swɩ̀n bɛɛ tə con, ʋ wʋ́: «N mʋ̀ cɩ́gá nə swɩ̀n kan wà tə con?» Ka le wá, ka wʋ́: «Awoo, à mʋ̀ nə!» 12 Manowa swɩ̀n, ʋ wʋ́: «Sɩ́ʋ́n nə, máŋá tə wa, n sʋgʋ tə nii nə súə́, nətə nə, nə mɛ sə nə ja bisɩmaa tə? Bɛ̀ɛ̀ nə, nə mɛ sə nə fwa nə pa wá?» 13 Ba-Yígúrə́-Jə-Tiu malɩka tə le Manowa, ka wʋ́: «Kan tə mɛ sə ʋ cɩ̀ ʋ tɩ̀àn nə, də wiən tə mama, à nə swɩ̀n tə yoo, ʋ con. 14 Ʋ wà mɛ sə ʋ də́ divɛn tɩ̀ʋ́ won mama. Ʋ wà mɛ sə ʋ nyʋn divɛn, nə à yə̀ə́ sana tə nə dà. Ʋ wà mɛ sə ʋ də́ wodiu mama, kʋ nə yɩ durən won. Ʋ mɛ sə ʋ twá yìə̀n tə mama nə, à nə pɩn wá nii, tə yuu wa.» 15 Manowa swɩ̀n Ba-Yígúrə́-Jə-Tiu malɩka tə con, ʋ wʋ́: «Nə lòrì mʋ́ sə n jə̀ń, sə nə gʋ bʋbiə, nə ma fwa wodiu nə pa mʋ́.» 16 Ba-Yígúrə́-Jə-Tiu malɩka tə le Manowa, ka wʋ́: «N nə swə n ja nə n jə̀ń, à ba də́ n wodiu tə. Yá n dàń nə pɩ̀à sə n fwa joŋi, ba nə sʋ̀rɩ́*, n pa Ba-Yígúrə́-Jə-Tiu nə, n wàá kʋ mʋ̀ n fwa.» Manowa yà yəri də kʋ yɩ Ba-Yígúrə́-Jə-Tiu malɩka tə. 17 Yá ʋ dàń swɩ̀n ka con, ʋ wʋ́: «N yɩrɩ nə bɛ̀? Nə pɩ̀à sə nə pa mʋ́ dun, máŋá tə, n sʋ̀ràn tə nii nə wá sú.» 18 Ba-Yígúrə́-Jə-Tiu malɩka tə ma le wá, ka wʋ́: «Bɛ̀ɛ̀ nə n pɩ̀à à yɩrɩ sə n ma fwa? Kʋ yɩ yogwarʋ.» 19 Manowa jɩn bʋbiə tə, də zìlə́ won tə ʋ bà ʋ tún kapan yuu, ʋ ma fwa joŋi ba nə sʋ̀rɩ́, ʋ pa Ba-Yígúrə́-Jə-Tiu tə nə, ʋ nə tʋŋa yogwaran. Manowa də ʋ kan tə yà zɩga, ba ywàŋá. 20 Yá máŋá tə, joŋi tə mənvwə tə nə zaŋa joŋi bwálɩ́ tə yuu con, ka dɩ̀ yɩɩ, Ba-Yígúrə́-Jə-Tiu malɩka tə də zʋa Yɩɩ joŋi bwálɩ́ tə mənvwə tə wa, ka dɩ̀ yɩɩ. Manowa də ʋ kan tə nə nɩ kʋ nətʋ tə, ba tʋa ba nadwana yuu, ba pú ba yáá tɩa. 21 Yá Ba-Yígúrə́-Jə-Tiu malɩka tə kʋ́ʋ̀ wà pìí ka nan Manowa də ʋ kan tə nə. Manowa dàń lwarɩ də, kʋ yɩ Ba-Yígúrə́-Jə-Tiu malɩka tə nə. 22 Manowa swɩ̀n ʋ kan tə con, ʋ wʋ́: «Nə wá tɩ, kʋ ba tʋ́tʋ̀ná jə, nə nə nɩ Yɩɩ tə yɩrɩ!» 23 Yá ʋ kan tə le wá, ʋ wʋ́: «Də Ba-Yígúrə́-Jə-Tiu yà nə pɩ̀à sə ʋ gʋ nəba, ʋ yà ba jon nə joŋi tə, ba nə sʋ̀rɩ́, də nə zìlə́ won tə. Ʋ yà ba pa nə na yìə̀n tətə mama, yá nə yà bá nì yìə̀n tə tə də tətə, ʋ nə swɩ̀n nə con sɩ́ʋ́n nətən.»