Saməson kasweri yoo
14
1 Dɩɩn don nə, Saməson vəli Timəna, yá ʋ nɩ bʋ̀á don, Filisi tɩ̀án bwɩ̀ɩ́ tə wa lá nə. 2 Yá máŋá tə, ʋ nə pìí ʋ bà sàń, ʋ swɩ̀n ʋ nyɩna də ʋ nuu con, ʋ wʋ́: «À nɩ bʋ̀á Timəna nə, Filisi tɩ̀án bwɩ̀ɩ́ tə wa. Á swie wá á pa nə, sə à ma fwa à kan.» 3 Ʋ nyɩna də ʋ nuu ma swɩ̀n ʋ con, ba wʋ́: «Kʋ yɩ n pɩ̀à kan n ga n dwíí tə wa, də nə lʋʋ lɩ̀à tə mama wa mʋ̀ naaa, kʋ yɩ nətə n ma vəli n swe Filisi tɩ̀án bʋ̀á, ba mʋ̀ lɩ̀à tə nə yəri Yɩɩ?» Yá Saməson swɩ̀n ʋ nyɩna tə con, ʋ wʋ́: «Swe wá n pa nə. Cɩ́gá, mə ʋ mʋ̀ nə à swə.» 4 Ʋ nyɩna də ʋ nuu yà yəri də, kʋ nətʋ tə yɩ kʋ nan Ba-Yígúrə́-Jə-Tiu. Cɩ́gá, Ba-Yígúrə́-Jə-Tiu yà yɩ yoo nə ʋ pɩ̀à, sə ʋ pa Saməson twá kʋ nə, ʋ ma dɩ jara də Filisi tɩ̀án tə. Kʋ máŋá tə wa, Filisi tɩ̀án yà dí dɩ̀àn Yɩzərayɛlə lɩ̀à tə yuu wa.5 Saməson, də ʋ nyɩna, də ʋ nuu vəli Timəna. Máŋá tə ba nə vəli ba yí Timəna tɩ̀án divɛn tɩ̀án kárɩ́ tə, gəbɩa nyɩ́n kʋ nan, kʋ fʋrɩ kʋ bɩ̀àn, sə kʋ jəri Saməson. 6 Ba-Yígúrə́-Jə-Tiu Siŋu* tə cúə́ Saməson yuu wa, yá ʋ jɩn gəru tə, də jɩkʋrɩkɛ. Ʋ van kʋ ʋ cɩrɩ, ndə ba nə cɩrɩ bʋbiə nətʋ. Yá Saməson dàń nə wà kʋ tə, ʋ nə tʋn tə swɩ̀n ʋ bɩrɩ ʋ nyɩna də ʋ nuu nə. 7 Ʋ vəli ʋ ve də bʋ̀á tə, yá bʋ̀á tə twá ʋ fɩra nə.
8 Máŋá don nə kɛ̀ń kwa nə, ʋ pìí ʋ va Timəna, sə ʋ swe kan tə. Yá ʋ yori ʋ twá kasɔɔ wa, sə ʋ ywàń gəru tɩgʋ tə. Ʋ nɩ də twɩ zʋa gəru tɩgʋ tə wa, tə kə tʋ̀ràn. 9 Ʋ lɩ tʋ̀ràn tə ʋ kə ʋ jɩ̀àn wa, ʋ də́ cwəŋə wa. Máŋá tə, ʋ nə twi ʋ nyɩna də ʋ nuu con, ʋ pɩn tʋ̀ràn tə ba də nə, ba də́. Yá ʋ dàń nə wà ba con swɩ̀n, də tʋ̀ràn tə yɩ ʋ lɩ gəru tɩgʋ wa.
10 Saməson nyɩna vəli bʋ̀á tə sàń, yá Saməson dàń pɩn ba də́ cànà lá nə. Cɩ́gá, mə nətʋ nə, balandʋra tə yàá fwa. 11 Filisi tɩ̀án tə nə zə́n ba na Saməson, ba kúrí balandʋra fɩtwa, sə ba kwé wá. 12 Saməson swɩ̀n ba con, ʋ wʋ́: «À wá pa aba sɩsalwara. Á nə wànɩ́ á gwìń ka də̀ń á bɩrɩ nə, dɩan barpɛ tə pwə́rə́ wa, nə nə wá də́ cànà tə, á nə wànɩ́ á lwarɩ ka, à wá pa aba gànbii fɩtwa, də ganmʋla fɩtwa. 13 Yá á nə wàrɩ̀ ka də̀ń á gwìń á bɩrɩ nə, á mʋ̀ nə wá pa nə gànbii fɩtwa, də ganmʋla fɩtwa.» Ba le wá, ba wʋ́: «Swɩ̀ń n sɩsalwara tə, sə nə cʋgʋ.» 14 Saməson swɩ̀n ba con, ʋ wʋ́:
«Won ba nə də́,
nan wodidə́rú yɩra!
Won tə nə ywán,
nan dɩ̀àn tíú yɩra!»
Ba fwa dɩan batwa, də ba tə wà wànɩ́ ba gwìń sɩsalwara tə də̀ń. 15 Barpɛ nii dɩɩn tə nə, ba swɩ̀n Saməson kan tə con, ba wʋ́: «Sugu n barɩ tə, sə ʋ gwìń sɩsalwara tə də̀ń, ʋ bɩrɩ nəba. Kʋ nə tà nətʋ, nə wá sʋ̀rɩ́ n də n nyɩna dìə̀ tə. Kʋ yɩ á bon nəba, sə á vɩrɩ nə wiən naaa?» 16 Saməson kan tə dàń kwi, ʋ jə ʋ bɩan nə, ʋ wʋ́: «Kʋ yɩ dʋŋɩ nə, n jə də nə, n ba nə swə! N pɩn sɩsalwara à nábwáná tə nə, yá n wà ka də̀ń gwìń, n bɩrɩ nə.» Saməson ma le wá, ʋ wʋ́: «À wà ka də̀ń gwìń, à bɩrɩ à nyɩna də à nuu də tətə nə. N na də kʋ mɛ sə à gwìń ka də̀ń, à bɩrɩ n mʋ̀ nə naaa?» 17 Yá ʋ dàń kwi, ʋ ja Saməson bɩan nə, dɩan barpɛ tə mama, ba nə dí cànà tə. Barpɛ nii dɩɩn tə nə, Saməson gwìń sɩsalwara tə də̀ń, ʋ bɩrɩ ʋ kan tə nə, ʋ yà nə jə ʋ bɩan nə zənzən yɩrɩ. Yá kan tə vəli ʋ gwìń ka də̀ń, ʋ bɩrɩ ʋ nábwáná tə nə. 18 Barpɛ nii dɩɩn tə nə, də yɩɩ tə wà zwɩ, tɩʋ tə balandʋra tə twi ba swɩ̀n Saməson con, ba wʋ́:
«Bɛ̀ɛ̀ nə ywán
kʋ doni tʋ̀ràn?
Bɛ̀ɛ̀ nə jə dɩ̀àn
kʋ doni gəru?»
Saməson ma le ba, ʋ wʋ́: «Á yà nə wà à nacɩɩn tə ma vàrà, a á yà bá wànɩ́ à sɩsalwara tə də̀ń á lwarɩ.»
19 Yá Ba-Yígúrə́-Jə-Tiu Siŋu tə dàń cúə́ Saməson yuu wa. Ʋ zàn, ʋ va Aswəkelon, ʋ gʋ bara fɩtwa, ʋ lɩ ba gànàn tə, ʋ ja bà, ʋ pa lɩ̀à tə nə, ba nə gwìń sɩsalwara tə də̀ń tə. Yá ʋ lɩŋa dàń zàn zənzən, ʋ ja pìí ʋ va ʋ nyɩna sàń. 20 Ba tì ʋ kan tə ba pa ʋ twadon tə nə, ʋ yà nə yɩ ʋ dabɛɛ duduŋu, kasweri tə wa.