Saməson fwi ʋ lɩŋa, Filisi tɩ̀án tə yuu wa
15
1 Máŋá don nə kɛ̀ń kwa nə, dipɛn mɩna ganʋ máŋá wa, Saməson jɩn bʋbiə, ʋ va sə ʋ ma na ʋ kan tə. Ʋ lòrì sə ʋ zʋ ʋ kan tə yipaa dìə̀ wa, yá kan tə nyɩna vɩga. 2 Ʋ swɩ̀n Saməson con, ʋ wʋ́: «À bʋ́n də n kʋ́ʋ̀ ba wá pɩ̀à, à ma tì wá à pa n twadon tə nə. N ba na də, ʋ nyánʋ́ tə zəni dwə wá? N dàń tì nyánʋ́ tə, n kə zʋnʋ tə bʋʋ wa!» 3 Saməson swɩ̀n, ʋ wʋ́: «Naa kʋ tə mʋ̀ nə, à nə tʋn yolwan Filisi tɩ̀án tə yɩra, lìù mama bá tì à tàlɩ́.» 4 Saməson vəli, ʋ ja cirəkuri biətwa, ʋ vwa tə dəbilə tə ʋ kə duən nə bələ bələ, ʋ ga tì málá, ʋ tɩrɩ dəbilə bələ mama pwə́rə́ wa. 5 Ʋ ken mən málá tə nii nə, ʋ ga dɩŋa cirəkuri tə, ʋ kə Filisi tɩ̀án dipɛn mɩna kárɩ́ wa. Yá dipɛn mɩna tə, ba nə gan ba pú púlə́ púlə́, də tə tə yà tə nə zɩga yɩɩ nə, dàń dí mən. Divɛn tɩ̀án kárɩ́, də olivə* tɩ̀án kárɩ́ də tətə dí mən.6 Filisi tɩ̀án tə bwe, ba wʋ́: «Wàà nə tʋn yoo kʋ tə?» Yá lɩ̀à le, ba wʋ́: «Timəna tɩ̀án tɩnbɛɛ Saməson nə! Ʋ tɩnbɛɛ nə jon ʋ kan, ʋ pa ʋ twadon nə, kʋ mʋ̀ nə pɩn, ʋ ma tʋn nətʋ.» Yá Filisi tɩ̀án tə dàń vəli ba sʋ̀rɩ́ kan tə, də ʋ nyɩna tə mɛ. 7 Saməson swɩ̀n ba con, ʋ wʋ́: «Yoo kʋ tə yɩrɩ, á nə tʋn à yɩra, à nə wà à lɩŋa fwi á yuu wa, à bá yá.» 8 Ʋ ta ba ʋ də́ mɩ́ámɩ́án, ʋ ga nan ʋ va ʋ wulə Etamə pɩ̀ʋ̀ bʋʋ wa.
9 Filisi tɩ̀án tə dàń vəli, ba kə ba dəkuu bwálɩ́ Zwida nagwanaa wa, ba ga tɩɩn ba kwatara, ba va ba yí bwálɩ́ don, ba nə boŋə Lehi. 10 Zwida dwíí tə bwe, ba wʋ́: «Bɛ̀ɛ̀ nə pɩn, á ma bà sə á ta nəba?» Filisi tɩ̀án tə le, ba wʋ́: «Nə yɩ nə twi sə nə vwa Saməson. Nə wá ŋwɩ́n kʋ tə, ʋ nə tʋn nə yɩra tə jɩŋɩ ʋ yɩra.» 11 Zwida dwíí tə wa bara mʋ̀rʋ̀ batwa dàń vəli Etamə pɩ̀ʋ̀ bʋʋ tə wa, ba swɩ̀n Saməson con, ba wʋ́: «Bɛ̀ɛ̀ yoo nə n van n kə nə yuu wa nətən! N yəri də, Filisi tɩ̀án tə dɩ̀àn dwə nəba naaa?» Yá Saməson le ba, ʋ wʋ́: «Kʋ tə, ba nə tʋn à yɩra tə jɩŋɩ nə, à ŋwɩ́n ba yɩra.» 12 Ba swɩ̀n ʋ con, ba wʋ́: «Nə yɩ nə twi sə nə ja mʋ́ nə vwa, nə pa Filisi tɩ̀án tə nə.» Yá Saməson swɩ̀n ba con, ʋ wʋ́: «Á dwiə də, á bá gʋ nə!» 13 Ba le wá, ba wʋ́: «Ɔn ɔn! Nə mʋ̀ yɩ nə pɩ̀à nə ja mʋ́ nə vwa, nə pa ba cɩcɩ, nə ba pɩ̀à nə gʋ mʋ́.» Ba vwə wá də ŋwəndʋra bələ, ba ja nan pɩ̀ʋ̀ bʋʋ tə wa.
14 Máŋá tə, ba nə ja wá ba yí Lehi, Filisi tɩ̀án tə mà cə̀rí, ba ma jəri wá. Ba-Yígúrə́-Jə-Tiu Siŋu* tə dàń cúə́ Saməson yuu wa, yá ŋoni tə ba nə vwa ʋ vànà, də ʋ jɩ̀àn nə, jìgə̀ ndə ganbʋa nə, mən nə dí. 15 Saməson nɩ bɩ̀nà nipaa kuu nəlɩʋ ʋ tì, ʋ ma gʋ bara mʋ̀rʋ̀. 16 Yá ʋ dàń dɩga gwaran ʋ nuŋə, ʋ wʋ́:
À ja bɩ̀nà nipaa kuu,
à ma gʋ bara mʋ̀rʋ̀!
«À ja bɩ̀nà nipaa kuu,
à ma gʋ tə!»
17 Ʋ nə swɩ̀n sʋ̀ràn təntə ʋ zwɛ̀ kwa nə, ʋ dɩlɩ bɩ̀nà nipaa kuu tə ʋ dʋgʋ. Yá ba dàń dɩga kʋ bwálɩ́ tə yɩrɩ, Ramatə-Lehi.a
18 Kʋ kwa nə, nanyʋnɩ jɩn Saməson zənzən, yá ʋ dàń bon ʋ kə Ba-Yígúrə́-Jə-Tiu nə, ʋ wʋ́: «Ooo, Ba-Yígúrə́-Jə-Tiu, n mʋ̀ nə pɩn kʋ twá də à mʋ̀, n tʋtʋnʋ tə jɩɩn, n ma də́ dɩ̀àn nəfarʋ tə tə. Yá sɩ́ʋ́n nə, kʋ mɛ sə à tʋ pəntanan tɩ̀án ba tə jɩɩn wa, à tɩ də nanyʋnɩ naaa?» 19 Yɩɩ dàń lwə pɩ̀ʋ̀ kòlú tə nə wulə Lehi nə, yá nɩ́á nan kʋ wa. Saməson nyʋan nɩ́á tə, yá ʋ yɩ́á pori, ʋ ga pìí ʋ na dɩ̀àn. Kʋ mʋ̀ nə pɩn, ba dɩ nabuliyii təntə yɩrɩ, Eyin-Kore.b Nabuliyii təntə tə wulə Lehi nə, də zə̀n mama. 20 Filisi tɩ̀án máŋá tə wa, Saməson yɩn Yɩzərayɛlə lɩ̀à kwatara yáá tíú, bɩna sapʋa.