Kwatara 16

SAMƏSON DƏ DALƖLA

Saməson gəri Gaza tɩʋ tə mimii nii bòrə̀n tə

1 Dɩɩn don nə, Saməson vəli Gaza. Ʋ nɩ kacwarʋ don lá, yá ʋ vəli kacwarʋ tə con. 2 Lɩ̀à swɩ̀n Gaza tɩ̀án con, də Saməson twi tɩʋ tə wa. Tɩʋ tə tɩ̀án dàń cɩ̀gà wá ba kə tɩʋ tə wa, ba ga cɩ̀ kʋ mimii tə nə, tɩtɩn tə mama, ba ma dànɩ̀ sənbwen, də tɩa pʋrɩ sə ba gʋ wá. 3 Saməson pə̀ń wuuu, kʋ va kʋ yí máŋá tə, tɩa nə kwɩ́n, ka tara ka mɛ duən. Yá ʋ dàń zàn kʋ máŋá təntə wa, ʋ va ʋ ja tɩʋ tə mimii nii bòrə̀n tə, də mimii səpunə dɛɛ bələ tə, də borusɔɔ tə mɛ, ʋ van ʋ gəri, ʋ tì ʋ kə ʋ pàrà wa, ʋ ja dɩ̀ ʋ tún paan tə yuu wa, ka nə wulə Ebəron yáá con.

Dalɩla jɩn Saməson, ʋ pa

4 Yoo təntə kwa nə, Saməson sóní kan don, Sorɛkə varɩnaa tə wa, ʋ yɩrɩ nə yɩ Dalɩla. 5 Filisi tɩ̀án pɛ̀gá tə twi ba swɩ̀n Dalɩla con, ba wʋ́: «Gɩgarɩ wá, n pa ʋ man bwálɩ́ tə, ʋ dɩ̀àn nəfarʋ tə nə naŋa ʋ bɩrɩ mʋ́, də nətʋ tə, nə nə wá twá nə ma də́ dɩ̀àn ʋ yuu wa. Nə wá vwa wá, nə ma fwa nə fɩra, yá nə lìù mama dàń wá pa mʋ́ wárʋ́ səbilurən mʋ̀rʋ̀ də bíí.» 6 Dalɩla dàń swɩ̀n Saməson con, ʋ wʋ́: «À lòrì mʋ́ sə n swɩ̀n bwálɩ́ tə, n dɩ̀àn nəfarʋ tə nə naŋa n bɩrɩ nə! Də lìù nə pɩ̀à sə ʋ də́ dɩ̀àn n yuu wa, bɛ̀ɛ̀ won nə ʋ mɛ sə ʋ ma vwa mʋ́?» 7 Saməson le wá, ʋ wʋ́: «Ba nə ja naŋʋnlɩran barpɛ, ndə tə tə nə ba nə ma fwa twasɩn, ba ma vwa nə, à wá bwànɩ̀, yá à wá jì ndə lɩ̀à tə duən nə.» 8 Filisi tɩ̀án pɛ̀gá tə ja twan ŋwəndʋra nəlɩran barpɛ ba bà, ba pa Dalɩla nə, ʋ ma vwa Saməson. 9 Yá dʋŋa tə yà səgə Dalɩla dìə̀. Ʋ dàń swɩ̀n Saməson con, ʋ wʋ́: «Saməson, Filisi tɩ̀án tə twi sə ba ja mʋ́!» Yá Saməson karɩ ŋoni tə, ndə mən nə dí jònù gaŋoni. Yá ba wà ʋ dɩ̀àn tə culu lwarɩ.

10 Kʋ kwa nə, Dalɩla swɩ̀n Saməson con, ʋ wʋ́: «N dí bɩyɩrɩ à yɩra, cɩ́gá, n kʋ̀nɩ̀ kʋ̀nkʋ̀n n bɩrɩ nə. Sɩ́ʋ́n nə, à dàń lòrì mʋ́ sə n swɩ̀n won tə, ba nə mɛ sə ba ma vwa mʋ́, n bɩrɩ nə!» 11 Saməson le wá, ʋ wʋ́: «Ba nə ja ŋwəndʋra ba tə nə wà tə ma tʋn də mama, ba ma vwa nə, à wá bwànɩ̀, yà à wá jì ndə lɩ̀à tə duən nə.» 12 Dalɩla dàń tì ŋwəndʋra, ʋ ma vwa Saməson. Kʋ kwa nə, ʋ swɩ̀n Saməson con, ʋ wʋ́: «Saməson, Filisi tɩ̀án tə twi sə ba ja mʋ́!» Dʋŋa tə yà kʋ́ʋ̀ səgə Dalɩla dìə̀ wa. Yá Saməson dàń karɩ ŋoni tə yà nə vwa ʋ vànà nə, ndə gaŋwənə nə.

13 Dalɩla swɩ̀n Saməson con, ʋ wʋ́: «N kʋ́ʋ̀ dí bɩyɩrɩ à yɩra, cɩ́gá, n kʋ̀nɩ̀ kʋ̀nkʋ̀n n bɩrɩ nə. Swɩ̀n won tə ba nə mɛ sə ba ma vwa mʋ́, n bɩrɩ nə!» Saməson ma swɩ̀n ʋ con, ʋ wʋ́: «N nə ja gàntwadàʋ̀, n ma sʋ à yuu zwala barpɛ tə, n ga ja párɩ́ n ma kukuli tə, à wá bwànɩ̀, yá à wá jì ndə lɩ̀à tə duən nə.» 14 Dalɩla dàń pɩn Saməson dwɛ̀, ʋ ga ja gàntwadàʋ̀ ʋ ma sʋ ʋ yukʋran tə, yuu zwala barpɛ, ʋ ja párɩ́ ʋ ma kukuli tə. Kʋ kwa nə, ʋ swɩ̀n Saməson con, ʋ wʋ́: «Saməson, Filisi tɩ̀án tə twi sə ba ja mʋ́!» Yá Saməson nyɩ́n ʋ zàn ʋ dwiən tə nə, ʋ van párɩ́ tə, də gàntwadàʋ̀ tə, də kʋ gaŋoni tə mɛ ʋ mùrí. 15 Yá Dalɩla swɩ̀n ʋ con, ʋ wʋ́: «Nətə nə n wàá n swɩ̀n də n swə nə, yá n bɩcan ga tə̀lə́ də nə? Nə̀ń kʋ nə, n dí bɩyɩrɩ à yɩra, nɛɛ batwa, yá n wà bwálɩ́ tə, n dɩ̀àn nəfarʋ tə nə naŋa swɩ̀n n bɩrɩ nə.» 16 Dɩɩn mama, Dalɩla dàń yàá jə Saməson bɩan nə, ʋ ga wʋwalɩ wá, də ʋ sʋ̀ràn tə. Yá Saməson dàń pɩ́án ʋ ga, 17 ʋ súrí ʋ bɩcan mama, ʋ bɩrɩ wá. Ʋ swɩ̀n ʋ con, ʋ wʋ́: «Yufɩna tə wà à yuu wa fɩnɩ mɩ́ámɩ́án. Cɩ́gá, à yɩ Yɩɩ nə tɩ, yá kʋ yɩ nətʋ, də à tə wulə à nuu pùə́ wa. À yuu nə fɩnɩ, à dɩ̀àn tə wá nan tə yá nə, yá à dàń wá jì ndə lɩ̀à tə duən nə.»

18 Dalɩla nə nɩ də, Saməson súrí ʋ bɩcan mama ʋ bɩrɩ wá, ʋ tʋn ʋ swɩ̀n Filisi tɩ̀án pɛ̀gá tə con, ʋ wʋ́: «Á kʋ́ʋ̀ bɩ̀án! Naa kʋ tə mʋ̀ nə, Saməson dàń súrí ʋ bɩcan mama ʋ bɩrɩ nə.» Yá Filisi tɩ̀án pɛ̀gá tə dàń vəli Dalɩla con, də səbiu tə ba nə kàn nii, sə ba pa wá. 19 Ʋ dàń pɩn Saməson pə̀ń ʋ nadwana yuu ʋ dwɛ̀, ʋ ga bon bɛɛ don, ʋ pa ʋ gan Saməson yuu zwala barpɛ tə. Mə kʋ zɩgɩ nətʋ, Dalɩla ma bwànɩ̀ Saməson. Cɩ́gá, ʋ dɩ̀àn tə dàń yà nan tə yá wá. 20 Kʋ kwa nə, Dalɩla dàń swɩ̀n Saməson con, ʋ wʋ́: «Saməson, Filisi tɩ̀án twi sə ba ja mʋ́!» Saməson nyɩ́n ʋ zàn ʋ dwiən tə nə. Ʋ yà swɩ̀n ʋ waa con, ʋ wʋ́: «À kʋ́ʋ̀ wá vʋvʋgʋ à tɩ̀àn à jon, ndə nɛɛ tə duən tə nə.» Ʋ yà yəri də, Ba-Yígúrə́-Jə-Tiu yà kʋ́ʋ̀ tə̀lə́ də wá. 21 Filisi tɩ̀án tə jɩn wá, ba lá ʋ yɩ́á. Ba ja wá ba va Gaza, ba vwa də cɩnɩan banzala, ba pa ʋ viviri nʋŋʋ, bandiə wa.

Saməson fwi ʋ lɩŋa, yá ʋ tɩ

22 Saməson yuu tə ganʋ kwa nə, ʋ yukʋran tə yà pìí tə wulə tə naŋa. 23 Dɩɩn don nə, Filisi tɩ̀án pɛ̀gá tə yà kun duən nə, sə ba fwa joŋi nəfarʋ, ba pa ba woŋwanʋ tə nə, ba nə boŋə Dagon, sə ba ga fwa pupwən. Ba yà swɩ̀n, ba wʋ́: «Nə woŋwanʋ tə nə jɩn nə dʋŋʋ Saməson, kʋ kə nə jɩɩn wa!» 24 Yá lalʋʋ tə nə nɩ Saməson, ba bʋ̀à ba woŋwanʋ tə nə, ba wʋ́: «Nə woŋwanʋ tə nə jɩn nə dʋŋʋ tə, kʋ kə nə jɩɩn wa! Ʋ mʋ̀ lìù tə, ʋ yà nə cʋ̀gà nə lʋʋ nii tə, ʋ ga gwɩ nə lɩ̀à zənzən.» 25 Yá ba pùə́ dàń yà poli zənzən, kʋ pa ba swɩ̀n, ba wʋ́: «Á pɩan Saməson bà, ʋ pa nə mʋn!» Ba lɩ Saməson bandiə tə wa, ba ja bà lɩ̀à tə yáá con, yá ʋ dàń jìgə̀ mʋmʋn yoo, ʋ pa ba. Kʋ kwa nə, ba zɩgɩ wá, woŋwanʋ dìə̀ tə ywəŋə tə pwə́rə́ wa. 26 Saməson swɩ̀n balandʋrʋ tə con, ʋ yà nə jə ʋ jɩɩn nə, ʋ wʋ́: «Ja nə n va, sə à ja ywəŋə tə yɩra, dìə̀ tə nə tígə́ tə yuu wa. À pɩ̀à sə à salɩ tə yɩra.»

27 Dìə̀ tə yà súə́ də bara də kana. Filisi tɩ̀án pɛ̀gá tə mama yà wulə lá. Bara də kana, ba yà nə wulə dəyuu tə wa, ba ywàŋá Saməson, yà yɩ ndə lɩ̀à mʋ̀rʋ̀ batwa nə. 28 Saməson dàń lòrì Ba-Yígúrə́-Jə-Tiu, ʋ wʋ́: «Yuu-Tiu, Ba-Yígúrə́-Jə-Tiu, à lòrì mʋ́, sə n lìí à yoo! Ooo, à tíú Yɩɩ, pa nə dɩ̀àn naa kʋ tə cɩcɩ nə, sə à ma fwi à lɩŋa, Filisi tɩ̀án tə yuu wa, naa nədʋ, à yɩ́á tə yɩrɩ ba nə lá!» 29 Saməson dàń zi titəŋi ywəŋə bələ tə, dìə̀ tə nə tígə́ tə yuu wa. Ʋ jɩzən yà jə kʋ don nə, yá ʋ jɩgwiə jə kʋ don tə də nə, ʋ dàń ga pʋŋa tə yuu wa. 30 Ʋ swɩ̀n, ʋ wʋ́: «À sɛ̀ sə à də Filisi tɩ̀án tə twá duən nə tɩ!» Ʋ pʋn də ʋ dɩ̀àn mama, yá dìə̀ tə tʋa Filisi tɩ̀án pɛ̀gá tə, də lɩ̀à tə mama yuu nə, ba yà nə wulə lá. Lɩ̀à tə Saməson nə gʋa, ʋ tɩan tə máŋá wa, yà dwə ba tə, ʋ nə gʋa, də ʋ tə wulə lʋʋ wa. 31 Ʋ nubɩa tə, də ʋ nyɩna dìə̀ lɩ̀à tə mama twi ba tì ʋ tɩgɩ tə, ba ja vìí. Ba gùrì wá ʋ nyɩna Manowa libəri tə wa, kʋ nə wulə Sora də Ɛswətawɔlə tɩan tə pwə́rə́ wa. Saməson yɩn Yɩzərayɛlə lɩ̀à kwatara yáá tíú, bɩna sapʋa.