KWATARA YAA TƖAN TƏ MAŊA WA YIƏN DUƏN
Mika tún woŋwanan ʋ dìə̀ wa
17
1 Bɛɛ don yà wulə Efərayimə pɛɛn nagwanaa tə wa, ʋ yɩrɩ nə yɩ Mika. 2 Dɩɩn don nə, ʋ swɩ̀n ʋ nuu con, ʋ wʋ́: «N lìí n tɩ̀àn də dɩɩn don nə, n wárʋ́ səbilurən mʋ̀rʋ̀ də bíí jɛ́n, yá n zɩrɩ n kə ŋwɩ̀àn tə nə, à yɩ́á wa! Səbiu təntə wulə à con, à mʋ̀ nə tì kʋ.» Ʋ nuu tə le wá, ʋ wʋ́: «Ba-Yígúrə́-Jə-Tiu wá fwa zəni n yɩra, à bìú!» 3 Mika pɩn wárʋ́ səbilurən mʋ̀rʋ̀ də bíí tə, ʋ nuu nə, yá ʋ nuu swɩ̀n ʋ con, ʋ wʋ́: «À tún səbiu tə vàn nə, à pa Ba-Yígúrə́-Jə-Tiu cɩcɩ nə, də à waa mama, sə n mʋ̀ à bìú tə ja kʋ n ma fwa dàʋ̀ woŋwanʋ, də lugu woŋwanʋ.» 4 Mika dàń tì səbiu tə, ʋ pa ʋ nuu nə, yá ʋ nuu lɩ kʋ wa wárʋ́ səbilurən biələ, ʋ pa lìù nə, ʋ nə nyɩnɩ lurən. Yá kʋ tíú dàń fwa dàʋ̀ woŋwanʋ, də lugu woŋwanʋ, ʋ zɩgɩ Mika dìə̀ wa. 5 Mika təntə dàń yà jə Yɩɩ dìə̀. Ʋ pɩn ba fwa joŋwana culu gànʋ̀*, də dìə̀ woŋwanan*, ʋ ga tún ʋ bibara tə wa bìú don, sə ʋ ya joŋwanʋ.Mika tún joŋwanʋ ʋ dìə̀ wa
6 Kʋ máŋá tə wa, pɩ̀ʋ́ yà tə̀lə́ Yɩzərayɛlə wa. Yá lìù mama dàń yà tʋŋa kʋ tə, ʋ nə swə. 7 Balandʋrʋ don yà wulə Bɛtəleyɛmə nə, Zwida nagwanaa tə wa. Ʋ yà yɩ Levi dwíí lìù, ʋ twi ʋ jə̀ə́ lá. 8 Bɛɛ təntə nan Bɛtəleyɛmə, ʋ va sə ʋ pɩ̀à bwálɩ́ don, ʋ jə̀ń lá. Ʋ twá Efərayimə pɛɛn nagwanaa tə wa, ʋ va ʋ nan Mika sàń nə. 9 Mika bwe wá, ʋ wʋ́: «Yə̀n nə n nan?» Ʋ le Mika, ʋ wʋ́: «À yɩ Levi dwíí lìù, à nan Bɛtəleyɛmə, Zwida nagwanaa tə wa. À yɩ bwálɩ́ nə à twá lá à pɩ̀à, sə à jə̀ń lá.» 10 Mika ma swɩ̀n ʋ con, ʋ wʋ́: «Jə̀ń à con. N wá ya à nyɩna, yá n wá ya à dìə̀ joŋwanʋ. À wá ŋwɩ́n mʋ́ wárʋ́ səbilurən fugə, bɩnɩ mama, à ga wá pa mʋ́ gànàn, də n nii wodiu.» 11 Levi dwíí tíú tə sɛ̀ ʋ jə̀ə́ Mika con, yá Mika dàń yà ywàŋá ʋ yuu, ndə ʋ tətə bɩ̀á tə wa lìù nə. 12 Mika tún Levi dwíí lìù tə, ʋ pa ʋ jì ʋ joŋwanʋ, ʋ wulə ʋ dìə̀ wa. 13 Mika swɩ̀n ʋ waa con, ʋ wʋ́: «Sɩ́ʋ́n nə, à dàń yə̀ə́ də, Ba-Yígúrə́-Jə-Tiu wá fwa zəni à yɩra, Levi dwíí lìù wà tə nə jìgə̀ à joŋwanʋ tə yɩrɩ.»