Dan dwíí tə pɩ̀à tɩa, sə ba jə̀ń lá
18
1 Kʋ máŋá tə wa, pɩ̀ʋ́ yà tə̀lə́ Yɩzərayɛlə wa. Yá Dan dwíí tə də yà wulə ba pɩ̀à tɩa, sə ka ya ba nyiən, ba jə̀ń ka wa. Cɩ́gá, ba mʋ̀ yà tə wà tɩa nɩ, ka nə wá ya ba tori, Yɩzərayɛlə dwíə́ tə titəŋi wa. 2 Dan dwíí tə kúrí ba wa bara bonu, ba waa nə dà, Sora də Ɛswətawɔlə tɩan tə wa ba tʋn, sə ba va ba jírí lʋʋ nii tə wa, ba ywàń kʋ. Ba swɩ̀n ba con, ba wʋ́: «Á vələ á ywàń lʋʋ nii tə.» Bara təntə nə vəli ba yí Efərayimə pɛɛn nagwanaa tə wa, ba nan ba jɩrɩ Mika sàń nə, yá ba jʋa lá. 3 Máŋá tə wa, ba yà nə wulə Mika sàń tə nii nə, ba nì Levi dwíí balandʋrʋ tə kori, yá ba lwarɩ də ʋ yɩ Levi dwíí lìù. Ba ma yori ba va ba bwe wá, ba wʋ́: «Wàà nə ja mʋ́ ʋ bà yəbə? Bɛ̀ɛ̀ tʋtʋŋɩ nə n tʋŋa yəbə? Bɛ̀ɛ̀ yɩrɩ nə n wulə yəbə?» 4 Ʋ le ba, ʋ wʋ́: «Mika tʋn zəni à yɩra. Ʋ tì nə ʋ ma fwa ʋ joŋwanʋ, yá ʋ ŋwɩ́n nə.» 5 Ba swɩ̀n ʋ con, ba wʋ́: «Kʋ nə yɩ nətʋ, nə lòrì mʋ́ sə n bon n kə Ba-Yígúrə́-Jə-Tiu nə, n pa nəba, sə nə jə́n nə cwəŋə tə wá ja yáá naaa.» 6 Yá joŋwanʋ tə le ba, ʋ wʋ́: «Á dànà ká pa fən ja aba! Ba-Yígúrə́-Jə-Tiu wulə də aba, á cwəŋə tə vəlu wa!»7 Bara bonu tə kɛ̀ń ba va ba yí Layiswə. Ba nɩ də lɩ̀à tə nə wulə lá, yà jə yazurə ndə Sidon tɩ̀án nə. Ba yà jə ba tɩ̀àn dɩ̀àn, yoo mama yà ba ba wʋwalɩ. Lʋʋ nii tə wa, ba jəndon mama yà ba ba wʋwalɩ, yá lìù də mama yà ba pàrɩ̀ də́ ba yuu wa, də dɩ̀àn. Ba yà ŋʋ́ná də Sidon tɩ̀án tə, yá ba də lìù mama yoo yà tə̀lə́ duən nə. 8 Bara bonu tə pìí ba bà, ba dwíí tɩ̀án tə con, Sora də Ɛswətawɔlə tɩan tə wa, yá ba dwíí tɩ̀án tə dàń bwe ba, ba wʋ́: «Kʋ yɩn nətə á con?» 9 Ba le, ba wʋ́: «Nə zaŋa nə va nə ta Layiswə tɩ̀án! Nə nɩ nagwanaa tə, yá ka jə fɩra. Á dànà ká kə bábɩ̀á á waa! Á dànà ká pa fən ja aba! Á zaŋa sə nə vu nə jon nagwanaa tə, nə tɩnɩ. 10 Á nə zʋa nagwanaa tə wa, á wá na də lɩ̀à tə nə wulə ka wa, jə ba tɩ̀àn dɩ̀àn. Nagwanaa tə nii dáá, yá Yɩɩ ken ka á jɩɩn wa. Won mama tə̀lə́ tɩa yuu wa, kʋ nə mùrì kʋ bwálɩ́ təntə nə.
11 Yá Dan dwíí tə wa bara biəyardʋ dàń tì ba kwatarɩ zɩla, ba ja nan Sora də Ɛswətawɔlə tɩan tə wa. 12 Ba vəli ba kə ba dəkuu bwálɩ́, Kiriyatə-Yarimə tɩʋ tə nii nə, Zwida nagwanaa wa. Kʋ mʋ̀ nə pɩn də zə̀n mama, ba boŋə kʋ bwálɩ́ tə, Mahane-Dan. Kʋ də̀ń nə yɩ, “Dan dwíí tə dəkuu bwálɩ́”. 13 Ba zɩgɩ lá nə, ba twá Efərayimə pɛɛn nagwanaa tə wa, ba va ba nan Mika sàń nə. 14 Bara bonu tə nə dí yáá ba va ba mɩ̀àn Layiswə nagwanaa tə, dàń swɩ̀n ba nubɩa tə con, ba wʋ́: «Á yə̀ə́ də joŋwanʋ culu gànʋ̀*, də dàʋ̀ woŋwanʋ, də dìə̀ woŋwanan*, də lugu woŋwanʋ wulə dìì tətə wa? Á mʋ̀ dàń nə yə̀ə́ kʋ tə, á nə wá fwa.» 15 Ba ma yori ba va Mika sàń. Ba vəli ba zʋ Levi dwíí balandʋrʋ tə dìə̀, ba jʋn wá. 16 Dan dwíí tə wa bara biəyardʋ tə yà zɩga mimii tə nə, də ba kwatarɩ zɩla. 17 Yá bara bonu tə nə vəli ba mɩ̀àn nagwanaa tə, dàń kɛ̀ń ba zʋ ba tì dàʋ̀ woŋwanʋ tə, də joŋwana gànʋ̀ tə, də dìə̀ woŋwanan tə, də lugu woŋwanʋ tə. Kʋ máŋá tə wa, də joŋwanʋ tə mʋ̀ yà wulə bara biəyardʋ tə con, ba nə zɩga mimii tə nə, də ba kwatarɩ zɩla. 18 Joŋwanʋ tə nə nɩ də, ba zʋa Mika dìə̀ wa, ba tì dàʋ̀ woŋwanʋ tə, də joŋwana culu gànʋ̀ tə, də dìə̀ woŋwanan tə, də lugu woŋwanʋ tə, ʋ bwe ba, ʋ wʋ́: «Bɛ̀ɛ̀ nə á fwa nətən?» 19 Ba le wá ba wʋ́: «Swiii! Pú n nii, n ga pú nə kwa! Bàá, n ya nə nyɩna, də nə joŋwanʋ. N nə yɩ dwíí pə́rɩ́ joŋwanʋ Yɩzərayɛlə wa, kʋ ba kʋ́kwà n nə yɩ ləzwəndʋa dìə̀ joŋwanʋ naaa?» 20 Ba sʋgʋ tə poli joŋwanʋ tə pùə́, yá ʋ dàń jon joŋwana culu gànʋ̀ tə, də dìə̀ woŋwanan tə, də woŋwanan tə duən tə, ʋ ja twá Dan dwíí tə nə.
21 Ba kʋ́ʋ̀ zàn ba zʋ cwəŋə. Ba yà ken bìsɩ́ná tə, də vàná tə, də zɩla tə ba yáá. 22 Ba nə van ba nan kwa, ba yá Mika sàń tə, ʋ də ʋ jənduən tə bon duən, ba nan ba dɩŋɩ Dan dwíí tə kwa. 23 Ba mà bubwiə ba kə Dan dwíí tə kwa. Dan dwíí tə ma viviri, ba bwe Mika, ba wʋ́: «Bɛ̀ɛ̀ nə jə mʋ́, n ma mà bubwiə?» 24 Mika ma le, ʋ wʋ́: «Á tì à woŋwanan tə à nə fwa, á ga ja à joŋwanʋ tə, á vìrí. Won mama kʋ́ʋ̀ wà à con gɛ, yá á tə bwe nə sə á jə́n, bɛ̀ɛ̀ nə jə nə, à ma mà bubwiə?» 25 Dan dwíí tə swɩ̀n ʋ con, ba wʋ́: «Nə ba pɩ̀à sə nə pìí nə nì n kori lá! Kʋ nə tà nətʋ, nə wa lɩ̀à duən lɩŋa nə zàn, ba wá ta aba, yá n də n dìə̀ lɩ̀à tə mɛ wá kwɩ̀n á mɩɩ tə nə.» 26 Yá Dan dwíí tə tì ba cwəŋə, ba vìí. Mika nɩ də, ba dɩ̀àn dwə wá, ʋ ma pìí ʋ bà ʋ sàń.
Dan dwíí tə jon Layiswə tɩʋ tə
27 Mə nətʋ nə, Dan dwíí tə jon Mika woŋwanan tə ʋ nə fwa, də ʋ joŋwanʋ tə, ʋ yà nə tʋŋa ʋ pɩn wá. Layiswə tɩ̀án yà jə ba tɩ̀àn dɩ̀àn, yoo mama yà ba ba wʋwalɩ. Yá Dan dwíí tə twi, ba pú tɩʋ tə ba kə, ba ta. Ba gʋa lɩ̀à tə də kwatara sɩ̀ʋ́, ba ga dɩ mən tɩʋ tə nə. 28 Lìù mama wà wànɩ́ ʋ bà ʋ jon Layiswə. Kʋ yà yɩ kʋ wulə Bɛtə-Rehɔbə varɩnaa tə wa. Kʋ yà ŋʋ́ná də Sidon tɩʋ tə, yá kʋ də tɩʋ don mama yà ba nimarʋ jə də duən. Dan dwíí tə pìí ba lwà tɩʋ tə, ba wulə kʋ wa. 29 Ba lwàń tɩʋ tə yɩrɩ, ba kə Dan. Ba nɩbɛɛ tə, ʋ nə yɩ Zwakɔbə bìú, yɩrɩ yà nə. Yá fuən nə, tɩʋ tə yɩrɩ yà nə yɩ Layiswə. 30 Dan dwíí tə zɩgɩ Mika woŋwanʋ tə lá nə, ba ma fwa ba yɩjʋnɩ bwálɩ́, yá Gɛrəswomə bìú Zonatan, ʋ nə yɩ Moyizə nàʋ́, dàń yà nə yɩ Dan dwíí tə joŋwanʋ. Kʋ yɩn Zonatan bɩ̀á tə də tʋtʋŋɩ, kʋ va kʋ yí máŋá tə, dʋŋa nə jɩn Yɩzərayɛlə lɩ̀à tə ba va yongaʋ. 31 Mika woŋwanʋ tə nə yɩn Dan dwíí tə woŋwanʋ, máŋá tə mama, Yɩɩ wúlú gansili tə nə yɩn Silo nə.