Bɛnzwamɛn dwíí tə nə wulə Gibeya nə, tʋn cʋna
19
1 Kʋ máŋá tə wa, pɩ̀ʋ́ yà tə̀lə́ Yɩzərayɛlə wa. Yá Levi dwíí lìù don yà twá ʋ jə̀ə́ Efərayimə pɛɛn nagwanaa tə vàn don nə. Ʋ yà jə bwàlʋ́ Bɛtəleyɛmə nə, Zwida nagwanaa tə wa, ʋ nə tì ʋ ma fwa ʋ kabiə. 2 Máŋá don wa, bwalʋkan tə pùə́ cʋ̀gʋ̀ bɛɛ tə yuu wa, yá ʋ dàń dəri ʋ va ʋ nyɩna sàń, Bɛtəleyɛmə nə, Zwida nagwanaa tə wa. Ʋ yɩn lá wuuu, cànɩ̀ banɩa. 3 Yá dɩɩn don nə, ʋ barɩ tə zàn ʋ va ʋ yí wá, sə ba swɩ̀n ba kə duən yuu, sə ʋ ga ja wá ʋ pìí ʋ bà. Ʋ yà jɩn ʋ tʋtʋnbiu, də bɩnɛ bələ ʋ kə lá ʋ va. Bwalʋkan tə jɩn ʋ barɩ tə, ʋ zʋ ʋ nyɩna dìə̀ wa, yá ʋ nyɩna tə nə nɩ wá, ʋ zàn ʋ jəri wá də pupwən. 4 Ʋ tɩnbɛɛ tə jɩn wá ʋ con, dɩan batwa. Levi dwíí lìù tə, də ʋ tʋtʋnbiu tə yà də́, ba nywɩn, ba ga jwɩ lá. 5 Banɩa nii dɩɩn tə nə, ba zàn jɩjʋ fuən fuən, yá Levi dwíí lìù tə dàń yà kəni ʋ sírí, sə ʋ pìí ʋ vìí. Ʋ tɩnbɛɛ tə ma swɩ̀n ʋ con, ʋ wʋ́: «Yá sə ba fwa wodiu ba pa mʋ́ n də́, sə á dàń vìí.» 6 Levi dwíí lìù tə ma jə̀ń, ʋ də ʋ tɩnbɛɛ tə mɛ bələ də́ wodiu, ba ga nyʋn. Yá kʋ kwa nə, bʋ̀á nyɩna tə swɩ̀n kanbarɩ tə con, ʋ wʋ́: «À lòrì mʋ́ sə n jʋ, sə nə ve!» 7 Levi dwíí lìù tə yà swə sə ʋ vìí, yá ʋ tɩnbɛɛ tə nyɩ́n dɩ̀àn, ʋ pa ʋ sɛ̀, ʋ tə jʋ lá.8 Bonu nii dɩɩn tə nə, ʋ zàn jɩjʋ fuən fuən, sə ʋ vìí. Yá ʋ tɩnbɛɛ tə swɩ̀n ʋ con, ʋ wʋ́: «À lòrì sə n yá, sə ba fwa wodiu ba pa mʋ́ n də́, n ga dàn yɩbalɩ nə, sə á dàń vìí. Ʋ sɛ̀ kʋ nətʋ tə, yá ba mɛ bələ dàń dí wodiu tə. 9 Yá máŋá tə kanbarɩ tə nə zàn, sə ʋ də ʋ kabiə tə, də ʋ tʋtʋnbiu tə vìí, ʋ tɩnbɛɛ tə swɩ̀n ʋ con, ʋ wʋ́: «Ywàń, yɩɩ tʋa kʋ zwɛ̀. Tɩa yì. Á jwɩa yəbə sə nə ve. Yá á dàń wá zàn jwɩan jɩjʋ fuən fuən, á vìí.» 10 Yá naa kʋ tə mʋ̀ nə, kanbarɩ tə vɩga, sə ʋ jʋ. Ʋ zàn ʋ zʋ cwəŋə, ʋ də ʋ kabiə, də ʋ bɩnɛ bələ, də tə tàŋá zɩla. Ʋ twi ʋ yí Yebusə yáá con (kʋ mʋ̀ nə nə yɩ Zwerizalɛmə). 11 Máŋá tə, ba yí Yebusə, də yɩɩ tʋa zənzən. Tʋtʋnbiu tə ma swɩ̀n ʋ yuu-tiu tə con, ʋ wʋ́: «Nə ywərə nə va Yebusə tɩ̀án tɩʋ kʋ tə wa, nə jʋ lá.» 12 Ʋ yuu-tiu tə ma le wá, ʋ wʋ́: «Nə bá yori nə va tɩʋ nəkaʋ wa, Yɩzərayɛlə lɩ̀à nə tə̀lə́ lá. Nə wá va nə jʋ Gibeya nə.» 13 Ʋ swɩ̀n ʋ tʋtʋnbiu tə con, ʋ súrí lá, ʋ wʋ́: «Nə kənə dɩ̀àn nə yí Gibeya, nə à yə̀ə́ Rama, nə jʋ tɩan təntə don wa.» 14 Ba kɛ̀ń ba vìí, yá yɩɩ zʋa də ba wulə Gibeya nii nə, Bɛnzwamɛn dwíí nagwanaa wa. 15 Ba dàń yori ba zʋ, sə ba jʋ Gibeya wa. Levi dwíí lìù tə vəli tɩʋ tə kanporu tə wa, yá lìù mama wà ba ja zʋ ʋ dìə̀, sə ba jʋ lá.
16 Kʋ didəni təntə nə, də nə̀ń bazʋnʋ don nə, ʋ nan kárá ʋ bɩ̀àn. Ʋ yà yɩ Efərayimə pɛɛn nagwanaa tə wa lìù, ʋ twi ʋ twá ʋ jə̀ə́ Gibeya nə. Yá Gibeya tɩ̀án mʋ̀ yà yɩ Bɛnzwamɛn dwíí lɩ̀à. 17 Bazʋnʋ tə nə zɩ̀n ʋ yáá ʋ na cwəvəlu tə, də ʋ jə̀ə́ tɩʋ tə kanporu tə wa, ʋ bwe wá, ʋ wʋ́: «Yə̀n nə n nan? Yá yə̀n nə n vələ?» 18 Ʋ le wá, ʋ wʋ́: «Nə yɩ nə nan Bɛtəleyɛmə, Zwida nagwanaa wa, nə lɛ nə vələ à sàń, Efərayimə pɛɛn nagwanaa tə vàn tə don nə. À yɩ Ba-Yígúrə́-Jə-Tiu dìə̀ tʋtʋnʋ, à yà vəli Bɛtəleyɛmə, Zwida nagwanaa wa. À dàń yɩ à pìí vìrí, yá lìù mama wà nə jon, sə à zʋrɩ ʋ dìə̀ wa. 19 Nə jə gaʋ də wosanan, sə nə pa nə bɩnɛ tə nə. Nə ga jə wodiu də divɛn, à mʋ̀ də n bʋ̀á tə, də tʋtʋnbiu tə nə wulə à mʋ̀ n tʋtʋnʋ tə kwa, nə wá də́, nə ga nyʋn. Won mama wà nəba mùrì.» 20 Bazʋnʋ tə ma swɩ̀n ʋ con, ʋ wʋ́: «Yɩɩ wá ya də mʋ̀! À wá pa mʋ́ won tə mama, n nə pɩ̀à. À dàń nə lòrì mʋ́, dàn ká jʋ kanporu tə wa.» 21 Ʋ ja ba ʋ zʋ ʋ dìə̀, ʋ pa gaʋ ba bɩnɛ tə nə. Ba sɩ̀n ba nɛɛ, ba də́ wodiu, ba ga nyʋn.
22 Máŋá tə, ba nə wulə ba sìí, də nə̀ń Bakʋkwanyɩna nə, ba twi ba kɩkarɩ dìə̀ tə, ba mà mimii tə nə, də ba bwɛ́. Ba swɩ̀n bazʋnʋ tə con, ʋ nə yɩ dìə̀ tə tíú, ba wʋ́: «Pa bɛɛ tə nə zʋa n dìə̀ tə nan yəbə, nə pɩ̀à wá sə nə pə̀ń.» 23 Dìə̀ tə tíú nan, ʋ swɩ̀n ba con, ʋ wʋ́: «Ɔn ɔn, à dabara-ba, à lòrì aba, á dànà ká tʋn yolwan. Bɛɛ tə yɩ à dìə̀ vee, á dànà ká tʋn yutəlu yoo təntə ʋ yɩra. 24 Á nəŋə, à jə bʋ̀á, ʋ tə nə yəri bɛɛ, bɛɛ tə də ma jə ʋ bwalʋkan. À wá lɩ ba à pa aba, sə á ma fwa á fɩra. À dàń nə lòrì aba, á dànà ká tʋn yutəlu yoo təntə, bɛɛ tə yɩra.» 25 Yá bara tə wà dìə̀ tə tíú con tan. Levi dwíí lìù tə dàń ma ja ʋ kabiə tə, ʋ nan ʋ pa ba, kàrá wa. Ba pə̀ń wa də dɩ̀àn tɩtɩn tə mama, kʋ va kʋ yɩ jɩjʋ. Yá ba dàń yá wá tɩbɩlakʋnʋ wa.
26 Tɩbɩlakʋnʋ tə wa, kan tə twi ʋ tʋ bɛɛ tə dìə̀ tə mimii nə, ʋ barɩ tə yà nə wulə lá. Ʋ pə̀ń lá mama, tɩa kori ka pʋrɩ. 27 Yá jɩjʋ nə, ʋ barɩ tə zàn, ʋ súrí dìə̀ tə mimii ʋ nan sə ʋ vìí, də nə̀ń ʋ kabiə tə nə, ʋ tígə́ sələlələ, dìə̀ tə mimii tə wa, ʋ jɩ̀àn tígə́ mimii zwɩɩ tə wa. 28 Ʋ swɩ̀n kan tə con, ʋ wʋ́: «Zàn sə nə vìí!» Yá kan tə wà sʋsʋgʋ. Bɛɛ tə ma tì wá, ʋ kə ʋ bɩ̀nà yuu, ʋ ja va ʋ sàń. 29 Ʋ nə vəli ʋ zʋ ʋ dìə̀, ʋ tì sɩ̀ʋ́ ʋ ma ca ʋ kabiə tə tɩgɩ tə, nandaran fugə də bələ. Yá ʋ dàń ja tə ʋ tʋn lɩ̀à, ʋ pa ba tara tə, Yɩzərayɛlə dwíə́ tə nagwanɛɛ tə mama wa. 30 Tʋntʋna tə yàá bwe lɩ̀à tə mama, ba nə nɩ kʋ nətʋ tə, ba wʋ́: «Kʋ nə sinti máŋá tə, Yɩzərayɛlə lɩ̀à nə nan ba yá Ezwipətə lʋʋ nii tə, kʋ bà kʋ yí zə̀n, yoo kʋ tə yiri tə tʋn naaa? Lìù mama tə dí yáá ʋ na yoo kʋ tə yiri naaa? Á bʋŋa kʋ yuu wa zəni. Á nɩan duən, á ga bɩrɩ yoo tə nə mɛ sə kʋ tʋn, yoo təntə yɩrɩ.»