Kwatara 20

Yɩzərayɛlə dwíə́ tə duən tə jəri duən, ba bwe kan tə tɩan nɛɛ nə

1 Kʋ nə zɩgɩ Dan tɩʋ tə nə, kʋ cú kʋ yí Bɛrə-Swəba tɩʋ tə, kʋ ja Galadə lʋʋ nii tə kʋ súrí, Yɩzərayɛlə lalʋʋ tə mama twi ba kun duən nə, də pubʋŋa nədʋ, Ba-Yígúrə́-Jə-Tiu yáá con, Misəpa nə. 2 Lalʋʋ tə yáá tɩ̀án tə mama, də Yɩzərayɛlə dwíə́ tə yáá tɩ̀án tə mama yɩn Yɩɩ lɩ̀à tə jə́rə́ təntə wa. Lalʋʋ tə yà yɩ kwatara mʋ̀rʋ̀ biənɩa, ba nə vəli tɩa, ba ga ja kwatara sɩ̀ʋ́, ba tɛ kʋ̀ʋ̀. 3 Bɛnzwamɛn dwíí lɩ̀à tə nì də, Yɩzərayɛlə dwíə́ tə duən tə mama jəri duən Misəpa nə.

Yɩzərayɛlə dwíə́ tə swɩ̀n, ba wʋ́: «Á maŋa nətʋ tə, kʋ yolwan tə nə tʋn, á bɩrɩ nəba.» 4 Levi dwíí lìù tə, ba nə gʋa ʋ kan tə ma swɩ̀n, ʋ wʋ́: «À də à kabiə tə yɩ nə twi nə yí Gibeya tɩʋ tə, Bɛnzwamɛn nagwanaa tə wa də tɩa yì, nə ma zʋ sə nə jʋ lá. 5 Yá kʋ tɩtɩn tə nə, Gibeya tɩʋ tɩ̀án tə twi ba kɩkarɩ dìə̀ tə, à nə zʋrɩ lá, sə ba tʋn lwanɩ à yɩra. À mʋ̀ gʋrɩ nə ba yà pɩ̀à, yá ba dàń jɩn à kabiə tə, ba pə̀ń də dɩ̀àn, ba gʋ. 6 Yá à dàń tì ʋ tɩgɩ tə, à ca nandaran nandaran, à ma tʋn lɩ̀à, à pa ba tara tə, Yɩzərayɛlə dwíə́ tə nagwanɛɛ tə mama wa. Cɩ́gá, Gibeya tɩ̀án cʋ̀gʋ̀ culu nəfarʋ, ba tʋn yutəlu yoo Yɩzərayɛlə wa. 7 Sɩ́ʋ́n nə, á mʋ̀ Yɩzərayɛlə lɩ̀à tə mama nə, á twi duən yáá! Á dàń nɩan duən, á ga bɩrɩ yoo tə nə mɛ sə kʋ tʋn, yoo təntə yɩrɩ, yəbə.»

Yɩzərayɛlə dwíə́ tə duən tə tanɩ, sə ba ta Gibeya tɩ̀án

8 Lalʋʋ tə mama dàń zàn də pubʋŋa nədʋ, ba swɩ̀n, ba wʋ́: «Nə lìù mama bá pìí ʋ va ʋ sàń! 9 Nə̀ń kʋ tə, nə nə wá tʋn Gibeya tɩ̀án yɩra: Nə wá dí yáá nə pwárɩ́, nə dàń ga zɩgɩ lá, nə va nə ta ba. 10 Yɩzərayɛlə dwíə́ tə mama wa, nə wá kúrí bara, sə ba va ba pɩ̀à wodirən, ba ja bà ba pa kwatara tə nə, ba nə wá va ba ta Gibeya tɩ̀án. Bara bíí yuu wa, nə wá lɩ bara fugə. Bara mʋ̀rʋ̀ yuu wa, nə wá lɩ bara bíí. Yá bara mʋ̀rʋ̀ fugə yuu wa, nə wá lɩ bara mʋ̀rʋ̀. Yá kwatara tə dàń wá kə càn Bɛnzwamɛn nagwanaa lɩ̀à təntə nə, yutəlu yoo tə yɩrɩ, ba nə tʋn Yɩzərayɛlə wa. 11 Yɩzərayɛlə bara tə mama dàń ken nii nədʋ, sə ba mama kun duən nə, ba va ba ta Gibeya tɩʋ tə.

Bɛnzwamɛn dwíí lɩ̀à tə vɩga, sə ba ja cʋna lɩ̀à tə, ba pa

12 Yɩzərayɛlə dwíə́ tə duən tə dí yáá ba tʋn lɩ̀à, Bɛnzwamɛn dwíí tə sànɩ́ tə mama wa, sə ba bwe, ba wʋ́: «Nətə nə kʋ twá, cʋna nəfarʋ kʋ tə yiri ma tʋn á con? 13 Sɩ́ʋ́n nə, á dàń jana ba mʋ̀ lakʋkwɩnan tə, ba nə wulə Gibeya tɩʋ tə wa, á pa nəba sə nə gʋ, nə ma kwɛn cʋna tə, nə lɩ Yɩzərayɛlə wa.»

Yá Bɛnzwamɛn dwíí tə vɩga, sə ba cʋgʋ ba nubɩa, Yɩzərayɛlə dwíə́ tə duən tə kori. 14 Ba nan ba tɩan tə wa ba bà, ba kun duən nə Gibeya nə, sə ba ta Yɩzərayɛlə dwíə́ tə duən tə. 15 Kʋ dɩɩn tə nə, Bɛnzwamɛn dwíí lɩ̀à tə nə nan tɩan tə wa ba bà, yɩn bara mʋ̀rʋ̀ sapʋa də bardʋ, ba nə ja kwatara sɩ̀ʋ́ ba tɛ kʋ̀ʋ̀. Gibeya tɩ̀án tə nii yà ba lá də́. Gibeya tɩ̀án tə yɩn kwatara biəyarpɛ, ba nə jə yii. 16 Lalʋʋ təntə mama wa, kwatara biəyarpɛ yà wulə lá, ba nə yɩ jɩgwiə tɩ̀án. Ba lìù mama yà wàá kapan, ʋ kəni kapadɩlʋ wa, ʋ ma dɩlɩ yukʋʋ, yá ʋ ba kʋ gɛ. 17 Yɩzərayɛlə dwíə́ tə duən tə kwatara tə yà yɩ bara mʋ̀rʋ̀ biənɩa, ba mama nə ja kwatara sɩ̀ʋ́ ba ta kʋ̀ʋ̀, ba mɩn. Bɛnzwamɛn dwíí kwatara tə nii yà ba ba wa də́.

Yɩzərayɛlə dwíə́ tə duən tə zɩ̀n kʋ̀ʋ̀ də Bɛnzwamɛn dwíí tə

18 Yɩzərayɛlə dwíə́ tə duən tə zàn ba va Betɛlə, ba bon ba kə Yɩɩ nə, sə ba jə́n ba wa dwíí tə nə mɛ, sə ba dí yáá ba va, ba ta Bɛnzwamɛn dwíí tə! Ba-Yígúrə́-Jə-Tiu ma bɩrɩ də, Zwida dwíí tə nə mɛ, sə ba dí yáá ba va.

19 Yá kʋ tɩpʋrɩ jɩjʋ nə, Yɩzərayɛlə lɩ̀à tə vəli ba kə ba dəkuu bwálɩ́ Gibeya nii nə. 20 Ba nyɩ́n ba nan ba zɩga, sə ba ta kʋ̀ʋ̀ də Bɛnzwamɛn dwíí tə, Gibeya yáá con. 21 Yá kʋ dɩɩn tə nə, Bɛnzwamɛn dwíí tə nan Gibeya wa, ba gʋ bara mʋ̀rʋ̀ sapʋa də bələ, Yɩzərayɛlə lɩ̀à tə wa, ba tún tɩa. 22-23 Yɩzərayɛlə lɩ̀à tə vəli ba kwi Ba-Yígúrə́-Jə-Tiu yáá con, kʋ va kʋ yí didəni. Yá ba dàń bon ba kə Ba-Yígúrə́-Jə-Tiu nə, sə ba jə́n, də kʋ nə mɛ, sə ba pìí ba va ba ta Bɛnzwamɛn dwíí tə, ba də nə yɩ Yɩzərayɛlə lɩ̀à! Ba-Yígúrə́-Jə-Tiu ma bɩrɩ də kʋ mɛ sə ba pìí ba vu. Yɩzərayɛlə kwatara tə dàń pìí ba tì wʋdɩʋ. Ba kʋ́ʋ̀ nan ba zɩga, sə ba ta kʋ̀ʋ̀, bwálɩ́ tə tətə nə, ba nə dí yáá ba zɩgɩ, təntən dɩɩn tə nə. 24 Yɩzərayɛlə lɩ̀à tə kʋ́ʋ̀ yí Bɛnzwamɛn dwíí tə yɩra, sə ba ta ba, bələ nii dɩɩn təntə nə. 25 Yá bələ nii dɩɩn təntə də nə, Bɛnzwamɛn dwíí tə kʋ́ʋ̀ nan Gibeya wa, ba jəri Yɩzərayɛlə lɩ̀à tə, yá ba gʋa Yɩzərayɛlə lɩ̀à tə wa bara mʋ̀rʋ̀ fugə də nana, ba mama nə ja kwatara sɩ̀ʋ́, ba tɛ kʋ̀ʋ̀, ba tún tɩa. 26 Yɩzərayɛlə kwatara tə mama, də lalʋʋ tə mama kʋ́ʋ̀ vəli Betɛlə, ba jə̀ń lá, ba kwi Ba-Yígúrə́-Jə-Tiu yáá con. Ba vwə ba níə́ kʋ dɩɩn tə nə, kʋ va kʋ yí didəni, ba ga fwa jwəŋə ba nə sʋ̀rɩ́*, də nimarʋ* jwəŋə, Ba-Yígúrə́-Jə-Tiu yáá con. 27-28 Kʋ máŋá tə wa, də Yɩɩ nimarʋ culu daka* tə yà wulə Betɛlə nə. Eleyazarə bìú Fineyasə, ʋ nə yɩ Aron nàʋ́, yà nə ywàŋá ka yuu. Yá Yɩzərayɛlə lɩ̀à tə kʋ́ʋ̀ bon ba kə Ba-Yígúrə́-Jə-Tiu nə, sə ba jə́n, də kʋ nə mɛ sə ba tə pìí ba va, ba ta Bɛnzwamɛn dwíí tə, ba də nə yɩ Yɩzərayɛlə lɩ̀à, nə à yə̀ə́ ba nə mɛ, sə ba yá ba! Ba-Yígúrə́-Jə-Tiu ma le, ʋ wʋ́: «Á vələ! Jwɩan nə, à wá kə ba á jɩɩn wa.»

29 Yɩzərayɛlə lɩ̀à tə dàń vəli ba səgə kwatara, ba ja kɩkarɩ Gibeya tɩʋ tə. 30 Yá batwa nii dɩɩn tə nə, ba kʋ́ʋ̀ vəli sə ba ta Bɛnzwamɛn dwíí tə. Yá ba kʋ́ʋ̀ nan ba zɩga Gibeya yáá con, sə ba ta kʋ̀ʋ̀, ndə dɩan tə duən tə nə. 31 Bɛnzwamɛn dwíí tə də kʋ́ʋ̀ nan, ba jəri Yɩzərayɛlə lɩ̀à tə, sə ba ta ba. Yá Bɛnzwamɛn dwíí tə dàń púə́ Yɩzərayɛlə lɩ̀à tə kwa, ba dɩŋa ba, ba ja va yiŋʋnɩ də tɩʋ tə. Bɛnzwamɛn dwíí tə yà kʋ́ʋ̀ sinti ba gwɩ Yɩzərayɛlə lɩ̀à tə, ndə dɩan tə duən tə nə. Ba gʋa ba wa lɩ̀à, ba yí fɩtwa, kasɔɔ tə wa, cwəŋə tə yuu wa, ka nə vəli Betɛlə, də ka tə yuu wa, ka nə vəli Gibeya. 32 Ba yà swɩ̀n ba waa con, ba wʋ́: «Nə kʋ́ʋ̀ ta ba nə də́, ndə dí yáá tə nə! Yá Yɩzərayɛlə lɩ̀à tə mʋ̀ yà swɩ̀n duən con, ba wʋ́: «Nə dərə ba yáá nə, sə nə ja ba nə va coŋi tə yuu wa, yiŋʋnɩ də tɩʋ tə.» 33 Yɩzərayɛlə kwatara tə mama dàń nan bwálá tə nə, ba yà nə wulə, ba dəri ba va, ba jəri duən Baalə-Tamarə nə. Yá kwatara tə yà nə səgə tɩʋ tə nii nə, dàń nyɩ́n ba nan ba yisəgə bwálɩ́ tə nə, Mare-Geba vàn con. 34 Ba yà kúrí bara mʋ̀rʋ̀ fugə, ba nə jə yii, Yɩzərayɛlə mama wa. Yá bara təntə dàń twi, ba nan Gibeya yáá con. Kʋ̀ʋ̀ tə yɩn dɩ̀àn, yá Bɛnzwamɛn dwíí tə wà lwarɩ, də càn wá yí ba. 35 Ba-Yígúrə́-Jə-Tiu pɩn Yɩzərayɛlə lɩ̀à tə də́ dɩ̀àn, Bɛnzwamɛn dwíí tə yuu wa. Kʋ dɩɩn tə nə, Yɩzərayɛlə lɩ̀à tə gʋa bara mʋ̀rʋ̀ sapʋa də bonu də bíí, Bɛnzwamɛn dwíí tə wa, ba mama nə ja kwatara sɩ̀ʋ́, ba tɛ kʋ̀ʋ̀.

36 Bɛnzwamɛn dwíí tə dàń nɩ də, Yɩzərayɛlə lɩ̀à tə dí dɩ̀àn ba yuu wa. Yɩzərayɛlə lɩ̀à tə yà jə kwatara tə duən tə dɩ̀àn, ba nə səgə Gibeya kwa con. Kʋ mʋ̀ nə pɩn, ba ma dəri ba yá bwálɩ́, ba pa Bɛnzwamɛn dwíí tə nə. 37 Kwatara tə nə səgə tə dàń nan, ba dəri lala, ba va ba zʋ Gibeya tɩʋ tə wa, ba gʋ kʋ wa lɩ̀à tə mama, də kwatara sɩ̀ʋ́. 38 Kwatara tə nə səgə tə, də Yɩzərayɛlə lɩ̀à tə duən tə yà swɩ̀n, ba tún mɩmɩnʋ don yuu wa, ba nə wá fwa. Kʋ mʋ̀ nə yɩ, sə ba kə mən tɩʋ tə nə, ba pa tə ŋwɩn zàn tə dɩ̀ yɩɩ nə, kuləlululu. 39 Yɩzərayɛlə lɩ̀à tə yà mɛ, sə ba pìí ba vəvəri ba ta Bɛnzwamɛn dwíí tə. Yá Bɛnzwamɛn dwíí tə yà manwarɩ ba gʋ ba wa lɩ̀à, ba yí fɩtwa. Ba dàń yà bʋŋa də, ba kʋ́ʋ̀ dí dɩ̀àn Yɩzərayɛlə lɩ̀à tə yuu wa, ndə dí yáá tə nə! 40 Kʋ máŋá tə wa, də ŋwɩn sinti tə zaŋa tɩʋ tə wa, tə dɩ̀ yɩɩ nə, kuləlululu. Bɛnzwamɛn dwíí tə pìí ba ywàń ba kwa con, də nə̀ń ba tɩʋ tə mama nə, kʋ kwé mən, kʋ ŋwɩn dɩ̀ yɩɩ. 41 Yɩzərayɛlə lɩ̀à tə dàń yà pìí ba viviri, ba tɛ Bɛnzwamɛn dwíí tə. Yá fən dàń zʋa ba zənzən, ba nə nɩ də, càn yí ba yɩrɩ. 42 Ba dàń pìí ba tì kasɔɔ lanworu cwəŋə tə, ba dəri sə ba jɛ́n Yɩzərayɛlə lɩ̀à tə yáá nə. Yá Yɩzərayɛlə kwatara púlə́ bələ tə dàń cɩ̀gà ba, ba kə titəŋi wa. Yá kwatara púlí tə yà nə naŋa tɩan tə con ba bɩ̀àn tə, dàń gʋa ba. 43 Ba cɩ̀gà Bɛnzwamɛn dwíí tə ba kə, ba pú ba kwa ba dɩŋɩ, ba ba zɩga ba sìí. Yá ba dàń tɩtaga ba wuuu, ba ja bà ba nan Gibeya yáá con, yɩɩ yipɩan con. 44 Bɛnzwamɛn dwíí tə wa bara mʋ̀rʋ̀ fugə də nana nə ba gʋa. Ba mama yà yɩ kwatara babɩran. 45 Ba duən yà pìí ba dəri, ba va kasɔɔ lanworu tə wa, Rimon pɩ̀ʋ̀ tə con. Yá Yɩzərayɛlə lɩ̀à tə dɩŋɩ ba wa lɩ̀à mʋ̀rʋ̀ bonu, ba ja ba gʋ coŋi tə yuu. Yɩzərayɛlə lɩ̀à tə púə́ ba gɩganɩ tə kwa, ba dɩŋɩ ba ja va ba yí Gidomə, yá ba gʋa ba lɩ̀à mʋ̀rʋ̀ bələ. 46 Bɛnzwamɛn dwíí tə wa lɩ̀à tə mama ba nə gʋa, kʋ dɩɩn tə nə, yɩn bara mʋ̀rʋ̀ sapʋa də bonu, ba nə ja kwatara sɩ̀ʋ́, ba tɛ kʋ̀ʋ̀. Ba mama yà yɩ kwatara babɩran. 47 Yá lɩ̀à tə wa, ba yà nə dəri ba va kasɔɔ lanworu tə wa, Rimon pɩ̀ʋ̀ tə con, bara biəyardʋ nə wànɩ́ ba jɛ́n. Bara təntə yɩn pɩ̀ʋ̀ tə yuu wa wuuu, cànɩ̀ banɩa. 48 Yɩzərayɛlə lɩ̀à tə dàń pìí ba bà Bɛnzwamɛn dwíí tə gɩganɩ tə nə. Ba twá Bɛnzwamɛn nagwanaa tɩan tə wa, ba gʋ lɩ̀à tə mama, də vàná tə mama, də won tə mama, ba nə nɩ, də kwatara sɩ̀ʋ́. Ba dɩga mən tɩan tə də mama nə, ba nə twá tə wa, ba kɛ̀ń.