Ba jon Bɛnzwamɛn dwíí tə, sə ba dàn ká tɩ, ba kwa
21
1 Yɩzərayɛlə lɩ̀à tə yà dùə̀ durə Misəpa nə, də ba lìù mama bá pa ʋ bʋ̀á, Bɛnzwamɛn dwíí lìù nə, sə ʋ ma fwa ʋ kan. 2 Lalʋʋ tə twi ba zɩgɩ Yɩɩ yáá con, Betɛlə nə, kʋ va kʋ yí didəni. Ba zɩ̀n ba kori yɩɩ nə, ba kwi zənzən. 3 Ba swɩ̀n, ba wʋ́: «Ba-Yígúrə́-Jə-Tiu, Yɩzərayɛlə Yɩɩ, bɛ̀ɛ̀ nə pɩn yoo kʋ tə ma tʋn Yɩzərayɛlə wa? Bɛ̀ɛ̀ nə pɩn Yɩzərayɛlə dwíí tə don ma mɛ, sə kʋ tɩ kʋ kwa, zə̀n kʋ tə?» 4 Kʋ tɩpʋrɩ nə, lalʋʋ tə zàn jɩjʋ fuən fuən, ba lwà Yɩɩ joŋi bwálɩ́ lá nə, ba ga fwa jwəŋə tə ba nə sʋ̀rɩ́*, də nimarʋ* jwəŋə, ba pa Yɩɩ nə. 5 Kʋ kwa nə, Yɩzərayɛlə lɩ̀à tə bwe duən, ba wʋ́: «Yɩzərayɛlə dwíə́ tə mama wa, wàà nə wà jə́rə́ tə wa yɩn, Ba-Yígúrə́-Jə-Tiu yáá con, Misəpa nə?» Cɩ́gá, ba yà dùə̀ də, ba wá gʋ lìù tə mama, ʋ nə vɩga sə ʋ bà Ba-Yígúrə́-Jə-Tiu yáá con, Misəpa nə. 6 Yɩzərayɛlə lɩ̀à tə pùə́ pìí ka cʋ̀gʋ̀ yoo tə yɩrɩ, ba nə tʋn Bɛnzwamɛn dwíí tə yɩra, ba nə yɩ ba nubɩa. Ba swɩ̀n, ba wʋ́: «Zə̀n kʋ tə, dwíí don pɩ̀à kʋ tɩ kʋ kwa, Yɩzərayɛlə dwíə́ tə wa. 7 Bɛ̀ɛ̀ nə nə wá fwa, sə bara tə nə ga tə wànɩ́ ba na kana? Cɩ́gá, nə dùə̀ də Ba-Yígúrə́-Jə-Tiu, də nə bá pa ba nə bwɩ̀ɩ́, sə ba ma fwa ba kana.» 8 Ba dàń bwe duən sə ba jə́n, də tɩʋ nə wulə kʋ lɩ̀à nə wà Ba-Yígúrə́-Jə-Tiu yáá con twi, Misəpa nə. Yá ba nɩ də, Galadə nagwanaa tə wa, Yabɛswə tíú nədʋ mama wà jə́rə́ tə wa yɩn, ba dəkuu bwálɩ́ tə nə. 9 Ba gàlɩ̀ lalʋʋ tə, yá ba nɩ də, Galadə nagwanaa tə wa, Yabɛswə tíú mama tə̀lə́ ba wa. 10 Lalʋʋ tə dàń kúrí babɩran mʋ̀rʋ̀ fugə də bələ, ba tʋn Yabɛswə nə. Ba pɩn ba nii, ba wʋ́: «Á vələ Galadə nagwanaa tə wa, á gʋ Yabɛswə tɩ̀án. Á gwɩa ba də ba kana, də ba bɩ̀á mama! 11 Nə̀ń nətʋ tə, á nə wá fwa: Á wá gʋ bara tə mama mɩ́ámɩ́án, də kana tə mama, ba nə yə̀ə́ bɛɛ.» 12 Yá ba dàń nɩ kacɩan biənɩa, Yabɛswə tɩ̀án tə wa, Galadə nagwanaa tə wa, ba nə yəri bɛɛ. Ba jɩn ba, ba bà dəkuu bwálɩ́ tə wa, Silo nə, Kanaan lʋʋ nii tə wa.13 Kʋ kwa nə, lalʋʋ tə mama tʋn lɩ̀à Bɛnzwamɛn dwíí lɩ̀à tə con, ba yà nə wulə Rimon pɩ̀ʋ̀ tə yuu wa, sə ba swɩ̀n ba con də kʋ̀ʋ̀ tə zwɛ̀, yá sìə́ dàń wulə ba pwə́rə́ wa. 14 Kʋ máŋá təntə wa, Bɛnzwamɛn dwíí lɩ̀à tə dàń pìí ba bà. Yɩzərayɛlə lɩ̀à tə pɩn ba kana tə, ba yà nə wà gwɩ Yabɛswə nə, Galadə nagwanaa tə wa. Yá kana tə dàń nə wà ba mɛ yí.
15 Yɩzərayɛlə lɩ̀à tə pùə́ pìí ka cʋ̀gʋ̀ yoo tə yɩrɩ, ba nə tʋn Bɛnzwamɛn dwíí tə yɩra. Cɩ́gá, Ba-Yígúrə́-Jə-Tiu yà tún bʋʋ Yɩzərayɛlə dwíə́ tə wa. 16 Lalʋʋ tə yáá tɩ̀án tə bwe duən, ba wʋ́: «Kan kʋ́ʋ̀ tə̀lə́ Bɛnzwamɛn dwíí tə wa mɩ́ámɩ́án! Nətə nə nə dàń wá fwa, sə lɩ̀à tə gɩganɩ tə, ba nə wà kana nɩ, wànɩ́ ba na kana?» 17 Ba swɩ̀n, ba súrí lá, ba wʋ́: «Bɛnzwamɛn dwíí lɩ̀à tə gɩganɩ tə mɛ sə ba tún dwíí, sə dwíí mama dàn ká tɩ kʋ kwa, Yɩzərayɛlə dwíə́ tə wa. 18 Yá nə dàń nə wàrɩ̀ ba nə bwɩ̀ɩ́ nə pɩn, sə ba ma fwa ba kana, durə tə yɩrɩ, nə nə dùə̀. Cɩ́gá, nə dùə̀ sə Yɩɩ yàlà lìù tə mama, ʋ nə wá pa ʋ bʋ̀á, Bɛnzwamɛn dwíí lìù nə, sə ʋ ma fwa ʋ kan.» 19 Yá ba lìí ba tɩ̀àn, də bɩnɩ mama, ba yàá də́ Ba-Yígúrə́-Jə-Tiu cànà, Silo nə. Silo yɩ kʋ wulə Betɛlə jɩzən saparʋ yuu, cwəŋə tə nə naŋa Betɛlə, ka vələ Siswɛmə, yɩɩ yipɩan con, Lebona jɩgwiə saparʋ yuu. 20 Ba dàń pɩn nii kʋ tə Bɛnzwamɛn dwíí tə nə, ba wʋ́: «Á vələ á səgə divɛn tɩ̀án tə wa. 21 Á wá ywàń, máŋá tə, á nə nɩ Silo tɩ̀án bwɩ̀ɩ́ tə, də ba nan sə ba sa ba sɩʋ tə, á wá wùrì á nan divɛn tɩ̀án tə wa, yá á lìù mama dàń wá ja kacɩɩn tə don, ʋ ja va Bɛnzwamɛn nagwanaa wa, ʋ ma fwa ʋ kan. 22 Ba nyɩna-ba, nə à yə̀ə́ ba nábwáná nə twi ba caga kʋ yɩrɩ, nə con, nə wá lòrì ba, sə ba taa nə yɩrɩ, ba yá. Cɩ́gá, nə wà wànɩ́ nə na kan, nə pa á lìù mama nə, kʋ̀ʋ̀ tə wa nə nə ta də Yabɛswə tɩ̀án. Yá kʋ nə tà Silo tɩ̀án tətə nə pɩn aba ba bwɩ̀ɩ́ tə pɩn, lìù mama bá swɩ̀n də, ba cʋ̀gʋ̀ culu.» 23 Mə nətʋ nə, Bɛnzwamɛn dwíí tə fwa. Ba jɩn kana bwɩ̀ɩ́ tə wa, ba nə nan sə ba sa, ba yí nətʋ tə, kʋ yà nə mɛ də ba. Ba ja ba ba va ba nagwanaa wa, yá ba dàń pìí ba lwà ba tɩan tə, ba jə̀ə́ tə wa. 24 Kʋ máŋá təntə wa, Yɩzərayɛlə lɩ̀à tə lìù mama dàń mɛ lá, ʋ pìí ʋ va ʋ dwíí wa, də ʋ sanii wa. Ba mɛ lá, ba lìù mama pìí ʋ va ʋ nagwanaa wa.
25 Kʋ máŋá tə wa, pɩ̀ʋ́ yà tə̀lə́ Yɩzərayɛlə wa. Yá lìù mama dàń yà tʋŋa kʋ tə, ʋ nə swə.