Rutə
Elimelɛkə də ʋ dìə̀ lɩ̀à vəli Mʋabə lʋʋ nii
1
1 Máŋá tə wa, lɩ̀à tə, ba nə bʋ̀rɩ̀ bʋra tə yà nə kəni yìə̀n cwəŋə nə, Yɩzərayɛlə nə, niən yɩn kʋ lʋʋ nii tə wa. Yá Bɛɛ don, ʋ nə yɩ Bɛtəleyɛməa tíú, Zwida nagwanaa tə wa, dàń nan, ʋ də ʋ kan, də ʋ bɩ̀á bələ, ba va, sə ba twá ba jə̀ń Mʋabə lʋʋ nii tə wa. 2 Bɛɛ tə yɩrɩ yà nə yɩ Elimelɛkə. Ʋ kan tə yɩrɩ nə Nowemi. Ʋ bɩ̀á bələ tə yɩra nə Malon, də Kiliyon. Ba yà yɩ Efərata dwíí, Bɛtəleyɛmə nə, Zwida nagwanaa tə wa. Ba vəli, ba twá ba jə̀ə́ Mʋabə lʋʋ nii tə wa. 3 Máŋá don wa, Nowemi barɩ Elimelɛkə twi ʋ tɩ. Yá kʋ dàń ga Nowemi, də ʋ bɩ̀á bələ tə. 4 Ʋ bɩ̀á tə swe Mʋabitə-ba bwɩ̀ɩ́. Bìú tə don kan yɩrɩ nə yɩ Orəpa, Ʋ don tə də kan yɩrɩ ga yɩ Rutə. Ba yɩn lʋʋ nii təntə wa, kʋ yí ndə bɩna fugə nə. 5 Yá máŋá don wa, Malon də Kiliyon də mɛ bələ kʋ́ʋ̀ tɩga. Kʋ dàń yà ga Nowemi cɩcɩ. Ʋ barɩ tə, də ʋ bɩ̀á bələ tə mɛ tɩga, ba yá wá.Nowemi də Rutə pìí ba va Bɛtəleyɛmə
6 Nowemi yà nə wulə Mʋabə lʋʋ nii tə wa, máŋá tə wa, ʋ nì də Ba-Yígúrə́-Jə-Tiu dəri ʋ mʋ̀ Ba-Yígúrə́-Jə-Tiu lɩ̀à tə yinəgə, ʋ ga pa ba wodiu. Nowemi dàń zàn, ʋ kə ʋ sírí, sə ʋ pìí ʋ va Zwida lʋʋ nii tə wa, ʋ də ʋ bikɩna tə. 7 Ʋ dàń nan bwálɩ́ tə wa, ʋ yà nə wulə, ʋ də ʋ bikɩna bələ tə pìí ba vələ Zwida lʋʋ nii wa.
8 Yá Nowemi dàń swɩ̀n ʋ bikɩna bələ tə con, ʋ wʋ́: «Á pìrə́! Á lìù mama pìí ʋ va ʋ nyɩna sàń. Ba-Yígúrə́-Jə-Tiu wá tʋn wʋywaŋʋ* á yɩra, ndə á nə tʋn zəni à də lɩ̀à tə yɩra, ba nə tɩga, nətʋ. 9 Ba-Yígúrə́-Jə-Tiu wá pa, á lìù mama ja sìə́ barɩ don dìə̀ wa.» Nowemi dàń pùrì ʋ bikɩna tə, ʋ kə ʋ nyʋnɩ nə, sə ba ga dʋgʋ duən. Yá ʋ bikɩna tə dàń lwə kori, ba wulə ba kwi. 10 Ʋ bikɩna tə swɩ̀n ʋ con, ba wʋ́: «Ɔn ɔn! Nə wá twá n nə, nə va n lʋʋ lɩ̀à tə con.» 11 Yá Nowemi swɩ̀n, ʋ wʋ́: «Á pìrə́, à bwɩ̀ɩ́ ba! Bɛ̀ɛ̀ nə pɩn, á pɩ̀à, sə á twá à nə? À kʋ́ʋ̀ wàá bɩ̀á à lɩrɩ, sə ba zàn, ba swe aba naaa? 12 Á pìrə́ á vìí, à bwɩ̀ɩ́ ba! Cɩ́gá, à kwɩn zənzən, à kʋ́ʋ̀ wàrɩ̀ barɩ, à nɩ. Yá də à nə swə à swɩ̀n də, à jə yala, də tɩtɩn kʋ tə nə, à wá na barɩ, à pìí à lɩrɩ bɩ̀á, 13 á wá wànɩ́ á dɩ̀àn, sə ba bori, ba swe aba naaa? Á dàń wá taa kʋ nətʋ yɩrɩ, á vɩ, sə á lìù mama swe bɛɛ don nə naaa? Ɔn ɔn, à bwɩ̀ɩ́-ba! À pucʋnɩ tə dáá zənzən, kʋ doni á nyiən tə. Cɩ́gá, kʋ yɩ à mʋ̀ nə nə, Ba-Yígúrə́-Jə-Tiu zɩga.» 14 Yá ʋ bikɩna tə kʋ́ʋ̀ lwə kori, ba wulə ba kwi. Orəpa mʋ̀ dàń pùrì ʋ barɩ nuu tə, ʋ kə ʋ nyʋnɩ nə, sə ʋ ga pìí ʋ vìí. Yá Rutə mʋ̀ vɩga, sə ʋ pìí ʋ yá Nowemi.
15 Nowemi ma swɩ̀n Rutə con, ʋ wʋ́: «Ywàń, n don tə nə, ʋ pìí ʋ vələ, ʋ lʋʋ lɩ̀à tə, də ʋ woŋwanan tə con. N də pìí, n pú ʋ kwa.» 16 Yá Rutə le, ʋ wʋ́:
«Dàn ká kalɩ nə,
sə à pìí, à ga yá mʋ́.
Cɩ́gá, bwálɩ́ tə, n nə wá va,
à də wá va lá.
Bwálɩ́ tə, n nə wá ya,
à də wá ya lá.
N lʋʋ lɩ̀à tə wá ya à də lɩ̀à,
yá n Yɩɩ tə wá ya à də Yɩɩ.
17 Bwálɩ́ tə, n nə wá tɩ,
à də wá tɩ lá,
yá mə lá nə, ba wá gùrì nə.
À dùə̀, sə Ba-Yígúrə́-Jə-Tiu cʋ̀gʋ̀ à yáá də à kwa,
də kʋ nə tà tɩan cɩcɩ nə pwɛ̀ nəba duən nə!»
18 Nowemi nə nɩ də, Rutə cɩ́gá kúrí ʋ tì, sə ʋ twá ʋ nə, ʋ yá wá, ʋ kʋ́ʋ̀ wà yoo mama ʋ con swɩ̀n.
19 Ba mɛ bələ dàń twá duən, ba va ba yí Bɛtəleyɛmə. Ba nə zʋa Bɛtəleyɛmə wa máŋá tə wa, ba jìgə̀ yogwarʋ, kʋ pa tɩʋ tə mama nə. Yá kana tə dàń bwe duən, ba wʋ́: «Cɩ́gá mama, Nowemi nə nətən?» 20 Yá Nowemi dàń swɩ̀n ba con, ʋ wʋ́: «Á kʋ́ʋ̀ dànà ká bon nə Nowemi.b Á dàń boŋə nə Mara.c Cɩ́gá, ʋ mʋ̀ Yɩɩ tə, ʋ nə wulə tə mɛ yuu wa*, ken nə pucʋnɩ wa. 21 À nan yəbə, à vìí, də wiən bʋ́rɩ́ nə. Yá Ba-Yígúrə́-Jə-Tiu pìí, ʋ ja nə ʋ bà də jɩkʋrɩkɛ. Bɛ nə pɩn, à ma boŋə nə Nowemi, yá Ba-Yígúrə́-Jə-Tiu ken yacara à nə? Yɩɩ tə, ʋ nə wulə tə mɛ yuu wa ken nə yinəgə wa.»
22 Mə kʋ zɩgɩ nətʋ, Nowemi ma pìí ʋ nan Mʋabə lʋʋ nii tə wa, ʋ bà, ʋ də ʋ bikɩnɩ Rutə, ʋ nə yɩ Mʋabə tíú. Ba yí Bɛtəleyɛmə, dipɛn mɩna yiri don dəru ka sinti máŋá wa.