Rutə gun mɩna Bʋazə kárá wa
2
1 Nowemi yà jə ʋ barɩ Elimelɛkə dwíí tíú don. Bɛɛ təntə yà yɩ jɩjə tíú, ʋ nə jə dun. Ʋ yɩrɩ nə yɩ Bʋazə. 2 Dɩɩn don nə, Rutə, ʋ nə yɩ Mʋabə tíú, swɩ̀n Nowemi con, ʋ wʋ́: «À lòrì cwəŋə, sə à va kárɩ́ tə wa. Dɩɩn don, kárá don tíú wá fwa pubwanʋ à yɩra, ʋ ga yá sə à ya ʋ kwa, à gun mɩna.» Nowemi le, ʋ wʋ́: «Vəli, à bʋ̀á.» 3 Rutə dàń vəli, ʋ zʋ kárá don wa, ʋ wulə tʋ̀tʋ̀nà tə kwa, ʋ guni mɩna tə. Rutə yuu yɩn ywánɩ́. Ʋ zə́n ʋ va ʋ tʋ Bʋazə, ʋ nə yɩ Elimelɛkə dwíí tíú, kárá nə. 4 Yá kʋ nə fwa mancɩn, Bʋazə nan Bɛtəleyɛmə, ʋ bà, ʋ kə tʋ̀tʋ̀nà tə lɛ̀. Ʋ jʋn ba, ʋ wʋ́: «Ba-Yígúrə́-Jə-Tiu wá ya də aba!» Ba le wá, ba wʋ́: «Ba-Yígúrə́-Jə-Tiu wá fwa zəni, n yɩra!» 5 Yá Bʋazə dàń bwe ʋ tʋ̀tʋ̀nà yáá tíú tə, ʋ wʋ́: «Kacɩn wà tə yɩ ʋ nan yìə̀n nə?» 6 Tʋ̀tʋ̀nà yáá tíú tə ma le, ʋ wʋ́: «Kʋ yɩ Mʋabə tɩ̀án bʋ̀á tə, ʋ nə twá Nowemi nə, ʋ nan Mʋabə lʋʋ nii tə wa, ʋ bà tə. 7 Ʋ twi ʋ lòrì cwəŋə, sə ʋ ya tʋ̀tʋ̀nà tə kwa, ʋ gun mɩna mɩswaran tə wa. Ʋ nə twi jɩjʋ tə mama, kʋ kori kʋ yí máŋá ka tə, ʋ zʋa sìlí tə wa, ʋ sìí mancɩn cɩcɩ.»8 Bʋazə dàń swɩ̀n Rutə con, ʋ wʋ́: «Cʋgʋ zəni, à bʋ̀á! Dàn ká va kárá don wa, n gun mɩna. Dàn ká nan, n yá kárá ka tə. Ya yəbə, də à tʋtʋnbwɩɩ tə. 9 Ywàń kárá tə, tʋ̀tʋ̀nà tə nə tʋŋa ka wa zəni, n ga pú kana tə kwa, ba nə dèrì mɩna tə. À pɩn nii à tʋ̀tʋ̀nà tə nə, sə ba dàń ká kə n con. Nanyʋnɩ nə jə mʋ́, sə n va n nyʋn nɩ́á tə, ba nə tan, ba kə kwàrɩ́ tə wa.» 10 Rutə dàń tʋa ʋ nadwana yuu, ʋ pú ʋ yáá tɩa, ʋ ga swɩ̀n Bʋazə con, ʋ wʋ́: «À mʋ̀ lìù tə, à nə yɩ vee, bɛ̀ɛ̀ nə pɩn, n ma fwa pubwanʋ kʋ tə yiri, à yɩra, n ga swə à yáá yoo?» 11 Bʋazə ma le, ʋ wʋ́: «Ba man zəni tə mama, n nə fwa, n barɩ nuu tə yɩra, n barɩ tə tɩan kwa nə, ba bɩrɩ nə. À yə̀ə́ də n nan n yá n nyɩna də n nuu, də n lʋʋ nii tə, ba nə lɩrɩ mʋ́ kʋ wa, n ga bà, sə n ya lɩ̀à duən con, n nə wà dí yáá, n yəni ba, fuən nə. 12 Ba-Yígúrə́-Jə-Tiu nə wá ŋwɩ́n n jɩŋɩ, kʋ tə yɩrɩ, n nə fwa. Ʋ mʋ̀ Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, n nə twi, n səgə ʋ vànà də̀ń, nə wá ŋwɩ́n n jɩŋɩ mama ʋ pa mʋ́.» 13 Yá Rutə dàń swɩ̀n, ʋ wʋ́: «N sʋ̀ràn tə zuri à mʋ̀, n tʋtʋnbʋa tə bɩcan, tə ga dàn à jɩɩn. Yá à ga wà n tʋtʋnbʋa tə don tətə yí. À dàń lòrì mʋ́, sə n tə fwa pubwanʋ à yɩra wuuu, à yuu-tiu.»
14 Wodiu diŋə máŋá nə yí, Bʋazə swɩ̀n Rutə con, ʋ wʋ́: «Bà n yí lá, sə nə də́ wodiu. Fʋ dipɛn tə, n ma kùlə̀ dəŋə tə.» Rutə dàń jə̀ń tʋ̀tʋ̀nà tə səpuni nə, yá Bʋazə lɩ wobɩa, ba nə kwàrɩ̀, ʋ pa wá. Ʋ dí wodiu tə, ʋ sú, ʋ ga ʋ tún. 15 Kʋ kwa nə, ʋ zàn, ʋ pìí ʋ va, sə ʋ gun mɩna tə. Yá Bʋazə dàń pɩn nii ʋ tʋ̀tʋ̀nà tə nə, ʋ wʋ́: «Á yágá, sə ʋ gun mɩswaran tə də pwə́rə́ wa. Á dànà ká fʋfʋlɩ wá. 16 Á sɩna, á van mɩna yun duən tətə mɩswaran tə wa, á lɩ, á dʋgʋ tɩa, sə ʋ bà, ʋ gun. Á nə dànà ká caga ʋ nii nə.»
17 Kʋ dɩɩn tə nə, Rutə gun mɩna tə Bʋazə kárá tə wa wuuu, kʋ va kʋ yí didəni nii. Yá ʋ dàń mà dipɛn mɩna yiri don tə, ʋ nə gun ʋ na tə, ʋ kə ʋ sú tiə. 18 Ʋ tì tə ʋ zɩn, ʋ ja pìí ʋ va sàń. Ʋ ja tə, ʋ va ʋ bɩrɩ ʋ barɩ nuu tə nə. Ʋ lɩ wodiu tə də, ʋ nə dí ʋ ga, ʋ pa wá. 19 Ʋ barɩ nuu tə bwe wá, ʋ wʋ́: «Yə̀n nə n gun mɩna tə, zə̀n kʋ tə? Wàà kárá wa nə, n vəli n tʋn? Yɩɩ wá fwa zəni lìù tə yɩra, ʋ nə jələ mʋ́, ndə lìù nə.» Yá Rutə dàń man lìù tə, ʋ nə tʋn ʋ con. Ʋ swɩ̀n, ʋ wʋ́: «Bɛɛ tə, à nə tʋn ʋ kárá wa zə̀n kʋ tə, yɩrɩ nə yɩ Bʋazə.» 20 Nowemi swɩ̀n ʋ bikɩnɩ tə con, ʋ wʋ́: «Ba-Yígúrə́-Jə-Tiu nə wá fwa wʋywaŋʋ* ʋ yɩra. Ʋ mʋ̀ Ba-Yígúrə́-Jə-Tiu, nə fwa pubwanʋ, ləzwənəŋən də tɩga mɛ yɩra, wuuu!» Nowemi tə swɩ̀n, ʋ súrí lá, ʋ wʋ́: «Bɛɛ təntə yɩ nə dwíí tíú. Ʋ yɩ lɩ̀à tə, ba nə mɛ, sə ba tì nəba, ba ywàń nə yuu nə, wa lìù.» 21 Yá Rutə, ʋ nə yɩ Mʋabə tíú, dàń swɩ̀n, ʋ wʋ́: «Bɛɛ tə swɩ̀n à con, sə à twá ʋ tʋ̀tʋ̀nà tə nə, à tʋn, sə ba kori ba ca ʋ wiən tə mama, ba zwɛ̀.» 22 Nowemi ma swɩ̀n ʋ bikɩnɩ Rutə con, ʋ wʋ́: «À bʋ̀á, kʋ ziən, sə n də n twá Bʋazə tʋtʋnbwɩɩ tə nə, n naŋa n tʋŋa. Dàn ká va kárá don wa, n pa lɩ̀à fʋfʋlɩ mʋ́.» 23 Rutə dàń twá Bʋazə tʋtʋnbwɩɩ tə kwá, ʋ gun mɩna tə wuuu, ba kori ba ca wiən, ba zwɛ̀. Ʋ barɩ nuu tə con nə, ʋ yà wulə.