Rutə 3

Nowemi saŋa Rutə nə, sə ʋ na barɩ

1 Dɩɩn don nə, Nowemi swɩ̀n Rutə con, ʋ wʋ́: «À bʋ̀á, à swə, sə à pɩ̀à barɩ dìə̀, à pa mʋ́, sə n wànɩ́, n ya pupwən lìù. 2 Ndə n nə yə̀ə́ kʋ nətʋ tə, Bʋazə tə, n nə twá ʋ tʋtʋnbwɩɩ nə, n tʋŋa tə, yɩ nə dwíí tíú. ʋ wá mà dipɛn mɩna yiri don tə, ʋ cə̀rì tʋa tə wa, tɩtɩn kʋ tə nə. 3 Sɩ́ʋ́n nə, n dàń zàn, n swɛ nɩ́á, n tùrì nʋga tə, ka lwán nə ywán, n ga zʋ n gànàn tə nə ziən, tə doni n gànàn tə mɛ. Kʋ kwa nə, n wá va tʋa tə wa. Yá n nə dàn ká pa, ʋ lwarɩ mʋ́, də ʋ tə wà wodiu dí, ʋ zwɛ̀, ʋ ga nyʋn divɛn. 4 Máŋá tə, ʋ nə tígə́, n wá mɩ̀àn, n na bwálɩ́ tə, ʋ nə tígə́. Kʋ kwa nə, n dàń wá va, n ja ʋ gansara tə, n súrí ʋ nɛɛ nə, n ga pə̀ń ʋ nɛɛ con. Yá máŋá tə, ʋ nə nɩ mʋ́, ʋ tətə dàń wá bɩrɩ mʋ́, kʋ tə, n nə mɛ, sə n fwa.» 5 Ʋ le Nowemi, ʋ wʋ́: «À wá fwa kʋ tə mama, n nə swɩ̀n à con.»

6 Rutə nan, ʋ va tʋa tə wa, yá ʋ tʋn yoo mama, kʋ twá ndə nətʋ tə nə, ʋ barɩ nuu tə nə bɩrɩ wá. 7 Bʋazə dí wodiu, ʋ nyʋn divɛn, ʋ pùə́ ga poli. Ʋ dàń vəli, ʋ tígə́ mɩbɩa púlí tə nii nə. Rutə dàń fwa bʋ̀àbʋ̀à, ʋ bà, ʋ súrí Bʋazə gansara tə, ʋ nɛɛ nə, ʋ ga mɛ ʋ nɛɛ con, ʋ tígə́. 8 Máŋá tə, tɩa nə man ka tara, Bʋazə viviri, də nə̀ń kan nə, ʋ tígə́ ʋ nɛɛ con. Ʋ zəzəgə, 9 ʋ ga bwe, ʋ wʋ́: «Kʋ yɩ wàà?» Rutə le, ʋ wʋ́: «Kʋ yɩ à mʋ́, n tʋtʋnbʋa Rutə. Tì nə, n ma fwa n kan! N nə yɩ à barɩ dwíí tíú tə yɩrɩ, n wàá nə n tì.» 10 Bʋazə swɩ̀n ʋ con, ʋ wʋ́: «À bʋ̀á, Ba-Yígúrə́-Jə-Tiu nə wá fwa zəni, n yɩra! N kʋ́ʋ̀ bɩrɩ də, n twá cɩ́gá nə, ndə kʋ nə mɛ nətʋ, n doni təntən nyiən tə. Cɩ́gá, n wà balandʋra pɩ̀à, ba nə swə ba yɩ jɩjə tɩ̀án, nə à yə̀ə́, zʋra. 11 Sɩ́ʋ́n nə, à bʋ̀á, dàn ká pa fən ja mʋ́. Kʋ tə mama, n nə wʋ́, à wá fwa kʋ, à pa mʋ́. Cɩ́gá, tɩʋ tə mama yə̀ə́, də n yɩ kan tə, n nə jə dun. 12 Sɩ́ʋ́n nə, kʋ yɩ cɩ́gá, à wá mʋ́ à tì, à ma fwa à kan. Yá n barɩ tə dwíí tíú don dàń nə wulə, ʋ də nə kʋ́ʋ̀ jə cwəŋə, ʋ doni nə, sə tì mʋ́, ʋ ma fwa ʋ kan. 13 N dàń pə̀ń yəbə, də tɩa pʋrɩ. Jwɩan jɩjʋ nə, kʋ nə ywán də wá, sə ʋ tì mʋ́, ʋ ma fwa ʋ kan, kʋ ziən. Ʋ mʋ̀ nə mɛ, sə ʋ tʋn kʋ. Yá kʋ dàń nə ba ywán də wá, sə ʋ tì mʋ́, ʋ ma fwa ʋ kadən kan, kʋ yɩ cɩ́gá, Ba-Yígúrə́-Jə-Tiu wulə! À mʋ̀ wá tì mʋ́, à ma fwa à kan. Pə̀ń də tɩa pʋrɩ.»

14 Rutə dàń pə̀ń Bʋazə nɛɛ con, tɩbɩlakʋnʋ bà kʋ yí. Ʋ zàn jɩjʋ fuən fuən, máŋá tə wa, lìù nə wàrɩ̀ ʋ don ʋ lwarɩ. Cɩ́gá, Bʋazə yà swɩ̀n ʋ waa con, ʋ wʋ́: «Lɩ̀à wà mɛ, sə ba yəni, də kan wà tə twi tʋa tə wa.» 15 Bʋazə swɩ̀n Rutə con, ʋ wʋ́: «Lɩ ganpəru tə, n nə bɩ́bárɩ́, n larɩ, n ga ja kʋ nə zəni.» Rutə ma lɩ kʋ, ʋ larɩ, ʋ ga jə kʋ nə zəni. Yá Bʋazə dàń man dipɛn mɩna yiri don zʋbəri yiə bardʋ ʋ kə kʋ wa, ʋ tì ʋ ma zɩn Rutə. Kʋ kwa nə, Bʋazə dàń zàn, ʋ zʋ tɩʋ tə wa. 16 Yá Rutə pìí ʋ bà ʋ barɩ nuu tə con. Ʋ bwe wá, ʋ wʋ́: «À bʋ̀á, nətə nə kʋ yɩn?» Rutə dàń man kʋ tə mama, bɛɛ tə nə fwa, ʋ pa wá, ʋ bɩrɩ Nowemi nə. 17 Ʋ swɩ̀n, ʋ wʋ́: «Ʋ mʋ̀ nə pɩn nə dipɛn mɩna yiri don zʋbəri yiə bardʋ tətə. Ʋ swɩ̀n à con, də kʋ wà mɛ, sə à pìí à bà n con, də jɩkʋrɩkɛ.» 18 Nowemi swɩ̀n Rutə con, ʋ wʋ́: «À bʋ̀á, jə̀ń yəbə sənbwen, kʋ jə vələ máŋá tə, n nə wá na yoo kʋ tə yuu. Cɩ́gá, bɛɛ wà tə bá ja sìə́, də ʋ nə wà yoo kʋ tə kwɛn, zə̀n mama.