Elimelɛkə tɩa tə yolu yoo
4
1 Kʋ kwa nə, Bʋazə vəli, ʋ jə̀ə́ tɩʋ tə mimii nə.a Kʋ máŋá tə wa, də nə̀ń Elimelɛkə dwíí tíú tə, Bʋazə nə swɩ̀n ʋ yoo, də ʋ mʋ̀ nə mɛ, sə ʋ tì Rutə, ʋ ma fwa ʋ kan tə nə, ʋ twi, sə ʋ kɛ̀ń. Bʋazə ma bon wá, ʋ wʋ́: «N mʋ̀ à yaŋwɩn, n mʋ̀ nə, à yà pɩ̀à. Bà jə̀ń yəbə!» Bɛɛ tə ma bà, ʋ jə̀ə́. 2 Kʋ kwa nə, Bʋazə bon tɩʋ tə tɩ̀án nəkwɩna fugə, ʋ swɩ̀n ba con, ʋ wʋ́: «Á jənə yəbə!» Ba ma bà, ba jə̀ə́. 3 Ba nə twi, ba jə̀ə́ tɩa máŋá tə wa, Bʋazə dàń swɩ̀n lìù tə, ʋ nə mɛ sə tì Rutə, ʋ ma fwa ʋ kan tə con, ʋ wʋ́: «N yə̀ə́ də Nowemi pìí ʋ nan Mʋabə lʋʋ nii, ʋ bà. Yá ʋ pɩ̀à sə ʋ yoli tɩa tə, ka yà nə yɩ nə nubiu Elimelɛkə nyiən. 4 Yá à nɩ də kʋ mɛ, sə à pa n lwarɩ kʋ nətʋ tə. Kʋ mʋ̀ nə pɩn, à swɩ̀n n con, sə n yə̀ tɩa tə n jon, lɩ̀à tə ba nə jə̀ə́ yəbə yáá con, də tɩʋ tə nəkwɩna tə yáá con. N nə wá yə̀ ka n jon, sə n yə̀ n jon. N kʋ́ʋ̀ nə bá yə̀ ka n jon, sə n swɩ̀n à con, sə à yəni. Cɩ́gá, n mʋ̀ nə yɩ təntən lìù, n nə mɛ, sə n yə̀ tɩa tə, n jon. Yá n mʋ̀ kwa nə, à mʋ̀ nə daa lá.» Bɛɛ tə ma swɩ̀n, ʋ wʋ́: «À wá yə̀ ka, à jon.» 5 Yá Bʋazə dàń swɩ̀n, ʋ wʋ́: «Də n nə yə̀ tɩa tə, n jon Nowemi con, kʋ bɩrɩ də n sɛ̀, sə n tì kadənu tə də, Rutə, ʋ nə yɩ Mʋabə tíú, ʋ ma fwa n kan. Kʋ nətʋ tə dàń wá pa, tɩgɩ tə jɩjə wiən tə ya dwíí tə, á nə wá tún, á pa wá, nyiən.» 6 Bɛɛ tə, ʋ nə mɛ, sə ʋ tì Rutə, ʋ ma fwa ʋ kan tə, nə nì kʋ nətʋ tə, ʋ dàń swɩ̀n, ʋ wʋ́: «Kʋ nə yɩ nətʋ mʋ̀, à wàrɩ̀ tɩa tə, à yə̀, à joŋə. À nə yə̀ ka, à jon, kʋ wàá də, à wá kwɩ̀n à tətə jɩjə tə nə. N dàń jon kʋ tə, à yà nə mɛ, sə à yə̀, à jon tə, n yə̀, n jon, n ja. Cɩ́gá, à wàrɩ̀ tɩa tə, à yə̀, à joŋə.»7 Fuən nə, Yɩzərayɛlə lɩ̀à yà jə yofwamɩʋn don, də ba nə yə̀ won, ba jon, nə à yə̀ə́, ba nə lárɩ́ wiən, nə à yə̀ə́, ba nə kwɛn yoo yiri mama. Sə kʋ ma bɩrɩ də, lɩ̀à tə, ba nə fwa kʋ nətʋ tə, ken duən yuu, ba wa lìù don yàá lɩ ʋ natɩrɩ, ʋ pa ʋ don tə nə. 8 Kʋ mʋ́ nə pɩn, bɛɛ tə, ʋ yà nə mɛ, sə ʋ tì Rutə, ʋ ma fwa ʋ kan tə, ma swɩ̀n Bʋazə con, sə ʋ yə̀ tɩa tə, ʋ jon, ʋ ja, yá ʋ ga lɩ ʋ natɩrɩ, ʋ pa Bʋazə nə.
Bʋazə tì Rutə, ʋ ma fwa ʋ kan
9 Kʋ kwa nə, Bʋazə dàń swɩ̀n nəkwɩna tə, də lalʋʋ tə mama con, ʋ wʋ́: «Á yɩ dansɩa lɩ̀à, zə̀n kʋ tə, də à yə̀ kʋ tə mama, kʋ yà nə yɩ Elimelɛkə nyiən, də kʋ tə mama, kʋ yà nə yɩ Kiliyon də Malon nyiən, à jon Nowemi con. 10 Kʋ tə nə súrí lá, à tì Rutə də, ʋ nə yɩ Mʋabə tíú, Malon kan tə, ʋ nə tɩga ʋ yá, à ma fwa à kan. Kʋ nətʋ dàń wá pa, tɩgɩ tə jɩjə wiən tə ya dwíí tə, nə nə wá tún, nə pa wá, nyiən. Yá tɩgɩ tə yɩrɩ kʋ́ʋ̀ bá jɛ́n, ʋ nuu bɩ̀á tə wa, də ʋ tɩʋ tə yìə̀n wa. Á yɩ dansɩa lɩ̀à, yoo təntə wa, zə̀n kʋ tə.» 11 Yá nəkwɩna tə, də lɩ̀à tə mama, ba yà nə wulə tɩʋ tə mimii nə, dàń swɩ̀n, ba wʋ́: «Nə sɛ̀, nə yɩ dansɩa lɩ̀à! Ba-Yígúrə́-Jə-Tiu wá fwa zəni kan tə yɩra, ʋ nə zwɩ n dìə̀ wa, sə ʋ ya ndə Raswɛlə də Leya nə. Ba bələ tə nə lɩrɩ Yɩzərayɛlə dwíí tə. Yɩɩ wá pa, n jɩjə pùlì Efərata dwíí tə wa, sə n jì ləzwənfarʋ Bɛtəleyɛmə wa! 12 Ba-Yígúrə́-Jə-Tiu wá pa dwíí tə, n də kacɩɩn wà tə nə wá lɩra, ya dánɩ́, ndə Zwida də Tamarə bìú Perɛsə dwíí tə nə.»
Davidə nɩbɛɛ Obɛdə lɩrʋ yoo
13 Mə kʋ zɩgɩ nətʋ, Bʋazə ma tì Rutə, ʋ ma fwa ʋ kan. Ba yəni duən, yá Ba-Yígúrə́-Jə-Tiu pɩn ʋ jə pùə́, ʋ lɩra bìú. 14 Yá Bɛtəleyɛmə tɩ̀án kana tə dàń swɩ̀n Nowemi con, ba wʋ́:
«Ba-Yígúrə́-Jə-Tiu mɛ də bʋra!
Ʋ pɩn mʋ́ nàʋ́, zə̀n kʋ tə,
ʋ nə wá ywàń n yuu.
Yɩɩ wá pa, ʋ bori,
ʋ jì ləzwənfarʋ Yɩzərayɛlə wa!
15 N bikɩnɩ tə swə mʋ́,
yá ʋ kʋ́kwà bɩ̀á barpɛ, n yáá con.
Ʋ lɩrɩ nàʋ́, ʋ pa mʋ́,
ʋ nə wá pìí, ʋ dàn n jɩɩn,
ʋ ga ywàń n yuu, n kazʋnɩ máŋá wa.
16 Nowemi dàń tì bisɩmaa tə, ʋ kə ʋ nyʋnɩ nə, yá ʋ mʋ̀ nə kʋ̀nɩ̀ wá. 17 Kana tə, ba nə yɩ Nowemi jənduən, swɩ̀n, ba wʋ́: «Ba lɩrɩ bìú, ba pa Nowemi nə.» Yá kana tə dàń pɩn yɩrɩ bìú tə nə, ba boŋə wá, Obɛdə. Obɛdə nə yɩ Yɩzayi nyɩna. Yɩzayi də nə yɩ Davidə nyɩna.