Təntən sagɩ tə
Samiyɛlə
nə pʋ́pʋ́nɩ́
Samiyɛlə nuu tə yoo
1
1 Bɛɛ don yà wulə Efərayimə dwíí tə wa, ʋ yɩrɩ nə yɩ Ɛləkana. Ʋ yà wulə tɩʋ tə nə, ba nə boŋə Rama. Kʋ tɩʋ təntə yɩ kʋ wulə Efərayimə pɛɛn nagwanaa tə wa. Ɛləkana yɩ Yerohamə bìú. Yerohamə də yɩ Elihu bìú. Elihu də yɩ Tohu bìú. Tohu də yɩ Sufə bìú. Sufə yɩ Efərayimə dwíí lìù. 2 Ɛləkana yà jə kana bələ. Ʋ kan tə don yɩrɩ nə yɩ Anə, ʋ don tə də yɩrɩ nə yɩ Penina. Penina yà lɩrɩ bɩ̀á, yá Anə ga wà bìú lɩrɩ.3 Bɩnɩ mama, Ɛləkana də ʋ dìə̀ lɩ̀à yàá nan ba tɩʋ Rama, ba va tɩʋ tə, ba nə boŋə Silo. Ba yàá va ba fwa joŋi lá nə, Yɩɩ wúlú gansili tə wa, ba ma jʋn Ba-Yígúrə́-Jə-Tiu, ʋ nə yɩ kwatara Yɩɩ. Eli bɩ̀á bələ tə yà nə yɩ Ba-Yígúrə́-Jə-Tiu joŋwana, lá nə. Eli bìá bələ təntə yà nə yɩ Ofəni də Fineyasə.
4 Dɩɩn tə Ɛləkana nə fwa joŋi tə, ʋ yàá tarɩ nàŋʋ́ tə, ʋ pa ʋ kan Penina, də ʋ bɩ̀á tə, də ʋ bwɩ̀ɩ́ tə mama nə. 5 Yá Ɛləkana dàń yàá pa tori nəzəŋu, Anə mʋ̀ nə. Cɩ́gá, Ɛləkana yà swə Anə, də Ba-Yígúrə́-Jə-Tiu nə pɩn, ʋ yɩ kadɩŋʋ tə mɛ. 6 Máŋá mama, Anə kadon tə yàá fʋfʋlɩ wá, ʋ pa ʋ lɩŋa zàn, Ba-Yígúrə́-Jə-Tiu nə pɩn, ʋ yɩ kadɩŋʋ tə yɩrɩ. 7 Yá bɩnɩ mama, mə kʋ yàá yɩ nətʋ. Máŋá mama, ba nə vəli Ba-Yígúrə́-Jə-Tiu wúlú gansili tə wa, Penina yàá fʋfʋlɩ Anə, ʋ pa ʋ lɩŋa zàn. Yá Anə dàń yàá kwi, ʋ ga vɩ, sə ʋ də́ wodiu. 8 Ʋ barɩ Ɛləkana yàá swɩ̀n ʋ con, ʋ wʋ́: «Anə, bɛ̀ɛ̀ nə pɩn n ma kwi, yá n ga ba wodiu də́? Bɛ̀ɛ̀ nə pɩn n pùə́ cʋ̀gʋ̀? Sonu tə, à nə jə à pa mʋ́, ba bɩ̀á fugə dwə naaa?»
Anə lòrì, sə Yɩɩ pa wá bìú
9-10 Dɩɩn don nə, máŋá tə ba nə dí wodiu ba zwɛ̀, Silo nə, Anə zàn, ʋ yá ʋ dìə̀ lɩ̀à tə, ʋ ga va ʋ zɩga Ba-Yígúrə́-Jə-Tiu wúlú gansili tə mimii nə. Ʋ pùə́ yà cʋ̀gʋ̀ zənzən. Yá ʋ dàń lòrì Yɩɩ də ʋ kwi. Kʋ máŋá tə wa, də Yɩɩ joŋwanʋ Eli yà jə̀ə́ gólí yuu, mimii tə nii nə. 11 Anə dàń poli nii, ʋ swɩ̀n, ʋ wʋ́: «Ba-Yígúrə́-Jə-Tiu, kwatara Yɩɩ, à yɩ n tʋtʋnbʋa! Ywàń à yinəgə nə mɛ nətʋ! À lòrì mʋ́, sə n bʋ́n à yoo, dàn ká swɛ̀ɛ́ à yoo! Də n nə bʋ́n à yoo, n ga pa nə bibɛɛ, à kàŋá nii, də à wá tì wá, à pa n mʋ̀ Ba-Yígúrə́-Jə-Tiu nə, sə ʋ ya n nyiən, ʋ tʋn ʋ pa mʋ́, ʋ lʋʋ wúlú mama wa. Yá yufɩna ba pàrɩ́ ʋ yuu mɩ́ámɩ́án.» 12 Anə jʋn Yɩɩ tə, ʋ nə yɩ Ba-Yígúrə́-Jə-Tiu, kʋ dán. Yá Eli dàń yà jə̀ə́ ʋ ywàŋá wá. 13 Anə yɩjʋnɩ tə yà yɩ ʋ jʋnɩ ʋ waa con. Ʋ nii yà súrí də kʋ pwí, yá ʋ kori ga ba naŋa. Kʋ pɩn, Eli yà bʋŋa, də kʋ yɩ sana nə jə wá. 14 Yá Eli dàń swɩ̀n Anə con, ʋ wʋ́: «Máŋá kwà wa nə, n sana tə wá nan n yɩ́á wa? Ja n sanyʋrɩ yìə̀n tə, n zàn, n pɩ̀à bwálɩ́.» 15 Yá Anə pìí ʋ le wá, ʋ wʋ́: «Ɔn ɔn, à yuu-tiu! À wà divɛn, nə à yə̀ə́ sabwarɩ sana nywɩn. Yá à dàń nə yɩ kan tə, pucʋnɩ nə wʋwalɩ nə, à bɩcan wa. Yá à pucʋnɩ tə nə, à tuŋə, à bɩrɩ Ba-Yígúrə́-Jə-Tiu nə. 16 Dàn ká bʋ́n də à yɩ kakʋkwɩʋn. Cɩ́gá, kʋ yɩ à pucʋnɩ tə nə dáá zənzən, kʋ ga yɩ̀ nə, à bɩcan wa. Kʋ mʋ̀ nə pɩn, à lòrì Ba-Yígúrə́-Jə-Tiu, kʋ dán kʋ mɛ nətən.» 17 Yá Eli dàń pìí ʋ swɩ̀n, ʋ wʋ́: «Vəli də bɩcan sìə́! Yá Yɩzərayɛlə Yɩɩ tə nə wá pa mʋ́, kʋ tə n nə lòrì ʋ con.» 18 Yá Anə swɩ̀n, Eli con, ʋ wʋ́: «Də n lɛ̀ɛ̀! N dàń pa, sə à na yuywaŋʋ n yáá con, máŋá mama.» Kʋ kwa nə, Anə kɛ̀ń ʋ yá Eli. Ʋ yáá yà kʋ́ʋ̀ tà, ndə ka dí yáá tə nə. Ʋ pùə́ dàń yà poli. Yá ʋ vəli ʋ də́ wodiu.
19 Kʋ tɩpʋrɩ nə, Ɛləkana də ʋ dìə̀ lɩ̀à tə zàn jɩjʋ fuən fuən, ba tʋ ba nadwana yuu, Ba-Yígúrə́-Jə-Tiu yáá con. Yá kʋ kwa nə, ba pìí ba va ba sàń, Rama nə.
Ɛləkana də ʋ kan Anə yəni duən, yá Ba-Yígúrə́-Jə-Tiu le Anə yɩjʋnɩ.
Samiyɛlə lɩrʋ yoo
20 Kʋ bɩnɩ təntə tətə wa, Anə jɩn pùə́, ʋ lɩra bibɛɛ, ʋ dɩ ʋ yɩrɩ Samiyɛlə. Cɩ́gá, ʋ yà pɩ̀à, sə ʋ twá kʋ nətʋ nə, ʋ ma swɩ̀n, ʋ wʋ́: «Ʋ yɩ à lòrì wá, Ba-Yígúrə́-Jə-Tiu con!» 21 Samiyɛlə lɩrʋ kwa nə, máŋá kʋ́ʋ̀ yí, sə Ɛləkana də ʋ dìə̀ lɩ̀à tə va Silo, ba fwa bɩnɩ mama joŋi tə, ba pa Ba-Yígúrə́-Jə-Tiu nə. Yá Ɛləkana yà pɩ̀à, sə ʋ kə lá ʋ fwa joŋi don də, nipoli yɩrɩ, kʋ nii nə súə́. 22 Yá Anə mʋ̀ wà twá ʋ va. Cɩ́gá, ʋ swɩ̀n ʋ barɩ tə con, ʋ wʋ́: «À wá dàn, máŋá tə à nə lɩ bisɩmaa tə yɩlɩ nə, sə à dàń ja wá à va à pa Ba-Yígúrə́-Jə-Tiu nə, Silo nə, sə ʋ ya ʋ nyiən. Yá ʋ dàń wá ya Ba-Yígúrə́-Jə-Tiu yáá con, máŋá mama wuuu.» 23 Ʋ barɩ Ɛləkana swɩ̀n ʋ con, ʋ wʋ́: «Kʋ nətʋ tə mɛ! Kʋ cɩ́gá ziən, sə n pìí, n ya sàń nə, kʋ ja vələ máŋá tə, n nə wá lɩ bisɩmaa tə yɩlɩ nə. Ba-Yígúrə́-Jə-Tiu nə wá san mʋ́, ʋ pa n nipoli tə nii sú!» Yá Anə dàń pìí, ʋ ya sàń nə, ʋ pa ʋ bìú tə ŋʋ̀à yɩlɩ wuuu, kʋ va kʋ yí máŋá tə, ʋ nə lɩ wá yɩlɩ nə. 24 Máŋá tə Anə nə lɩ Samiyɛlə yɩlɩ nə, ʋ dàń tì wá, ʋ ja va Ba-Yígúrə́-Jə-Tiu wúlú gansili tə wa, Silo nə. Anə də ʋ barɩ Ɛləkana jɩn nabɩa ka nə jə bɩna batwa,a ba gà mun, ba kə divɛn ba sú púrí nii, ba ja kə lá ba va. Kʋ máŋá tə wa, də Samiyɛlə yà tə yɩ bisɩmabarɩbiə. 25 Ba gʋa nabɩa tə, ba ma fwa joŋi, ba pa Yɩɩ nə. Kʋ kwa nə, ba jɩn Samiyɛlə, ba va Eli yáá con. 26 Anə swɩ̀n Eli con, ʋ wʋ́: «À yuu-tiu, à twi, sə à tún à nii n con. Kʋ yɩ cɩ́gá, n wulə*! À mʋ̀ nə yɩ kan tə, à bɩnɩ nə twi, à zɩgɩ n səpuni nə, à lòrì Ba-Yígúrə́-Jə-Tiu tə. 27 Bisɩmaa wà tə nə, à dɩɩn lòrì Ba-Yígúrə́-Jə-Tiu con, yá ʋ pɩn wá nə. 28 À də kʋ́ʋ̀ pìí à tì wá, à pɩn Ba-Yígúrə́-Jə-Tiu nə, sə ʋ ya ʋ nyiən, ʋ tʋn ʋ pa wá, ʋ lʋʋ wúlú mama wa.» Yá ba dàń tʋa ba nadwana yuu, Ba-Yígúrə́-Jə-Tiu yáá con, ba pa wá dun*.