Anə siən Yɩɩ
2
1 Kʋ kwa nə, Anə jʋn Yɩɩ, ʋ ga swɩ̀n, ʋ wʋ́:«Ba-Yígúrə́-Jə-Tiu pɩn à sú də pupwən.
Ba-Yígúrə́-Jə-Tiu zɩ̀n à yuu yɩɩ nə.
À də dàń wàá à dʋŋa, à mʋŋa.
Cɩ́gá, à wulə pupwən wa,
Ba-Yígúrə́-Jə-Tiu nə pɩn, à də́ dɩ̀àn yɩrɩ.
2 Lìù tə̀lə́, ʋ nə yɩ parɩ, ndə Ba-Yígúrə́-Jə-Tiu nə.
Yɩɩ don tə̀lə́, də kʋ nə tà Ba-Yígúrə́-Jə-Tiu.
Cɩ̀rʋ́ don tə̀lə́, ʋ nə nyən ndə nə Yɩɩ tə nə.
3 Á dànà ka swɩ̀n sʋ̀ràn buru buru,
tə nə yɩ fwìə́ sʋ̀ràn,
á ma zɩ̀n á tɩ̀àn yɩɩ nə.
Cɩ́gá, Ba-Yígúrə́-Jə-Tiu yɩ Yɩɩ tə,
ʋ nə yə̀ə́ yoo mama.
Yá ʋ mʋ̀ nə bʋ̀rɩ̀ ləzoni tʋtʋnɛɛ bʋra.
4 Ʋ pɩn kwatara babɩran twɛn kɛ́n,
yá labwana dàń lwàń ba jì ladɩra.
5 Lɩ̀à tə ba yà nə də́ ba swi ba fɩra,
dàń yɩ ba lòrì ba də́.
Yá lɩ̀à tə, niən yà nə jə ba, dàń nə də́ ba swi.
Kadɩŋʋ də tətə lɩrɩ nɛɛ barpɛ.
Yá kan tə, ʋ yà nə lɩrɩ bɩ̀á zənzən, dàń kwin.
6 Ba-Yígúrə́-Jə-Tiu nə pɩn mɩɩ,
ʋ mʋ̀ ga nə joŋə mɩɩ də.
Ʋ mʋ́ nə pɩn lɩ̀à vəli ciru*,
ʋ mʋ̀ ga nə pɩn lɩ̀à pìí ba naŋa ciru, ba twi.
7 Ba-Yígúrə́-Jə-Tiu nə pɩn lɩ̀à duən jì zʋra,
ʋ ga pɩn ba duən də jì jɩjə tɩ̀án.
Ʋ mʋ̀ nə muŋə lɩ̀à duən,
ʋ ga zɩ̀n ba duən də yɩɩ nə.
8 Ʋ mʋ̀ nə vaŋa labwana, ʋ zɩ̀n, ʋ zɩga yɩɩ nə,
ʋ ga vaŋa yinənyɩna, ʋ zɩn pùrí yuu.
Ʋ zɩ̀n ba, ʋ pɩn ba jəni dun bwálɩ́ nə,
yá ʋ dàń yàá pa ba, pàrɩ̀ tə, kʋ nə jə dun.
Cɩ́gá, Ba-Yígúrə́-Jə-Tiu nə tún lʋʋ tə dəkuu.
Ʋ mʋ̀ nə fwa lʋʋ tə.
9 Ʋ ywàŋá lɩ̀à tə yuu, ba nə zìlí ʋ nii,
yá wʋlʋnyɩna tə mʋ̀, wá tɩ yikunu wa.
Cɩ́gá, ləzwənə wàrɩ̀ dɩ̀àn ʋ də́, ʋ tɩ̀àn nə.
10 Ba-Yígúrə́-Jə-Tiu wá cʋ̀gʋ̀ lɩ̀à tə, ba nə vɩ ʋ nii.
Ʋ lɩŋa wá zàn ba yuu wa, ndə dwà nə baa lanworu wa, nətʋ.
Ba-Yígúrə́-Jə-Tiu nə wá bʋ̀rɩ̀ lɩ̀à tə mama bʋra, tɩa yuu mama wa.
Ʋ wá pa dɩ̀àn pɩ̀ʋ́ tə nə, ʋ nə tún,
yá pɩ̀ʋ́ tə, Yɩɩ nə kúrí*, wá na dun nəfarʋ.
11 Kʋ kwa nə, Ɛləkana də ʋ kan Anə dàń pìí ba va ba sàń, Rama nə, ba ga yá ba bìú Samiyɛlə Silo nə. Ba yá wá Yɩɩ joŋwanʋ Eli con, sə ʋ bɩrɩ wá Ba-Yígúrə́-Jə-Tiu tʋtʋŋɩ tə.
Eli bɩ̀á tə tʋtʋnkʋkwɩnan tə yoo
12 Eli bɩ̀á tə yà yɩ lɩ̀à tə, ba nə vɩga nii. Ba yáá yà tə̀lə́ də Ba-Yígúrə́-Jə-Tiu mɩ́ámɩ́án. 13 Eli bɩ̀á təntə yà yɩ Yɩɩ joŋwana. Yá də kʋ mɛ, nə̀ń yìə̀n tə, ba yà nə tʋŋa lɩ̀à yɩra. Máŋá mama, lìù nə twi ʋ fwa joŋi, ʋ nə san nàŋʋ́ tə, Eli bɩ̀á tə yàá tʋn ba tʋtʋnʋ nàŋʋ́ tə nə, də cɩnɩan danyunzɩan, ka cələ batwa. 14 Tʋtʋnʋ tə dàń yàá ja cɩnɩan danyunzɩan təntə, ʋ ma zwa nàŋʋ́ tə, kwarɩ tə wa, nə à yə̀ə́ nagwalʋ tə wa, nə à yə̀ə́ nəkənə tə wa, nə à yə̀ə́, nəvuə tə wa, kúrə́ tə yuu. Yá nandɔɔ tə mama, cɩnɩan danyunzɩan tə nə zuə ka ja nan, kʋ yɩ joŋwana tori. Mə nətʋ nə, ba yà tʋŋa Yɩzərayɛlə lɩ̀à tə mama yɩra, ba nə twi ba fwa joŋi Silo nə. 15 Kʋ tə nə dwə, Joŋwana tə tʋtʋnʋ tə yàá bà, də ba tə wà nàŋʋ́ tə yɩra nʋga tə tətə lɩ, sə ʋ pa ba sʋ̀rɩ́, ba pa Yɩɩ nə. Yá ʋ dàń yàá swɩ̀n lìù tə con, ʋ nə fwa joŋi tə, ʋ wʋ́: «Pa nə nàŋʋ́, sə à ja va, à pa joŋwanʋ tə nə, sə ʋ pa ba pʋ̀rɩ̀. Ʋ ba nàŋʋ́, kʋ nə san pɩ̀à. Nango nə, ʋ pɩ̀à.» 16 Yá joŋi tə tíú nə swɩ̀n, ʋ wʋ́: «Yá sə ba dí yáá, ba lɩ nàŋʋ́ tə yɩra nʋga tə, ba sʋ̀rɩ́, ba pa Yɩɩ nə. Kʋ kwa nə, n dàń wàá nandɔɔ tə, n nə pɩ̀à, n lɩ!» Tʋtʋnʋ tə yàá pìí ʋ le, ʋ wʋ́: «Ɔn ɔn! Pa kʋ nə, sɩ́ʋ́n sɩ́ʋ́n. Kʋ nə tà nətʋ, à wá jon kʋ də dɩ̀àn. 17 Mə nətʋ nə, Eli bɩ̀á tə yà tʋŋa cʋna nəfarʋ, Ba-Yígúrə́-Jə-Tiu yáá con. Cɩ́gá, ba yà ba jwəŋə tə, lɩ̀à tə nə fwa ba pɩn Ba-Yígúrə́-Jə-Tiu nə tə, zìlí.
Samiyɛlə sinti ʋ tʋŋa ʋ pɩn Yɩɩ nə
18 Samiyɛlə mʋ̀ yà yɩ bisɩmabarɩbiə, ʋ zwɩ Yɩɩ joŋwana gànʋ̀*, ʋ ma tʋŋa ʋ pɩn Ba-Yígúrə́-Jə-Tiu nə. 19 Bɩnɩ mama, ʋ nuu tə yàá nyan gànzwɩ́biə, ʋ ja bà ʋ pa wá, máŋá tə wa, ʋ də ʋ barɩ tə nə twi, sə ba fwa bɩnɩ mama joŋi tə. 20 Yá Eli dàń yàá lòrì, sə Yɩɩ fwa zəni Ɛləkana, də ʋ kan Anə yɩra. Ʋ yàá swɩ̀n, ʋ wʋ́: «Ba-Yígúrə́-Jə-Tiu wá pa, n kan wà tə lɩra bɩ̀á duən, ʋ pa mʋ́, bìú wà tə bʋʋ wa, á nə tì á pa, ʋ mʋ̀ Ba-Yígúrə́-Jə-Tiu nə.» Kʋ kwa nə, Ɛləkana də ʋ kan Anə yàá pìí ba va ba sàń. 21 Yá Ba-Yígúrə́-Jə-Tiu kʋ́ʋ̀ pɩn, Anə na yuywaŋʋ. Ʋ jɩn pwìí, ʋ lɩrɩ bɩ̀á duən. Bɩ̀á təntə yà yɩ bibara batwa də bikana bələ. Samiyɛlə mʋ̀, ʋ yà nə yɩ bisɩmabarɩbiə, dàń yà bori, ʋ tʋŋa ʋ pɩn Ba-Yígúrə́-Jə-Tiu nə.
Eli caga ʋ bɩ̀á tə nii nə
22 Yɩɩ joŋwanʋ Eli dàń yà kwɩn zənzən. Yá ʋ yà nə̀ń, də ba swɩ̀n yokʋkwɩnan tə yoo, ʋ bɩ̀á tə nə tʋŋa Yɩzərayɛlə lɩ̀à tə yɩra. Kʋ tə nə dwə, Eli ni də, ʋ bɩ̀á tə yàá pə̀ní kana tə, ba nə twi ba tʋŋa Yɩɩ wúlú gansili tə dəwoo tə wa. 23 Yá ʋ dàń swɩ̀n ʋ bɩ̀á tə con, ʋ wʋ́: «Bɛ̀ɛ̀ nə pɩn, á ma tʋŋa yìə̀n yiri tətə? Cɩ́gá, à nə̀ń lɩ̀à tə mama nə swɩ̀n á tʋtʋnkʋkwɩnan tə yoo. 24 Ɔn ɔn, à bɩ̀á ba, á wà mɛ, sə á tʋn tə yìə̀n təntə yiri! Kʋ tə à nə nə̀ń, də Ba-Yígúrə́-Jə-Tiu lɩ̀à tə swɩ̀n á yuu wa, lwara zənzən. 25 Ləzwənə nə tʋn lwanɩ ʋ don ləzwənə yɩra, Yɩɩ wá bʋ̀rɩ̀ kʋ tíú bʋra, ʋ jon wá lìù tə don tə jɩɩn wa. Yá lìù dàń nə tʋn cʋna Ba-Yígúrə́-Jə-Tiu yáá con, wàà nə wá lwɛ̀ kʋ tíú, ʋ jon Ba-Yígúrə́-Jə-Tiu jɩɩn wa? Yá ʋ bɩ̀á tə wà ʋ con tan, Ba-Yígúrə́-Jə-Tiu yà nə pɩ̀à, sə ʋ pa ba tɩ yɩrɩ. 26 Samiyɛlə mʋ̀, ʋ yà nə yɩ bisɩmabarɩbiə, dàń yà yɩ ʋ bori wuuu, ʋ yoo mama ga ziən Ba-Yígúrə́-Jə-Tiu yáá con, də ləzoni də yáá con.
Yɩɩ swɩ̀n Eli con də, ʋ wá cʋ̀gʋ̀ ʋ bɩ̀á tə
27 Dɩɩn don nə, Yɩɩ tʋtʋnʋ twi Eli con, ʋ swɩ̀n, ʋ wʋ́: «Nə̀ń kʋ tə Ba-Yígúrə́-Jə-Tiu nə swɩ̀n: “N yə̀ə́ də à pɩn n nyɩna-ba tə yəni nə, máŋá tə wa, ba yà nə wulə Ezwipətə nə, ba tʋŋa ba pɩn Farawon nə. 28 Yá Yɩzərayɛlə dwíə́ tə mama wa, n nibɛɛ Aron də ʋ dìə̀ tə nə, à kúrí, sə ba ya à joŋwana. Ba tʋtʋŋɩ nə yɩ, sə ba fwa jwəŋə à joŋi bwálɩ́ tə yuu, də ba sʋ̀rɩ́ wusinə, ba pɩn nə. Ba mʋ̀ nə mɛ, sə ba zʋ Yɩɩ joŋwana gànʋ̀* tə, ba ja twi à yáá con. Yá à tə pɩn cwəŋə n nyɩna tə, də ʋ dìə̀ tə nə, sə ba tì nandɛɛ jwəŋə tə mama wa, Yɩzərayɛlə lɩ̀à nə fwa ba sʋ̀rɩ́. 29 Bɛ̀ɛ̀ dàń nə pɩn, n də n bɩ̀á tə ma ba jwəŋə tə, də zìlə́ wiən tə, à nə pɩn nii, sə ba fwa à dìə̀ tə wa, zìlí? Bɛ̀ɛ̀ nə pɩn, Yɩzərayɛlə lɩ̀à tə nə fwa joŋi, ba pa nə, á yàá lɩ nàŋʋ́ tə, bwálá tə nə jə nʋga tə, á də́, á nwi? Kʋ nətʋ tə bɩrɩ də, n zìlí n bɩ̀á tə, n doni nə.” 30 Kʋ mʋ̀ yɩrɩ, nə̀ń kʋ tə Ba-Yígúrə́-Jə-Tiu tə, ʋ nə yɩ Yɩzərayɛlə lɩ̀à Yɩɩ, nə swɩ̀n: “À yà swɩ̀n də, n dìə̀ tə, də n nyɩna tə dìə̀ tə wá tʋn, á pa nə, máŋá mama, wuuu. Yá sɩ́ʋ́n nə, à dàń swɩ̀n də, kʋ kʋ́ʋ̀ bá ya nətʋ. Cɩ́gá, à zìlí lɩ̀à tə, ba nə zìlí nə. Yá cavɩra wá yí lɩ̀à tə, ba nə muŋə nə. 31 Yəni də máŋá bɩ̀àn, à nə wá pa, ba gʋ n də n nyɩna tə dìə̀ balandʋra tə mama. Yá kʋ nətʋ wá pa, bazʋnʋ mama kʋ́ʋ̀ bá ya n dìə̀ tə wa, mɩ́ámɩ́án. 32 À wá fwa zəni Yɩzərayɛlə lɩ̀à tə duən mama yɩra, yá pucʋnɩ nəfarʋ nə wá yí n mʋ̀, à dìə̀ tə wa. Bazʋnʋ kʋ́ʋ̀ bá ya n mʋ̀ dìə̀ tə wa, mɩ́ámɩ́án. 33 Yá də kʋ mɛ, à wá pa n dìə̀ lìù tə don mʋ̀ ya lʋʋ wa, sə ʋ ya à joŋi bwálɩ́ tə yáá con, ʋ tʋn ʋ pa nə. Yá kʋ nətʋ tə wʋgwɩʋ də kʋ yimən dàń wá ja mʋ́. Yá n dìə̀ lɩ̀à tə duən tə mʋ̀ mama, ba nə wá lɩra n dìə̀ tə wa, wá tɩ də ba tə yɩ balandʋra. 34 N bɩ̀á Ofəni də Fineyasə mɛ bələ wá tɩ, dɩɩn nədʋ. Yá kʋ mʋ̀ nə wá yà mɩmɩnʋ, kʋ bɩrɩ mʋ́, də à cɩ́gá wá tʋn kʋ tə, à nə swɩ̀n tə, à pa kʋ nii sú. 35 Kʋ kwa nə, à wá lɩ joŋwanʋ à tún, ʋ nə zìlí à nii, ʋ ga tʋŋa, kʋ twá à fɩra nə. À wá ywàń ʋ də, ʋ dìə̀ lɩ̀à yuu, sə ba ya pɩ̀ʋ́ tə, Yɩɩ nə kúrí*, yáá con, ba tʋn ba pa wá, máŋá mama wuuu. 36 Yá kʋ máŋá tə wa, lìù nə ga n dìə̀ tə wa, kʋ tíú wá bà ʋ tʋ ʋ nadwana yuu, joŋwanʋ təntə yáá con, ʋ lòrì səbilugu nədʋ də dipɛn kɩkaʋ. Ʋ wá swɩ̀n də, ʋ lòrì mʋ́, sə n kə wá Yɩɩ dìə̀ tə tʋtʋŋɩ don wa, sə ʋ wànɩ́ ʋ na ʋ nii wodiu.” »