Yɩɩ kúrí Samiyɛlə
3
1 Samiyɛlə yà yɩ bisɩmabarɩbiə, ʋ wulə Eli yáá con, ʋ tʋŋa ʋ pɩn Ba-Yígúrə́-Jə-Tiu nə. Kʋ máŋá tə wa, Ba-Yígúrə́-Jə-Tiu sʋgʋ yà kʋ́ʋ̀ ba yàgà. Yá ʋ ka twá nɩʋn də nə, ʋ ma bɩrɩ yoo, yà kʋ́ʋ̀ ba tʋŋa lala. 2 Tɩtɩn don nə, Eli yà tígə́ ʋ yipaa nə, ʋ dwɛ̀. Ʋ yɩ́á yà bwànɩ̀, tə kʋ́ʋ̀ ba na zəni. 3 Samiyɛlə də yà tígə́ Ba-Yígúrə́-Jə-Tiu dìə̀ tə wa, Yɩɩ nimarʋ culu daka tə yà nə wulə lá, ʋ dwɛ̀. Kʋ máŋá tə wa, də cànʋ́ tə, ba nə sʋ̀rɩ́ Yɩɩ dìə̀ tə wa, yà tə wà doŋi. 4 Yá Ba-Yígúrə́-Jə-Tiu dàń bon Samiyɛlə. Samiyɛlə ma sɛ̀, ʋ wʋ́: «Nə̀ń nə!» 5 Yá Samiyɛlə dàń zàn, ʋ dəri ʋ va Eli con, ʋ swɩ̀n, ʋ wʋ́: «À nì də n bon nə! Nə̀ń nə, à twi!» Eli le, ʋ wʋ́: «À wà mʋ́ bon. Pìí n va, n pə̀ń n bwálɩ́ nə.» Yá Samiyɛlə dàń pìí, ʋ va, ʋ tígə́. 6 Ba-Yígúrə́-Jə-Tiu kʋ́ʋ̀ bon Samiyɛlə, nɛɛ bələ nii nə. Yá Samiyɛlə kʋ́ʋ̀ zàn, ʋ va Eli con, ʋ swɩ̀n, ʋ wʋ́: «À nì də n bon nə! Nə̀ń nə, à twi!» Eli kʋ́ʋ̀ le, ʋ wʋ́: «À bìú, à wà mʋ́ bon. Pìí n va, n pə̀ń n bwálɩ́ nə.» 7 Kʋ máŋá tə wa, də Samiyɛlə yà tə yəri Ba-Yígúrə́-Jə-Tiu. Ba-Yígúrə́-Jə-Tiu yà tə wà dí yáá, ʋ swɩ̀n ʋ con, mɩ́ámɩ́án.8 Ba-Yígúrə́-Jə-Tiu kʋ́ʋ̀ bon Samiyɛlə, nɛɛ batwa nii nə. Yá Samiyɛlə kʋ́ʋ̀ zàn, ʋ va Eli con, ʋ swɩ̀n, ʋ wʋ́: «À nì də n bon nə! Nə̀ń nə, à twi!» Eli dàń lwarɩ, də kʋ yɩ Ba-Yígúrə́-Jə-Tiu nə boŋə bisɩmabarɩbiə tə. 9 Eli dàń swɩ̀n Samiyɛlə con, ʋ wʋ́: «Vəli n pə̀ń n bwálɩ́ nə. Yá n nə pìí n nì boŋə tə, sə n le, n wʋ́: “Swɩ̀n kʋ tə nə wulə, Ba-Yígúrə́-Jə-Tiu. N tʋtʋnʋ tə cʋga mʋ́.” » Samiyɛlə ma kʋ́ʋ̀ pìí ʋ va, ʋ tígə́ ʋ bwálɩ́ nə.
10 Ba-Yígúrə́-Jə-Tiu kʋ́ʋ̀ twi Samiyɛlə con, ʋ ga bon wá, ndə ʋ nə dí yáá, ʋ bon wá nətʋ, ʋ wʋ́: «Samiyɛlə, Samiyɛlə!» Yá Samiyɛlə dàń le, ʋ wʋ́: «Swɩ̀n kʋ tə nə wulə, Ba-Yígúrə́-Jə-Tiu. N tʋtʋnʋ tə cʋga mʋ́.»
11 Ba-Yígúrə́-Jə-Tiu dàń swɩ̀n Samiyɛlə con, ʋ wʋ́: «Nə̀ń, à wá tʋn yoo Yɩzərayɛlə wa, kʋ nə wá pa lìù mama yuu didigi, də kʋ tíú nə nì kʋ. 12 Kʋ dɩɩn nə yí, à wá pa pucʋnɩ tə mama, à nə dí yáá, à swɩ̀n tə yoo Eli con, tʋ ʋ də ʋ dìə̀ lɩ̀à tə yuu wa. À wá tʋn tə mama, à pa tə nii sú. À bá swɛ̀ɛ́ yoo nədʋ tətə swɩa. 13 À dí yáá, à swɩ̀n ʋ con, də à wá bʋ̀rɩ̀ ʋ dìə̀ lɩ̀à bʋra, à ga cʋ̀gʋ̀ ba, máŋá mama wuuu, yolwan tə yɩrɩ, ʋ nə yə̀ə́ kʋ nii nə. Cɩ́gá, ʋ bɩ̀á tə mun nə, yá ʋ ga wà ba nii nə caga. 14 Kʋ mʋ̀ nə pɩn, à dù à ga swɩ̀n Eli dìə̀ tə con, də joŋi, nə à yə̀ə́, zìlə́ won yiri mama wàrɩ̀, ʋ dìə̀ yolwan tə, kʋ kwɛn kʋ lɩ.»
15 Kʋ kwa nə, Samiyɛlə pə̀ń wuuu, tɩa pʋrɩ. Yá ʋ dàń zàn jɩjʋ nə, ʋ súrí Yɩɩ dìə̀ tə mimien. Fən yà jə Samiyɛlə, sə ʋ swɩ̀n yoo tə, Ba-Yígúrə́-Jə-Tiu nə swɩ̀n ʋ con nɩʋn tə wa, ʋ bɩrɩ Eli nə. 16 Eli dàń ma bon Samiyɛlə, ʋ wʋ́: «À bìú Samiyɛlə!» Samiyɛlə ma le, ʋ wʋ́: «À nyɩna, nə̀ń nə!» 17 Eli dàń bwe Samiyɛlə, ʋ wʋ́: «Bɛ̀ɛ̀ sʋgʋ nə Ba-Yígúrə́-Jə-Tiu swɩ̀n n con? Dàn ká səgə nə yoo mama. N nə səgə nə yoo, sʋgʋ tə mama wa, Yɩɩ nə swɩ̀n n con, sə Yɩɩ cʋ̀gʋ̀ n yáá də n kwa*! 18 Samiyɛlə dàń swɩ̀n sʋ̀ràn tə mama, Ba-Yígúrə́-Jə-Tiu nə swɩ̀n ʋ con, ʋ bɩrɩ Eli nə. Ʋ wà wá yoo mama səgə. Yá Eli swɩ̀n, ʋ wʋ́: «Ʋ mʋ̀ nə yɩ Ba-Yígúrə́-Jə-Tiu! Ʋ tʋn kʋ tə nə ywán də wá!»
19 Samiyɛlə bori ʋ súrí lá, Ba-Yígúrə́-Jə-Tiu də ga wulə də wá. Yá Samiyɛlə wà Yɩɩ nii sʋgʋ nədʋ tətə swɩ̀n, kʋ nii nə wà swí. 20 Kʋ nə zɩgɩ Dan nagwanaa tə nə, kʋ va kʋ nan Bɛrəsweba nə, Yɩzərayɛlə lɩ̀à tə mama yà lwarɩ, də Ba-Yígúrə́-Jə-Tiu, lɩ Samiyɛlə ʋ tún, sə ʋ ya ʋ nii sʋ̀sʋ̀nʋ̀. 21 Ba-Yígúrə́-Jə-Tiu yà tə twi Silo. Cɩ́gá, Ba-Yígúrə́-Jə-Tiu yà bɩrɩ ʋ tɩ̀àn Samiyɛlə nə, Silo nə, kʋ twá də ʋ sʋgʋ tə.