1 Samiyɛlə 4

1 Samiyɛlə dàń yà swɩ̀n Yɩɩ sʋ̀ràn tə, Yɩzərayɛlə lɩ̀à tə mama con.

Dʋŋa jon Yɩɩ nimarʋ culu daka tə

Dɩɩn don nə, Yɩzərayɛlə lɩ̀à tə nan, ba va ba jəri Filisi tɩ̀án tə, sə ba də ba ta duən. Ba vəli ba kun Ebɛn-Ezɛrə nə, Filisi tɩ̀án tə də ga kun Afɛkə nə. 2 Filisi tɩ̀án tə dàń tanɩ ba zɩga, sə ba ta Yɩzərayɛlə lɩ̀à tə. Kʋ̀ʋ̀ tə twi kʋ nyɩ́ kʋ zàn. Filisi tɩ̀án tə ta Yɩzərayɛlə lɩ̀à tə ba də́, ba gʋ ba lɩ̀à ndə mʋ̀rʋ̀ banɩa nə, kʋ̀ʋ̀ tə bwálɩ́ nə. 3 Yɩzərayɛlə lɩ̀à tə ba nə dəri ba jɛ́n kʋ̀ʋ̀ tə wa, pìí ba bà sàń. Ba nəkwɩna tə dàń ma swɩ̀n, ba wʋ́: «Bɛ̀ɛ̀ nə pɩn Ba-Yígúrə́-Jə-Tiu ma yá nəba ʋ pa Filisi tɩ̀án tə ta nəba ba də́, zə̀n kʋ tə? Nə vələ Silo, nə tì Ba-Yígúrə́-Jə-Tiu nimarʋ culu daka tə, nə ja bà nə titəŋi wa. Ka wá jon nəba, nə dʋŋa tə jɩɩn wa. 4 Yɩzərayɛlə lɩ̀à tə dàń ma tʋn lɩ̀à Silo nə. Lɩ̀à təntə vəli ba tì Ba-Yígúrə́-Jə-Tiu, ʋ nə yɩ kwatara Yɩɩ, ʋ ga saa malɩkɛ nyɩnyɩga titəŋi wa, nimarʋ culu daka tə, ba ja bà. Eli bɩ̀á bələ tə, Ofəni də Fineyasə yà twi də Yɩɩ nimarʋ culu daka tə. 5 Máŋá tə, Ba-Yígúrə́-Jə-Tiu nimarʋ daka tə nə twi, Yɩzərayɛlə lɩ̀à kwatara sàń tə wa, ba mama mà cə̀rí, ba kə yɩɩ nə də pupwən, tɩa ga zizigi.

6 Filisi tɩ̀án tə nì zùzùgù təntə, ba ga swɩ̀n, ba wʋ́: «Zùzùgù nəfarʋ kʋ tə də̀ń nə yɩ bɛ̀ɛ̀, kʋ nə naŋa Ebərə-ba kwatara sàń con?» Ba dàń twi ba lwarɩ, də Ba-Yígúrə́-Jə-Tiu nimarʋ culu daka tə nə ba ja bà, Ebərə-ba con. 7 Yá fən dàń zʋa Filisi tɩ̀án tə, ba yà nə bʋŋa də Yɩɩ twi Ebərə-ba titəŋi wa yɩrɩ. Ba swɩ̀n duən con, ba wʋ́: «Kʋ yɩ lɛɛ nə yí nəba. Cɩ́gá, yoo kʋ tə yiri tə wà tʋn, də kʋ nə tà zə̀n kʋ tə. 8 Kʋ yɩ lɛɛ nə yí nəba. Wàà nə wá jon nəba Yɩɩ təntə, ʋ nə jə dɩ̀àn zənzən jɩɩn wa? Mə Yɩɩ təntə nə ken càn yirə yirə, Ezwipətə tɩ̀án nə, kasɔɔ lanworu tə wa. 9 Á mʋ̀ Filisi tɩ̀án tə, á daŋa á jɩ̀àn, sə á bɩrɩ də á yɩ bara. Kʋ nə tà nətʋ, á də kʋ́ʋ̀ wá jì Ebərə-ba ywə́ŋə́, ndə ba nə yɩn á ywə́ŋə́ nətʋ. Á dàń pɩan nə ta ba də barɩ!» 10 Filisi tɩ̀án tə nə kʋ́ʋ̀ zɩn kʋ̀ʋ̀ tə, ba kʋ́ʋ̀ ta Yɩzərayɛlə lɩ̀à tə ba də́. Ba lìù mama dəri, ʋ va ʋ zʋ ʋ gansili wa. Filisi tɩ̀án tə ta Yɩzərayɛlə lɩ̀à tə ba də́ zənzən. Ba gʋa ba wa lɩ̀à, ba nə vəli də nɛɛ, lɩ̀à mʋ̀rʋ̀ fitwa. 11 Filisi tɩ̀án tə jon Yɩɩ nimarʋ culu daka tə Yɩzərayɛlə lɩ̀à tə con, ba ga gʋ Eli bɩ̀á bələ tə, ba nə yɩ Ofəni də Fineyasə.

Eli tɩan yoo

12 Bɛnzwamɛn dwíí tə wa, bɛɛ don nan kʋ̀ʋ̀ tə bwálɩ́ nə, ʋ dəri ʋ bà Silo kʋ dɩɩn tətə nə. Ʋ gànàn mama yà kàrɩ́, ʋ yuu ga sú də pùrə́n. 13 Bɛɛ tə nə twi ʋ yí lá máŋá tə wa, də nə̀ń Eli nə, ʋ nan, ʋ jə̀ə́ gólí yuu, cwəŋə tə nii nə, ʋ ma dànɩ̀. Cɩ́gá, Yɩɩ nimarʋ culu daka tə yoo yà jə wá, kʋ pa ʋ bɩcan dɩŋɩ. Bɛɛ tə nə twi ʋ zʋ tɩʋ tə wa, ʋ swɩ̀n kʋ tə nə tʋn kʋ̀ʋ̀ tə bwálɩ́ nə, ʋ bɩrɩ ba. Yá tɩʋ tə lɩ̀à tə mama, dàń yigu bubwiə ba kə. 14 Eli nə nì bubwiə təntə, ʋ bwe, ʋ wʋ́: «Bɛ̀ɛ̀ nə yɩ zizigu kʋ tə nətən?» Bɛɛ tə dàń dəri lala ʋ bà, ʋ swɩ̀n yoo tə nə tʋn kʋ̀ʋ̀ tə bwálí nə, ʋ bɩrɩ Eli. 15 Kʋ máŋá tə wa, də Eli yà kwɩn, ʋ jə bɩna sapwɩnɩa də fugə də nana. Ʋ yɩ́á dàń yà yɩ tə cəə lá, yá tə kʋ́ʋ̀ wàrɩ̀ won tə nɩ. 16 Bɛɛ tə swɩ̀n Eli con, ʋ wʋ́: «Mə à dàń nə zə́n à naŋa kʋ̀ʋ̀ tə bwálɩ́ nə à bɩ̀àn. Zə̀n tətə nə à nan lá, à dəri, à bà à yí yəbə.» Eli bwe wá, ʋ wʋ́: «À bìú, kʋ yɩn nətə?» 17 Bɛɛ tə ʋ nə jə yoo tə ʋ bà, sə ʋ swɩ̀n tə, le ʋ wʋ́: «Yɩzərayɛlə lɩ̀à dəri Filisi tɩ̀án tə yáá nə. Yá Filisi tɩ̀án tə gʋa Yɩzərayɛlə lɩ̀à zənzən. N bɩ̀á bələ tə tətə, Ofəni də Fineyasə mɛ tɩga. Yá Filisi tɩ̀án tə jon Yɩɩ nimarʋ culu daka tə. 18 Bɛɛ tə nə zə́n ʋ za Yɩɩ nimarʋ culu daka tə yɩrɩ, də Eli nan ʋ gólí tə yuu, ʋ tʋ ʋ kwa yàrà, mimii tə vàn nə. Ʋ tʋa ʋ kɛ́n ʋ bɩan, ʋ ga tɩ. Cɩ́gá, ʋ yà yɩ bazʋnʋ, ʋ ga du zənzən. Ʋ yɩn lìù tə, ʋ nə bʋ̀rɩ̀ bʋra Yɩzərayɛlə wa, bɩna sapwɩlə.

19 Ʋ bìú Fineyasə kan yà jə pùə́ ka lʋ̀rʋ́ nə yí. Kan tə nə nì də ba jon Yɩɩ nimarʋ culu daka tə, ʋ ga nì də ʋ barɩ nyɩna tə, də ʋ barɩ tə də tɩga, ʋ kwá tɩa, ʋ ga lɩra ʋ pùə́ tə. Cɩ́gá, pùə́ tə yɩŋa tə dɩ̀gà ʋ yuu. 20 Kʋ kwa nə, máŋá tə ʋ wulə ʋ tɩ, kana tə, ba nə wulə ʋ nii nə, swɩ̀n ʋ con, ba wʋ́: «Dàn ká pa fən ja mʋ́, n lɩrɩ bìú!» Yá kan tə wà ba le, ʋ ga wà ba cʋgʋ. 21 Ʋ dɩga bɩsɩma tə yɩrɩ Yɩkabɔdə. Kʋ də̀ń nə yɩ, «Yɩɩ dun vìí!» Ʋ swɩ̀n kʋ nətʋ tə, Filisi tɩ̀án tə nə jon Yɩɩ nimarʋ culu daka tə, kʋ súrí ʋ barɩ nyɩna tə, də ʋ barɩ tə tɩan tə yɩrɩ. 22 Ʋ swɩ̀n, ʋ wʋ́: «Yɩɩ dun vìí Yɩzərayɛlə wa, dʋŋa nə jon Yɩɩ nimarʋ culu daka tə, yɩrɩ.»