Yɩɩ nimarʋ culu daka tə wulə Filisi tɩ̀án con
5
1 Filisi tɩ̀án tə jon Yɩɩ nimarʋ culu daka tə, ba ja nan Ebɛn-Ezɛrə, ba va Aswədɔdə. 2 Ba ja Yɩɩ nimarʋ culu daka tə, ba zʋ ba woŋwanʋ dìə̀, kʋ yɩrɩ nə yɩ Dagon. Ba tún Yɩɩ nimarʋ culu daka tə Dagon səpuni nə. 3 Kʋ tɩpʋrɩ nə, Aswədɔdə tɩ̀án zàn jɩjʋ fuən fuən, də nə̀ń Dagon nə, kʋ tʋa kʋ yáá pú tɩa, Ba-Yígúrə́-Jə-Tiu nimarʋ culu daka tə yáá con. Ba jɩn Dagon ba zɩ̀n, ba zɩgɩ kʋ bwálɩ́ nə. 4 Kʋ tɩpʋrɩ nə, ba kʋ́ʋ̀ zàn jɩjʋ fuən fuən, də nə̀ń Dagon nə, kʋ tʋa kʋ yáá pú tɩa, Ba-Yígúrə́-Jə-Tiu nimarʋ culu daka tə yáá con. Dagon yuu də kʋ jɩ̀àn bələ tə mɛ goŋi, tə tʋ dìə̀ tə mimii wa. Kʋ titəŋi tə cɩcɩ dàń yà nə ga. 5 Kʋ mʋ̀ nə pɩn, də zə̀n mama, Dagon joŋwana tə, də lɩ̀à tə mama, ba nə zwɩ Dagon dìə̀ tə wa Aswədɔdə nə, ba ba naa mimii tə wa nɩŋɩ.6 Ba-Yígúrə́-Jə-Tiu ken càn Aswədɔdə tɩ̀án nə, zənzən. Ʋ dɩga ŋʋna Aswədɔdə tɩ̀án, də kʋ tɩbii tə lɩ̀à tə nə. Ʋ pɩn fən zʋ ba zənzən. 7 Aswədɔdə tɩ̀án nə nɩ də kʋ yɩ nətʋ, ba swɩ̀n, ba wʋ́: «Yɩzərayɛlə lɩ̀à Yɩɩ nimarʋ culu daka tə bá ya nə con. Cɩ́gá, ʋ ken càn nə mʋ̀ də nə yɩɩ Dagon nə, zənzən.»
8 Aswədɔdə tɩ̀án dàń pɩn, ba bon Filisi yun tɩ̀án tə mama, ba bà, ba kun duən nə, ba con. Ba dàń bwe, ba wʋ́: «Bɛ̀ɛ̀ nə, nə wá fwa, də Yɩzərayɛlə lɩ̀à Yɩɩ nimarʋ culu daka tə?» Filisi Pabɩa tə le, ba wʋ́: «Á pɩan ba ja Yɩzərayɛlə lɩ̀à Yɩɩ nimarʋ culu daka tə, ba va Gatə.» Yá ba dàń tì Yɩzərayɛlə lɩ̀à Yɩɩ nimarʋ culu daka tə, ba ja va Gatə. 9 Yá ba nə ja Yɩɩ nimarʋ culu daka tə, ba yí Gatə kwa nə, Ba-Yígúrə́-Jə-Tiu ken càn Gatə tɩ̀án də nə, zənzən. Ʋ dɩga ŋʋna Gatə tɩ̀án nə, kʋ nə zɩgɩ ba bɩsɩna, kʋ va kʋ yí ba nəkwɩna. Ba-Yígúrə́-Jə-Tiu pɩn fən zʋ ba zənzən. 10 Filisi tɩ̀án tə kʋ́ʋ̀ pɩn, ba tì Yɩɩ nimarʋ culu daka tə, ba ja va Ekəron. Máŋá tə, ba nə ja ka ba zʋ Ekəron wa, Ekəron tɩ̀án mà bubwiə ba wʋ́: «Ba ja Yɩzərayɛlə lɩ̀à Yɩɩ nimarʋ culu daka tə, ba bà nə con, sə ka gʋ nə də nə tɩʋ lɩ̀à tə.» 11 Yá Ekəron tɩ̀án də kʋ́ʋ̀ pɩn, ba bon Filisi yun tɩ̀án tə mama, ba bà, ba kun duən nə. Ekəron tɩ̀án tə dàń swɩ̀n, ba wʋ́: «Á pɩan Yɩzərayɛlə lɩ̀à Yɩɩ nimarʋ culu daka tə pìí ka va, ka pə̀ń ka bwálɩ́ nə, ka dàn ká gʋ nə də nə tɩʋ lɩ̀à tə. Cɩ́gá, lɩ̀à tɩ tɩan, tə jə fən zənzən tɩʋ tə wa. Yɩɩ ken càn ba nə, zənzən. 12 Lɩ̀à tə ba nə wà tɩ, kʋ yɩ ŋʋna yà nə jə ba. Yá lɩ̀à tə bubwiə dàń ya dɩ̀ yɩɩ nə.