1 Samiyɛlə 6

Filisi tɩ̀án tə pɩn Yɩɩ nimarʋ culu daka tə pìí ka va Yɩzərayɛlə lɩ̀à con

1 Ba-Yígúrə́-Jə-Tiu nimarʋ culu daka tə fwa cànɩ̀ barpɛ, Filisi lʋʋ nii tə wa. 2 Filisi tɩ̀án tə dàń bon ba joŋwana də ba vʋra, ba bwe ba, ba wʋ́: «Bɛ̀ɛ̀ nə, nə wá fwa, də Ba-Yígúrə́-Jə-Tiu nimarʋ culu daka tə? Á bɩra nəba nətʋ tə, nə nə mɛ, sə nə fwa, sə ka ma pìí, ka va ka bwálɩ́ nə.» 3 Ba ma le, ba wʋ́: «Á nə pɩ̀à, sə á pa, Yɩzərayɛlə lɩ̀à Yɩɩ nimarʋ culu daka tə vìí, á dàn ká pa ka vìí tʋtʋ. Á mɛ, sə á fwa cʋna kwɩan joŋi, á pa Yɩɩ nə. Kʋ wá pa á yayɩran tə zwɛ̀. Yá á dàń wá lwarɩ, won tə nə pɩn, Yɩɩ ma kəni aba càn wa, zənzən, máŋá mama wuuu.» 4 Filisi tɩ̀án tə kʋ́ʋ̀ bwe, ba wʋ́: «Bɛ̀ɛ̀ won nə, nə wá ma fwa kʋ cʋna kwɩan joŋi təntə, nə pa Yɩɩ nə?» Joŋwana tə də vʋra tə ma le, ba wʋ́: «Filisi yun tɩ̀án tə nə yɩ bonu tə yɩrɩ, á mɛ, sə á pa sɩ́án kúkúlə́ bonu, tə nə nyən də á ŋʋna tə, də sɩ́án tatwaran nyɩnyɩga bonu. Cɩ́gá, càn yiri nədʋ nə yí, á də á yun tɩ̀án tə mama. 5 Á fwa á ŋʋna tə nyɩnyɩga, də á tatwaran tə, tə nə cʋ̀gà á lʋʋ nii tə nyɩnyɩga, sə á ga pa dun, Yɩzərayɛlə Yɩɩ tə nə. Dɩɩn don, ʋ kʋ́ʋ̀ bá kə càn, á də á yɩa tə, də á lʋʋ nii tə nə. 6 Á dànà ká ya zɩbanənyɩna, ndə Ezwipətə tɩ̀án, də ba pɩ̀ʋ́ Farawon nə yɩn zɩbanənyɩna nətʋ. Á lìə́ á tɩ̀àn də Yɩɩ ken ba càn wa, ba ga ba yá ba pa Yɩzərayɛlə lɩ̀à tə vìí. 7 Sɩ́ʋ́n nə, á dàń tie nɩan kòrù nədʋn, á ja nanii bələ tə bɩ̀á nə ŋʋ̀à, tə tə nə wà nɩan kòrù van mɩ́ámɩ́án, á kə nɩan kòrù tə nə. Á dàń wá ja tə bɩ̀á tə nə wulə tə kwa tə, á pìí á bà sàń. 8 Kʋ kwa nə, á dàń wá tì Ba-Yígúrə́-Jə-Tiu nimarʋ culu daka tə, á kə nɩan kòrù tə wa. Á wá kə sɩ́án wiən tə, á nə ma fwa cʋna kwɩan joŋi, á pɩn Yɩɩ nə tə, daka don wa, á tún Yɩɩ nimarʋ culu daka tə səpuni nə. Kʋ kwa nə, á dàń wá yá nɩan kòrù tə, á pa kʋ vìí. 9 Á ywàŋá kʋ yuu zəni. Á nə nɩ də kʋ tì Yɩzərayɛlə lʋʋ nii cwəŋə tə, kʋ vələ Bɛtə-Swemɛswə con, kʋ nətʋ bɩrɩ də, kʋ yɩ Ba-Yígúrə́-Jə-Tiu nə tʋn yolwan nəfarʋ kʋ tə, nə yɩra. Kʋ nə kʋ́ʋ̀ tà nətʋ, nə wá lwarɩ, də kʋ tà ʋ mʋ̀ nə ken càn tə nə nə. Kʋ yɩ càn pupun tə yí nəba mʋ́.» 10 Filisi tɩ̀án tə tʋn ndə ba nə bɩrɩ ba, sə ba tʋn nətʋ. Ba jɩn nanii bələ tə bɩ̀á nə ŋʋ̀à, ba kə nɩan kòrù tə nə, ba ga ja tə bɩ̀á tə, ba sun tə nii nə, najɩrɩ wa. 11 Ba tì Ba-Yígúrə́-Jə-Tiu nimarʋ culu daka tə, ba kə nɩan kòrù tə wa. Ba tì daka tə don tə də, ka wa nə jə sɩ́án tatwaran nyɩnyɩga, də sɩ́án ŋʋna nyɩnyɩga tə, ba kə nɩan kòrù tə wa.

12 Nanii tə tì cwəŋə mənəmənə, tə vələ Bɛtə-Swemɛswə con. Tə tì cwəŋə təntə wuuu, də tə kwi, yá tə ga ba yori tə kəni jɩzən, nə à yə̀ə́, jɩgwiə. Filisi yun tɩ̀án tə yɩn tə kwa, yiŋʋnɩ yiŋʋnɩ wuuu, ba va ba yí Bɛtə-Swemɛswə sɩswɩan tə. 13 Bɛtə-Swemɛswə tɩ̀án yà wulə ba tʋŋa fʋʋ, vara tə wa. Ba zɩ̀n ba yáá, ba na Yɩɩ nimarʋ culu daka tə, yá ba dàń jwɛ kʋ yɩrɩ. 14 Nɩan kòrù tə twi kʋ mɛ Zozuwe, ʋ nə yɩ Bɛtə-Swemɛswə tíú kárá wa, kʋ zɩga lá. Kapan nəfarʋ yà tígə́ kʋ bwálɩ́ tə wa. Yɩzərayɛlə lɩ̀à tə dàń lwə nɩan kòrù tə dɛɛ tə, ba ga gʋ nanii tə, ba ma fwa joŋi, ba sʋ̀rɩ́*, ba pa Ba-Yígúrə́-Jə-Tiu nə. 15 Levi dwíí tɩ̀án tə lɩ Ba-Yígúrə́-Jə-Tiu nimarʋ culu daka tə, də daka tə don tə, sɩ́án wiən tə nə wulə ka wa, ba tún kapan nəfarʋ tə yuu wa. Kʋ dɩɩn tə nə, Bɛtə-Swemɛswə tɩ̀án fwa jwəŋə ba sʋ̀rɩ́, ba ga fwa jwəŋə yirə duən də, ba pa Ba-Yígúrə́-Jə-Tiu nə. 16 Filisi yun tɩ̀án bonu tə nə nɩ kʋ nətʋ tə, ba pìí ba va Ekəron, kʋ dɩɩn tə mama.

17 Nəŋə sɩ́án ŋʋna nyɩnyɩga tə, Filisi tɩ̀án tə nə fwa, sə ba ma fwa cʋna kwɩan joŋi, ba pa Ba-Yígúrə́-Jə-Tiu nə. Nədʋ yɩ Aswədɔdə yɩrɩ, kʋ don yɩ Gaza yɩrɩ, kʋ don yɩ Asəkalon yɩrɩ, kʋ don yɩ Gatə yɩrɩ, kʋ don yɩ Ekəron yɩrɩ. 18 Sɩ́án tatwaran nyɩnyɩga tə yɩ Filisi tɩfaran tə, ba nə lwə̀ biritaŋʋ, ba ma kɩkarɩ, də tə nii tɩbii tə nə zɩga yaaa, tə nə yɩ ba yun tɩ̀án bonu tə nyiən, mama yuu yɩrɩ. Ba lʋʋ nii tə vəli kʋ yí kapan nəfarʋ tə, ba nə lɩ Ba-Yígúrə́-Jə-Tiu nimarʋ culu daka tə, ba tún kʋ yuu wa. Kapan təntə tə wulə də zə̀n mama, Zozuwe, ʋ nə yɩ Bɛtə-Swemɛswə tíú, kárá tə wa.

19 Bɛtə-Swemɛswə tɩ̀án ywàń Ba-Yígúrə́-Jə-Tiu nimarʋ culu daka tə wa. Ba lɩ̀à mʋ̀rʋ̀ finu tə wa, Ba-Yígúrə́-Jə-Tiu pɩn lɩ̀à sapwɩtwa də fugə tɩ. Yá kʋ dàń ken lalʋʋ tə pucʋnɩ wa, Ba-Yígúrə́-Jə-Tiu nə pɩn yolwan nəfarʋ təntə yí ba yɩrɩ. 20 Bɛtə-Swemɛswə tɩ̀án dàń swɩ̀n, ba wʋ́: «Wàà nə wàá Ba-Yígúrə́-Jə-Tiu yáá con, ʋ zɩga, yá kʋ tíú ga ba tɩ? Ʋ mʋ̀ Yɩɩ tə, ʋ nə yɩ parɩ! Yá wàà con nə, Yɩɩ nimarʋ culu daka tə mɛ, sə ka va, sə ka ya yiŋʋnɩ də nəba?» 21 Bɛtə-Swemɛswə tɩ̀án tʋn lɩ̀à Kiriyatə-Yarimə tɩ̀án con, sə ba swɩ̀n, ba wʋ́: «Filisi tɩ̀án tə pɩn Ba-Yígúrə́-Jə-Tiu nimarʋ culu daka tə, pìí ka bà. Á dàń bɩ̀àn á tì ka, á ja va á con.»