7
1 Kiriyatə-Yarimə tɩ̀án twi, ba tì Ba-Yígúrə́-Jə-Tiu nimarʋ culu daka tə, ba ja vìí. Ba ja ka ba va ba tún Abinadabə dìə̀, paan tə yuu wa. Yá ba dàń kúrí ʋ bìú Eleyazarə, ba tún vàn nə, ba pa Yɩɩ nə, sə ʋ ywàń Ba-Yígúrə́-Jə-Tiu nimarʋ culu daka tə yuu.Yɩzərayɛlə lɩ̀à dí dɩ̀àn Filisi tɩ̀án yuu wa
2 Ba nə ja Yɩɩ nimarʋ culu daka tə ba va, ba tún, Kiriyatə-Yarimə nə, ka dánɩ́ lá zənzən. Ka fwa bɩna sapʋa lá nə. Yɩzərayɛlə lɩ̀à tə mama dàń bubwi, ba kə Ba-Yígúrə́-Jə-Tiu nə, ba pɩ̀à, sə ba pìí ba ja nimarʋ də wá. 3 Yá Samiyɛlə dàń swɩ̀n Yɩzərayɛlə lɩ̀à tə mama con, ʋ wʋ́: «Də kʋ cɩ́gá nə yɩ də á bɩcanɩ mama nə, á pìí á bɩ̀àn Ba-Yígúrə́-Jə-Tiu con, á mɛ, sə á lɩ dwíə́ nəkaran* tə yɩa tə, də ba woŋwanan tə, ba nə boŋə Asətarəte, á titəŋi wa. Á vivirə á bɩcanɩ, á kə Ba-Yígúrə́-Jə-Tiu con, á ga tʋn á pa ʋ mʋ̀ cɩcɩ nə. Yá ʋ dàń wá jon aba, Filisi tɩ̀án tə jɩɩn wa.» 4 Yɩzərayɛlə lɩ̀à tə dàń lɩ dwíə́ nəkaran tə woŋwanan tə, ba nə boŋə Baalə də Asətarəte, ba titəŋi wa. Yá ba dàń ga tʋŋa ba pɩn, Ba-Yígúrə́-Jə-Tiu cɩcɩ nə. 5 Samiyɛlə dàń swɩ̀n, ʋ wʋ́: «Á kənə Yɩzərayɛlə lɩ̀à tə mama duən yáá, Misəpa nə, yá à wá lòrì, Ba-Yígúrə́-Jə-Tiu, à pa aba.» 6 Ba dàń twi duən yáá, Misəpa nə. Ba tan nɩ́á, ba lwá tɩa, Ba-Yígúrə́-Jə-Tiu yáá con, ba ga vwa ba níə́, kʋ dɩɩn tə nə. Mə kʋ bwálɩ́ tə wa nə, ba swɩ̀n, ba wʋ́: «Nə tʋn cʋna, nə zɩgɩ Ba-Yígúrə́-Jə-Tiu nə.» Yá Samiyɛlə dàń bʋ̀rɩ̀ Yɩzərayɛlə lɩ̀à tə bʋra, Misəpa nə. 7 Filisi tɩ̀án tə nì, də Yɩzərayɛlə lɩ̀à tə twi duən yáá Misəpa nə. Yá Filisi yun tɩ̀án tə dàń nan, ba va, sə ba ta Yɩzərayɛlə lɩ̀à tə. Yɩzərayɛlə lɩ̀à tə nə nì kʋ, fən zʋa ba, Filisi tɩ̀án tə yɩrɩ. 8 Yá Yɩzərayɛlə lɩ̀à tə dàń swɩ̀n Samiyɛlə con, ba wʋ́: «Dàn ká pú n nii! Bubwi wuuu, n kə nə Yɩɩ tə nə, ʋ nə yɩ Ba-Yígúrə́-Jə-Tiu, n pa nəba, sə ʋ jon nəba, Filisi tɩ̀án tə jɩɩn wa. 9 Samiyɛlə jɩn pəbiə ka nə ŋʋ̀à yɩlɩ, ʋ ma fwa joŋi, ʋ sʋ̀rɩ́* ka mama, ʋ pa Ba-Yígúrə́-Jə-Tiu nə. Kʋ kwa nə, ʋ bubwi ʋ kə Ba-Yígúrə́-Jə-Tiu nə, sə ʋ san Yɩzərayɛlə lɩ̀à tə nə. Yá Ba-Yígúrə́-Jə-Tiu le ʋ yɩlori tə. 10 Máŋá tə Samiyɛlə nə wulə, ʋ sʋ̀rɩ́ joŋi tə, sə ʋ pa Yɩɩ nə, Filisi tɩ̀án tə twi ba yí lá, sə ba ta Yɩzərayɛlə lɩ̀à tə. Kʋ dɩɩn tə nə, Ba-Yígúrə́-Jə-Tiu pɩn dwà baa pwə̀rə́, ka cú Filisi tɩ̀án tə nə. Kʋ viviə ba, ba ga dəri ba laga duən yáá nə. Yá Yɩzərayɛlə lɩ̀à tə dàń dí dɩ̀àn ba yuu wa. 11 Yɩzərayɛlə lɩ̀à tə nan Misəpa nə, ba dɩŋɩ Filisi tɩ̀án tə kwa. Ba gʋa ba wuuu, ba ja va, ba kɛ̀ń bwálɩ́ tə ba nə boŋə Bɛtə-Karə. 12 Samiyɛlə zɩ̀n kapan nəfarʋ, ʋ cwɛn yɩɩ nə, Misəpa də Swɛnə pwə́rə́ wa. Ʋ dɩga kʋ bwálɩ́ təntə yɩrɩ, Ebɛn-Ezɛrə. Ʋ pɩ̀à sə ʋ twá kʋ nətʋ nə ʋ swɩ̀n, ʋ wʋ́: «Ba-Yígúrə́-Jə-Tiu san nəba wuuu, ʋ ja bà ʋ yí yəbə.»
13 Mə kʋ zɩgɩ nətʋ, Filisi tɩ̀án tə ma də́ cavɩra. Ba yà kʋ́ʋ̀ ba Yɩzərayɛlə lɩ̀à lʋʋ nii tə wa zwɩ. Ba-Yígúrə́-Jə-Tiu ken càn Filisi tɩ̀án tə nə wuuu, Samiyɛlə lʋʋ wúlú tə mama wa. 14 Yɩzərayɛlə lɩ̀à pìí ba jon ba tɩan tə, Filisi tɩ̀án tə yà nə ta ba jon. Kʋ nə zɩgɩ Ekəron nə, kʋ va kʋ yí Gatə, Yɩzərayɛlə lɩ̀à pìí ba ta kʋ nagwanaa təntə, ba jon Filisi tɩ̀án tə jɩɩn wa. Yá sìə́ dàń twi Yɩzərayɛlə lɩ̀à tə, də Amɔrə dwíí tə pwə́rə́ wa.
15 Samiyɛlə bʋ̀rɩ̀ Yɩzərayɛlə lɩ̀à tə bʋra, ʋ lʋʋ wúlú tə mama wa. 16 Bɩnɩ mama, ʋ yàá kɩkarɩ, ʋ va Bɛtɛlə, də Giligalə, də Misəpa, ʋ ma bʋ̀rɩ̀ Yɩzərayɛlə lɩ̀à tə bʋra, bwálá təntə mama wa. 17 Kʋ kwa nə, ʋ yàá pìí ʋ va ʋ sàń Rama nə. Tɩa lá də, ʋ yàá bʋ̀rɩ̀ Yɩzərayɛlə lɩ̀à tə bʋra. Ʋ lwə̀ Yɩɩ joŋi bwálɩ́ lá nə, ʋ pa Ba-Yígúrə́-Jə-Tiu nə.