Yɩzərayɛlə lɩ̀à pɩ̀à pɩ̀ʋ́
8
1 Máŋá tə Samiyɛlə nə twi ʋ kwɩn, ʋ tún ʋ bɩ̀á tə, sə ba bʋ̀rɩ̀ Yɩzərayɛlə lɩ̀à tə bʋra. 2 Ʋ bikwɩa tə yɩrɩ yà nə yɩ Zʋwɛlə, yá bələ nii bìú tə yɩrɩ yà yɩ Abɩya. Ba yà yɩ, ba bʋ̀rɩ̀ bʋra Bɛrəsweba nə. 3 Yá Samiyɛlə bɩ̀á tə wà ʋ yʋa jon. Ba viviri ba yáá ba kə watʋtʋ diŋə wa. Ba yàá joŋə vwiŋə lɩ̀à con, ba ga bʋ̀rɩ̀ kʋ̀nkʋ̀n bʋra, ba pɩn ba. 4 Yɩzərayɛlə lɩ̀à nəkwɩna tə mama dàń kun duən nə, ba ga pɛ̀ duən, ba bà Samiyɛlə con, Rama nə. 5 Ba swɩ̀n ʋ con, ba wʋ́: «Nə̀ń n nə, n jìgə̀ bazʋnʋ, yá n bɩ̀á tə ga wà n yʋa jon. Sɩ́ʋ́n nə, n dàń lɩ pɩ̀ʋ́, n tún n pa nəba, sə ʋ bʋ̀rɩ̀ nə bʋra, ndə kʋ nə yɩ nətʋ lʋʋ níə́ tə duən mama wa.» 6 Yolwan nə yɩ kʋ yoo təntə, Samiyɛlə mʋ̀ con, də ba nə swɩ̀n ʋ con, sə ʋ tún pɩ̀ʋ́ ʋ pa ba, sə ʋ ywàń ba yuu. Yá Samiyɛlə dàń ken kʋ yɩjʋnɩ wa Ba-Yígúrə́-Jə-Tiu yáá con. 7 Ba-Yígúrə́-Jə-Tiu le Samiyɛlə, ʋ wʋ́: «Cʋgʋ lalʋʋ tə kori, kʋ tə mama wa, ba nə wá swɩ̀n n con. Cɩ́gá, kʋ tà n mʋ̀ nə ba vɩga. Kʋ yɩ à mʋ̀ nə ba vɩga. Ba kʋ́ʋ̀ ba pɩ̀à, sə à ya ba pɩ̀ʋ́. 8 Kʋ nə zɩgɩ máŋá tə, à nə lɩ ba Ezwipətə nə, kʋ bà kʋ yí zə̀n, ba yàá vɩ nə, ba ga pìí ba tʋŋa, ba pɩn yɩa duən nə. Yá kʋ tə, ba nə tʋn à yɩra, mə kʋ nə ba tʋŋa n də yɩra. 9 Kʋ mʋ̀ nə pɩn, sɩ́ʋ́n nə, cʋgʋ ba kori. N dàń nə wá dí yáá, n fwi ba zɩan wa, n pa ba yəni kʋ tə, pɩ̀ʋ́ tə, ʋ nə wá də́ pàrɩ̀ ba yuu wa, nə wá tʋn ba yɩra.»10 Samiyɛlə swɩ̀n Ba-Yígúrə́-Jə-Tiu sʋ̀ràn tə mama, ʋ bɩrɩ Yɩzərayɛlə lalʋʋ tə nə, ba nə pɩ̀à, sə ʋ tún pɩ̀ʋ́, ʋ pa ba. 11 Ʋ swɩ̀n ba con, ʋ wʋ́: «Á nəŋə kʋ tə, pɩ̀ʋ́ tə, ʋ nə wá də́ pàrɩ̀ á yuu wa, nə wá tʋn á yɩra. Ʋ wá jon á bɩ̀á, ʋ pa ba tʋn də ʋ kʋ̀ʋ̀ səsen kòrə̀n. Ʋ wá pa ba duən jì ʋ kʋ̀ʋ̀ səsədɩra, ʋ ga pa ba duən də ya ʋ tətə kʋ̀ʋ̀ səsen kòrù yáá, ba ja ʋ səsen nii nə. 12 Ʋ wá tún á bɩ̀á duən, sə ba ya kwatara mʋ̀rʋ̀ yáá tɩ̀án, də kwatara finu yáá tɩ̀án. Ʋ wá jon ba duən də, sə ba vàrà ʋ kárɩ́, ba ca. Ba duən də wá lù ʋ kwatarɩ zɩla, də ʋ kʋ̀ʋ̀ səsen kòrə̀n zɩla. 13 Ʋ wá jon á bwɩ̀ɩ́, ʋ pa ba fwa tɩralɩ, də wodirən, də dipɛn. 14 Ʋ wá jon á kárɩ́ wiən tə nə ziən, də á divɛn tɩ̀án lənə tə nə ziən, də á olivə* tɩ̀án lənə tə nə ziən, ʋ pa ʋ tʋ̀tʋ̀nà nə. 15 Ʋ wá jon á kárɩ́ wiən, də á divɛn tɩ̀án lənə fugə nii nyiən, ʋ pa ʋ tʋ̀tʋ̀nán yun tɩ̀án nə, də ʋ tʋtʋnbɩa nə. 16 Ʋ wá jon á tʋtʋnbɩa, də á tʋtʋnbwɩɩ, də á ləzwəndʋn tə wa lɩ̀à tə, ba nə ziən, də á bɩnɛ, ʋ pa ba tʋn ʋ tʋ̀tʋ̀nán. 17 Ʋ wá jon á vanmɩnɩ fugə nii nyiən, yá á tətə dàń wá jì ʋ ywəŋə. 18 Yá kʋ máŋá tə nə yí, á dàń wá bubwi, á kə Ba-Yígúrə́-Jə-Tiu nə. Á wá swɩ̀n á zɩgɩ á pɩ̀ʋ́ tə nə, á nə tún, á pa á tɩ̀àn nə. Yá kʋ máŋá təntə wa, Ba-Yígúrə́-Jə-Tiu bá le aba!»
19 Yá lalʋʋ tə vɩga, sə ba cʋgʋ Samiyɛlə kori tə. Ba swɩ̀n ba wʋ́: «Kʋ tà nə yáá! Nə mʋ̀ yɩ pɩ̀ʋ́ nə, nə pɩ̀à mʋ́. 20 Nə də pɩ̀à, sə nə ya ndə lʋʋ níə́ tə duən tə mama nə. Nə pɩ̀à pɩ̀ʋ́, ʋ nə wá bʋ̀rɩ̀ nə bʋra. Ʋ wá nan ʋ ya nə yáá, ʋ ja nəba ʋ ta nə kʋ̀ʋ̀.» 21 Samiyɛlə cʋgʋ lalʋʋ tə sʋ̀ràn tə mama. Yá ʋ dàń tún tə, ʋ bɩrɩ Ba-Yígúrə́-Jə-Tiu nə. 22 Ba-Yígúrə́-Jə-Tiu swɩ̀n Samiyɛlə con, ʋ wʋ́: «Cʋgʋ ba kori tə, n ga tún pɩ̀ʋ́, n pa ba.» Kʋ kwa nə, Samiyɛlə dàń swɩ̀n Yɩzərayɛlə lɩ̀à tə con, ʋ wʋ́: «Á lìù mama pìí ʋ va ʋ tɩʋ.»