1 Samiyɛlə 9

Sayulə nyɩna bɩnɛ jɛ́n

1 Bɛɛ don yà wulə Bɛnzwamɛn dwíí tə wa, ʋ yɩrɩ nə yɩ Kiswə. Ʋ yà yɩ jɩjə tíú, ʋ ga jə dun zənzən. Ʋ yɩ Abɩyɛlə bìú. Abɩyɛlə də yɩ Serɔrə bìú. Serɔrə də yɩ Bekoratə bìú. Bekoratə də yɩ Afɩya bìú. Afɩya də yɩ Bɛnzwamɛn dwíí tə wa bɛɛ don bìú. 2 Kiswə yà jə bìú, ʋ yɩrɩ nə yɩ Sayulə. Sayulə yà yɩ balandʋrʋ, ʋ ga yɩ nanʋnbɛɛ. Ʋ zəni yà dwə lɩ̀à tə mama, Yɩzərayɛlə lɩ̀à tə wa, ʋ danɩ də ga dwə ba.

3 Dɩɩn don nə, Sayulə nyɩna Kiswə bɩnɛ jɛ́n. Yá Kiswə dàń swɩ̀n ʋ bìú Sayulə con, ʋ wʋ́: «Ja tʋtʋnbiu tə don, n ma kwé n tɩ̀àn, sə á nan, á twarɩ bɩnɛ tə.» 4 Sayulə də tʋtʋnbiu tə dàń vəli, ba twá Efərayimə pɛɛn tə wa, ba kɛ̀ń, ba va, ba twá Swalɩswa nagwanaa tə wa, ba kɛ̀ń, yá ba wà bɩnɛ tə lá nɩ. Ba vəli ba twá Swalimə nagwanaa tə də wa, ba kɛ̀ń, yá tə yà tə̀lə́ lá. Ba tə vəli ba twá Bɛnzwamɛn nagwanaa tə wa, ba kɛ̀ń, yá ba tə wà tə, tɩa lá də nɩ. 5 Ba nə vəli ba yí Sufə nagwanaa tə wa, Sayulə swɩ̀n ʋ tʋtʋnbiu tə con, ʋ nə twá ʋ nə, ʋ wʋ́: «Bà nə pìí nə vìí, sə nə yoo dàn ká pìí, kʋ yɩ̀ à nyɩna, kʋ doni bɩnɛ tə.» 6 Tʋtʋnbiu tə pìí ʋ le, ʋ wʋ́: «Yɩɩ tʋtʋnʋ don wulə tɩʋ kʋ tə wa, ʋ nə yɩ bɛɛ tə, ʋ nə jə dun zənzən. Yoo tə mama, ʋ nə swɩ̀n, kʋ cɩ́gá yàá tʋn. Nə vələ ʋ con, dɩɩn don, ʋ wá bɩrɩ nəba cwəŋə tə, nə nə mɛ, sə nə tì.» 7 Sayulə ma bwe ʋ tʋtʋnbiu tə, ʋ wʋ́: «Nə dàń nə vəli lá, bɛ̀ɛ̀ nə, nə wá pa bɛɛ təntə nə? Cɩ́gá, dipɛn kʋ́ʋ̀ tə̀lə́, nə lwaran tə wa. Bɛ̀ɛ̀ nə, nə jə? Nə ba zìlə́ won mama jə, sə nə pa Yɩɩ tʋtʋnʋ tə nə.» 8 Tʋtʋnbíú ma pìí ʋ le Sayulə, ʋ wʋ́: «Nə̀ń, swəkɛlə səbilugu nəmanbiə nədʋ wulə à mʋ̀ con. À wá pa kʋ Yɩɩ tʋtʋnʋ tə nə, yá ʋ dàń wá bɩrɩ nəba, cwəŋə tə, nə nə mɛ, sə nə tì.»

9 Máŋá don yɩn lá, Yɩzərayɛlə lʋʋ nii tə wa, lìù nə pɩ̀à, sə Yɩɩ bɩrɩ wá jwɩan yoo, ʋ yàá swɩ̀n, ʋ wʋ́: «Á bɩ̀àn nə va Yɩɩ yinarʋ* tə con!» Cɩ́gá, lìù tə ba nə boŋə, Yɩɩ nii sʋ̀sʋ̀nʋ̀* zə̀n kʋ tə, máŋá don yɩn lá, ʋ yà yɩ ba boŋə, Yɩɩ yinarʋ. 10 Yá Sayulə dàń swɩ̀n ʋ tʋtʋnbiu tə con, ʋ wʋ́: «Kʋ ziən! Bà nə va!» Yá ba dàń vəli tɩʋ tə wa, Yɩɩ tʋtʋnʋ tə nə wulə tə.

11 Máŋá tə, ba nə zwɩ tɩʋ tə wa, ba jəri kacɩan duən, də ba naŋa, sə ba tan nɩ́á. Sayulə də ʋ tʋtʋnbiu tə ma bwe kacɩan tə, ba wʋ́: «Yɩɩ yinarʋ tə wulə yəbə naaa?» 12 Kacɩan tə ma le ba, ba wʋ́: «Awo, ʋ wulə á yáá con lá nə. Á dàń nə vələ lala. Cɩ́gá, ba pɩ̀à ba fwa joŋi, Yɩɩ joŋi dədolu* tə yuu, ba pa Yɩɩ nə, lalʋʋ tə yuu yɩrɩ. Kʋ mʋ̀ nə pɩn, ʋ ma bà tɩʋ tə wa, zə̀n kʋ tə. 13 Á dàń nə zʋa tɩʋ tə wa, á wá yí wá, də ʋ tə wà Yɩɩ joŋi dədolu tə yuu dɩ̀, sə ʋ də́. Cɩ́gá, lalʋʋ tə bá də́, də ʋ nə wà lá vəli. Ʋ mʋ̀ nə mɛ, sə ʋ kə Yɩɩ lɛ̀ɛ̀, joŋi tə yɩrɩ, sə lɩ̀à tə, ba nə bon tə dàń zɩgɩ lá, ba də́. Sɩ́ʋ́n nə, á dàń vələ, yá á wá na wá, sɩ́ʋ́n sɩ́ʋ́n.»

Sayulə nɩ Samiyɛlə

14 Sayulə də ʋ tʋtʋbiu tə dàń kɛ̀ń, ba zʋ tɩʋ tə wa. Máŋá tə ba nə yí tɩʋ tə titəŋi wa, Samiyɛlə nan ʋ jəri ba, də ʋ ma dɩ̀ Yɩɩ joŋi dədolu* tə yuu.

15 Yá tɩa nə wá pʋrɩ, sə Sayulə bà, Ba-Yígúrə́-Jə-Tiu dí yáá, ʋ swɩ̀n Sayulə yoo Samiyɛlə con, ʋ wʋ́: 16 «Jwɩan nə, máŋá ka tə wa, à wá pa Bɛnzwamɛn nagwanaa tə wa bɛɛ don bà n con. Yá n dàń wá twɛ́n dun nʋga* ʋ yuu wa, sə ʋ mʋ̀ nə ya à lɩ̀à tə, ba nə yɩ Yɩzərayɛlə dwíí tə, pɩ̀ʋ́. Ʋ mʋ̀ nə wá jon à lɩ̀à tə, Filisi tɩ̀án tə jɩɩn wa. Cɩ́gá, à lɩ̀à tə bubwi, ba kə à nə, yá à nɩ ba yinəgə tə.» 17 Máŋá tə Samiyɛlə nə nɩ Sayulə, Ba-Yígúrə́-Jə-Tiu swɩ̀n Samiyɛlə con, ʋ wʋ́: «Nə̀ń bɛɛ tə, à nə swɩ̀n ʋ yoo n con, də ʋ mʋ̀ nə wá də́ pàrɩ̀, à lɩ̀à tə yuu wa.»

18 Sayulə dàń vəli, ʋ yí Samiyɛlə yɩra, tɩʋ tə mimii wa, ʋ ga swɩ̀n, ʋ wʋ́: «À lòrì mʋ́, sə n bɩrɩ nə, Yɩɩ yinarʋ* tə sàń.» 19 Yá Samiyɛlə le Sayulə, ʋ wʋ́: «À mʋ̀ nə yɩ Yɩɩ yinarʋ tə. Kɛ̀ń n ya à yáá, sə nə dɩ̀ Yɩɩ joŋi dədolu tə yuu. À də aba wá də́ wodiu zə̀n. Yá jwɩan jɩjʋ nə, à dàń wá swɩ̀n yoo tə mama, kʋ nə wulə n bɩcan wa, à bɩrɩ mʋ́, à ga yá mʋ́, sə n vìí. 20 Yá kʋ dàń nə yɩ n bɩnɛ tə nə jɛ́n, kʋ dɩan batwa zə̀n tə mʋ̀, dàn ká pa tə yoo yɩ̀ mʋ́. Cɩ́gá, ba pìí ba na tə. Yá wàà nə wá tɩnɩ wiən tə mama, tə nə jə fɩra Yɩzərayɛlə lʋʋ nii tə wa? Kʋ tà n mʋ̀ də n nyɩna dìə̀ tə mama naaa?» 21 Sayulə ma le, ʋ wʋ́: «Bɛnzwamɛn dwíí tə wa nə à nan. Kʋ ga yɩ Yɩzərayɛlə dwíə́ nəmɛɛ tə wa dwíí don. À mʋ̀ nyɩna dìə̀ tə ga nə mun, dìì tə də mama wa, tə nə wulə Bɛnzwamɛn dwíí tə wa. Bɛ̀ɛ̀ dàń nə pɩn, n ma swɩ̀n sʋ̀ràn yiri tətə à con?»

22 Yá Samiyɛlə dàń jɩn Sayulə də ʋ tʋtʋnbiu tə, ʋ ja zʋ wodiu dìə̀ tə wa. Ʋ pɩn ba jə̀ń dun bwálɩ́ nə, lɩ̀à tə, ba nə bon tə yáá con. Ba yà yí lɩ̀à fɩtwa. 23 Samiyɛlə swɩ̀n wodifwanʋ tə con, ʋ wʋ́: «Ja tori tə, à nə pɩn mʋ́, sə n tún vàn nə tə, n ja bà.» 24 Wodifwanʋ dàń tì ciin tə, də kʋ yɩra nʋga tə, ʋ ja bà, ʋ tún Sayulə yáá. Yá Samiyɛlə dàń swɩ̀n Sayulə con, ʋ wʋ́: «Nə̀ń kʋ tə, ba nə lɩ, ba tún n nə, kʋ tígə́ n yáá con. Də́! Cɩ́gá, mə joŋi tə won nə, à nə pɩn ba lɩ, ba tún n nə, máŋá tə wa, à nə swɩ̀n də à bon lɩ̀à.» Yá Sayulə dàń dí wodiu tə də Samiyɛlə, kʋ dɩɩn tə nə.

25 Kʋ kwa nə, Samiyɛlə də Sayulə pìí ba nan Yɩɩ joŋi dədolu tə yuu, ba cu, ba zʋ tɩʋ tə wa. Yá Samiyɛlə də Sayulə dàń dɩ̀gà diyuu wa, ba vee lá.

26 Kʋ tɩpʋrɩ nə, ba zàn jɩjʋ fuən fuən. Yá tɩblakʋnʋ wa, Samiyɛlə dàń bon ʋ kə Sayulə nə, diyuu tə wa, ʋ swɩ̀n ʋ con, ʋ wʋ́: «Zàn, sə à kwé mʋ́, à kə cwəŋə nə, sə n vìí.» Sayulə dàń zàn, ʋ də Samiyɛlə mɛ bələ nan cwəŋə tə yuu. 27 Máŋá tə ba nə nan tɩʋ tə nii nə, Samiyɛlə swɩ̀n Sayulə con, ʋ wʋ́: «Swɩ̀n n tʋtʋnbiu tə con, sə ʋ dí nə yáá, ʋ də ʋ vəli.» Sayulə tʋtʋnbiu tə ma kɛ̀ń, ʋ dí yáá, ʋ vìrí. Samiyɛlə dàń pìí ʋ swɩ̀n Sayulə con, ʋ wʋ́: «Sɩ́ʋ́n nə, n mʋ̀ dàń zɩgɩ yəbə, sə à tún Yɩɩ kori, à bɩrɩ mʋ́.»