Samiyɛlə swɩ̀n Yɩɩ nii sʋ̀ràn Sayulə con
10
1 Samiyɛlə dàń lɩ nʋga kunkwələ, ʋ twɛ́n dun nʋga* tə Sayulə yuu wa. Kʋ kwa nə, ʋ pùrì Sayulə, ʋ kə ʋ nyʋnɩ nə, ʋ ga swɩ̀n ʋ con, ʋ wʋ́: «Ba-Yígúrə́-Jə-Tiu nə twɛ́n dun nʋga n yuu wá, sə n ya ʋ lɩ̀à tə pɩ̀ʋ́. 2 Zə̀n kʋ tə, n nə nan à con n vìí kwa nə, n wá jəri bara bələ, Raswɛlə libəri tə səpuni nə, Sɛlətəsa nə, Bɛnzwamɛn nagwanaa tə sɩswɩan nə. Ba wá swɩ̀n n con, də ba pìí ba na bɩnɛ tə, n nə nan, sə n twarɩ. Yá sɩ́ʋ́n nə, n nyɩna tə dàń lɩ bɩnɛ tə yoo ʋ waa. Yá á mʋ̀ yoo dàń nə pìí kʋ yɩ̀ wá. Ʋ bwe ʋ tɩ̀àn, sə ʋ jə̀ń, bɛ̀ɛ̀ nə ʋ mɛ, sə ʋ fwa, ʋ ma pìí ʋ na ʋ bìú tə?» 3 Samiyɛlə kʋ́ʋ̀ swɩ̀n, ʋ wʋ́: «N nə kɛ̀ń kʋ bwálɩ́ təntə, n wá va yáá, də n yí sɩsanʋ tə, Tabɔrə nə. Bara batwa wá jəri mʋ́ tɩ̀ʋ́ təntə máŋá nə, də ba ma vələ, Yɩɩ yáá con, Betɛlə nə. Ba wa lìù don vaŋa bʋbii batwa, ʋ don də jə dipɛn dàlá batwa, ʋ don tə də pà divɛn púrí. 4 Ba wá jʋn mʋ́, ba ga pa mʋ́ dipɛn bələ. Yá n wá sɛ̀, n jon tə ba jɩɩn wa.» 5 Samiyɛlə tə swɩ̀n, ʋ wʋ́: «Kʋ kwa nə, n wá va n yí paan tə, ba nə boŋə Gibeya-Eloyimə.a Filisi tɩ̀án tə kwatara sàń wulə kʋ bwálɩ́ təntə nə. Máŋá tə, n nə zwɩ tɩʋ tə wa, n wá jəri Yɩɩ nii sʋ̀sʋ̀nà*, də ba tɩɩn duən nə, ba naŋa Yɩɩ joŋi dədolu* tə yuu, ba cwi. N wá na kúnkólú gwàgá, də gungwəndurə, də wuwurə, də kwandurə, ba wulə Yɩɩ nii sʋ̀sʋ̀nà tə yáá. Yá Yɩɩ nii sʋ̀sʋ̀nà tə ga wulə, ba swɩ̀n Yɩɩ nii sʋ̀ràn. 6 Ba-Yígúrə́-Jə-Tiu Siŋu* tə dàń wá cú n yuu wa, yá n ga wá twá ba nə, n swɩ̀n Yɩɩ nii sʋ̀ràn. Yá kʋ wá lwàń mʋ́, kʋ pa n jì lìù yiri don.» 7 Samiyɛlə tə swɩ̀n, ʋ súrí lá, ʋ wʋ́: «Máŋá tə, n nə nɩ də mɩmɩnan təntə tʋn, tə nii sú, sə n dàń tʋn won tə mama, n nə na də kʋ mɛ, sə n tʋn. Cɩ́gá, Yɩɩ wulə də mʋ́. 8 N dàń wá də́ à yáá, n va Giləgalə*. Yá à wá bà, à yí mʋ́ lá, sə à fwa jwəŋə. Tə duən yɩ à wá sʋ̀rɩ́*, à pa Yɩɩ nə, tə duən də ga wá ya nimarʋ jwəŋə*. N wá dan nə lá dɩan barpɛ, də à ma bɩ̀àn, sə à bɩrɩ mʋ́, kʋ tə n nə mɛ, sə n fwa.»Yɩɩ nii sʋ̀ràn tə, Samiyɛlə nə swɩ̀n Sayulə con, nii súə́
9 Máŋá tə wa, Sayulə də Samiyɛlə nə zə́n ba dʋgʋ duən, Sayulə ga viviri, sə ʋ vìí, də Yɩɩ lwàń ʋ bɩcan tə. Yá mɩmɩnan tə mama cɩ́gá tʋn, tə nii sú, kʋ dɩɩn tə tətə nə. 10 Sayulə də ʋ tʋtʋnbiu tə cɩ́gá nə yí Gibeya, Yɩɩ nii sʋ̀sʋ̀nà tɩɩn duən nə, ba nan ba jəri wá. Yɩɩ Siŋu* tə cúə́ Sayulə yuu wa, yá ʋ dàń swɩ̀n Yɩɩ nii sʋ̀ràn, Yɩɩ nii sʋ̀sʋ̀nà tə titəŋi wa. 11 Lɩ̀à tə mama, ba yà nə yə̀ə́ wá fuən, nɩ də ʋ wulə ʋ swɩ̀n Yɩɩ nii sʋ̀ràn, də Yɩɩ nii sʋ̀sʋ̀nà tə. Yá ba dàń bwe duən lalʋʋ tə wa, ba wʋ́: «Bɛ̀ɛ̀ nə yí Kiswə bìú tə? Sayulə də twá ʋ wulə Yɩɩ nii sʋ̀sʋ̀nà tə wa naaa?» 12 Bwálɩ́ tə wa lìù don swɩ̀n, ʋ súrí lá, ʋ wʋ́: «Yá wà dàń nə yɩ ba nyɩna mʋ̀?» Mə sʋgʋ təntə ba tì, ba ma fwa zansɩra, ba swɩ̀n, ba wʋ́: «Sayulə də twá ʋ wulə Yɩɩ nii sʋ̀sʋ̀nà tə wa naaa?»
13 Máŋá tə Sayulə nə swɩ̀n Yɩɩ nii sʋ̀ràn tə, ʋ zwɛ̀, ʋ vəli Yɩɩ joŋi dədolu* tə yuu. 14 Kʋ kwa nə, Sayulə nyɩna nubidon nɩ ʋ də ʋ tʋtʋnbiu tə, yá ʋ dàń bwe ba, ʋ wʋ́: «Yə̀n nə á yà vəli?» Sayulə ma le, ʋ wʋ́: «Nə yà vəli, sə nə pɩ̀à bɩnɛ tə, mə kʋ nə, nə wà tə nɩ. Nə dàń ma kɛ̀ń nə va Samiyɛlə con.» 15 Sayulə nyɩna nubidon tə ma swɩ̀n, ʋ wʋ́: «Mə n dàń swɩ̀n kʋ tə, Samiyɛlə nə swɩ̀n á con, n bɩrɩ nə.» 16 Sayulə ma swɩ̀n ʋ con, ʋ wʋ́: «Ʋ yɩ ʋ swɩ̀n nə con, də ba pìí ba na bɩnɛ tə.» Yá Sayulə wà yoo mama ʋ con swɩ̀n pàrɩ̀ tə mʋ̀ yuu wa, Samiyɛlə nə swɩ̀n kʋ yoo.
Ba kúrí Sayulə, sə ʋ ya Yɩzərayɛlə pɩ̀ʋ́
17 Samiyɛlə bon Yɩzərayɛlə lɩ̀à tə, Ba-Yígúrə́-Jə-Tiu yáá con, Misəpa nə. 18 Yá ʋ dàń swɩ̀n lalʋʋ tə con, ʋ wʋ́: «Á cʋga kʋ tə Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ, nə swɩ̀n. Ʋ wʋ́, kʋ yɩ ʋ mʋ̀ nə pɩn, á mʋ̀ Yɩzərayɛlə lɩ̀à tə nan Ezwipətə lʋʋ nii tə wa. Ʋ mʋ̀ nə jon aba Ezwipətə tɩ̀án, də payun tə duən tə mama jɩɩn wa, tə yà nə fɩfɩn aba. 19 Yá zə̀n kʋ tə, á mʋ̀ nə vɩga á Yɩɩ tə á dʋgʋ, yá ʋ mʋ̀ ga nə jon aba, á pucʋnɩ də á yojanan mama wa. Á swɩ̀n ʋ con, á wʋ́, ʋ tún pɩ̀ʋ́, ʋ pa aba! Sɩ́ʋ́n nə, á dàń bɩ̀án, á zɩgɩ Ba-Yígúrə́-Jə-Tiu yáá con, dwíí dwíí, də dìə̀ dìə̀.» 20 Samiyɛlə pɩn, Yɩzərayɛlə dwíə́ tə mama bólí ʋ yɩra. Yá Ba-Yígúrə́-Jə-Tiu dàń kúrí Bɛnzwamɛn dwíí tə. 21 Kʋ kwa nə, Samiyɛlə kʋ́ʋ̀ pɩn, Bɛnzwamɛn dwíí tə wa dìì tə mama bólí ʋ yɩra. Yá Ba-Yígúrə́-Jə-Tiu kúrí Matəri dìə̀ tə. Yá Matəri dìə̀ tə wa, Kiswə bìú Sayulə nə, Ba-Yígúrə́-Jə-Tiu kúrí. Yá ba dàń twarɩ Sayulə, ba wà wá nɩ. 22 Ba ma kʋ́ʋ̀ bwe Ba-Yígúrə́-Jə-Tiu, ba wʋ́: «Bɛɛ təntə twi yəbə naaa?» Ba-Yígúrə́-Jə-Tiu ma le, ʋ wʋ́: «Á nəŋə wá nə, ʋ səgə zɩla tə kwa con.» 23 Ba dàń dəri ba va, ba van Sayulə, ba lɩ lá, ba ja bà, ba zɩgɩ lalʋʋ tə titəŋi wa. Ʋ yuu danɩ yà dwə lɩ̀à tə mama. 24 Samiyɛlə dàń swɩ̀n lalʋʋ tə mama con, ʋ wʋ́: «Á nəŋə bɛɛ tə, Ba-Yígúrə́-Jə-Tiu nə kúrí. Ʋ yiri tə̀lə́ lalʋʋ tə mama wa, mɩ́ámɩ́án.» Lalʋʋ tə mama dàń mà cərə, ba ga swɩ̀n, ba wʋ́: «Yɩɩ wá pa mɩdarɩ pɩ̀ʋ́ tə nə!»
25 Kʋ kwa nə, Samiyɛlə bɩrɩ lalʋʋ tə, won tə nə yɩ pɩ̀ʋ́ tori. Yá ʋ dàń pʋ́pʋ́nɩ́ kʋ, ʋ kə sagɩ wa, ʋ tún Ba-Yígúrə́-Jə-Tiu dìə̀ tə wa. Yá ʋ dàń dʋgʋ lalʋʋ tə, ʋ pa lìù mama pìí, ʋ va ʋ sàń. 26 Sayulə də vəli ʋ tɩʋ Gibeya. Bara duən, ba nə jə dun, ba ga dəri Yɩɩ fən, kwé Sayulə, ba ja vìí. 27 Yá lakʋkwɩnan duən mʋ̀ swɩ̀n, ba wʋ́: «Bɛɛ wà tə wàá nəba ʋ joŋə?» Lɩ̀à təntə mʋ̀ mun Sayulə, ba ga wà zìlə́ won mama ja bà, ba pa wá. Yá Sayulə wà kʋ ma jì yoo.