Amon dwíí tə púə́ Yabɛswə tɩʋ tə ba kə, sə ba ta kʋ
11
1 Amon dwíí tə pɩ̀ʋ́ Nahaswə ja ʋ kwatara, ʋ bà, ʋ pú Yabɛswə tɩʋ tə ʋ kə, sə ʋ ta kʋ. Yabɛswə tɩʋ təntə yɩ kʋ wulə Galadə nagwanaa tə wa. Yabɛswə tɩ̀án mama dàń swɩ̀n Nahaswə con, ba wʋ́: «Tún nimarʋ də nəba, sə nə tʋn nə pa mʋ́.» 2 Ʋ ma le ba, ʋ wʋ́: «À wá tún nimarʋ də aba, də á nə sɛ̀, sə à la á lìù mama jɩzən yii tə. Yá kʋ nətʋ tə dàń wá ya cavɩra, kʋ pa Yɩzərayɛlə lɩ̀à tə mama.» 3 Yabɛswə tɩ̀án nəkwɩna tə ma swɩ̀n ʋ con, ba wʋ́: «Pa nəba dɩan barpɛ, sə nə ma wànɩ́ nə tʋn lɩ̀à, Yɩzərayɛlə lʋʋ nii tə mama wa. Kʋ kwa nə, nə nə wà lìù nɩ, sə ʋ jon nəba, nə dàń wá pa nə tɩ̀àn mʋ́.» 4 Tʋntʋna tə nə twi ba yí Sayulə tɩʋ Gibeya, ba tún ba nii ba bɩrɩ lalʋʋ tə nə. Yá lalʋʋ tə mama zɩ̀n ba kori ba kə yɩɩ nə, ba kwi.Sayulə ta Amon dwíí tə, ʋ də́
5 Kʋ máŋá tə wa, də nə̀ń Sayulə də nə, ʋ nɩan kwa, ʋ naŋa kárá, ʋ bɩ̀àn. Sayulə ma bwe, ʋ wʋ́: «Bɛ̀ɛ̀ nə jə lalʋʋ tə, ba ma kwi?» Ba dàń ma tì sʋ̀ràn tə, Yabɛswə tɩ̀án nə twi ba swɩ̀n tə, ba swɩ̀n ba bɩrɩ Sayulə nə. 6 Máŋá tə Sayulə nə nì sʋ̀ràn təntə, Yɩɩ Siŋu* tə cúə́ ʋ yuu wa, yá ʋ lɩŋa ga zàn zənzən. 7 Ʋ jɩn nɩan bələ, ʋ gʋ, ʋ ca tə, ʋ fʋ nankukulə, ʋ ma tʋn lɩ̀à Yɩzərayɛlə lʋʋ nii tə mama wa. Ʋ pɩn nii ʋ tʋntʋna tə nə, sə ba swɩ̀n, ba wʋ́: «Lìù tə mama, ʋ nə vɩga, sə ʋ nan, ʋ pú Sayulə də Samiyɛlə kwa, ʋ va kʋ̀ʋ̀, mə nətən nə, ba wá fwa kʋ tíú nɩan.» Lalʋʋ tə nə nɩ kʋ nətʋ tə, Ba-Yígúrə́-Jə-Tiu fən zʋa ba, yá ba dàń sɛ̀, ba nan, ba kun duən nə, ndə ləzwəndʋa nə. 8 Sayulə gàlɩ̀ ʋ kwatara tə Bezɛkə nə. Yɩzərayɛlə lɩ̀à tə yɩn mʋ̀rʋ̀ biətwa, yá Zwida lɩ̀à tə yɩn mʋ̀rʋ̀ fitwa. 9 Ba dàń swɩ̀n Yabɛswə tɩ̀án tʋntʋna tə con, ba wʋ́: «Á vələ á swɩ̀n Yabɛswə tɩ̀án con, Galadə nagwanaa tə wa, də jwɩan nə, ba wá na sáŋʋ́, kʋ nə wá jon ba, yɩcaʋ gùlú máŋá wa.» Tʋntʋna tə pìí ba va, ba swɩ̀n kʋ nətʋ tə, ba bɩrɩ Yabɛswə tɩ̀án nə, yá kʋ dàń yɩn pupwən, kʋ pa ba. 10 Yabɛswə tɩ̀án dàń swɩ̀n Amon dwíí tə con, ba wʋ́: «Jwɩan nə, nə wá pa nə tɩ̀án aba, sə á ma fwa kʋ tə, nə ywán də aba.»
11 Yá kʋ tɩpʋrɩ nə, Sayulə pwɛ̀ ʋ kwatara tə púlə́ batwa. Ba vəli ba zʋ Amon dwíí tə titəŋi wa, tɩbɩlakʋnʋ wa. Yá ba dàń gʋa Amon dwíí tə wuuu, kʋ va kʋ yí yɩcaʋ gùlú. Amon dwíí lɩ̀à tə nə ga tə, dəri ba laga duən yáá nə. Ba lìù mama də ʋ don wà duən twá, ba va yáá nədʋ.
12 Lalʋʋ tə dàń swɩ̀n Samiyɛlə con, ba wʋ́: «Bə̀rə́ yà nə swɩ̀n də Sayulə wà mɛ, sə ʋ ya nə pɩ̀ʋ́ tə? Á kənə lɩ̀à təntə nə jɩɩn wa, sə nə gʋ ba.» 13 Yá Sayulə dàń swɩ̀n, ʋ wʋ́: «Ba ba lìù mama gwɩ, zə̀n dɩɩn kʋ tə nə. Cɩ́gá, zə̀n kʋ tə, Ba-Yígúrə́-Jə-Tiu jon Yɩzərayɛlə lɩ̀à, ba dʋŋa jɩɩn wa.
14 Tə mʋ̀ yìə̀n təntə kwa nə, Samiyɛlə swɩ̀n lalʋʋ tə con, ʋ wʋ́: «Á bɩ̀àn nə va Giləgalə, sə nə kwɛn nə tún pàrɩ̀ tə.» 15 Lalʋʋ tə mama dàń zàn, ba va Giləgalə. Ba nə yí Giləgalə, ba lɩ Sayulə, ba tún Ba-Yígúrə́-Jə-Tiu yáá con, sə ʋ ya pɩ̀ʋ́. Kʋ kwa nə, ba fwa nimarʋ jwəŋə lá nə, ba pa Ba-Yígúrə́-Jə-Tiu nə. Yá Sayulə də Yɩzərayɛlə lɩ̀à tə mama, dàń fwa pupwən nəfarʋ lá nə.