1 Samiyɛlə 12

Samiyɛlə bʋ̀rɩ̀ ʋ tətə bʋra, Yɩzərayɛlə lɩ̀à yáá con

1 Samiyɛlə swɩ̀n Yɩzərayɛlə lɩ̀à tə mama con, ʋ wʋ́: «À cʋgʋ á kori tə, à ga sɛ̀, à tʋn kʋ tə mama, á nə swɩ̀n à con, sə à tʋn. À tún pɩ̀ʋ́ à pa aba. 2 Sɩ́ʋ́n nə, á dàń nəŋə pɩ̀ʋ́ tə, ʋ nə wá ya á yáá tíú. À mʋ̀ dàń jìgə̀ bazʋnʋ, à yuu pɩ̀rɩ̀. Yá kʋ nə yɩ à bɩ̀á tə də, á nəŋə ba nə, ba də jìgə̀ nəkwɩna, ndə á nə. À yɩn á yáá à zandwan mama, kʋ bà kʋ yí zə̀n. 3 Sɩ́ʋ́n nə, á dàń nəŋə à nə, à zɩga á yáá con! À lòrì aba, sə á bʋ̀rɩ̀ à bʋra Ba-Yígúrə́-Jə-Tiu, də pɩ̀ʋ́ tə, ʋ nə kúrí*, yáá con. Á wàà con nə, à jon naʋ? Á wàà con nə, à jon bɩna? Á wàà nə, à gɩgɩrɩ? Á wàà nə, à fɩfɩn? Á wàà con nə, à jon vwiŋə, sə à ga bʋ̀rɩ̀ kʋ̀nkʋ̀n bʋra? Də à nə tʋn nətʋ á yɩra, sə á swɩ̀n, yá à wá pìí à ŋwɩ́n tə, à pa aba.» 4 Yɩzərayɛlə lɩ̀à tə le, ba wʋ́: «N wà nəba gɩgɩrɩ, n ma wà nəba fɩfɩn. Yá n ga wà won jon, nə lìù mama con.» 5 Samiyɛlə ma kʋ́ʋ̀ swɩ̀n ba con, ʋ wʋ́: «Ba-Yígúrə́-Jə-Tiu yɩ dansɩa, də kʋ tə, á nə swɩ̀n. Yá pɩ̀ʋ́ tə, ʋ nə kúrí, də yɩ dansɩa lìù zə̀n kʋ tə, də á won mama tə̀lə́ à con.» Yá ba dàń le, ba wʋ́: «Kʋ yɩ cɩ́gá, Ba-Yígúrə́-Jə-Tiu yɩ dansɩa.»

Samiyɛlə maŋa Yɩzərayɛlə lɩ̀à nɩbara-ba yoo, ʋ bɩrɩ ba

6 Samiyɛlə dàń swɩ̀n lalʋʋ tə con, ʋ wʋ́: «Ba-Yígúrə́-Jə-Tiu yɩ dansɩa, yá ʋ mʋ̀ nə lɩ Moyizə də Aron ʋ tún, sə ba ya á nɩbara-ba yáá tɩ̀án. Ʋ mʋ̀ nə lɩ á nɩbara-ba, Ezwipətə lʋʋ nii wa. 7 Sɩ́ʋ́n nə, á dàń kənə á sírí, sə à də aba bʋ̀rɩ̀ bʋra, Ba-Yígúrə́-Jə-Tiu yáá con. Yá à dàń wá gàlà yozəŋə tə mama, Ba-Yígúrə́-Jə-Tiu nə tʋn, ʋ ma jon á mʋ̀ də á nɩbara-ba tə, à bɩrɩ aba. 8 Á nɩbɛɛ Zwakɔbə də ʋ dìə̀ lɩ̀à tə nə twi Ezwipətə kwa nə, máŋá twi ka ya lá, Ezwipətə tɩ̀án ken ʋ dwíí tə càn wa. Yá á nɩbara-ba bubwi ba kə Ba-Yígúrə́-Jə-Tiu nə, sə ʋ san ba. Yá Ba-Yígúrə́-Jə-Tiu dàń tʋn Moyizə, də Aron, ʋ pa ba lɩ á nɩbara-ba Ezwipətə nə, ba ja bà bwálɩ́ kʋ tə wa, sə ba ya lá. 9 Yá kʋ kwa nə, á nɩbara-ba swɛ̀ɛ́ Ba-Yígúrə́-Jə-Tiu yoo, ʋ nə yɩ ba Yɩɩ. Kʋ mʋ̀ nə pɩn, Ba-Yígúrə́-Jə-Tiu ma yá ʋ pa, Sisera, ʋ nə yɩ Hasɔrə kwatara yuu tíú, də Filisi tɩ̀án, də Mʋabə pɩ̀ʋ́, ta á nɩbara-ba, ba də́. 10 Yá á nɩbara-ba kʋ́ʋ̀ bubwi ba kə Ba-Yígúrə́-Jə-Tiu nə, sə ʋ san ba. Ba swɩ̀n də ba tʋn cʋna, ba nə vɩga Ba-Yígúrə́-Jə-Tiu, ba ga tʋn ba pa woŋwanan tə nə, ba nə boŋə Baalə də Asətarəte, yɩrɩ. Yá ba dàń lòrì Ba-Yígúrə́-Jə-Tiu, sə ʋ jon ba, ba dʋŋa tə jɩɩn wa, sə ba ga tʋn ba pa wá. 11 Yá Ba-Yígúrə́-Jə-Tiu tʋn Zwedeyon, ʋ tʋn Barakə, ʋ tʋn Zwefəte, ʋ ma kʋ́ʋ̀ tʋn à mʋ̀ Samiyɛlə də. Mə kʋ twá nətʋ, ʋ ma jon aba, á dʋŋa tə jɩɩn wa, ba nə kɩkarɩ aba. Yá kʋ twá nətʋ, á ma wànɩ́, á ya lʋʋ nii tə wa, də yazʋrə.

Kʋ tə Yɩzərayɛlə lɩ̀à nə mɛ, sə ba fwa, ba ma ya lʋʋ nii tə wa, də yazurə

12 Yá máŋá tə, á nə nɩ də, Amon dwíí tə pɩ̀ʋ́ Nahaswə bɩ̀àn, sə ʋ ta aba, á vɩga à con, á ga swɩ̀n də pɩ̀ʋ́ nə, á pɩ̀à, sə ʋ də́ pàrɩ̀, á yuu wa. Yá Ba-Yígúrə́-Jə-Tiu tə, ʋ nə yɩ á Yɩɩ, ga nə yɩ á pɩ̀ʋ́. 13 Yá sɩ́ʋ́n nə, á dàń nəŋə pɩ̀ʋ́ tə, á nə kúrí. Á mʋ̀ nə swɩ̀n, á wʋ́ á pɩ̀à pɩ̀ʋ́, Ba-Yígúrə́-Jə-Tiu ma tún wá, ʋ pa aba. 14 Də á nə dəri Ba-Yígúrə́-Jə-Tiu fən, á ga tʋŋa á pɩn wá, á nə cʋga ʋ kori, á ga ba ʋ nii vɩ, á mʋ̀ də pɩ̀ʋ́ tə mɛ, ʋ nə də́ pàrɩ̀ á yuu wa, wá pìí, á vwa á tɩ̀àn Yɩɩ yɩra. 15 Yá á dàń nə ba Ba-Yígúrə́-Jə-Tiu kori cʋga, á nə ba ʋ nii zìlí, Ba-Yígúrə́-Jə-Tiu wá kə càn á nə, ndə ʋ nə ken càn á nɩbara-ba nə nətʋ. 16 Kʋ mʋ̀ yɩrɩ, sɩ́ʋ́n nə, á dàń kənə á sírí, á ywàń yomɩlʋ kʋ tə, Ba-Yígúrə́-Jə-Tiu nə wá tʋn á yɩ́á yuu. 17 Woceri máŋá wa nə, nə wulə sɩ́ʋ́n. Kʋ tà nətʋ naaa? À wá bon à kə Ba-Yígúrə́-Jə-Tiu nə, yá ʋ wá pa dwà nà, də ka baa. Kʋ nətʋ wá pa, á lwarɩ də, á nə pɩn Ba-Yígúrə́-Jə-Tiu tún pɩ̀ʋ́, ʋ pa aba tə, yɩ yolwan nəfarʋ á tʋn, ʋ yáá con.» 18 Yá Samiyɛlə dàń bon ʋ kə Ba-Yígúrə́-Jə-Tiu nə. Yá Ba-Yígúrə́-Jə-Tiu pɩn dwà nà, də ka baa, kʋ dɩɩn tə tətə nə. Yá Ba-Yígúrə́-Jə-Tiu də Samiyɛlə fən dàń zʋa lalʋʋ tə mama zənzən. 19 Lalʋʋ tə mama dàń swɩ̀n Samiyɛlə con, ba wʋ́: «Lòrì Ba-Yígúrə́-Jə-Tiu, ʋ nə yɩ n Yɩɩ tə, n pa nə mʋ̀, n tʋ̀tʋ̀nà tə nə, sə nə dàn ká tɩ. Cɩ́gá, nə nə pɩn n tún pɩ̀ʋ́, n pa nəba tə, yɩ cʋna nə tʋn, nə súrí nə cʋna tə duən tə mama nə.» 20 Samiyɛlə ma le lalʋʋ tə, ʋ wʋ́: «Á dànà ká pa fən ja aba. Á cɩ́gá tʋn yolwan. Yá á nə dànà ká pìí, á viviri á kwa, á ma sà Ba-Yígúrə́-Jə-Tiu. Á tʋŋa á pa Ba-Yígúrə́-Jə-Tiu nə, də á waa mama. 21 Á kʋ́ʋ̀ dànà ká pìí, á viviri á yáá, á kə woŋwanan con. Woŋwanan ba funə jə. Yá tə nə ba funə jə tə pɩn, tə ba sáŋʋ́ jə, tə ma wàrɩ̀ lìù də tə joŋə. 22 Cɩ́gá, Ba-Yígúrə́-Jə-Tiu nə kúrí aba ʋ tún, sə á ya ʋ mʋ̀ lɩ̀à. Kʋ mʋ̀ yɩrɩ, ʋ bá vɩ aba, ʋ dʋgʋ, sə kʋ cʋ̀gʋ̀ ʋ yɩrɩ tə, kʋ nə jə dun. 23 À mʋ̀ Samiyɛlə də bá yá yɩjʋnɩ nə, à yuu yɩrɩ. À nə yá yɩjʋnɩ nə á yuu yɩrɩ, kʋ yɩ cʋna nə, à tʋŋa, à zɩgɩ Ba-Yígúrə́-Jə-Tiu nə. À wá bɩrɩ aba cwəŋə tə, ka nə ziən, ka ga yɩ mənəmənə. 24 Yoo nədʋ cɩcɩ nə wulə: Á dərə Ba-Yígúrə́-Jə-Tiu fən, á ga tʋn á pa wá, də cɩ́gá, də á waa mama. Cɩ́gá, á tətə ywàŋá yomɩlan tə, ʋ nə tʋn á titəŋi wa, dánɩ́ nə mɛ nətʋ! 25 Yá á dàń nə tʋn lwanɩ, á mʋ̀ də á pɩ̀ʋ́ tə mɛ wá tɩ.