Yɩzərayɛlə lɩ̀à zàn ba zɩgɩ Filisi tɩ̀án nə
13
1 Sayulə jìgə̀ pɩ̀ʋ́ máŋá tə wa, də ʋ jə bɩna fɩtwa. Yá ʋ dí pàrɩ̀ Yɩzərayɛlə yuu wa, bɩna sapwɩlə də bələ.a2 Yá Sayulə dàń kúrí bara mʋ̀rʋ̀ batwa Yɩzərayɛlə lɩ̀à tə wa. Bara mʋ̀rʋ̀ bələ yà wulə də wá, Mikəmasə nə, də Betɛlə pɛɛn tə yuu wa. Yá bara mʋ̀rʋ̀ ga wulə də ʋ bìú Zonatan, Gibeya nə, Bɛnzwamɛn nagwanaa tə wa. Ʋ dàń ga pa lalʋʋ tə gɩganɩ tə, lìù mama pìí, ʋ va ʋ sàń.
3 Dɩɩn don nə, Zonatan ta Filisi tɩ̀án kwatara tə, ba yà nə wulə Geba nə, ʋ də́. Yá Filisi tɩ̀án duən nì kʋ. Sayulə dàń pɩn, ba wúrú nabwana lʋʋ nii tə mama wa, ba ga swɩ̀n, ba wʋ́: «Ebərə-ba mɛ, sə ba nì kʋ!» 4 Yɩzərayɛlə lɩ̀à tə mama nì də ba swɩ̀n, ba wʋ́: «Sayulə ta Filisi tɩ̀án kwatara tə, ʋ də́. Yá kʋ nətʋ dàń pɩn, Filisi tɩ̀án tə tì dʋŋɩ də Yɩzərayɛlə lɩ̀à tə.» Ba bon ba kə Yɩzərayɛlə lalʋʋ nə, sə ba jəri duən Sayulə con, Giləgalə nə. 5 Filisi tɩ̀án tə də kun duən nə, ba vʋrɩ, sə ba ta Yɩzərayɛlə lɩ̀à tə. Filisi tɩ̀án tə yà jə kʋ̀ʋ̀ səsen kòrə̀n mʋ̀rʋ̀ fɩtwa, də səsədɩra mʋ̀rʋ̀ bardʋ. Yá ba kwatara tə yà dáá zənzən, ndə mʋʋ nii kasɩlʋ nə. Ba twi ba kun duən nə, Mikəmasə nə, Bɛtə-Avɛnə yɩɩ yipɩan con. 6 Yɩzərayɛlə lɩ̀à tə nɩ də, Filisi tɩ̀án tə dɩ̀gà ba, ba sʋ. Yá kʋ nətʋ tə dàń pɩn ba jɩ̀àn gwarɩ. Lalʋʋ tə səgə pɛɛn bʋran wa, də gwàlán wa, də pɩ̀ràn kwə̀lə́ wa, də gwàlán wa, tə də̀ń nə lu. 7 Ebərə-ba duən bɩn Zʋrədɛn mʋnaa tə, ba va ba səgə Gadə də Galadə nagwanɛɛ tə wa.
Sayulə fwa joŋi ʋ tɩntɩan nə, ʋ sʋ̀rɩ́ ʋ pa Yɩɩ nə
Sayulə yà tə wulə Giləgalə nə, yá lɩ̀à tə mama, ba yà nə wulə də wá, yà yɩ ba vɩvaga.
8 Sayulə dàn dɩan barpɛ, ndə Samiyɛlə nə swɩ̀n ʋ con nətʋ, yá Samiyɛlə tə wà Giləgalə yí. Sayulə kwatara tə dàń yà wulə ba laga, ba yá wá. 9 Sayulə ma ga, ʋ swɩ̀n, ʋ wʋ́: «Á jana joŋi tə ba nə sʋ̀rɩ́*, ba pɩn Yɩɩ nə tə, də nimarʋ jwəŋə* vàná tə, á bà, á pa nə.» Yá ʋ tətə dàń fwa joŋi tə, ʋ sʋ̀rɩ́ ʋ pa Yɩɩ nə. 10 Máŋá tə Sayulə nə fwa joŋi tə, ʋ sʋ̀rɩ́ ʋ pa Yɩɩ nə, ʋ zwɛ̀, də nə̀ń Samiyɛlə nə, ʋ yí. Sayulə dàń nan ʋ jəri wá, sə ʋ jʋn wá. 11 Samiyɛlə bwe Sayulə, ʋ wʋ́: «Bɛ̀ɛ̀ yoo nə, n tʋn nətən?» Sayulə le, ʋ wʋ́: «À nɩ də kwatara tə wulə ba laga, ba yá nə, yá máŋá tə də, n nə bɩrɩ də n wá bà tə yí, də n tə wà twi. Yá Filisi tɩ̀án tə də kun duən nə, Mikəmasə nə. 12 À dàń bʋ́n də Filisi tɩ̀án tə wá bà, ba ta nə, Giləgalə nə, də à tə wà Ba-Yígúrə́-Jə-Tiu sáŋʋ́ lòrì. Kʋ mʋ̀ nə pɩn, à ma kalɩ à fwa joŋi tə, à sʋ̀rɩ́ à pa Yɩɩ nə.»
Samiyɛlə caga Sayulə nii nə
13 Samiyɛlə ma swɩ̀n Sayulə con, ʋ wʋ́: «Kʋ yɩ ləyiri yoo nə n tʋn. N wà Ba-Yígúrə́-Jə-Tiu, ʋ nə yɩ n Yɩɩ, nii tə, ʋ nə pɩn mʋ́ zìlí. N yà nə zìlí Ba-Yígúrə́-Jə-Tiu nii, ʋ yà wá pa n də n dìə̀ tə də́ pàrɩ̀ Yɩzərayɛlə lɩ̀à yuu wa, máŋá mama wuuu. 14 Yá sɩ́ʋ́n nə, n pàrɩ̀ tə kʋ́ʋ̀ bá dán. Ba-Yígúrə́-Jə-Tiu kúrí bɛɛ, ʋ nə twá ʋ fɩra nə. Yá bɛɛ təntə nə, Ba-Yígúrə́-Jə-Tiu tún, sə ʋ ya ʋ lɩ̀à tə yáá tíú, n nə vɩga, sə n zìlí Ba-Yígúrə́-Jə-Tiu nii tə, ʋ nə pɩn mʋ́, yɩrɩ.»
Kwatara tə wulə ba tanɩ, sə ba ta kʋ̀ʋ̀
15 Kʋ kwa nə, Samiyɛlə zàn Giləgalə nə, ʋ vìí.b Yá Sayulə də ʋ kwatara tə dàń nan Giləgalə, ba va, sə ba jəri ʋ kwatara tə duən tə, Gibeya nə, Bɛnzwamɛn nagwanaa tə wa. Sayulə gàlɩ̀ kwatara tə, ba yà nə wulə də wá. Ba yà ga ndə lɩ̀à biəyardʋ nə.
16 Sayulə, də ʋ bìú Zonatan, də kwatara tə, ba yà nə wulə də ba, yà ken ba dəkuu Geba nə, Bɛnzwamɛn nagwanaa tə wa. Filisi tɩ̀án tə də ga kun duən nə, Mikəmasə nə.
17 Kwatara púlə́ batwa nyɩ́ ba nan Filisi tɩ̀án tə wa. Təntən púlí tə tì Ofəra cwəŋə, kʋ vələ Swuwalə lʋʋ nii con. 18 Bələ nii púlí tə tì Bɛtə-Horon cwəŋə. Batwa nii púlí tə də ga tì sɩswɩan cwəŋə tə, ka nə vələ Seboyimə vara tə con, kasɔɔ lanworu tə vàn con.
19 Kʋ máŋá tə wa, də yarʋ mama yà tə̀lə́ Yɩzərayɛlə lʋʋ nii tə mama wa. Cɩ́gá, Filisi tɩ̀án tə yà cɩ̀gà, sə Ebərə-ba dàn ká lù kwatara sɩ̀ʋ́, nə à yə̀ə́ cwiin. 20 Yá Yɩzərayɛlə lɩ̀à tə lìù mama dàń yà yɩ ʋ janɩ ʋ nɩan vàrʋ́ vabiu, nə à yə̀ə́ ʋ vataʋ, nə à yə̀ə́ ʋ dèrí, nə à yə̀ə́ ʋ sɩkwara, ʋ vəli Filisi tɩ̀án tə con, sə ba kwɛn tə nii, ba pa wá. 21 Nɩan vanan vabɩa, də vataran níə́ kʋlʋ yàá yɩ səbilurən bələ. Yá dèrə́, də sɩkwarɩ níə́ deru, nə à yə̀ə́ líú ka kwɩ̀án, yàá yɩ səbilugu nədʋ. 22 Kʋ mʋ̀ nə pɩn, kʋ̀ʋ̀ tə dɩɩn nə yí, Sayulə də Zonatan kwatara tə lìù mama yà ba kwatara sɩ̀ʋ́, nə à yə̀ə́ cwiin jə. Sayulə də ʋ bìú Zonatan cɩcɩ yà nə jə kwatarɩ zɩla təntə.
Zonatan ta Filisi tɩ̀án kwatara púlí don, ʋ də́
23 Filisi tɩ̀án kwatara púlí don yà nan, kʋ kə kʋ dəkuu Mikəmasə nacoru tə vàn tə don nə.